Biyuvu bia bitangi
Ngano nzonzolo ya “Nge mbo ba keba,” ye mu Mikunga 12:7, “bansana” yita tarila (verse 5), peleko “Misamu mi tâka Yehova” yita tarila (verse 6)?
Misamu mita zungirila verse yo misongele ti bantu bata zonzela.
Mu Mikunga 12:1-4, mbo tutangaka ti “bantu ba kwikama bazimbakane ha kati dia bantu.” Mpe ha manima mu Mikunga 12:5-7, NWT, verse zitêle:
“‘Mu bungu ti bansana bata niekona,
Mu bungu ti bamputu bata fwema,
Mbo nitelama mu sa tima,’ Yehova têle bo.
‘Meno mbo nibavukisa mu bô babaniekonaka.’
Misamu mi tâka Yehova mia verela miena;
Ntiana arza miena yi batsemese mu fure ya tiya ya mutoto mbala nsambwari (7).
Nge mbo ba keba, ô Yehova;
Mbo kengerela mankululu muna mosi mu bawu mu mbandu yi.”
Verse 5 misamu mi yirika Nzambi mu bungu dia bansana yita tarila. Yandi mbo kabavukisa.
Verse 6 yitêle “misamu mi tâka Yehova mia verela miena,” ‘ntiana arza yi batsemese.’ Musamu wo wusongele mabanza ma bâka neto mu Zu dia Yehova.—Mik. 18:30; 119:140.
Bwawu bu tataluzuleno verse yita landa, Mikunga 12:7: “Nge mbo ba keba, ô Yehova; mbo kengerela mankululu muna mosi mu bawu mu mbandu yi.” Ngano “bawu” nti yita tarila?
Mu bungu ti verse 7 ha manima ma versse 6 yita kwiza, yitêle “misamu mi tâka Yehova,” bantu bakaka balendi banza ti wuzololo tâ ti Nzambi misamu miandi ‘kakeba.’ Mpe tuzebi ti Nzambi wakengerela Bibila ntono ngolo zazansoni za sarila batantu bandi mu yimina dio na mu fukisa dio.—Iza. 40:8; 1 Pi. 1:25.
Kâ mio mi batêle mu verse 5 mpe mia matieleka miena. Yehova wabakisa, mpe mbo katatamana mu bakisa na mu vukisa “bansana” na bô “babaniekonaka.”—Yobe 36:15; Mik. 6:4; 31:1, 2; 54:7; 145:20.
Buna, ntelo ya “bawu” mu verse 7 nti yita tarila?
Bu tutomo taluzula mukunga wo, wutomono moneka ti ntelo ya “bawu” bantu yita tarila.
Ku mbatukulu ya Mikunga 12, Davide bisari bia kwikama bia Yehova kata zonzela bi bahuna kwe bankwa-mbi. Verse yita landa tutengi ti Yehova mbo kasa tima mu bungu dia bô batâka misamu mia mbi. Titsoniki tia Mikunga tuheni lukwikulu ti tulendi sikirila Nzambi ti mbo kasa tima mu bungu dia kanda diandi, mu bungu ti misamu mi katâka mia verela miena.
Buna verse 7 yitêle ti Yehova mbo ka[ba]keba mpe mbo ka[ba]kengerela, wu zololo tâ bansana babaniekonaka kwe bankwa-mbi.
Ntelo yo ya “bawu” basarila yo mu mikanda mia Matsonoko ma Hebre mia matieleka mi bakopa. La Septante ya Greke yasarila ntelo ya “beto” mbala zole mu verse 7, yi zonzelaka bisari bia kwikama bi baniekonaka na bi bamwisaka mpasi. Ku nsuka, verse 7 yitêle ti “muna mosi mu” bisari bia kwikama mbo kakengerela bio “mu mbandu yi,” mu bantu basingasaka mbi. (Mik. 12:7, 8) Mu mbangululu yimosi ya Matsonoko ma Hebre mu zu dia Arameye, lweka lwa ntete lwa verse 7 ntelo ya “bawu” yisarilaka, mpe tutengi: “Nge, ô Mfumu, mbo kengerela bantu ba sungama, mbo ba keba mankululu mu mbandu yi ya mbi.” Musamu wo wusongele ti Mikunga 12:7 ka yita zonzela misamu mi tâka Nzambi ko.
Dieka bo, verse yi tivuvu yita hana kwe “bantu ba kwikama”—Nzambi mbo kasa tima.