Mukanda wa Timvuka titwarisaka

Mpangi zeto,

Bu twe bisari bia Yehova, Zu diandi Bibila, dia tuzoloko. Lukwikulu lwe neto ti tinsamu tiandi tia matieleka tiena, malongi mandi ma nsungu mena mu bâ na luzingu lwa mbote, mpe bidimbu dihanaka bia luzolo lwa Nzambi mu bungu dia bantu. (Mikunga 119:105; Like 1:3; 1 Za 4:19) Tuzololo tabakisa bantu bakaka mu longoka matieleka ma ntalu ma Zu dia Nzambi. Buna, nsayi ye neto ya lu kubikila buku di die na mutu-diambu Ndongosolo zi lendi baka mu Bibila. Tazonzeleno dio mu bukufi.

Buku di mu bungu dia bala ba fioti bakubikiri dio. Kâ, balendi dia sarila mu bakisa bantu ba kula bazololo mu tomo zaba Bibila. Mu bungu ti Bibila buku diena dia bantu babansoni, lukwikulu lwe neto ti mbo tubaka ndandu mu ndongosolo zandi, mpe zilendi tu bakisa mu bâ mu nsayi.

Buku di tinsamu tia bantu dizonzelaka tûka ndiyilukulu, mu nzila ya binsamu bia mu Bibila. Ngolo zazansoni basariri mu tsoneka binsamu bia Bibila mu mpila yilembolo mpasi mu bakula, buna bu biayôkela.

Kâ, buku ka dizonzelaka kwa binsamu bia Bibila ko. Matsonoko ma buku di na bifwani biandi bayizi bia kubika ngatu binsamu bia Bibila biasimba mitima mia bantu, ngatu babakula mbanzulu za bantu ba mu Bibila.

Mukanda wu beto wuta bakisa mu mona bwe Bibila die buku ditariri bantu—bô batumamaka kwe Yehova na bô balembo mu tumamanaka. Beto wuta tuma mu baka ndongosolo mu bifwani biawu. (Bisi-Rome 15:4; 1 Bisi-Korente 10:6) Buku di mu bitini 14 diena. Ku mbatukulu ya muna lweka, ndongosolo zi tulendi baka bazonzelaka mu bukufi.

Tala ti mwana we naku, lendi tangaka ndongosolo yimosi na yandi, mpe ha manima lutaluzuri bifwani. Lulendi tanga mpe verse za Bibila zidelakane na tinsamu tio. Bakisa mwana’aku mu sa tintwari ha kati dia misamu mi kata tanga na ndongosolo ya buku. Mpila yo mpe yilendi bâ ya mbote mu bakisa muntu wa kula mu bâ na mabanza ma delakana mu Bibila diadiansoni.

Tubenzi ti mukanda wu mbo wubakisa bantu babansoni bê na mitima mia mbote—ntwenia na bantu ba kula—mu longoka Zu dia Nzambi na mu sarila ndongosolo zandi mu luzingu. Dieka bo, bawu mpe balendi kota mu kanda dia Nzambi ngatu bamusambila.