Gabriele wizi tala Maria

Mu kanda dia Elizabete ntwenia yabâ mô yi beri tâka nkumbu Maria, yeri bâka ku hata dia Nazarete, ku tizunga tia Galile. Maria na Yozefe baketi kwelana, tisari timosi tia mabaya. Elizabete bu kabâ na zimi dia ngonda 6, Gabriele, mbazi ya Yehova, yamonekena Maria. Yandi watâ: ‘Mbote, Maria. Yehova tomono ku hana bweso bwandi.’ Maria keri’â bakulaka ko bwe Gabriele keri zolo tâka. Buna Gabriele wamutêla: ‘Mbo baka zimi, mpe mbo buta mwana; mpe fweti mu tâ nkumbu Yezu. Yandi mbo kabâ Mutinu. Luyâlu lwandi mankululu luzingila.’

Maria watâ: ‘Kâ ka ndieka’eti vukasa nitu na bakala ko. Bwe ndendi butila mwana?’ Gabriele watâ: ‘Yehova ka lembanaka musamu ko. Mpeve santu mbo yikukokela, mpe mbo buta mwana. Elizabete, muntu wa kanda diaku mpe wabakiri zimi.’ Buna Maria watâ: ‘Meno ngamba ya Yehova yena. Bîka mio mi katêla mialungana.’

Maria wayenda ku hata diabâ ku miongo mu kwe tala Elizabete. Maria bu kahana mbote kwe Elizabete, yandi wamona ti mwana wabâ mu moyo waningana. Elizabete wafuluka mu mpeve santu, mpe watâ: ‘Maria, Yehova nge kasakumuni. Bweso bwena kwe meno mu bâ na nguri ya Mfumu’ani mu nzo’ani.’ Maria watâ: ‘Yehova nita kembela mu mutima’ani wawansoni.’ Maria wabâ kwe Elizabete ngonda zitatu za mukaka, ha manima wakâla ku nzo’andi, ku Nazarete.

Yozefe bu kawâ ti Maria zimi diabâ nandi, wadinga mu kabakasa makwela. Kâ mbazi yamumonekena mu ndozi, mpe yamutêla: ‘Kubândi na bunkuta mu kwela Maria. Ka yirikiri’â musamu wa mbi ko.’ Buna Yozefe wakwela Maria, mpe wamunata ku nzo’andi.