Yehova wasarila luvivululu kwe Yonase

Ku hata dimosi dia Asiri, ku Ninive, bantu miangu miamingi mia bâ nawu. Yehova watâ kwe mbikuri’andi Yonase mu kwenda ku Ninive na mu lwengesa bantu ti bafweti soba ndiatulu. Kâ Yonase wadioka mu nzila yakaka. Yandi wanaka mu bato mu kwenda ku Tarsise.

Bato bu yabâ mu mamba, titembo tia ngolo tiatulumuka, mpe bantu beri salaka mu bato babaka bunkuta. Bawu basambila nzambi zawu, mpe bayula: ‘Mu bungu dia nti musamu wu wuta tu tûrila?’ Ha manima, Yonase wabatêla: ‘Ni mu bungu dia meno misamu mio mita lu tûrila. Misamu ndiokele mi kundombele Yehova. Kundoseno mu mubu, mpe titembo mbo tikangama.’ Bantu beri salaka mu bato ka beri’â zoloko ko mu losa Yonase mu mamba, kâ yandi wabasa tiya. Bu bamulosa mu mubu, titembo tiakangama.

Yonase wabanza ti mbo kaketi fwa. Kâ Yonase bu keri tomo kwe diami ku nsi’a mamba, ni keri sambilaka Yehova. Buna, Yehova watambika mbizi ya yinene. Mbizi yango yamina Yonase, kâ Yonase ka fwa ko. Mu kati dia mbizi, Yonase wasambila: ‘Nikukanisini ti mbo nikutumamana ntangu zazansoni.’ Yehova wakengerela Yonase mu kati dia mbizi bilumbu bitatu. Ha manima, mbizi yalobola Yonase ha mutoto.

Mu bungu ti Yehova wavûkisa Yonase, ngano wuzololo tâ ti kaketi’â vutu kwenda ku Ninive ko? Kâni. Yehova wavutu lomba kwe Yonase mu kwenda ku Ninive. Buna Yonase watumama. Yandi wayenda mpe watâ kwe bankwa-mbi bo: ‘Mu bilumbu 40, Ninive mbo bamwangasa yo.’ Ha manima, musamu wa nzitukulu wayilama—Bisi-Ninive bawâ, mpe basoba ndiatulu zawu. Mutinu wa Ninive watâ kwe bantu bandi: ‘Sambileno Nzambi mpe sobeno mabanza. Kampe ka tu fukisa ko.’ Yehova bu kamona ti bantu basoba mabanza, wabîka mu fûkisa Ninive.

Yonase wabaka nkesi, Ninive bu yalembo fûka. Banza’eti: Yehova wasongela luvivululu na ndemvokolo kwe Yonase, kâ Yonase ka bâ na ndemvokolo ko mu bungu dia bantu ba ku Ninive. Buna, yandi wazakala mu ndeko ya hata, ku nsi’a mpeho ya mwa muti wumosi wubutaka bibete, mpe wabatika mu vimbana. Ha manima mwa muti wô wa fwa, mpe Yonase wabaka nkesi. Buna Yehova wamutêla: ‘Muti wo ta belokela lwaka yôka Baninivite. Nibalemvokele, mpe bavûkiri.’ Ngano malongi ni me? Bantu ba ku Ninive bayôka muti ni muti mu mfunu.