Rite na Naomi

Nsatu bu yakota ku Israele, mwana Israele wumosi wu beri tâka nkumbu Naomi, na bakala diandi, baye bâ ku nsi ya Moabe na bala bawu ba bole ba babakala. Ha manima, bakala dia Naomi diafwa. Bala bawu bakwela Rite na Orpa, bakento ba nsi ya Moabe. Kâ, bala ba Naomi bayizi fwa mpe.

Naomi bu kawâ ti nsatu yawa ku Israele, wabonga nzengolo ya kâla ku nzo’andi. Rite na Orpa bayenda na Naomi. Kâ mu nzila, Naomi wabatêla: ‘Beno bakento ba mbote lwabâ mu bungu dia bala bani, mpe bako ba mbote lwena mu bungu dia meno. Nzololo lwavutu kwela beno bole. Kâleno ku Moabe.’ Bakento bo bamutêla: ‘Nge tuzololo! Ka tuzololo’â ko takubîka.’ Naomi keri’â bikaka ko mu ba têla benda. Ha manima, Orpa wakâla ku Moabe, kâ Rite wasâla. Naomi watâ kwe Rite: ‘Orpa kêri kwe kanda diandi na kwe nzambi zandi. Kâla na yandi, mpe yenda ku nzo ya nguri’aku.’ Kâ, Rite watâ: ‘Ka nikubîka ko. Kanda diaku mbo dibâ kanda diani, mpe Nzambi’aku mbo yibâ Nzambi’ani.’ Mu mabanza ma nge, bwe Naomi kamona ku mutima, Rite bu katâ bo?

Rite na Naomi batûla ku mbatukulu ya ntangu yi batiaka mbutu za orge. Tilumbu timosi, Rite waye tota mbutu zasâla ku musitu wa bakala dimosi di beri tâka nkumbu Boaze, wabâ mwana wa Rahabe. Boaze wawâ ti Rite Musi-Moabe wabâ, mpe watatamana mu bâ wa kwikama kwe Naomi. Boaze watâ kwe bisari biandi mu bîkaka ndambu mbutu mu musitu ngatu Rite katotaka.

Mpimpa yîna, Naomi walomba kwe Rite: ‘Ku musitu wa nani sariri lumbu ti?’ Rite watâ: ‘Ku musitu wa bakala di batâka nkumbu Boaze.’ Naomi wamutêla: ‘Boaze muntu wena wa kanda dia bakala diani. Tatamana mu sala ku musitu’andi na bakento bakaka ba ntwenia. Kûna mbo lubâ mu nkengololo.’

Rite watatamana mu sala ku musitu wa Boaze tii mu ntangu yi batiaka mbutu. Boaze wamona ti Rite bubote keri salaka, mpe mukento wa mbote wabâ. Mu ntangu yîna, bakala bu dieri fwaka, tala ti kabâ na mwana ko, muntu wa kanda diandi weri kwelaka mukento’andi. Buna Boaze wakwela Rite. Bawu babuta mwana wu batâ nkumbu Obede. Obede wayizi bâ nkaka ya mutinu Davide. Ndiku za Naomi zayizi bâ mu nsayi. Bawu batâ: ‘Yehova watokolo ku hana Rite, yandi wa mbote wabêle mu bungu dia nge; mpe bwawu bu mutekolo we naku. Bîka Yehova kakemboso.’