TIMOKO 23

Bateme—Kani dia nzitukulu!

Mukanda wa papier

Yezu walongesa ti Bakristo bafweti batusu. (Tanga Matie 28:19, 20.) Kâ, ngano bateme ni nti? Mpe muntu nti wufweti sa mu lungisa kani dio?

1. Ngano bateme ni nti?

Ntelo ya “bateme” mu Greke yatûka, mpe yizololo tâ “vwika” mu mamba. Mu ntangu Yezu yi kabatusu, mu nzari ya Zurde bamuvwika, mpe wanaka “mu mamba.” (Marke 1:9, 10) Bakristo ba matieleka mpe, bu babatusuku, mu mamba babavwikaka, peleko babadiamisaka.

2. Ngano bateme nti yisongelaka?

Muntu bu wubatusuku, mbo wusongelaka ti kwe Yehova katiheni. Ngano bwe muntu wutihaninaka? Ntete kabatusu, mu lusambulu lwa yandi kaka katêlaka Yehova ti zololo kamusarila ntangu zazansoni. Mbo kakanisina ti Yehova kwa kasambila, mpe tima tiyôka mfunu mu luzingu lwandi ni mu sarila luzolo lwa Yehova. Mbo kasolaka mu ‘tikala . . . na mu tatamana mu landa’ ndongosolo na tifwani tia Yezu. (Matie 16:24, NWT) Bu katihana mpe bu kabatusu, mbo kabâ na lenda dia bâ na tindiku tia ngolo na Yehova, mpe na Bakristo bakaka.

3. Ntete kabatusu, muntu nti wufweti sa?

Ntete wabatusu, musamu wa mfunu wena mu longoka mu zaba Yehova na mu kurisa timinu tia ngolo mu Yandi. (Tanga Bahebre 11:6.) Buna luzabu lwaku na timinu tiaku bu bikwe kuri, luzolo lwaku mpe mu Yehova mbo lukula. Ntebe kâni, mbo zolo mu kwe samuna misamu mitariri Yehova na mu diatila mu mitieno miandi. (2 Timote 4:2; 1 Za 5:3) Muntu bu wudiatila “buna bufwanane ha meso ma Yehova mu mu tâ nsayi yayingi,” lendi bonga nzengolo ya tihana kwe Nzambi na ya batusu.—Bisi-Kolose 1:9, 10, NWT.a

YIKA NDILU

Zaba nti tulendi longaka mu bateme ya Yezu, mpe bwe muntu wulendi kubamana mu bungu dia kani dio dia mfunu.

4. Tulendi baka malongi mu bateme ya Yezu

Tangeno Matie 3:13-17 mu tomo longoka misamu mitariri bateme ya Yezu. Ha manima zonzeleno biyuvu ebi:

Ngano Yezu mwana fioti weri bu kabatusu?
Bwe Yezu kabatusulu? Ngano mamba kwa bamutsamuna ha mutu?

Yezu wabatika tisalu tia mu hana Nzambi ha mutoto bu kabatusu. Tangeno Like 3:21-23 na Za 6:38, mpe zonzeleno tiyuvu eti:

Ha manima ma bateme’andi, Yezu ntia tisalu katûla ha tibuka tia ntete mu luzingu lwandi?

5. Bateme kani diena di lendi lungisa

Ha mbatukulu, kani dia tihana kwe Yehova na dia batusu dilendi tâ bunkuta. Kâ, lendi kula mu timpeve na tii bu kwizi bâ na lukwikulu ti lendi bonga nzengolo yo ya mfunu. Mu zaba bantu bakaka basarila bo, taleno VIDEO.

VIDEO: Kurisa tindiku na Yehova (1:11)

Tangeno Za 17:3 na Zaki 1:5, mpe zonzeleno tiyuvu eti:

Nti bilendi bakisa muntu mu bâ wa kubama mu bungu dia bateme?

A. Mukento wuta tihana kwe Nzambi mu lusambulu.

B. Mukento wo kwa wuta batusu mu bâ Mbangi ya Yehova bu bamuvwikiri yandi wansoni mu mamba.

Kwe Yehova tutihanaka bu tumutêlaka ti tuzololo tamusarila ntangu zazansoni
Bu tubatusuku, ha meso ma bantu tusongelaka ti kwe Nzambi tatiheni

6. Bateme mu kanda dia Yehova yitukotesaka

Bu tubatusuku, mu kanda dia mu nza yayansoni die mu bumosi tukwizi kotaka. Ni bu sa ti mu mbuka na makanda ma swaswana tatûka, beto bansoni nkwikulu zimosi tulandaka, mpe mu mitieno mimosi tudiatilaka. Tangeno Mikunga 25:14 na 1 Piere 2:17, mpe zonzeleno tiyuvu eti:

Ntia nsobolo bateme yilendi nata mu tindiku tieto na Yehova, mpe na bampwana’eto?

Tifwani: Mpangi ya yikento ya batusu, yita banza na nsayi yayansoni tindiku tia mbote tie nandi na mpangi zakaka za timvuka. 1. Kwe mpangi ya yikento kata tiyekola. 2. Mpangi ya yikento ya nuna kata bakisa mu kwe yende. 3. Tintwari kata dia na mpangi ze na mvula za swaswana. 4. Tintwari na mpangi yakaka ya yikento bata samunina bakala dimosi. 5. Selfi kata baka na mpangi zibe mukanda-nitu wa swaswana ku lukutakanu lwa lunene.

TALA TI BAKUTÊLELE: “Ka ndiena wa kubama ko mu batusu.”

Tala ti ni bo banzaka, ngano kwe nge bateme kani diena dita zolo lungisa?

MU BUKUFI

Yezu walongesa ti Bakristo bafweti batusu. Ntete muntu wabatusu, musamu wa mfunu wena walongoka mu zaba Yehova, wakurisa timinu tia ngolo mu Yandi, wadiatila mu mitieno miandi, mpe wabatusu.

Biyuvu bia mbambukulu

Ngano bateme ni nti, mpe mu bungu dia nti we musama wa mfunu?
Ngano bateme nti yisongelaka?
Ntete wabatusu, muntu nti wufweti sa?

Timoko tiwiri mu tilumbu tia:

Kani

Taluzula listes ze ku nsuka ya Lweka 4 ya “Ngano wa kubama ndiena mu samuna na timvuka?” na ya “Ngano wa kubama ndiena mu batusu?,” mu zaba bwe lendi kubamana mu bilumbu bita kwiza.

Kani diakaka:

Your other goal

ZABA BIAKAKA

Tomo zaba bateme nti biena.

“Ngano bateme ni nti?” (Mutu-diambu wa mu Internet)

Vutu taluzula nti muntu wulendi sa mu batusu.

“Luzolo na tifu tia tondaka Yehova ku bateme binataka” (Nzo ya Zangama ya Munkengi, mars 2020)

Zaba bwe nzengolo ya batusu ya bakala dimosi yeri ya nsungu.

“Bazolo ti nadzukula matieleka me beni” (Nzo ya Zangama ya Munkengi, 1^er février 2013)

Taluzula mu bungu dia nti bateme die kani dia mfunu, mpe bwe lendi kubamana.

“Ngano mfweti batusu?” (Les jeunes s’interrogent—Réponses pratiques, Volume 2, timoko 37)

a Tala ti muntu mu dibundu diakaka wabatusu, wufweti vutu batusu. Mu bungu dia nti? Mu bungu ti dibundu diango ka dieri’â longesaka matielaka ma Bibila ko.—Tala Bisalu 19:1-5 na Timoko 13.