TIMOKO 54
Dema dia “ngamba ya kwikama na ya ndwenga”
Mfumu ya timvuka tia Bakristo ni Yezu. (Bisi-Efeze 5:23) Lumbu ti, tûka ku zulu, Yezu mbo katwarisaka milongoki miandi mie ha mutoto mu nzila ya “ngamba ya kwikama na ya ndwenga.” (Tanga Matie 24:45.) Yezu yandi beni wasola ngamba yo mpe wahana yo nswa wabonga nzengolo zakaka. Kâ ngamba yo yifweti tumama, mpe yifweti sarila mpangi za Kristo. Ngano ngamba yo ni nani? Bwe yitukipilaka?
1. Ngano “ngamba ya kwikama na ya ndwenga” ni nani?
Yehova, muntu peleko tikunku tia bantu kwa kasarilaka mu twarisa kanda diandi. (Malaki 2:7; Bahebre 1:1) Ha manima ma lufwa lwa Yezu, bantumwa na bakuluntu bayizi bâ ba twarisi. (Bisalu 15:2) Mpila mosi, lumbu ti mpe, tikunku tia bakuluntu tita twarisa. Mbo babatâka Timvuka titwarisaka tia Mbangi za Yehova. Madia ma timpeve bahanaka mpe tisalu tia samuna batwarisaka. Tikunku tio ni “ngamba ya kwikama na ya ndwenga, [Yezu] yi kasolele.” (Matie 24:45a, NWT) Bantu babansoni bê mu Timvuka titwarisaka ba tumbu bêna, mpe timina die nawu dia kwe yâla na Yezu mu Timfumu tia mazulu bu suka luzingu lwawu ha mutoto.
2. Ngano ngamba ya kwikama ntia bidia bia timpeve yihanaka?
Yezu watâ ti ngamba ya kwikama mbo “yihana bidia [kwe Bakristo] mu ntangu yifwanakane.” (Matie 24:45b, NWT) Ntiana kwa bidia bi tudiaka bitubakisaka mu bâ na tikolela tia mbote, mpila mosi mpe bidia bia timpeve—mitieno mia Zu dia Nzambi—ngolo bituhanaka mu tatamana mu bâ ba kwikama kwe Yehova na mu lungisa tisalu tia tu hana Yezu. (1 Timote 4:6) Bidia bio bia timpeve tubakaka mu nzila ya tukutakanu twa timvuka na twa tunene, mu mikanda na video zitubakisaka mu zaba luzolo lwa Nzambi na mu yika ngolo tindiku tieto na Yandi.
YIKA NDILU
Tala mu bungu dia nti twe na nsatu ya “ngamba ya kwikama na ya ndwenga”—mpila mosi Timvuka titwarisaka.
Timvuka titwarisaka bidia bia timpeve tihanaka, lutwalusu, na lubakusu lwa delakana kwe Mbangi za Yehova za mu nza yayansoni
3. Kanda dia Yehova difweti bâ dia kutama
Mu lutwalusu lwa Yehova, Timvuka titwarisaka tisalu tia Mbangi za Yehova tikubikaka. Ni mu mpila yo mpe Yezu katwarisila Bakristo ba ntete. Taleno VIDEO.
Tangeno 1 Bisi-Korente 14:33, 40, mpe zonzeleno tiyuvu eti:
Bwe verse zo zita songela ti Yehova zololo ti Mbangi za Yehova zabâ za kutama?
4. Ngamba ya kwikama yikubikaka tisalu tieto tia samuna
Tisalu tiayôka mfunu tia sala Bakristo ba ntete tieri tisalu tia samuna. Tangeno Bisalu 8:14, 25, mpe zonzeleno biyuvu ebi:
Ngano nani weri twarisaka tisalu tia samuna kwe Bakristo ba ntete?
Ngano Piere na Za nti basa mu lutwalusu lwa bantumwa bakaka?
Tisalu tia samuna ni tisalu tiyôkele mfunu ti kubikaka Timvuka titwarisaka. Taleno VIDEO.
Yezu wasongela mfunu ya tisalu tia samuna. Tangeno Marke 13:10, mpe zonzeleno biyuvu ebi:
Mu bungu dia nti tisalu tia samuna tie tisalu tiyôkele mfunu kwe Timvuka titwarisaka?
Mu bungu dia nti twe na nsatu “ngamba ya kwikama na ya ndwenga” mu kubika tisalu tio mu nza ya mukaka?
5. Ngamba ya kwikama yihanaka lutwalusu
Timvuka titwarisaka lutwalusu tihanaka kwe Bakristo ba nza yayansoni. Bwe basolelaka lutwalusu lu bahana? Tataluzula bwe Timvuka titwarisaka tia Bakristo ba ntete tiasarila bo. Tangeno Bisalu 15:1, 2, mpe zonzeleno biyuvu ebi:
Ngano nti biatulumuna misamu kwe Bakristo ba ntete?
Ngano kwe nani Paulo, Barnabase, na bantu bakaka balomba lubakasu mu yirika musamu wo?
Tangeno Bisalu 15:12-18, 23-29, mpe zonzeleno tiyuvu eti:
Ntete babonga nzengolo, ngano Timvuka titwarisaka tia ntete nti tiatoko taluzula bu tieri dingaka lubakusu lwa Yehova mu musamu wo?—Tala verse 12, 15, na 28.
Tangeno Bisalu 15:30, 31 na 16:4, 5, mpe zonzeleno biyuvu ebi:
Ngano Bakristo ba ntete nti basa mu lutwalusu lwa hana Timvuka titwarisaka?
Bwe Yehova kasakumuna tumama kwawu?
Tangeno 2 Timote 3:16 na Zaki 1:5, mpe zonzeleno tiyuvu eti:
Bu tibongakaka nzengolo lumbu ti, ngano kwe nani Timvuka titwarisaka tidingaka lutwalusu?
TALA TI BAKUTÊLELE: “Tala ti wirikiri Timvuka titwarisaka, bu tomo tala bantu kwa ta landa.”
Nti bita ku songela ti Yezu Timvuka titwarisaka katwarisaka?
MU BUKUFI
Timvuka titwarisaka ni “ngamba ya kwikama na ya ndwenga” ya sola Yezu. Lutwalusu na bidia bia timpeve tihanaka kwe Bakristo ba mu nza yayansoni.
Biyuvu bia mbambukulu
Nani wasola “ngamba ya kwikama na ya ndwenga”?
Bwe Timvuka titwarisaka titukipilaka?
Ngano lukwikulu lwe naku ti Timvuka titwarisaka ni “ngamba ya kwikama na ya ndwenga”?
ZABA BIAKAKA
Tala bwe Timvuka titwarisaka tikubamaka mu sala tisalu tiandi.
“Ngano Timvuka titwarisaka tia Mbangi za Yehova ni nti?” (Mutu-diambu wa mu Internet)
Longaka bwe Timvuka titwarisaka tidingaka mu zaba tala ti bidia bia timpeve ma mbote me neto.
Bwe Timvuka titwarisaka tibanzaka mu tisalu tia ba hana Yezu?
Bwe tukutakanu tweto twa timvuka na twa tunene tusongelaka ti Yehova Timvuka titwarisaka katwarisaka?