Mfumu ya môna na bakento bole babâ na butindi

Bu kamana twarisa kanda dia Israele mvula zazingi, Yoswa wafwa mu mvula 110. Yoswa bu kabâ wa moyo, bala ba Israele Yehova kwa beri sarilaka. Kâ ha manima ma lufwa lwa Yoswa, bawu babatika mu sambila biteki ntiana Bisi-Kana. Mu bungu ti bala ba Israele ka beri’â tumamaka kwe Yehova ko, Yandi wahana nzila kwe mutinu wumosi wa ku Kana wu beri tâka nkumbu Yabine mu ba mwisa mpasi. Kanda dia Israele dialomba lubakusu kwe Yehova. Buna Yehova wabahana mfumu ya môna, Barake. Yandi mbo kaketi bakisa kanda dia Israele mu kâla kwe Yehova.

Mbikuri Debora walomba batâ mbila Barake. Nsangu za bâ nandi zatûka kwe Yehova: ‘Bonga bantu 10000, mpe yenda nwanisa binwani bia Yabine ku nto ya Kishone. Kûna, mbo nunga Sisera, mfumu ya binwani bia Yabine.’ Barake watâ kwe Debora: ‘Mbo nikwenda tala ti wiziri na meno.’ Debora watâ: ‘Mbo nikwenda na nge. Kâ, zaba ti ka nge’â ko honda Sisera. Yehova têle ti mukento wumuhonda.’

Debora wayenda na Barake, na binwani biandi, tii ha zulu mongo wa Tabore, mu kubama mu bungu dia mpaka. Buna kwa Sisera bu kawâ wo, wakutakasa bipusu biandi bia muzingu na binwani biandi ku mudimba. Debora watâ kwe Barake: ‘Lumbu ti ni tilumbu Yehova ti kalunungisa.’ Barake na bantu 10000 bakoka mu ntinu ku mongo wa Tabore mu nwanisa binwani bia ngolo bia Sisera.

Buna Yehova watulumuna niamba ya nto ya Kishone. Bipusu bia muzingu bia Sisera biadiama mu ntebe. Sisera wakoka mu tipusu tiandi mpe wabatika mu dioka. Barake na binwani biandi banunga binwani bia Sisera, kâ Sisera wadioka! Yandi waye swama mu tivula tia mukento wumosi wu beri tâka nkumbu Yaele. Yandi wamuhana lait ngatu kanwa, mpe wamuyabika vunga. Mu bungu ti wa fwatika wabâ, Sisera wabwa tolo. Buna, Yaele wapusana mu malembe, mpe wamutsoka muti mu mutu. Dieka bo, Sisera wafwa.

Barake wayizi dinga Sisera. Yaele wadûka mu tivula tiandi mpe wamutêla: ‘Yiza mu kati. Mbo nikusongela muntu wuta dinga.’ Barake wakota mu tivula mpe wamona Sisera, wa fwa. Barake na Debora bakembela Yehova mu mukunga, mu mu vuturila matondo, bu kanungisa kanda dia Israele mu mbeni zawu. Mu mvula 40 zalanda, Israele yazinga mu tidzunu.