Bitsono ha zulu tibaka

Belshazare wayizi bâ mutinu wa Babilone. Mpimpa yimosi, yandi watumisa bantu 1000 bayôka nsangu mu nsi’andi ku salaka dimosi. Belshazare walomba kwe bisari biandi mu dûkisa mbungu za ore za bonga Nebukadenezare mu Tempelo ya Yehova. Belshazare na bantu ba katumisa banwa mu bungu zo, mpe bakembela nzambi zawu. Hô nkatika bendo, koko kwa muntu kwadûka, mpe kwabatika mu tsoneka bitsono bia nzitukulu ha zulu tibaka tia nzo yi beri dîlaka.

Belshazare wayizi bâ na bunkuta. Yandi watâ mbila nganga zandi, mpe wabakanisina: ‘Wô lenda mu bangula bitsono bi mbo nisa ti kabâ muntu wa ntatu wuyôkele ku Babilone.’ Bawu bayêla, kâ kani wumosi mu bawu walenda mu bangula bitsono bio. Mutinu wa m’kento bu wakota, watâ: ‘Muntu we kô, wu batâka nkumbu Daniele, weri bangulaka bima bia nzitukulu kwe Nebukadenezare. Yandi lendi ku bangurila bitsono bio.’

Daniele wakota mu nzo yabâ mutinu. Belshazare wamutêla: ‘Tala ti lendele mu tanga na mu bangula bitsono bi, mbo nikuhana musanga wa ore, mpe mbo nisa ti wabâ muntu wa ntatu wuyôkele ngolo ku Babilone.’ Daniele watâ: ‘Makabu maku ka ndiena na mo nsatu ko. Kâ mbo nikutêla bwe bitsono bio bita zolo tâ. Tata’aku Nebukadenezare lulendo lwabâ nandi, mpe Yehova wamubetola. Misamu miamiansoni miamutûrila mia zebi, kâ nge kuzitisi’â Yehova ko bu nwinini vinu mu mbungu za ore za Tempelo’andi. Buna Nzambi tsonekene misamu mi: Mene, Mene, Tekele na Parsine. Bitsono bio bizololo tâ ti Bamede na Baperse mbo bakotela Babilone, mpe kuvutu’â bâ mutinu ko.’

Babilone dieri ntiana hata di baketi lembo nunga. Bibaka bia bila bieri kengerelaka hata dio na nzari ya ndilu. Kâ mpimpa yina, Bamede na Baperse bakotela hata dio. Mutinu wa Perse, Sirise, wayôkesa nzari mu nzila yakaka, mpe binwani bialenda mu yôka tii ha mwelo wa Babilone. Bu batûla ha mwelo, bawu babwana wo wa zibuka! Binwani biakota ku Babilone, bianunga, mpe bahonda mutinu. Buna Sirise wayizi bâ mfumu ya Babilone.

Mvula yimosi ka yatiyôkela ko, Sirise watâ: ‘Yehova ku ntêlele mu vutu tunga Tempelo’andi ku Yerusaleme. Bô bê mu kanda diandi, mpe bazololo mu hana lubakusu mu tisalu tia ntungulu, balendi kwenda.’ Ntiana bwa kanisina wo Yehova, Bayuda babingi bakala ku Yerusaleme mvula 70 ha manima ma mfukulu ya hata dio. Sirise watambika mbungu za ore na za arza, na bima biakaka Nebukadenezare bi kasa bonga mu Tempelo. Ngano mweni bwe Yehova kasarila Sirise mu bakisa kanda diandi?