TIMOKO TIA NDONGOKOLO 21
MUKUNGA 107 Talandeno luzolo lwa Nzambi
Bwe lendi bakila muntu wukwela?
“Nani lendi baka mukento wa fwanana? Ntalu’andi yi tomono yôka ntalu ya koraye.”—BIN. 31:10, NWT.
MABANZA MA NGURI
Mitieno mia Bibila mitariri mpila muntu yi kalendi bakila muntu wa mbote wu kakwela mpe bwe bantu bakaka mu timvuka balendi bakisila mpumpa yita zolo kwela.
1-2. a) Ntia misamu Mukristo wa mpumpa wufweti taluzula ntete kabatika fréquentation? b) Ngano ntelo ya “fréquentation” bwe yita zolo tâ? (Tala “Ntelo yi babanguri.”)
NGANO zololo wakwela? Ni bu sa ti ka wufwanane’â ko mu bâ mu nsayi, Bakristo babingi, bantwenia na bantu ba kula, bakêlaka na timina diadiansoni mu baka muntu wu bakwela. Diangana, ntete wabatika mu dinga muntu wukwela, fweti bâ na mbongo za fwanana, timpeve tia mbote, mpe fweti tomo tizaba nge beni.a (1 Kor. 7:36) Wamana bêla buna, mbo bâ na bweso bwatomo lenda makwela maku.
2 Kâ, musamu wa mpasi wubâka mu baka muntu wa fwanana wu tukwela. (Bin. 31:10) Mpe, ni bu sa ti bakiri muntu wuta dinga mu tomo zaba, ka wubâka kwa musamu wa fioti ko mu batika fréquentation.b Mu timoko ti, mbo tutaluzula nti bilendi bakisa Bakristo ba mpumpa mu baka muntu wu balendi kwela na mu batika fréquentation. Mbo tulongoka mpe bwe bantu bakaka mu timvuka balendi bakisila bô bata dinga mu kwela.
NTI BILENDI KU BAKISA MU BAKA MUNTU WA MBOTE WUKWELA?
3. Ntia misamu Mukristo wa mpumpa wufweti taluzula bu kata dinga muntu wu kakwela?
3 Tala ti zololo wakwela, musamu wa mbote wubâ tala ti zebi bifu bita dinga mu mona kwe muntu wo wukwela ntete wabatika fréquentation. Tala kâni, lendi yambirika muntu wulendi bâ wa mbote kwe nge mu kwela peleko we batika fréquentation na muntu wulembolo wa mbote kwe nge mu kwela. Diangana, muntu ni muntu wu tudinga mu kwela wufweti bâ Mukristo wa batusu. (1 Kor. 7:39) Kâ Bakristo babansoni babatusu ka bakwizi’â bâ bantu ba mbote ko kwe beto mu kwela. Buna lendi tiyula: ‘Ntia makani me nani mu luzingu? Ntia tifu tie mfunu kwe meno nita zolo mona kwe muntu wu nizolo kwela? Ngano misamu mi nita kekolo mia delakana miena?’
4. Ntia misamu lendi sambirila bu takwe dingi muntu wukwela?
4 Tala ti zololo wakwela, ntembe kâni wayizi sambirila musamu wo. (Flp. 4:6) Diangana, Yehova ka tukanisina ko mu tu hana muntu wu tukwela. Kâ mabanza maku na nsatu zaku kabelokelaka lwaka, mpe lendi ku bakisa bu takwe yela mu baka muntu wukwela. Buna, tatamana mu mu têla mabanza maku. (Mik. 62:8) Sambila mu bâ na luvivululu, kâ mpe na ndwenga. (Zaki 1:5) John,c mpangi ya mpumpa yibâka ku États-Unis, têle misamu mi katâka mu lusambulu lwandi: “Bifu bi nita zolo mu mona kwe muntu wu nikwela nitâka kwe Yehova. Mbo nisambilaka mu bâ na bweso bwa bwabana na muntu wu ndendi kwela. Kwe Yehova nilombaka mpe kakumbakisa mu kurisa bifu bisa ti nabâ bakala dia mbote.” Tanya, mpangi ya yikento yibâka ku Sri Lanka, têle: “Bu nikwe dingi muntu wu nikwela, kwe Yehova nilombaka kakumbakisa mu tatamana mu bâ wa kwikama na mu nsayi.” Ni bu sa ti ku kululu’â baka muntu wukwela ko, Yehova kukanisini mu tatamana mu kipa nsatu zaku za tinsuni na za luzolo.—Mik. 55:22.
5. Ntia bweso bwe na Bakristo ba mpumpa bwa bwabana na ba mpumpa bakaka bazoloko Yehova? (1 Bisi-Korente 15:58) (Tala mpe tifwani.)
5 Bibila beto ditindisaka mu ‘bâ na tima tia sala mu tisalu tia Mfumu.’ (Tanga 1 Bisi-Korente 15:58.) Tala ti bêle na tisalu tiatingi mu tisalu tia Yehova mpe yôkese ntangu na mpangi za swaswana ku bâ kwa na nsayi ya tunga bindiku bia ngolo ko, kâ mbo bâ na bweso bwa bwabana na mpangi zakaka za mpumpa, ntiana nge, zi tomo tihanaka mu tisalu tia Yehova. Mpe tala ti siri miamiansoni mu yangirika Yehova, mbo bâ na nkatika nsayi.
Tala ti bêle na tisalu tiatingi mu tisalu tia Yehova mpe yôkese ntangu na mpangi za swaswana, lendi bwabana na mpangi zakaka zita dinga mu kwela (Tala paragrafe 5)
6. Bu badingaka muntu wu bakwela, Bakristo ba mpumpa nti bafweti bambukila?
6 Kâ, sa keba: Kubikandi ti nsatu’aku ya dinga muntu wukwela yabâ tima tiyôkele mfunu mu luzingu lwaku. (Flp. 1:10) Nkatika nsayi ka yitûkaka ko mu makwela peleko mu bumpumpa, kâ mu tindiku tieto tia mbote na Yehova. (Mat. 5:3) Mpe, bu watiri mpumpa, mbo bâ na bweso bwatomo kurisa tisalu tiaku tia samuna. (1 Kor. 7:32, 33) Tomo sarila ntangu yo mu mpila yiyôkele bubote. Jessica, mpangi ya yikento yibâka ku États-Unis, yakwela ha manima ma mvula 30 têle: “Natatamana mu bâ na tisalu tiatiangi mu tisalu tia samuna mpe musamu wo wakumbakisa mu bâ mu nsayi ni bu sa ti nsatu kwela yabâ nani.”
BONGA NTANGU YATOMO ZABA MUNTU
7. Mu bungu dia nti sarila ndwenga tala ti tokolo taluzula muntu wuta zolo kwela ntete wamutêla mabanza maku? (Bingana 13:16)
7 Bwe tabanza tala ti muntu we kô wa mbote wulendi kwela? Ngano fweti kulu kwe têla muntu wo mabanza maku? Bibila ditêle ti muntu we na mayela mu luzabu kasarilaka. (Tanga Bingana 13:16.) Mbo sarila ndwenga tala ti dingiri mu tomo zaba muntu mu mansweki ntete wamutêla mabanza maku mu yandi. Aschwin bâka ku Pays-Bas têle: “Luzolo lulendi kula mu ntinu, kâ mpe lulendi zimbakana mu ntinu. Buna, bu bonga ntangu ya tomo taluzula muntu, ku kwizi’â batika fréquentation ko zisikamana kwa mu luzolo lwa ntangu fioti.” Musamu wakaka, butomo taluzula muntu lendi kwizi bakula ti ka wena muntu wa mbote ko wulendi kwela.
8. Bwe mpumpa yilendi taluzula muntu wu kata zolo kwela? (Tala mpe tifwani.)
8 Bwe lendi lendela mu taluzula muntu mu mansweki? Ku tukutakanu twa timvuka peleko bu yôkesaka ntangu na mpangi zakaka, lendi kwizi zaba misamu mitariri timpeve tia muntu, timuntu tiandi na ndiatulu’andi. Ngano ndiku zandi ni banani, mpe ntia misamu kazonzelaka? (Like 6:45) Ngano makani mandi ma delakane na makani ma nge? Lendi yula biyuvu kwe bakuluntu ba timvuka peleko kwe Bakristo bakaka ba yela batomono mu zaba. (Bin. 20:18) Lendi yula biyuvu bitariri bifu na nkumbu ya muntu. (Rite 2:11) Bu takwe taluzuri muntu, sa keba mu lembo mu fwemesa. Zitisa mabanza mandi. Kudingandi mu bâka ntangu zazansoni na yandi peleko mu zaba misamu miamiansoni mi mutariri.
Ntete watâ mabanza maku, toko taluzula muntu wo mu mansweki (Tala paragrafe 7-8)
9. Ntete wamonekena muntu wuta zolo kwela, mu nti fweti bêla na lukwikulu?
9 Ngano ntangu zi kwa fweti taluzula muntu ntete wamutêla mabanza maku? Wamana kulu kwe zonza na muntu, lendi banza ti ka watomono’â dimbitila ko ntete wabonga nzengolo. (Bin. 29:20) Kâ, tala ti muntu wo wubakuri ti yandi tazolo, mpe bongele ntangu yayingi mu mu têla wo, lendi banza ti kekama tomo kekamaka ntete wabonga nzengolo. (Ekl. 11:4) Bambuka ti, ntete wazonza na muntu, ka wena na nsatu ko yabâ na lukwikulu ti mbo kwela muntu wo. Kâ fweti bâ na lukwikulu ti wa kubama wena mu bungu dia makwela mpe muntu wo wuta zolo wulendi bâ muntu wa mbote mu kwela.
10. Ngano nti fweti sa tala ti muntu we kô wuta ku zolo, kâ nge kuta zolo ko mu batika fréquentation na yandi?
10 Ngano nti fweti sa tala ti bakuri ti muntu we kô wuta dinga mu tomo ku zaba? Tala ti ka wena na mabanza mamosi ko na yandi, dinga mu tomo wasongela mu nsalulu zaku. Ka wubâ musamu wa mbote ko tala ti muntu benzi ti lendi batika tindiku na nge, kâ butomo tala ka wena buna ko.—1 Kor. 10:24; Efz. 4:25.
11. Mu nsi zi bayirikaka fréquentation na makwela kwe bantu bakaka, ntia misamu tufweti sila keba?
11 Mu nsi zakaka, tulendi kekolo ti bibuti peleko bantu bakaka ba kula basolela muntu wa kanda diawu we mpumpa muntu wu kakwela. Mu nsi zakaka, ni kanda peleko ndiku zisolelaka muntu we mpumpa muntu wu kalendi kwela, ha manima misamu badelakasaka ngatu mukento na bakala babwabana mpe batala tala ti ba delakane. Tala ti bakulombele mu kubika fréquentation peleko makwela ma bantu, dinga mu zaba nsatu za mukento na za bakala. Tala ti benzi ti muntu we kô wa mbote wu balendi kwela, mu bungu dia ndiku’aku peleko muntu wa kanda diaku, bâ na lukwikulu ti yandi tomono zaba, bifu biandi bia zebi, mpe wuyôkele mfunu bâ na lukwikulu ti timpeve tia mbote tie nandi. Tindiku tia mbote na Yehova titomono yôka mbongo mu mfunu, lukolo lu tasa peleko bimvwama bie neto. Kâ, bambuka ti, ni mpangi ya mpumpa yifweti bonga nzengolo ya mansukina ya kwela peleko kâni.—Nga. 6:5.
BWE LENDI BATIKILA FRÉQUENTATION?
12. Bwe lendi têla kwe muntu ti zololo wabatika fréquentation na yandi?
12 Tala ti zololo wabatika fréquentation na muntu, ngano bwe lendi mu têla mabanza maku?d Lendi dinga mu moka na muntu wo ha lungiri bantu peleko ku telefone. Tomo mu têla mabanza maku. (1 Kor. 14:9) Tala ti wu fwanane, mu hana ntangu ya dimbitila mu mpila yi kakuhanina mvutu. (Bin. 15:28) Tala ti muntu ka wuta zolo ko mu tatamana, zitisa mabanza mandi.
13. Ngano nti lendi sa tala ti muntu wukutêlele ti nge kata zolo? (Bisi-Kolose 4:6)
13 Tala ti muntu we kô wuta ku zolo? Kampe butindi bwafwanane mu kwizi ku têla mabanza mandi, buna songela nsayi na buzitu. (Tanga Bisi-Kolose 4:6.) Tala ti ntangu ye naku nsatu mu mona tala ti mbo tambula mu batika fréquentation mu têla wo. Kâ, kuzingilandi mu hana mvutu. (Bin. 13:12) Tala ti ku tazolo ko, tomo wamutêla kâ na nsayi yayansoni. Tataleno mvutu ya hana Hans, mpangi yimosi ya ku Autriche, bu bayizi mu monekena kwe mpangi yimosi ya yikento: “Nayizi tomo mu têla nzengolo’ani, kâ mu buzitu. Manzangu nasarila mu bungu ti ka nazolo’â ko kabanza ti yandi na meno tulendi batika fréquentation. Mu bungu dia musamu wo mpe, nayizi sa keba mu lembo tâ peleko mu lembo yirika musamu waketi mu tuma mu banza ti nzengolo’ani naketi soba.” Ku lweka lwakaka, tala ti zololo wabatika fréquentation na muntu wo, mu têla mabanza maku na misamu mi ta kekolo. Misamu mi ta kekolo milendi bâ mia swaswana na muntu wo, tintwari na tikulu tieno peleko misamu miakaka.
BWE BANTU BAKAKA BALENDI BAKISILA BAKRISTO BA MPUMPA?
14. Bwe tulendi bakisila Bakristo ba mpumpa mu nzonzolo’eto?
14 Bwe bantu bakaka balendi bakisila Bakristo ba mpumpa ba ta zolo mu kwela? Mpila yimosi ya sila bo ni ya sa keba mu misamu mi tutâka. (Efz. 4:29) Tulendi tiyula: ‘Ngano tiya nisaka kwe bô ba ta zolo kwela? Bu nimonaka mpangi ya bakala ya mpumpa yi tazonza na mpangi ya yikento ya mpumpa, ngano mbo nibanzaka ti bazolosono?’ (1 Tim. 5:13) Tufweti sarila mpe ngolo mu lembo tuma Mukristo wa mpumpa mu banza ti kena wa lunga ko mu bungu ti kena wa kwela ko. Hans, wu tutokolo zonzelaka, têle: “Mpangi zakaka zitâka: ‘Mu bungu dia nti ta lembo kwelela? Mvula yôka zita yôka.’ Mabanza ma mpila yo malendi sa ti mpumpa yabanza ti ka ba tamuzolo ko.” Bubote bwena mu dinga bweso bwasîka Bakristo ba mpumpa!—1 Tes. 5:11.
15. a) Tintwari na mitieno mi tubakiri mu Bisi-Rome 15:2, nti tufweti taluzula ntete tabakisa muntu mu baka muntu wu kakwela? b) Ntia malongi ma mbote tubakiri mu video? (Tala mpe tifwani.)
15 Tala ti tubenzi mpangi ye kô ya bakala na mpangi ye kô ya yikento balendi sa longo lwa mbote? Bibila beto ditêlaka mu kipa mabanza ma bantu bakaka. (Tanga Bisi-Rome 15:2.) Ba mpumpa babingi balembo zolo ko ti bababakila muntu wu bakwela, mpe tufweti zitisa nzengolo’awu. (2 Tes. 3:11) Bakaka balendi zolo ti bababakisa, kâ tala ti ka batulombele’â wo ko, ka tuyirikandi wo.e (Bin. 3:27) Bakaka ka bazolo’â ko babayirikila misamu. Lydia, mpangi ya mpumpa yibâka ku Allemagne, yitêle: “Tulendi kubika misamu ngatu mpangi yo ya yikento na mpangi ya bakala bayôkesa ntangu tintwari mpe tababika babonga nzengolo mu misamu mi bayirika.”
Tikunku tia bampangi tia hana bweso kwe Bakristo ba mpumpa mu bâ tintwari (Tala paragrafe 15)
16. Mukristo wa mpumpa nti wufweti bambukila?
16 Beto bansoni—ba mpumpa peleko bantu bakwela—tulendi bâ na luzingu lwa nsayi! (Mik. 128:1) Buna, tala ti zololo wakwela kâ ka weka’eti baka muntu ko, tatamana mu tûla mutima mu tisalu tia Yehova. Sin Yi mpangi ya yikento yibâka ku Macao têle: “Bu tufwanakasa ntangu yi tuyôkesa ku Paradi na muntu wu takwela, ntangu ya bumpumba ya nkufi yena. Yangalala mu ntangu yo, mpe tomo ya sarila.” Kâ nti biyôka tala ti bakiri muntu wulendi kwela mpe batikiri fréquentation? Mu timoko tita landa, mbo tumona bwe lendi bêla na fréquentation ya mbote.
MUKUNGA 137 Bakristo ba bakento ba kwikama, mpe bê na timinu
a Mu ku bakisa mu zaba tala ti wa kubama wena mu kwela, tala mutu-diambu wa “Fréquentation—1re partie: Suis-je prêt pour les fréquentations?” mu jw.org
b NTELO YI BABANGURI: Mu timoko ti na mu tio tita landa, fréquentation ni ntangu mukento na bakala yi badingaka mu tomo zabasana na mu zaba tala ti balendi kwelasana. Mu nsi zakaka, ntelo ya bwabana na muntu basarilaka, zaba muntu, peleko musamu luzolo. Fréquentation yibatikaka mu ntangu mukento na bakala yi batomo songelaka ti bazolosono, mpe yitatamane tii ntangu yi babonga nzengolo ya kwelasana peleko ya zenga fréquentation.
c Nkumbu zakaka za basobele.
d Mu bikulu biakaka, mpangi ya bakala yi vulu kwe monekenaka mpangi ya yikento mu batika fréquentation. Kâ, mpangi ya yikento mpe yilendi bonga nzengolo ya monekena mpangi ya bakala. (Rite 3:1-13) Mu baka nsangu zakaka, tala mutu-diambu wa “Les jeunes s’interrogent [. . .] Comment lui dire ce que je ressens pour lui ?” mu Réveillez-vous ! ya 22 octobre 2004, Français.
e Tala video ya Banunga mu bungu dia timinu—Bakristo ba mpumpa mu jw.org