Ngano bwe lendi bela ndiku Ya Nzambi?

1, 2. Tangumuna nkumbu za ndiku za Yehova.

NGANO nani zoloko kabâ ndiku’aku? Muntu wu tomo zoloko mpe wutomo ku wilaka. Muntu we na timuntu tia mbote na bifu bi zoloko.

² Yehova bantu kasolaka mu bâ ndiku zandi. Mu tifwani, Abrahame weri ndiku ya Yehova. (Izaya 41:8; Zaki 2:23) Yehova wazolo mpe Davide. Yehova watâ ti Davide weri ‘Muntu we buna bu zololo mutima’andi.’ (Bisalu 13:22) Mbikuri Daniele weri mpe muntu wa “ntalu” ha meso ma Yehova.​—Daniele 9:23.

3. Mu bungu dia nti Abrahame, Davide na Daniele beri ndiku za Yehova?

³ Ngano bwe Abrahame, Davide na Daniele bayizi bela ndiku za Yehova? Yehova watâ kwe Abrahame: “Zu diani dia wirikiri.” (Mbatukulu 22:18) Yehova ndiku yena ya bantu ba kuluka na batumamaka kwe Yandi. Yehova lendi bâ mpe Ndiku ya kanda dia mukaka. Yehova wabangurila bala ba Israele ti: “Tumameno kwe meno, buna mbo nibâ Nzambi’eno, mpe mbo lubâ kanda diani.” (Yeremi 7:23) Tala ti zololo watomo bâ ndiku ya Yehova, fweti tumama kwe Yandi.

YEHOVA NDIKU ZANDI KAKENGERELAKA

4, 5. Ngano Yehova bwe kabakisilaka ndiku zandi?

⁴ Bibila ditele ti Yehova mpila ya bakisila bantu bamuzoloko mu mutima wawansoni kadingaka. (2 Ntangu 16:9) Mu Mikunga 32:8, Yehova kanisini kwe ndiku zandi ti: “Mbo nikuhana mayela mpe mbo nikulongesa nzila yi fweti landa. Nzololo nakulonga, disu kwe nge.”

⁵ Mbeni ya ngolo ye neto, yilembo zoloko tabâ ndiku za Nzambi. Yehova zololo katukengerela. (Tanga Mikunga 55:22.) Mu bungu ti ndiku za Yehova twena, mu mutima wawansoni tumusarilaka. Ni bu sa ti mu ntangu ya mpasi twena, ba kwikama tubâka kwe Yehova. Lukwikulu mpe lwe neto ti Yehova mbo katubakisa, ntiana Davide watsoneka ti: “Mu bungu ti ku lubakala lwani kena, ka niteketa ko.” (Mikunga 16:8; 63:8) Ngano Satana nti kasaka ngatu talembo vutu bâ ndiku za Yehova?

MUSAMU WA KWIKISILA SATANA KWE BANTU

6. Ngano Satana ntia musamu kakwikisilaka bantu?

⁶ Mu timoko tia 11, tayizi longoka ti Satana wakwikisila Yehova ti ngungu yena. Mpe, mu bungu ti Yehova ka bika Adame na Eva ko babonga nzengolo ya musamu wutariri mbote na mbi bawu beni, Satana wamukwikisila ti Yandi kena na buderede ko. Mukanda wa Yobe longesa wutulongesaka ti, Satana bantu bazololo mu bâ ndiku za Yehova kakwikisilaka misamu. Satana watâ ti, Yehova basarilaka mu baka ndandu za bawu beni; kâ, ka mu luzolo â ko. Satana tele mpe ti lendi tuma muntu ni muntu kakolama kwe Nzambi. Tataleno bwe Yehova kakengerela Yobe mpe ntia malongi tubakila mu misamu miamuturila.

7, 8. (a) Ngano Yobe ntia mpila muntu weri? (b) Ngano Satana bwe katâ mu bungu dia Yobe?

⁷ Ngano Yobe nani weri? Yobe muntu wa mbote weri. Mvula 3 600 zeka yôka tuka bwa zinga Yobe. Yehova watâ ti mu ntangu yina, ha mutoto ka ha ba muntu ntiana Yobe ko. Yobe buzitu bwabwingi bwaba nandi kwe Yehova, mpe mbi yina keri ya yinaka. (Yobe 1:8) Yobe nguria ndiku ya Nzambi yabâ.

⁸ Kâ Satana watâ ti, Yobe mu mbanzulu za bwimi keri sarilaka Yehova mpe ngatu kabaka ndandu ya yandi beni. Satana watâ kwe Yehova ti: “Ngano nge beni ka watelamasa tikaku tikengerelaka ko ha tizunga tiandi, ha tizunga tia nzo’andi, mpe ha tizunga tia bima biandi biabiansoni? Tisalu tia moko mandi tia wasakumuni, mpe twila diandi diatomo yalangana mu nsi yayansoni. Mu soba, lambula koko kwaku, simba bima biabiansoni bi kavwiri, mpe mbo kakuloka.”​—Yobe 1:10, 11.

9. Ngano Yehova ntia musamu kabikila Satana kayirika?

⁹ Satana wakwikisila Yobe ti, tala ti Yehova keri sarila mu bungu ti Yehova sakumuna keri mu sakumunaka. Satana watâ mpe ti mbo kaketi lenda mu kabakasa Yobe ngatu kalembo sarila Nzambi. Yehova ka tambula ntelo ya Satana ko. Kâ, Yehova wabika Satana kakotesa Yobe mu ntontolo. Ntontolo zango mbo zaketi songela tala ti Yobe watomo zolo Yehova.

SATANA MWISINI YOBE MPASI

10. (a) Ngano Satana bwe kamwisina Yobe mpasi? (b) Ngano Yobe nti kayizi sa?

¹⁰ Ntete, Satana wahondesa bibulu bia Yobe, biakaka walabisa bio. Satana wahondesa mpe bisari biandi biabîngi. Yobe wahombesa bima biabiansoni. Ha manima, Satana wahondesa mpe bala 10 ba Yobe mu titembo tia ngolo. Ntono misamu mio miamiansoni, Yobe wakwikama kwe Yehova. Kani kabwe, ka kwikisila Yehova misamu mia mbi ko.​—Yobe 1:12-19, 22.

11. (a) Ngano Satana bwe kavutu mwisina Yobe mpasi? (b) Ngano Yobe nti kayizi sa?

¹¹ Satana ka sukina ho ko. Satana watsotsa Yehova bu katâ mu bungu dia Yobe ti: “Lambula koko kwaku mpe simba bihisi biandi na musunia’andi, mpe mbo kakuloka.” (Yobe 2:5, 7) Buna, Satana watâ Yobe timbevo. Kâ, ntono timbevo tiandi tia mpasi, Yobe wakwikama kwe Yehova. Yobe watâ ti, mbo kaketi bâ wa kwikama tii ku lufwa.​—Yobe 27:5.

12. Ngano Yobe bwe kasongela ti Satana ngungu yena?

¹² Yobe ka zaba ko ti Satana weri mu kwikisilaka misamu, mpe ka zaba ko mu bungu dia nti keri mwinaka mpasi. Yobe keri banzaka ti Yehova watulumuna mpasi zandi. (Yobe 6:4; 16:11-14) Kâ, Yobe watatamana mu kwikama kwe Yehova. Tuka buna, ntembe zawa: Yobe ka ba na mbanzulu za bwimi ko. Yobe weri ndiku ya Nzambi mu bungu ti Nzambi keri zoloko. Misamu mia kwikisila Satana kwe Yobe mia bungungu mieri!

13. Ngano kwikama kwa Yobe ntia ndandu kwanata?

¹³ Ni bu sa ti Yobe ka zaba misamu mieri yôkaka ku mazulu ko, wayizi bâ wa kwikama kwe Nzambi, mpe wayizi songela ti Satana wa mbi wena. Yehova wasenda ndiku’andi mu bungu dia kwikama kwandi.​—Yobe 42:12-17.

SATANA MISAMU KAKUKWIKISILAKA, NGE MPE

14, 15. Ngano Satana ntia misamu kakwikisilaka bantu babansoni?

¹⁴ Misamu mia mfunu tulongokaka mu mio miaturila Yobe. Mu ntangu yi, Satana beto kakwikisilaka ti, tala ti Yehova tusarilaka mu bungu dia bima bi katuhanaka. Mu ntangu ya Yobe, Satana watâ ti: “Biabiansoni bie na muntu mbo kahana bio mu bungu dia luzingu lwandi.” (Yobe 2:4) Satana ka yizi â kwikisila kwa Yobe ko: Satana wakwikisila ti bantu babansoni mbanzulu za bwimi ze nawu. Mvula zazingi ha manima ma lufwa lwa Yobe, Satana watatamana mu finga Yehova mpe watatamana mu kwikisilaka bisari bia Yehova misamu. Bingana 27:11 yisongele ti, Nzambi watâ ti: “Mwana’ani sarila ndwenga mpe yangirika mutima’ani, ngatu nahana mvutu kwe wô kuntsotsaka [kumfingaka].”

¹⁵ Lendi bonga nzengolo ya tumama kwe Yehova, ya bâ ndiku’andi, mpe ya bâ wa kwikama ntangu zazansoni. Mbo songela ti Satana ngungu yena. Ni bu sa ti fweti sa nsobolo za zinene mu bâ ndiku ya Nzambi, yo ni nzengolo yiyôkele bubote yi lendi bonga! Nzengolo ya mfunu yena. Satana katâka ti, tala ti, bwabane na mpasi, nge, kubâ wa kwikama ko kwe Nzambi. Ngano Satana bwe kayêlelaka mpe mu tuhuna ngatu talembo kwikama kwe Nzambi?

16. (a) Ngano Satana ntia mpila kasarilaka mu tu kabakasa mu sarila Yehova? (b) Ngano Diabulu bwe kalendi yêlela mu tu kabakasa mu sarila Yehova?

¹⁶ Satana mpila zazingi kasarilaka mu bebesa tindiku tieto na Nzambi. Satana ‘ntiana ngo-mbulu’ katunwanisaka, ngatu katudia. (1 Piere 5:8) Kuyitukwandi: ndiku, bantu ba kanda diaku peleko bantu bakaka mbo bayêla mu ku kabakasa mu longoka Bibila mpe mu sarila mbote. Mbo banza kampe ti, ‘nwanisa bata ku nwanisa.’a (Za 15:19, 20) Satana mpe ‘mbazi ya mutsamina’ katitukaka: yêla kayêlaka mu tu huna ngatu takolama kwe Yehova. (2 Bisi-Korente 11:14) Mu tu kabakasa mu sarila Yehova, Satana zololo takwikila ti ka twena ba lunga ko mu sarila Yehova.​—Bingana 24:10.

TUMAMA KWE YEHOVA

17. Ngano nti bitutumaka mu tumama kwe Yehova?

¹⁷ Bu tukwe tumame kwe Yehova, mbo tusongela ti Satana ngungu yena. Ngano nti bitubakisa mu tumama kwe Yehova? Bibila ditele ti: “Fweti zolo Yehova Nzambi’aku mu mutima’aku wawansoni, mu tilundi tiaku tiatiansoni mpe mu ngolo zaku zazansoni.” (Lubambu 6:5) Kwe Yehova tutumamaka mu bungu ti Yandi tuzololo. Bu tukwe zolo Nzambi, mbo tuba na nsatu ya sarilaka misamu mi katulombaka. Ntumwa Za watsoneka ti: “Luzolo lwa Nzambi luzololo tâ ti: tatumama mu ntumunu zandi; ntumunu zandi ka zena dema ko.”​—1 Za 5:3, NWT.

18, 19. (a) Ngano ntia misamu mie mia mbi kwe Yehova? (b) Ngano bwe tuzabiri ti Yehova ka tu lombaka ko tasa tima ti tulembo lenda mu sa?

¹⁸ Yehova tele ti misamu miakaka mie kô mia mbi. Kaku (encadré) “Yina bima bi yinaka Nzambi” ndambu misamu mia mbi tita tangumuna. Ntete, mbo banza ti misamu miakaka ka miena mia mbi ko. Kâ, tanga verse za Bibila zi baheni mpe bonga ntangu ya dimbitila. Buna mbo bakula ti bubote bwena mu tumama mu mitieno mia Yehova. Mbo kwizi bakula ti fweti sa nsobolo mu luzingu lwaku. Tala ti siri nsobolo zango, mbo bâ mu tidzunu na mu nsayi yi monaka ndiku za Nzambi. (Izaya 48:17, 18) Ni bu sa ti musamu wa mpasi wena, lendi lenda. Ngano bwe tulendi wa kwikila?

¹⁹ Yehova ka lendi â katulomba ko tasa tima ti tulembo lenda mu sa. (Lubambu 30:11-14) Yehova nguria Ndiku yena mpe Yandi tomono tu zaba yôka beto beni. Yehova bifu bieto bia mbote na bia mbi bia kazebi. (Mikunga 103:14) Ntumwa Paulo tu heni lutindusu: “Nzambi wa kwikama wena, ka bika ko lwatonto mu misamu mi lulembo lenda mu vivirila, mpe ntontolo bu zikwiza mbo kakubika mpe ndukulu ngatu lwalenda mu korela.” (1 Bisi-Korente 10:13, NWT) Tufweti kwikila ti Yehova mbo katuhana ngolo ngatu tasarilaka mbote. Yehova mbo kakuhana “ngolo ziyôkele,” peleko ngolo za nzitukulu, ngatu kakubakisa mu vivirila misamu mia mpasi. (2 Bisi-Korente 4:7, NWT) Ntumwa Paulo wamona lubakusu lwa Yehova mu ntangu ya ntontolo. Ntiangu katâ ti: ‘Mu misamu miamiansoni, lenda die nani mu lubakusu lwa Yandi kunganaka ngolo.’​—Bisi-Filipe 4:13.

LONGOKA MU ZOLO MISAMU MI ZOLOKO NZAMBI

20. Ngano ntia bifu tufweti sarilaka? Mpe mu bungu dia nti?

²⁰ Mu bâ ndiku ya Yehova, fweti bika mu yirika misamu mia mbi. Kâ, ka wufweni â ko. (Bisi-Rome 12:9) Ndiku za Nzambi zizololo misamu mi kazoloko. Mu Mikunga 15:1-5. (Tanga.) ba bazonzelaka. Tifwani tia Yehova balandaka bu basarilaka ‘luzolo, nsayi, tidzunu, luvivululu, bulemvo, mbote, timinu, bulembami na tifu tia tiyimina.’​—Bisi-Ngalate 5:22, 23.

21. Ngano nti bilendi ku bakisa mu kurisa bifu bi zololo Nzambi?

²¹ Ngano nti bilendi ku bakisa mu kurisa bifu bio? Fweti longoka misamu mi zoloko Yehova bu kwe tangi Bibila bilumbu biabiansoni. (Izaya 30:20, 21) Tala ti siri bo, mbo tomo zolo Yehova. Bu tomo kwizi mu zolo, mbo ba na nsatu yayingi ya tumama kwe Yehova.

22. Tala ti tumamane kwe Yehova nti kwizi baka?

²² Nsobolo zi tusaka mu luzingu lweto ze ntiana muntu wukaturi binkuti bia ntama mpe wulweti binkuti bia môna. Bibila ditele ti tufweti katula “timuntu tia ntama” mu lwata “timuntu tia môna.” (Bisi-Kolose 3:9, 10) Ni bu sa ti musamu wa mpasi wena, tala ti tusiri nsobolo mu luzingu lweto mpe tala ti tutumamane kwe Yehova, mbo katuhana “musendo wa wunene.” (Mikunga 19:11) Musamu ni wo katukanisini. Buna, bonga nzengolo ya tumama kwe Yehova mpe songela ti Satana ngungu yena! Sarila Yehova, ka kwena ko ti ngatu wabaka musendo, kâ, mu bungu ti Yandi zololo. Buna, mbo tomo bâ ndiku ya Nzambi!