Nzambi wayirika zulu na mutoto

Yehova ni yandi watuyirika. Yandi wasala bima biabiansoni; bima bi tulendi mona na bima bi tulendi lembo mona. Ntete kasala bima bi tulendi mona, Yandi wasala mbazi za nkatika zazingi. Ngano zebi mbazi bwe zena? Mbazi ntiana Nzambi zena, ni Yandi wabasala. Ka tulendi’â tabamona ko, ntiana kwa bu tulendi lembo mona Nzambi. Mbazi ya ntete Yehova yi kasala yayizi mu bakisa mu sala bima biakaka. Mbazi yango yabakisa Yehova bu kasala mbwetete, planete na bima biabiansoni biakaka. Mosi ya planete zango ni mutoto, mbuka ya toma yi tubâka.

Ha manima, Yehova wakubika mutoto ngatu bibulu na bantu babêla wo. Yandi wasala ntangu mu hanaka mutsamina ha mutoto. Yandi wasala mpe miongo, nzari na nto.

Ngano nti kayirika ha manima? Yehova watâ: ‘Matiti niyirika, bikola na miti.’ Mbutu za mpila na mpila zazingi, miti na bifulu biabatika mu mena. Ha manima, Yehova wasala bibulu biabiansoni—bibulu bikwe pulumuki, bikwe yende mu mamba na bikwe yendele tia moyo. Yandi wasala bibulu bia fioti ntiana matutu, na bibulu bia binene ntiana ngombe. Ngano ntia tibulu zoloko?

Ha manima, Yehova watâ kwe mbazi ya ntete: “Tasala muntu.” Bantu ka baketi’â bâ ntiana bibulu ko. Bawu mbo baketi yirika bima. Bawu mbo baketi zonza, seha na sambila. Bawu mbo baketi kipa mutoto na bibulu. Ngano zebi muntu wa ntete nani wabâ? Mu zaba, tatanga tinsamu tita landa.