Yehova wasola Yoswa

Mose bu kamana twarisa kanda dia Israele mvula zazingi, watûla ku nsuka ya luzingu lwandi. Yehova wamutêla: ‘Ka nge’â ko nata kanda dia Israele ku Mutoto wa Kani. Kâ mbo nikubîka wamona nsi yango.’ Buna, Mose walomba kwe Yehova mu sola mfumu ya môna yaketi twarisa kanda dia Israele. Yehova wamutêla: ‘Tâ kwe Yoswa ti ni yandi bâ mfumu ya môna.’

Mose watâ kwe bala ba Israele ti lufwa lwandi penepene lwabâ, mpe Yehova wasola Yoswa mu ba nata ku Mutoto wa Kani. Ha manima, Mose watâ kwe Yoswa: ‘Kubândi na bunkuta. Yehova mbo kakubakisa.’ Ntangu fioti ha manima, Mose wanaka ku zulu mongo wa Nebo; kûna Yehova wamusongela nsi yi kakanisina mu hana kwe Abrahame, kwe Izake na kwe Yakobe. Ha manima, Mose wafwa; mvula 120 zabâ nandi.

Yehova watâ kwe Yoswa: ‘Sabuka nzari ya Zurde, mpe yenda ku nsi ya Kana. Mbo nikubakisa ntiana bu nabakisa Mose. Fweti tangaka Musiku’ani bilumbu biabiansoni. Kubândi na bunkuta, mpe bâ na butindi. Buna, yirika misamu mi nikulomba.’

Yoswa watambika bantu bole baye tala hata dia Yeriko mu mayela. Mu tinsamu tita landa mbo tumona misamu miayôka kûna. Bu bakâla, bantu baye tala hata batâ ti ntangu ya mbote yabâ mu kwenda ku nsi ya Kana. Tilumbu tialanda Yoswa walomba kwe bantu mu kubama na mu kwenda. Ha manima, Yoswa watâ kwe nganga-nzambi zeri nataka nkela ya luwawanu mu yôka ku matu ma bantu na mu kwenda ku nzari ya Zurde. Nzari ya sampa yabâ. Kâ, buna kwa nganga-nzambi bu zatûla malu mu mamba, nzari yakangama mpe mamba masika! Nganga-nzambi zayenda tii ha kati dia nzari, mpe batelama tii bantu babansoni bu basabuka. Diangana, timangu tio tiababambula timangu tia sa Yehova ku Mubu wa Mbwaki.

Ha manima ma mvula zo zazansoni, bala ba Israele batûla ku Mutoto wa Kani. Lenda diabâ nawu dia tunga nzo, diabâ na mahata, diabâ na misitu, miti mia vinu na miti mibutaka mbutu. Mutoto wa Kani nsi yabâ yeri dûkaka lait na mafuta ma niosi.