Yezu Kristo ni nani e?

1. Luzingu lwa Yezu bwe lwa batikila e?

Mu luswaswanu na bantu babansoni bakaka, Yezu ku zulu keri toko baka na nitu ya tsimpeve tekela kizi kabutuka ha m’toto. (Za 8:23) Yandi ni tsivangu tsia ntete tsia sala Nzàmbi, mpe wabakisa Nzàmbi mu vanga bima biabiansoni biakaka. Ni yandi kaka kwa Yehova kasala kondo muntu kamubakisa. Ntsiangu ba mutaka nkumbu “Mwana wa wumoshi wabutuka.” (Za 1:14) Yezu waba mpe Nzonzi ya Nzàmbi ntsiangu ba mutaka nkumbu “Zu.”​—Tanga Bingana 8:22, 23, 30; Bisi-Kolose 1:15, 16.

2. Mubwenabwe Yezu kayizila ha zulu m’toto?

Mu tambika mwana’andi ha m’toto Nzàmbi wakatula luzingu lwandi ku zulu mpe wakotisa lo mu moyo wa Mariya, mwa ndumba yimoshi ya Muyuda yalombo tsizabila babakala. Eka bo tata dia Yezu kawaba muntu ko. (Like 1:30-35) Yezu kayiza ha m’toto (1) mu tulongisa matsieleka matatarila Nzàmbi, (2) mu tusongela tsifwani tsia landa mu sarila luzolo lwa Nzàmbi ni tuba mu mpashi, (3) mu hana luzingu lwandi lwa lunga ntsiana nkululu.​—Tanga Matie 20:28.

3. Mubwenabwe twe na nsatu nkululu e?

Nkululu yena ntalu yi futulu mu kula muntu we kuntsia nsembolo ya lufwa. (Ndukulu 21:29, 30) Ku mbatukulu Nzàmbi katuwayila ko ti tanuna mpe tafwa. Bwe tuzabiri wo? Nzàmbi wata kwe bakala dia ntete, Adame, ti wamana sa tsio Bibila tsikatele nkumbu disumu, mbo fwa. Ni mu ta ti tala ti Adame ka sa disumu ko ngâ kaketia fwa ko. (Mbatukulu 2:16, 17; 5:5) Bibila ebu ditele ti mu ndila Adame lufwa lwa kotela mu nza ya bantu. Adame wasamburila bala bandi disumu na nsembolo ya disumu, lufwa. Nkululu ye neto nsatu ngati yatukula mu nsembolo ya lufwa yi tabiarila kwe Adame.​—Tanga Bisi-Rome 5:12; 6:23.

Mbo ni nani waketi futa nkululu mu tukula mu lufwa? Mbo tufwaka, masumu ma betobeni kwa tufutaka. Ka kwena muntu ko wa masumu lenda futa masumu ma bantu bakaka.​—Tanga Mikunga 49:7-9.

4. Mubwenabwe Yezu kafuila e?

Mu luswaswanu na beto, Yezu walunga weri. Kafwanakana’ako kafwa mu bungu dia masumu mandi. Ka sa kani disumu dimoshi ko. ba na masumuko. Ka fwa mu bungu dia masumu mandiko​—mu bungu ti ka sa na ka disumu dimoshi ko. Buna mu bungu dia masumu ma bantu bakaka Yezu kafwila. Nzàmbi luzolo lwa ngolo kasongila kwe bantu mbo katambika mwana’andi kafwa mu bungu dia beto. Yezu mpe watusongisa luzolo mbo katumamana tata’andi mu tambula mu hana luzingu lwandi mu bungu dia masumu meto.​—Tanga Za 3:16; Bisi-Rome 5:18, 19.

Tala video Mu bungu dia nti Yezu kafwila?

5. Yezu bû ntsi katasa e?

Mbo kaba ha zulu m’toto, mbevo kawashisa, bantu ba fwa kavumbula, beri mu mpashi kasarisa. Wa songela mio mikayirika mu bilumbu bikwiza kwe bantu bo batumamanaka Nzàmbi. (Matie 15:30, 31; Za 5:28) Yezu mbo kafwiri, Nzàmbi mukarishi tsimoyo na nitu ya tsimpeve. (1 Piere 3:18) Yezu ni bukeri kelaka ha koko kwa lubakala kwa Nzàmbi tii Yehova mbo kamuhana lutumu mu yala m’toto wawansoni. (Bahebre 10:12, 13) Bwawubu,Yezu yala kata yala ntsiana mfumu ku mazulu. Mpe milongoki miandi nsangu zango za mbote batasamuna ha m’toto ntsi wa m’kaka.​—Tanga Daniel 7:13, 14; Matie 24:14.

Ntamana,Yezu mbo kasarila ngolo zandi mu manisa mpashi na mu katula bô batumaka zo. Babanso bo bakwikilaka mu Yezu, bungu ti yandi batatumamana, mbo babaka luzingu lwa kiese ku paradi ha zulu m’toto.​—Tanga Mikunga 37:9-11.