Ntsia mpila lenda pusana kwe Nzàmbi e?

1. Ngâna Nzàmbi tusambulu twatwansoni twakawaka e?

Nzàmbi bantu ba mpila zazansoni katalomba bapusana kwe yandi mu ndila ya lusambulu. (Mikunga 65:2) Kâ kawaka, peleko katambulaka, tusambulu twatwansoni ko. Mu tsifwani, bakala diniekonaka m’kento’andi lusambulu lwandi ndila lukambikuluku. (1 Piere 3:7) Mpe mu ntangu Baisraeli mbo beri tatamanaka mu yirika mbi, Nzàmbi wakala mu wa lusambulu lwawu. Lusambulu lwena nkatika kabu ditufweni lombo bongela mu nsaka. Kâ ni wubela bo, Nzàmbi tusambulu twa bantu basà masumu ma ngolo twa kawaka tala ti basobela ndiatulu.​—Tanga Izaya 1:15; 55:7.

Tala video Ngano Nzambi tusambulu twatwansoni twa kawaka?

2. Bwe tufweni sambirila e?

Lusambulu diena diambu dimoshi dia nsabululu’eto. Ntsiangu kwe M’vangi’eto Yehova kwa tufweni sambila. (Matie 4:10; 6:9) Mpe mbotwena bantu ba masumu, tufweni sambila mu nkumbu ya Yezu bungu ti wafwa mu bungu dia masumu meto. (Za 14:6) Yehova kazololo’ako twakarilaka lusambulu lumoshi lu takanga mu mutu peleko lubatsonika mu mukanda. Zololo lusambulu lweto lwatukaka ku mutima.​—Tanga Matie 6:7; Bisi-Filipe 4:6, 7

M’vangi’eto lusambulu kani kwa lwa kuntsia mutsima lwa kawaka. (1 Samwele 1:12, 13) Wutulombele twamusambila ntangu zazansoni, ntsiana mu ntangu yituvumbukaka, yitusekaka, mu ntangu yadia, mpe bô mbotubaka na nkwamusu.​—Tanga Mikunga 55:22; Matie 15:36.

3. Mubwenabwe bakristo bavukanaka e?

Mu pusana kwe Nzàmbi kawena m’samu wafieti ko mu bungu hakati dia bantu bakondolo tsimini mu Nzàmbi mpe baseheselaka ntsilulu’andi ya nza yadzuna twena. (2 Timote 3:1, 4; 2 Piere 3:3, 13) Buna mvukani ya bampwaneto mikwikiri salu yê neto mu tutsindisa, mpe bawu mpe salu bê neto.​—Tanga Bahebre 10:24, 25.

Twamana vukanaka na bantu bazololo Nzàmbi, mbo tsitubakisa mu pusana kwe yandi. Tukutakanu twa Mbangi za Yehova twena ntangu yambote mu tsindasana mu tsiminu tsia bakaka.​—Tanga Bisi-Rome 1:11, 12.

4. Ntsia mpila lenda pusana kwe Nzàmbi e?

Lenda pusana kwe Nzàmbi wanana yindulaka mio mitalongoka mu Zu diandi. Yindula kantsia m’samu bisalu biandi, malongi mandi, na ntsilulu zandi zitulongisaka. Twamana dimbitilaka m’samu miandi mu lusambulu, mbo tubakula mfunu ya luzolo na ndwenga za Nzàmbi.​—Tanga Yoswa 1:8; Mikunga 1:1-3.

Mu pusana kwe Nzàmbi tabi wamushila mutima, waba na tsiminu mu yandi. Tsiminu tsiena ntsiana tsima tsitombaka dikila mu lama tsio. Buna tufweni vutu yindulaka bandu dia nkwikulu zeto mu dikila tsiminu tsieto ntangu zazansoni.​—Tanga Matie 4:4; Bahebre 11:1, 6.

5. Ntsia mambote baka wamana pusana kwe Nzàmbi e?

Yehova bantu bô bamuzololo bâ kabandilaka. Bawu kataninaka mu tsima ni tsima tsilenda bebesa tsiminu na tsivuvu tsiawu tsia luzingu lwa mankululu. (Mikunga 91:1, 2, 7-10) Kebesa katukebesaka mu ndiatulu zo zilenda bebesa luzingu lweto na nsayi’eto. Yehova longesa katulongesaka kabwe tulenda bela na luzingu lwa lubote.​—Tanga Mikunga 73:27, 28; Zaki 4:4, 8.