Luzolo na tifu tia tondaka Yehova ku bateme binataka

1-2. Ntiana bu songele wo Bisalu 8:27-31, 35-38, nti biatuma Musi-Etiopi mu batusu?

NGANO zololo wabatusu ngatu wabâ mulongoki wa Yezu? Luzolo na tifu tia tondaka biatuma bantu babingi mu bonga nzengolo yo. Tabonga tifwani tia bakala dimosi dieri sarilaka mutinu wa wukento wa ku Etiopi.

² Musi-Etiopi ka lembeketa ko mu batusu, ha manima ma ndongokolo ya misamu mi kalongoka mu Zu dia Nzambi. (Tanga Bisalu 8:27-31, 35-38.) Ngano nti biamubakisa? Zu dia Nzambi dia keri tomo zoloko mu bungu ti verse ze mu mukanda wa Izaya keri tangaka mu ntangu yi keri kwe yendele mu tipusu ti bendaka cheval. Mpe Filipe bu kayizi zonza na yandi, bakala dio diayizi tomo tonda mu misamu mia yirika Yezu mu bungu dia yandi. Kâ, mu bungu dia nti Musi-Etiopi wo katuka ku Yerusaleme? Mu bungu ti watikurisila luzolo lwandi mu Yehova. Bwe tuzabiri wo? Tala ti ku Yerusaleme katuka, ni mu kwe kunda Yehova. Kampe bakala dio diakatuka mu dibundu diandi di kabutukila, mpe wayizi bâ tintwari na kanda dia dimosi dieri sarilaka Nzambi ya matieleka. Ni luzolo lwandi mu Yehova kwa mpe lwamutuma mu sa tima tiakaka tia mfunu: wabatusu mpe wayizi bâ mulongoki wa Kristo.​—Mat. 28:19.

3. Ngano nti bilendi kabakasa muntu mu batusu? (Tala kaku “Ngano nti bie mu mutima’aku?”)

³ Luzolo mu Yehova lulendi ku tuma wabatusu. Kâ, luzolo lulendi mpe ku kabakasa mu batusu. Mu bwe? Tabonga mwa bifwani. Kampe bantu ba kanda diaku balembolo Mbangi za Yehova na ndiku zaku za tomono zolo, mpe kampe tîna tatîna mu bungu ti wamana batusu, mbo bakuyina. (Mat. 10:37) Peleko, kampe bifu bie kô zoloko, bi zebi ti Yehova ka zololo’â bio ko, mpe mbo monaka ti mpasi biena mu bika. (Mik. 97:10) Lendi mona mpe, mu malaki ma nsangu me tintwari na mabundu ma bungungu wakurila. Mpe mbo zoloko mu bambukilaka moyo ntangu za nsayi zi wayôkesa mu diaka malaki mango. Kampe, ntiangu monaka wo musamu wa mpasi mu bika nsalulu zi yinaka Yehova. (1Kor 10:20, 21) Buna fweti sola, “Nti peleko nani ntomono zolo?”

NANI TUFWETI TOMO ZOLO?

4. Ngano ntia tima tia ntete tikutuma mu batusu?

⁴ Bima biabingi bia mbote bie naku bi zoloko mpe bisaka ti watonda. Mu tifwani, ni bu sa ti ntete wabatika mu longoka na Mbangi za Yehova, kampe Bibila dia weri tomo zitisaka, mpe wayizi zolo Yezu. Bwawu bu, bu wizi zaba Mbangi za Yehova, kampe mbo zoloko mu yôkesaka ntangu na bawu. Kâ, ni bu zolo bima bio biabiansoni, ka bifweni’â ko ngatu watihana kwe Yehova mpe wabatusu. Tima tia ntete tikutuma mu batusu, ni luzolo lwaku mu Yehova Yandi beni. Bu zolo Yehova yôka bima biabiansoni, kuvutu’â bika na kani tima ko peleko na kani muntu ko kakukabakasa mu mu sarila. Luzolo lwaku mu Yehova mbo lukutuma wabatusu mpe mbo lukubakisa mu tatamana mu bâ wa kwikama kwe Yandi ha manima ma bateme’aku.

5. Ntia biyuvu tubakila mvutu?

⁵ Yezu watâ ti tufweti zolo Yehova mu mutima’eto wa mukaka, mu tilundi tieto tia mukaka, mu mbanzulu zeto zazansoni na mu ngolo zeto zazansoni. (Marke 12:30) Ngano bwe lendi longokela mu tomo zolo na mu tomo zitisa Yehova? Tala ti tubenzi mu mpila Yehova yi katuzololoko, beto mpe mbo tumuzolo. (1Za 4:19) Ntia mbanzulu na ntia bifu biakaka bifweti bâka naku, bu mana kurisa luzolo mu wô wu tufweti tomo zolo?b

6. Mu mabanza ma Bisi-Rome 1:20, timosi tia bima bi lendi longokela mu zaba Yehova ni tie?

⁶ Longoka mu zaba Yehova mu nzila ya bima bi kasala. (Tanga Bisi-Rome 1:20; Nza. 4:11) Banza’eti mu mpila Yehova yi kasala miti na bibulu, mpe dinga mu zaba bwe bima bio bisongelaka ti Yehova nkatika ndwenga ze nandi. Longoka fioti mu mpila ya toma yi basarila nitu’aku. (Mik. 139:14) Mpe banza’eti ngolo za tûla Yehova mu ntangu. Kâ zaba ti ntangu, mosi kwa yena ya miliare za mbwetete ze ku zulu.c (Iza. 40:26) Bu kwe taluzuri bima bia yirika Yehova, buzitu bwaku mu Yehova mbo butomo kula. Kâ, ka wufweni’â ko mu zaba ti Yehova ndwenga na ngolo zazingi ze nandi, mu bungu ti titini kwa tiena ti lendi batikila mu sa tindiku na Yandi. Mu kobesa luzolo mu Yehova, wufwanane walongoka misamu miakaka mu Yandi.

7. Mu tomo kwizi zolo Yehova, ntia musamu tufweti bela na lukwikulu?

⁷ Fweti bâ na lukwikulu ti Yehova nge katomo kipaka. Ngano musamu wa mpasi we kwe nge mu kwikila ti Nzambi yasala mutoto na zulu yizebi ti nge wa moyo wena, mpe nge kakipaka? Tala ti ni buna wena, bambuka ti Yehova ‘kena mala na muna muntu muntu ko.’ (Bis. 17:26-28) Yehova “mitima miamiansoni kataluzulaka,” mpe kukanisini, ntiana bwa tâ Davide kwe Salomo: “Tala ti mu dingiri mbo kabika wamumona.” (1Nta 28:9) Ntiangu, musamu wu ta longokela Bibila lumbu ti, ni ewu wu tele Yehova, “nikubendele kwe meno.” (Yer. 31:3) Bu kwe zabi misamu miamiansoni mia yirika Yehova mu bungu dia nge, luzolo lwaku mu Yandi mbo lutomo kwizi kula.

8. Bwe lendi karisila mvutu mu luzolo lwa Yehova?

⁸ Mpila yi lendi karisila mvutu mu luzolo lwa Yehova ni mu mu zonzelaka mu nzila ya lusambulu. Luzolo lwaku mu Nzambi mbo lukula bu kwe mu tele misamu mikutariri mpe bu kwe mu vuturiri matondo mu mio miamiansoni mi kayirika mu bungu dia nge. Mpe tindiku tiaku na Yehova mbo tibâ ngolo, wamana dingaka mu zaba ka ntia mpila Yehova kakarisilaka mvutu mu tusambulu twaku. (Mik. 116:1) Mbo kwizi bâ na lukwikulu ti Yehova nge kabakulaka. Kâ mu bâ penepene na Yehova, fweti bakula nzila zandi na mabanza mandi. Fweti mpe zaba ntia makani me nandi mu bungu dia nge. Mpila ya yimosi yi lendi bakila luzabu lwa misamu mio, ni mu longokaka Zu diandi, Bibila.

9. Bwe songela ti Bibila dia zoloko?

⁹ Longoka mu zolo Zu dia Nzambi, Bibila. Mu Bibila kwa lendi bakila matieleka matariri Yehova na makani mandi mu bungu dia nge. Mbo songela ti Bibila zoloko, wamana dia tangaka bilumbu biabiansoni, wamana kubamaka mu bungu dia ndongokolo’aku ya Bibila, mpe wamana sarilaka mio mi longokaka mu Bibila. (Mik. 119:97, 99; Za 17:17) Ngano programe ya nge beni ye naku ya ntangulu ya Bibila? Ngano programe yango ya yikubakisaka mu tangaka Bibila bilumbu biabiansoni?

10. Ntia nsangu lendi bakila kwa mu Bibila?

¹⁰ Mu Bibila kwa lendi bakila nsangu zatûka kwe bantu bamona Yezu. Bibila kwa ditâka misamu mia yirika Yezu mu bungu dia nge na matieleka mamansoni. Bu longoka mu zaba misamu mia tâ Yezu na misamu mi kayirika, mbo dinga mu sa tindiku na yandi.

11. Bwe lendi longokela mu zolo Yehova?

¹¹ Longoka mu zolo Yezu, mpe luzolo lwaku mu Yehova mbo lukula. Mu bungu dia nti? Mu bungu ti Yezu bifu bia Tata’andi kalandaka na bunsungu bwabwansoni. (Za 14:9) Ntiangu bu kwe longoke misamu mitariri Yezu, mbo tomo kwizi bakula, mpe mbo tomo kwizi zolo Yehova. Banza’eti tiari tia mutima tia songela Yezu kwe bantu ba beri diatuzulaka kwe bantu bakaka mu bungu ti mputu zeri, mbevo zeri mpe ba nôka beri. Banza mpe malongi ma delakana ma kakuhanaka, mpe banza bwe luzingu lwaku lusobelaka bu mu wilaka.​—Mat. 5:1-11; 7:24-27.

12. Bu kwe longoke mu zaba Yezu, nti kwizi zolo mu sa?

¹² Luzolo lwaku mu Yezu mbo lutomo kwizi bâ ngolo bu kwe tomo banzi mukayulu wa sa Yezu, ngatu masumu maku balemvokela mo. (Mat. 20:28) Bu kwizi bakula ti Yezu wazolo kafwa mu bungu dia nge, kampe mbo zolo wasoba mabanza, mpe mbo dinga wabaka mulemvo wa Yehova. (Bis. 3:19, 20; 1 Za 1:9) Bu kwizi zolo Yezu na Yehova, mbo kwizi bâ na nsatu ya kutakanaka na bantu bazoloko Yezu na Yehova.

13. Ngano Yehova nti kakuhana?

¹³ Longoka mu zolo kanda dia Yehova. Bantu ba kanda diaku balembolo Mbangi za Yehova na ndiku zaku, kampe ka babakula ko mu bungu dia nti ta zolo watihana kwe Yehova. Kampe mbo bakutelamana mpe. Yehova wasa ti mpangi za mu timvuka zabâ ntiana kanda. Wamana bâ wa kwikama kwe mpangi zo, mbo baka luzolo na lubakusu lwe naku nsatu. (Mak. 10:29, 30; Ebr. 10:24, 25) Ntangu bu yiyôka, kampe bantu bakaka ba mu kanda diaku mbo bakwizi sarila Yehova tintwari na nge, kampe mbo bakwizi tumama mu mitieno miandi mpe.​—1Pi. 2:12.

14. Ntiana bu tele 1 Za 5:3, nti wayizi bakula mu musamu wutariri mitieno mia Yehova?

¹⁴ Longoka mu zolo na mu sarila mitieno mia Yehova. Ntete wazaba Yehova, kampe mbo weri diatilaka buna bu zololo, kâ bwawu bu, wamweni ti mitieno mia Yehova miyôkele bubote. (Mik. 1:1-3; tanga 1 Za 5:3.) Banza’eti mitieno mia Bibila mitariri mulumi, mukazi, bibuti, na bala. (Efz. 5:22–6:4) Ngano bu sarilaka mitieno miango, mbo monaka ti luzingu lwa kanda diaku toma lutomaka? Bu tumamanaka mutieno wutâka ti, fweti sola ndiku zaku na ndwenga, ngano mbo monaka ti bifu bia mbote bie naku? Ngano mu nsayi wena? (Bin. 13:20; 1Kor 15:33) Tuta banza mbo tâ, “Yee,” mu biyuvu bio.

15. Ngano nti lendi sa tala ti nsatu lubakusu ye naku mu sarila mitieno mia Bibila?

¹⁵ Ntangu zakaka, kampe musamu wa mpasi wubâka kwe nge mu zaba ka bwe sarila mitieno mi longokaka mu Bibila. Ntiangu Yehova kasarilaka organizasio’andi ngatu yakubikaka mabuku mabangulaka Bibila, makubakisa mu swasikisa mbote na mbi. (Ebr. 5:13, 14) Wamana tangaka, mpe wamana longokaka mabuku mango, mbo kwizi mona bwe malendi ku sarisila, mpe mbo kwizi zolo wabâ penepene na organizasio ya Yehova.

16. Bwe Yehova kakabila kanda diandi?

¹⁶ Longoka mu zolo organizasio ya Yehova na mu yika yo moko. Yehova wakaba kanda diandi mu bimvuka; mpe Mwana’andi , Yezu, ni Mfumu ya bimvuka biabiansoni. (Efz. 1:22; 5:23) Yezu wakubika mwa tikunku tia bantu ba tumbu, ngatu batwarisaka tisalu ti kazololo tiasalama lumbu ti. Yezu watâ tikunku tia bantu bo nkumbu “ngamba ya kwikama na ya ndwenga,” mpe mpangi zo, mbo zinataka na bunsungu bwabwansoni dema diawu dia ku bakisa mu bâ wa kwikama kwe Nzambi mpe dia kengerela tindiku tiaku na Yandi. (Mat. 24:45-47) Bantu bakaka babakisaka ngamba ya kwikama mu ku kipa, ni bakuluntu. Bakuluntu balendi ku twarisa mpe balendi ku kengerela. (Iza. 32:1, 2; Ebr. 13:17; 1Pi. 5:2, 3) Bakuluntu mbo basa miamiansoni mi balenda mu ku tindisa, mpe mbo bakubakisaka mu tatamana mu bâ wa kwikama kwe Yehova. Kâ timosi tia bima biyôkele mfunu ti balendi sa mu bungu dia nge, ni mu ku bakisa mu longesa bantu bakaka misamu mitariri Yehova.​—Efz. 4:11-13.

17. Tintwari na Bisi-Rome 10:10, 13, 14, mu bungu dia nti tufweti zonzelaka misamu mitariri Yehova kwe bantu bakaka?

¹⁷ Bakisa bantu bakaka balongoka mu zolo Yehova. Yezu watâ kwe milongoki miandi balongesa misamu mitariri Yehova kwe bantu bakaka. (Mat. 28:19, 20) Tulendi tumamana musiku wo, mu bungu ti tuzebi ti tufweti wa tumamana. Luzolo lwaku mu Yehova bu lukula, mbo kwizi bâ na mbanzulu zimosi na ntumwa Piere mpe na ntumwa Za, batâ ti: ‘Beto konga, ka tulendi’â tabika ko mu zonzela mio mi tawiri na mi tamweni.’ (Bis. 4:20) Mbo tubâka na nsayi yayingi tala ti twizi bakisa muntu wazolo Yehova. Banza’eti nsayi ya bâ na tisamuni Filipe bu kabakisa Musi-Etiopi kalongoka matieleka me mu Bibila, mpe kabatusu! Mu ntangu yi landaka tifwani tia Filipe, mpe bu tumamaka mu ntumunu ya Yezu yitariri tisalu tia samuna, mbo songelaka ti zololo wabâ Mbangi ya Yehova nge mpe. (Tanga Bisi-Rome 10:10, 13, 14.) Buna, mpila mosi na Musi-Etiopi, mbo kwizi tiyula tiyuvu titele: “Nti bita kunkabakasa mu batusu?”​—Bis. 8:36.

18. Ngano ntia biyuvu tutaluzula mu timoko tita kwiza?

¹⁸ Bu kwizi bonga nzengolo ya batusu, mbo kwizi bonga nzengolo yiyôkele mfunu mu luzingu lwaku. Mu bungu ti, nzengolo yiyôkele mfunu yena, fweti taluzula na bunkete bwabwansoni ka bwe nzengolo yo yita zolo tâ. Ngano ntia misamu fweti zaba mu musamu wutariri bateme? Ntete wabatusu nti fweti sa, mpe ha manima ma bateme’aku nti fweti sa? Mbo tubakila biyuvu bio mvutu mu timoko tita kwiza.