Yezu vumburi Lazare kwe ba fwa

Yezu ndiku za mutima zitatu zabâ zeri bâka ku Betani: Lazare na bibusi biandi bia biole, Marte na Maria. Tilumbu timosi, Yezu bu kabâ ku simu diakaka dia nzari ya Zurde, Maria na Marte bamutambikila nsangu za mpasi: ‘Lazare timbevo tia ngolo tie nandi. Yiza mu ntinu!’ Kâ Yezu ka yenda ko mbala mosi. Yandi wavutu kêla bilumbu biole biakaka, mpe watâ kwe milongoki miandi: ‘Twendeno ku Betani. Lazare tolo kabwiri; ndie mu vumbula.’ Ntumwa zamutêla: ‘Tala ti Lazare tolo kabwiri, mbo wumubakisa mu wasa.’ Buna Yezu watomo ba têla: ‘Lazare fwiri.’

Yezu bu katûla ku Betani, batizikila Lazare tûka bilumbu biyà. Bantu babingi bayizi tindisa Marte na Maria. Marte bu kawâ ti Yezu wayiza, waye mu bwana mu ntinu. Yandi watâ: “Mfumu, tala ni hâ wabêle, nkazi’ani ka yaketi fwa ko.” Yezu wamutêla: ‘Nkazi’aku mbo yivutu bâ ya moyo. Ngano wa ta kwikila Marte?’ Yandi watâ: ‘Nzebi ti mbo kavumbuka mu tilumbu tia mvumbukulu ya ba fwa.’ Yezu wamutêla: “Meno ni mvumbukulu ya ba fwa na luzingu.”

Buna Marte wayenda kwe Maria, mpe wamutêla: ‘Yezu ni kû kena.’ Maria wayenda kwe Yezu mu ntinu, mpe bantu bamulanda. Maria wabwa ha malu ma Yezu, mpe keri’â bîkaka ko mu dila. Maria watâ: ‘Mfumu, tala ti hâ wabêle, nkazi’eto mbo kaketi tatamana mu bâ wa moyo!’ Yezu bu kamona mpasi zeri monaka Maria, wabatika mpe mu dila. Bantu bu bamona Yezu weri dilaka, bawu batâ: ‘Diangana, Yezu watomo zolo Lazare.’ Kâ bantu bakaka batâ: ‘Mu bungu dia nti ka lembolo vûkisila ndiku’andi?’ Yezu nti kaketi sa ha manima?

Yezu wayenda ku mpiema yi batûla tari dia dinene ha mwelo. Yandi watâ: ‘Katuleno tari dio.’ Marte watâ: ‘Bilumbu biyà biayôkele! Nitu’andi nsunga yita nuka.’ Kâ, bawu bakatula tari, mpe Yezu wasambila: ‘Tata, matondo bu ku ngwirikiri. Nzebi ti meno wâka ntangu zazansoni, kâ ngolo nita zonza ngatu bantu ba bazaba ti ni Nge wakuntambika.’ Ha manima, Yezu wazonza mu zu dia ngolo: “Lazare, dûka!” Tima tia nzitukulu tiayilama: Lazare wadûka mu mpiema na nitu yi bazinga milele. Yezu watâ: “Mu sutuleno, mpe mu bîkeno kenda.”

Bantu babingi ha kati dia bô bamona misamu mio bayizi bâ na timinu mu Yezu. Kâ bakaka banata nsangu zo kwe Bafarize. Tûka buna, Bafarize badinga mu honda Yezu na Lazare. Mosi ya ntumwa 12 za Yezu, Yuda Iskariote, waye monekena Bafarize mu mansweki, mpe wabayula: ‘Mbongo zikwa lukumfuta tala ti nilubakisi mu bwila Yezu?’ Bawu bawisana mu mu futa mipata 30 mia arza, mpe Yuda wabatika mu dinga bweso bwa teka Yezu kwe Bafarize.