“Ni bo, bantu babansoni bazabila ti beno milongoki miani miena”

1. Nti bisimbaka bantu mutima bu bakwizaka ku tukutakanu tweto? (Tala mpe tifwani.)

BANZA’ETI bantu ba kwelana biziri ku lukutakanu lwa Mbangi za Yehova mu mbala’awu ya ntete. Mpila yi ba bwanini bampangi na luzolo lwe ha kati diawu yitomono ba simba mutima. Bu bata kâla ku nzo, mukento wutêle kwe bakala diandi: ‘Mbangi za Yehova za nguria za swaswana zena na bantu ba tubwabanaka na bo—nsayi yibêleke nani mu bâ nawu.’

2. Mu bungu dia nti bantu bakaka batêla makuba?

² Luzolo lubâka ha kati dia bantu mu timvuka tia Bakristo lwa nguria lwa nzitukulu lwena. Diangana, Mbangi za Yehova bantu ba masumu mpe bena. (1 Za 1:8) Buna, bu tutomo kwizi zaba bantu ba mu timvuka, tulendi tomo kwizi mona ti bifu bie nawu bia mbi. (Rom. 3:23) Kâ, musamu wa tiari ni wena’eti, bantu bakaka batâ makuba mu masumu ma bampwana’awu.

3. Nti bizabikisaka milongoki mia Yezu mia matieleka? (Za 13:34, 35)

³ Vutu tala verse ya mutu-diambu wa timoko ti. (Tanga Za 13:34, 35.) Ntia tidimbu tizabikisaka milongoki mia Kristo mia matieleka? Ni luzolo, ka kondo kwa masumu’â ko. Diangana Yezu ka tâ ko ti: ‘Ni bo luzabila ti beno milongoki miani miena.’ Kâ, watâ ti: “Ni bo, bantu babansoni bazabila ti beno milongoki miani miena.” Yezu wasongela ti milongoki miandi na bantu bakaka balembolo mu timvuka mbo baketi zaba milongoki mia matieleka mu luzolo lwa ngolo lwe nawu bawu na bawu.

4. Bantu bakaka nti balendi dinga mu zaba mu Bakristo ba matieleka?

⁴ Bantu bakaka balembolo Mbangi za Yehova balendi yula: ‘Bwe luzolo luzabikisaka milongoki mia Yezu mia matieleka? Ngano Yezu bwe kasongela luzolo lo kwe ntumwa zandi? Mpe bwe tulendi landila tifwani tia Yezu lumbu ti?’ Musamu wa mbote wena kwe Mbangi za Yehova za batusu mu dinga mvutu za biyuvu bio. Biyuvu bio bilendi tu bakisa mpe mu songela luzolo mu mpila ya mbote, nsungula mu ntangu yi tumonaka bifu bia mbi kwe mpangi zeto.—Efz. 5:2.

MU BUNGU DIA NTI LUZOLO YENA NZILA YA YIMOSI YA ZABA MILONGOKI MIA YEZU MIA MATIELEKA?

5. Bangula misamu mia tâ Yezu mu Za 15:12, 13.

⁵ Yezu watomo songela ti luzolo lwa nzitukulu luzabikisa milongoki miandi. (Tanga Za 15:12, 13.) Yezu wabatuma ti: ‘Yendeno zolosono beno bansoni ntiana bu naluzololo.’ Ngano bwe wuta zolo tâ? Ntiana kwa bwa bangula wo Yezu, luzolo lwena lwakondo bwimi—luzolo lutumaka mpe Mukristo mu fwa mu bungu dia mpwana’andi tala ti wufwanane.b

6. Ngano Zu dia Nzambi bwe disongelaka mfunu ya luzolo?

⁶ Zu dia Nzambi mbo dilongesaka ti luzolo nguria mfunu lwena. Mu verse zi tomo zoloko bantu mbo mu vulu bâka verse zitâka ti: ‘Nzambi Nkwa luzolo.’ (1 Za 4:8) ‘Yenda zolo mpwana’aku mpila mosi nge beni.’ (Mat. 22:39) ‘Luzolo pôka dia masumu lukusunaka.’ (1 Pi. 4:8) “Kani kabwe luzolo ka luzimbakanaka ko.” (1 Kor. 13:8, NWT) Verse zo na zakaka zifweti bakisa muntu ni muntu mu bakula ti mfunu wena mu kurisa na mu songela tifu tio tia mbote.

7. Mu bungu dia nti Satana kalendi lembo vukasala bantu mu luzolo lwa matieleka?

⁷ Babingi bayulaka: Bwe ndendi zabila dibundu dia matieleka? Mabundu mamansoni mbo matâka ti matieleka malongesaka, kâ muna dibundu mbo dilongesaka misamu mia swaswana mu bungu dia Nzambi.’ Satana wadukisa mabundu mamingi ma bungungu, mpe wayika musamu wa mpasi kwe bantu mu zaba dibundu dia matieleka. Kâ ka lenda ko mu dukisa timvuka tia Bakristo bazolosono mu nza ya mukaka. Yehova kwa lendi bwa sa. Wa matieleka wena mu bungu ti luzolo lwa matieleka kwe Yehova lutûkaka. Bantu kwa bê na mpeve ya Yehova na lusakumunu lwandi balendi bâ na luzolo lwa matieleka ha kati diawu. (1 Za 4:7) Ntiangu Yezu katâ ti milongoki miandi kwa milendi bâ na luzolo lwa matieleka ha kati diawu.

8-9. Ngano luzolo lusongelaka Mbangi za Yehova bantu bakwa lwasimba mutima?

⁸ Ntiana kwa bwa tâ wo Yezu, bantu babingi bayizi zaba milongoki miandi mia matieleka mu luzolo lu basongasanaka bawu na bawu. Mu tifwani, mpangi ya bakala ye na nkumbu Ian mbo kabambukilaka lukutakanu lwa lunene lwa ntete lu kayenda,lwayôkela ku stade yeri penepene na nzo’andi. Mwa ngonda kwa zayôka tûka Ian ti kabâ ku stade yo mu kwe tala sport. Têle ti: “Luswaswanu na lukutakanu lo lwa lunene lwalwingi lwabâ. Mbangi za Yehova buzitu bweri nawu, bubote balwata, mpe bala bawu bifu bia mbote bieri nawu.” Vutulu tâ: “Kâ wuyôkele, bantu bo mbo beri monekenaka ntiana bawu beri na tidzunu mpe mbo beri yangalalaka mu bio bieri nawu—bima ni bio ndieri zoloko mu luzingu lwani. Ka nita bambukila na kani timosi tia binzonzi bi basa mu tilumbu tîna ko, kâ tii lumbu ti mbo nibambukilaka kwa ndiatulu ya Mbangi za Yehova.”c Kâ, ndiatulu yo mbo yisongelaka luzolo lwa matieleka lwe neto beto na beto. Mu bungu ti mpangi zeto tuzololo, mbo tubabongelaka na nsayi mpe na buzitu.

⁹ Mpangi yimosi ya bakala ye na nkumbu John, mabanza ni ma mpila yo mpe meri nandi bu kabatika mu kwendaka ku tukutakanu. Têle ti: “Nayizi yituku mu nsayi [. . .] ya kunsongela bantu babansoni beri kûna—mbo ndieri monaka ntiana basantu beri. Luzolo lwawu lwa matieleka lwakungana lukwikulu ti dibundu dia matieleka nabaka.”d Mbala zazingi binsamu bia mpila yo bisongelaka ti kanda dia Yehova ni Bakristo ba matieleka.

10. Mu ntia ntangu tuvulu bâka na bweso bwa songela luzolo? (Tala mpe note.)

¹⁰ Ntiana bu tumweni wo ku mbatukulu, Mbangi za Yehova mpe masumu me nawu. Ntangu zakaka mpangi zeto zilendi tâ peleko zilendi yirika misamu milendi tu fwemesa.e (Zaki 3:2) Mu ntangu yo mbo tubâka na bweso bwa songela luzolo mu mpila yi tuyirikila musamu. Mu musamu wo, nti tulendi longoka mu tifwani tia Yezu?—Za 13:15.

NGANO YEZU BWE KASONGELA LUZOLO KWE NTUMWA ZANDI?

11. Ngano ntia bifu bia mbi Zaki na Za basongela? (Tala mpe tifwani.)

¹¹ Yezu keri’â kêlaka ko ti milongoki miandi miabâ mia lunga. Kâ, mbo keri ba bakisaka na luzolo lwalwansoni mu tomesa bifu biawu bia mbi, ngatu Yehova kabatambula. Lumbu timosi, ntumwa zole, Zaki na Za balomba kwe nguri’awu kazonza kwe Yezu ngatu kabahana bibuka bia mfunu mu Timfumu. (Mat. 20:20, 21) Zaki na Za basongela ti lukuta lweri nawu, mpe mbo beri zoloko babâ ku matu.—Bin. 16:18.

12. Ngano Zaki na Za ni bawu kwa basongela bifu bia mbi? Bangula.

¹² Ka Zaki na Za ko kwa basongela bifu bia mbi mu musamu wo. Tataleno ka bwe ntumwa zakaka zasa: ‘Ba kumi bakaka bu bawâ musamu wo, baniungutina bampwana’awu bo ba bole.’ (Mat. 20:24) Tulendi banza ti Zaki na Za na ntumwa zo zakaka babakana fioti. Kampe bakaka bo batâ musamu wa mpila eyi: ‘Ngano beno luta banza banani lwena mu lomba bibuka bia ntete mu Timfumu? Ka beno kaka ko kwa lusalaka ngolo na Yezu. Beto bansoni lenda die neto dia baka bibuka bio bia mfunu!’ Mu mpila ni mpila bantumwa babika mwa ntangu ti musamu wo wabebesa luzolo lweri nawu ha kati diawu.

13. Ngano Yezu bwe kasa bu kamona bifu bia mbi bia ntumwa zandi? (Matie 20:25-28)

¹³ Ngano Yezu bwe kasa mu musamu wo? Ka wamuzezesa bito ko. Ka tâ ko ti, ‘Ndie dinga ntumwa za nguria za mbote, babâ babakala ba nguria ba kuluka, mpe basongasana luzolo ntangu zazansoni.’ Kâ, na luvivululu lwalwansoni, wazonza na bantu bo ba nsungu. (Tanga Matie 20:25-28.) Watatamana mu ba bongela na luzolo lwalwansoni ni bu sa ti ka yeri’â mbala ya ntete na ya mansukina ko bantumwa badinga mu zaba ka nani weri wa kula mu babansoni.—Mak. 9:34; Like 22:24.

14. Ngano bifu bia bantu bwe bieri mu tizunga tia kurila bantumwa?

¹⁴ Ntembe kâni, Yezu mbo keri kipaka ntûkulu za ntumwa zandi. (Za 2:24, 25) Bitsoniki bia Bayuda na Bafarize mbo beri longesaka ti muntu mu bâ mfunu, wafwanakana ti kabâ ha tibuka tia mfunu. (Mat. 23:6; fwanakasa na timoko tie na mutu-diambu Les synagogues : lieux où Jésus et ses disciples enseignaient mu Nzo ya Zangama ya Munkengi ya 1^er avril 2010, bin. 16-18.) Mfumu za mabundu ma Bayuda mbo beri monaka mpe ti bayôkele bampwana’awu.f (Like 18:9-12) Yezu wabakula ti tizunga tia mpila yo mbo tiaketi sobesa mpila yeri tibongelaka bantumwa na yi beri bongelaka bampwana’awu. (Bin. 19:11) Mabanza ma delakana meri nandi mu misamu mi keri kêlaka mu bungu dia milongoki miandi, mpe keri’â kulu fwemaka ko mu yirika misamu mu mpila ya delakana. Wazaba ti mitima mia mbote mieri nawu, buna na luvivululu lwalwansoni, wababakisa mu diata lukuta lwawu na tifu tiawu tia dinga mu yôka bampwana’awu ngatu bayingasa bio mu luzolo.

BWE TULENDI LANDILA TIFWANI TIA YEZU?

15. Nti tulendi longoka mu tinsamu tia Zaki na Za?

¹⁵ Tulendi longoka misamu miamingi mu tinsamu tia Zaki na Za. Musamu wa mbi bayirika bu balomba bibuka bia mfunu mu Timfumu. Kâ, ntumwa zakaka mpe bubi basa bu babika ti musamu wo wabebesa bumosi bwawu. Kâ, Yezu wabongela ntumwa za 12 na nsayi mpe na luzolo lwalwansoni. Ngano ntia malongi tuta baka? Nguria musamu ka wena ko kwa mio mi yirikaka bantu bakaka, kâ mpe mvutu yi tuhanaka mu makuba mawu peleko mu mfwemoso zawu. Nti bilendi tu bakisa? Bu tubâka na nkesi mu bungu dia mpangi’eto, tulendi tiyula: ‘Mu bungu dia nti musamu wu kayirikiri wutomono kumfwemesa? Ngano fwema ko mbo kuta songela ti tifu tia mbi tie nani ti mfweti tomesa? Ngano muntu wukumfwemese lendi bâ na musamu wuta mu kwamisa? Ni bu sa ti mpemba ye nani bu mfwemene, ngano ndendi songela luzolo lwa kondo bwimi bu niyôkesa kwa musamu wo?’ Bu tuvulu kwe bongele bampwana’eto na luzolo, mbo tutomo kwizi songela ti milongoki mia Yezu mia matieleka twena.

16. Nti biakaka tulendi longoka mu tifwani tia Yezu?

¹⁶ Tifwani tia Yezu mbo titulongesaka mpe mu bakula mpangi zeto. (Bin. 20:5) Wa matieleka Yezu lenda dieri nandi dia tanga mitima. Ka twena na lenda dio ko. Kâ, tulendi sarila luvivululu mu mpangi zeto bu batufwemesaka. (Efz. 4:1, 2; 1 Pi. 3:8) Musamu wa fioti wena mu sila bo tala ti tudingiri mu zaba ntûkulu zawu. Tabongeno tifwani.

17. Bwe munkengi wumosi wa tizunga kabakila ndandu bu kayizi dinga mu tomo zaba mpangi’andi?

¹⁷ Munkengi wumosi wa tizunga ku Afrique de l’est ta bambukila mpangi yimosi ya yibakala yi keri banzaka yandi ti keri’a na nsayi ko. Ngano munkengi wa tizunga wo nti kayizi sa? Têle ti: “Kani nadioka mpangi yo, nabonga nzengolo ya dinga mu tomo mu zaba.” Bu kasila bo, munkengi wa tizunga wayizi longoka misamu mitariri mpila ya kurila mpangi yo mpe ka bwe yanatina nsobolo mu timuntu tiandi. Munkengi wa tizunga wo vutulu tâ ti: “Bu nayizi bakula ngolo za sarila mpangi yo mu telamana misamu miandi mia ntama na nsobolo zi kasa, nayizi mu zitisa. Tayizi bâ nguria ndiku.” Diangana, bu tusarilaka ngolo mu bakula mpangi zeto, musamu wa fioti wuvulu bâka mu ba songela luzolo.

18. Ntia biyuvu tulendi tiyula tala ti mpangi yitufwemese? (Bingana 26:20)

¹⁸ Ntangu zakaka, mbo tubâka na nsatu ya monekena mpangi yitufwemese. Kâ ntete, tufweti tiyula biyuvu ebi: ‘Ngano musamu wukumfwemese wa ntomono bakula?’ (Bin. 18:13) ‘Ngano wulendi bâ ti mpangi yo ka dingiriki’â ko mu kumfwemesa?’ (Ekl. 7:20) ‘Ngano musamu wa mpila yo wa ndieka yirika?’ (Ekl. 7:21, 22) ‘Bu nidinga namumonekena ngano ka nitulumuna misamu mia minene ko yôka wu nita zolo yirika?’ (Tanga Bingana 26:20.) Bu tubonga ntangu ya tiyula biyubu bio, tulendi kwizi bakula ti luzolo mu mpangi’eto lufweti tu tuma mu lembo kipa musamu wutufwemese.

19. Ngano ntia nzengolo bongele?

¹⁹ Mu tintwari, Mbangi za Yehova mbo basongelaka ti bawu ni milongoki mia Yezu mia matieleka. Muna muntu mu beto mbo kasongelaka ti beto ni nguria milongoki mia Yezu bu kasongelaka luzolo lukondolo bwimi kwe bampangi ntono masumu mawu. Bu tusila bo, tulendi bakisa bantu bakaka mu zaba dibundu dia matieleka na mu kwizi bâ tintwari na beto mu sarila Yehova, Nzambi ya luzolo. Tabongeno nzengolo ya tatamana mu songela luzolo luzabikisaka Bakristo ba matieleka.