Tatamana mu diatila mu timinu

1. Mu bungu dia nti Paulo keri mu nsayi mu mplia yi kanatina luzingu lwandi?

NTUMWA Paulo wazaba ti ntamana mbo bamuhonda, kâ bu keri banzaka mu mpila yi kanatina luzingu lwandi nsayi yayingi yeri nandi, watâ: ‘Titini ti nafweti dioka tia nasukisi, timinu tia nakêlele.’ (2 Tim. 4:​6-8) Paulo wabonga nzengolo za ndwenga mu tisalu tiandi tia Bukristo, mpe lukwikulu lweri nandi ti Yehova nsayi yeri nandi mu yandi. Beto mpe tuzololo tabonga nzengolo za mbote, mpe Nzambi katutambula. Bwe tulendi bwa sila?

2. Diatila mu timinu bwe wuta zolo tâ?

² Paulo watâ mu bungu dia yandi beni na mu bungu dia Bakristo bakaka ba kwikama ti: ‘Mu timinu tuta kwe diatiri, ka wena ko ti mu timona-meso.’ (2 Kor. 5:7) Paulo bwe keri zolo tâka? Mu Bibila ntêlo ya “diata” ntangu zakaka mbo yitarilaka mpila muntu yi kanitinaka luzingu lwandi. Muntu bu wudiatilaka kwa mu timona-meso, nzengolo zi kabongaka mbo zisikamanaka kwa mu mio mi kamonaka, mi kawâka, na mu mio mi kamonaka ku mutima. Ku lweka lwakaka, muntu bu wudiatilaka mu timinu, nzengolo zi kabongaka mbo zisikamanaka mu lukwikulu lwandi mu Yehova. Nsalulu zandi mbo zisongekala ti lukwikulu lwe nandi ti Nzambi mbo kamusenda mpe mbo kabaka ndandu tala ti lendi malongi ma Yehova me mu Bibila.—Mik. 119:66; Ebr. 11:6.

3. Ntia ndandu tubakaka bu tudiatilaka mu timinu? (2 Bisi-Korente 4:18)

³ Wa matieleka, beto bansoni nzengolo tubongaka mu bungu dia mio mi tumonaka, mio mi tuwâka mpe mu bungu dia mio mi tumonaka ku mutima. Kâ bu tubongaka nzengolo za mfunu, tulendi bwabana na misamu tala ti tukipiri kwa mio mi tumonaka peleko mio mi tuwâka. Mu bungu dia nti? Mu bungu ti mio mi tumonaka mpe mi tuwâka ntangu zazansoni ka mibâka mia sungama ko. Ni bu sa ti ka wena bo ko, tala ti tudiatiri kwa mu timona-meso, tulendi zimbakana luzolo peleko malongi ma Nzambi. (Ekl. 11:9; Mat. 24:​37-39) Kâ bu tudiatilaka mu timinu, mbo tubongaka nzengolo “zitambulaka Mfumu.” (Efz. 5:​10, NWT) Bu tulanda malongi ma Nzambi mbo tubaka tidzunu tia mutima mpe mbo tubâ mu nguria nsayi. (Mik. 16:​8, 9; Iza. 48:​17, 18) Tala ti tutatamane mu diatila mu timinu, mbo tuzinga mankululu.—Tanga 2 Bisi-Korente 4:18.

4. Muntu bwe wulendi zabila tala ti mu timinu kata diatila peleko mu timona-meso?

⁴ Bwe tulendi zabila tala ti mu timinu tudiatilaka peleko mu timona-meso? Mu zaba wo beto bansoni tufweti tiyûla: Nzengolo zani mu nti zisikamanaka? Ngano mbo nisikamanaka kwa mu mio mi ndendi mona peleko malongi ma Yehova makuntwarisaka? Tataluzuleno bwe tulendi tatamana mu diatila mu timinu mu misamu mitatu mia mfunu: bu tusolaka tisalu, bu tusolaka muntu wu tukwela, mpe bu tubakaka lutwalusu lwa organizasio. Mu muna musamu, mbo tuzonzela misamu mi tufweti kipa ngatu tabonga nzengolo za mbote.

BU TUSOLAKA TISALU

5. Bu tusolaka tisalu ntia musamu tufweti toko banzaka?

⁵ Beto bansoni tuzololo tabâ na lenda dia lungisa nsatu zeto na za kanda dieto. (Ekl. 7:12; 1 Tim. 5:8) Bisalu biakaka bubote bafutaka. Na bisalu biakaka muntu wusalaka wulendi baka mbongo za fwanana mu lungisa nsatu za kanda diandi na mu lunda mbongo mu bungu dia bilumbu bia ku matu. Kâ bisalu biakaka, mbongo za fioti kwa bafutaka, buna muntu wusalaka lenda die nandi dia lungisa kwa nsatu za nguri za kanda diandi ntiana sumba bidia, futila nzo peleko sumba binkuti. Bu tusolaka tisalu ti tusala, mbo tudingaka mu toko zaba kwa batufuta. Kâ muntu wulendi diatila mu timona-meso tala ti musamu ni wo kwa kata kipa.

6. Bwe tulendi diatila mu timinu bu tusolaka tisalu? (Bahebre 13:5)

⁶ Tala ti mu timinu tudiatilaka, mbo tubanza mpe mu nsobolo zilendi nata tisalu tio mu tindiku tieto na Yehova. Tulendi tiyula: ‘Ngano tisalu tio mbo tikuntuma mu yirika misamu mi yinaka Yehova?’ (Bin. 6:​16-19) ‘Ngano mbo tikunkabakasa mu kwendaka ku tukutakanu, mu bâka na ntangu ya vulu samunaka, ya longokaka Bibila, mpe mbo tisa ti nabâ mala na kanda diani ntangu yayingi?’ (Flp. 1:10) Tala ti ni bo, mbo wubâ musamu wa ndwenga mu lembo tambula tisalu tio ni bu sa ti tisalu mpasi tiena mu baka. Mu bungu ti mu timinu tudiatilaka, nzengolo tubongaka zisongelaka ti lukwikulu lwe neto Yehova mbo kalungisa nsatu zeto mu mpila ni mpila.—Mat. 6:33; tanga Bahebre 13:5.

7-8. Bwe mpangi yimosi ya ku Amérique du Sud yadiatila mu timinu? (Tala mpe tifwani.)

⁷ Mpangi ya bakala ya ku Amérique du Sud ye na nkumbu Javier,a wabakula mfunu ya diatila mu timinu. Têle: “Nayizi dinga tisalu ti baketi kumfutila mbongo zazingi yôka tio ti ndieri salaka mpe nsayi yayingi tiaketi kunatina.” Kâ, Javier nsatu yayingi yeri nandi mu bâ mupasuri-nzila. Vutulu tâ: “Nasa programe ngatu nasa timoko na mfumu ya ku tisalu tio. Ntete tasa timoko, nasambila mu baka lubakusu na lukwikulu ti Yehova zebi mio miyôkele bubote mu bungu dia meno. Nazolo mu baka madema mamingi mu tisalu tiani na mu baka mbongo zazingi, kâ ka naketi’â tambula tisalu tio ko tala ti ka tiaketi’â kumbakisa ko mu lungisa makani mani ma timpeve.”

⁸ Javier têle: “Mu ntangu ya timoko, mfumu wakuntêla ti mbo naketi vulu sala heure zazingi yôka zo zi naketi sala. Na buzitu bwabwansoni namutêla ti ka ndendi’â na tambula ko mu bungu dia nsambululu’ani.” Buna, Javier wabonga nzengolo ya lembo tambula tisalu tio. Tumingu twole ha manima, wayizi bâ mupasuri-nzila. Mpe ntangu fioti mu muvu wo kwa, wayizi baka tisalu tia ntangu fioti. Têle: “Yehova wawâ tusambulu twani, mpe wakungana tisalu tieri delakanaka na programe’ani ya mupasuri-nzila. Nsayi yayingi ye nani mu bâ na tisalu tikumbakisaka mu yôkesa ntangu yayingi mu tisalu tia Yehova na bampangi.”

9. Nti longokele mu tifwani tia Trésor?

⁹ Nti tufweti sa tala ti tubakuri ti tisalu ti tusalaka ka titubakisaka ko mu diatila mu timinu? Tabongeno tifwani tia Trésor, bâka ku Congo. Têle: “Tisalu tiani tia môna bweso bwa nzitukulu bweri. Mbongo zi ndieri bakaka zayôka mbala tatu zo zi ndieri toko bakaka, mpe bantu buzitu bwabwingi beri kunganaka.” Trésor tukutakanu keri vulu mangisaka mu bungu dia heure zazingi za keri vutu yôkesaka ku salu (heures supplémentaires). Tiya mpe beri mu saka mu sweka nsalulu za bumbaki zeri yôkaka ku compagnie. Trésor wazolo mu bika tisalu tio, kâ bunkuta bweri nandi bwa lembo vutu sâla na tisalu. Nti biamubakisa? Têle: “Habakuke 3:​17-19 ya kumbakisa mu bakula ti tala ti nahombesa tisalu tiani Yehova mbo kaketi kunkipa mu mpilia ni mpila. Buna nabika tisalu tiani.” Banguri: “Bisari biabingi bibanzaka ti mu bungu dia tisalu tifutaka bubote muntu lendi tambula mu hombesa tima ni tima, mu kati luzingu lwandi lwa kanda mpe na bisalu biandi bia timpeve. Nsayi ye nani mu bungu ti nalunda tindiku tiani na Yehova mpe na kanda diani. Ha manima ma mvula mosi, Yehova wakumbakisa mu baka tisalu tia mbote tikunganaka mbongo zifwanane mu lungisa nsatu zani na mu bâ na ntangu yayingi mu tisalu tia Yehova. Bu tutûlaka Yehova ha tibuka tia ntete, tulendi bwabana na misamu mia mbaya, kâ Yehova mbo katukipa.” Tala ti tubêle na lukwikulu mu malongi na mu makani ma Yehova, mbo tutatamana mu diatila mu timinu mpe mbo katusakumuna.

BU TUSOLAKA MUNTU WU TUKWELA

10. Nti bilendi tunata mu diatila mu timona-meso bu tusolaka muntu wu tukwela?

¹⁰ Makwela kabu dia Yehova diena, mpe ka wena musamu wa mbi ko mu dinga mu kwela. Mpangi ya yikento bu yidingaka mu sola mpangi yi kakwela, lendi tala timuntu tiandi, mpila yi kamonekenaka, mpila bantu yi bamubongelaka, mbongo zandi, madema mandi mu kati dia kanda, na mio mi kamonaka ku mutima mu bungu dia yandi.b Misamu mio mfunu miena. Kâ, tala ti sikamane kwa mu misamu mio, mbo kadiatila mu timona-meso.

11. Bwe tulendi diatila mu timinu bu tusolaka muntu wu tukwela? (1 Bisi-Korente 7:39)

¹¹ Diangana Yehova nsayi yayingi yibâka nandi bu kamonaka bampangi basarilaka malongi mandi bu basolaka muntu wu bakwela! Malongi ma Bibila basarilaka mpe mbo bakêlaka mu toko bâ ba yela ntete badinga mu kwela. (1 Kor. 7:36) Nsungula mbo batalaka tala ti muntu wu bazololo mu kwela bifu bie nandi Yehova bi kasingasaka bifweti bâ na bakala dia mbote peleko mukento wa mbote. (Bin. 31:​10-13, 26-28; Efz. 5:33; 1 Tim. 5:8) Tala ti muntu wulembolo Mbangi ya Yehova songele luzolo mu bawu, lukwikulu batûlaka mu malongi ma tâka ti bafweti kwelana “kwa na mulongoki wa Mfumu,” ntiana butâka 1 Bisi-Korente 7:​39, NWT. (Tanga.) Mbo batatamanaka mu diatila mu timinu, na lukwikulu ti Yehova lendi kipa nsatu zawu za luzolo yôka muntu ni muntu.—Mik. 55:22.

12. Nti longokele mu tifwani tia Rosa?

¹² Tabongeno tifwani tia Rosa, mpangi ya yikento ye mupasuri-nzila ku Colombie. Ku tisalu tiandi bakala dimosi dialembo bâ Mbangi ya Yehova dia batika mu mu zolo. Rosa mpe yandi keri zoloko. Watâ: “Bakala dia mbote dieri monekaka. Bantu ba tizunga tiandi keri bakisaka, mpe mbo keri monekenaka ntiana’eti muntu wa nguria wa mbote. Mpila yi keri kumbongelaka ya ndieri zoloko. Bima bi ndieri dingaka kwe bakala biabâ nandi, kâ kabâ Mbangi ya Yehova ko.” Tatamane mu tâ: “Musamu wa mpasi weri mu kala mu bungu ti musamu wo wa ndieri zoloko. Mu ntangu yîna, mu bukaka ndieri mpe wabâ nani nakwela, kâ ka ndieri’â bakaka muntu ko mu kanda dia Yehova.” Rosa katûla kwa mabanza mandi ko mu mio mi keri monaka. Wadimbitila mu nsobolo zaketi nata nzengolo yo mu tindiku tiandi na Yehova. Buna, wazenga tindiku na bakala dio mpe watatamana mu bâ na tisalu tiatingi mu tisalu tia Yehova. Ntangu fioti ha manima, Rosa bamutikisa mu kwe sa Lukolo lwa Bisamuni bia Timfumu, mpe lumbu ti mupasuri-nzila wa wunene wena. Têle: “Yehova wakungana tusakumunu twatwingi twayizi kungana nsayi yayingi.” Ni bu sa ti ka wena musamu wa fioti ko mu diatila mu timinu mu misamu mi tuzoloko ku mutima, ntangu zazansoni ndandu kwa tubakaka bu tusilaka bo.

BU TUBAKAKA LUTWALUSU LWA ORGANIZASIO

13. Nti bilendi tu tuma mu diatila mu timona-meso bu tubakaka lutwalusu lwa organizasio?

¹³ Bakuluntu, mukengi wa tizunga, filiale na Timvuka titwarisaka lutwalusu bavulu tu hanaka mu tu bakisa mu sarila Yehova. Kâ nti biyôka tala ti ka tuta bakula lutwalusu lu bata tu hana ko? Tulendi bâ na ntembe ti lutwalusu lo lwa mbote lwena. Tulendi batika mpe mu tûla mabanza meto mu makuba ma mpangi zitutwarisaka.

14. Nti bitubakisa mu diatila mu timinu bu tubakaka lutwalusu lwa organizasio? (Bahebre 13:17)

¹⁴ Bu tudiatilaka mu timinu, lukwikulu lwe neto ti Yehova twarisaka organizasio’andi mpe misamu mieto mia kazebi. Buna, na manzangu mamansoni tutumamanaka mpe mbo tusilaka bo na mabanza ma mbote. (Tanga Bahebre 13:17.) Tuzebi ti bu tulandaka lutwalusu timvuka tubakisaka mu tatamana mu bâ mu bumosi. (Efz. 4:​2, 3) Lukwikulu lwe neto ti ni bu sa ti mpangi zitwarisaka bantu ba masumu bena, Yehova mbo kasakumuna tumama kweto. (1 Sam. 15:22) Mu ntangu yifwanane, mbo kasungika misamu mi bafweti sungika.—Mi. 7:7.

15-16. Nti biabakisa mpangi yimosi mu diatila mu timinu bu keri na ntembe mu lutwalusu lu kabaka? (Tala mpe tifwani.)

¹⁵ Tataleno tifwani tita songela ndandu zi tubakaka bu tudiatilaka mu timinu. Ku Pérou, ni bu sa ti bantu babingi Espagnol bazonzaka, kâ mfumu za makanda zazingi zizonzaka mazu mahata. Dimosi dia mazu mango ni Quechua. Tûka mwa mivu, bampangi bazonzaka Quechua badinga bantu bazonzaka Quechua mu teritware. Kâ ngatu batumamana misiku mia guvernema basa nsobolo mu mpila ya bakila bantu bo. (Rom. 13:1) Buna, mpangi zakaka za tiyula tala ti musamu wo ka waketi’â bebesa tisalu mu teritware ko. Mu bungu ti bampangi batambula nsobolo zi basa, Yehova wasakumuna ngolo zawu za baka bantu bazonzaka Quechua.

¹⁶ Kevin, we mukuluntu mu timvuka tia zu dia Quechua, yandi mpe lwaka lweri nandi ntiana bantu bakaka. Banguri: “Natâ ti bwawu bu ‘bwe tubakila bantu bazonzaka Quechua?’” Ngano Kevin nti kasa? Têle: “Nabambukila Bingana 3:5. Mpe nabanza Mose. Yehova wamuhana lutwalusu lweri monekeka ntiana’eti ka lweri’â lwa delakana ko. Watâ kwe Mose mu dukisa bala ba Isarele ku Ezipte tii ha mubu wa mbwaki, musamu wo wamoneka ntiana’eti ka baketi’â vuka ko kwe Bisi-Ezipte beri kwe balandi ku manima. Kâ, watumama, mpe Yehova wasakumuna tumama kwandi mu mpila ya nzitukulu.” (Ndu. 14:​1, 2, 9-11, 21, 22) Kevin wa kubama weri mu sa nsobolo mu tisalu tiandi tia samuna. Ntia ndandu zamoneka? Têle: “Nayituku mu mona bwe Yehova katusakumuna. Mu ntama, diata kwakwingi tweri kwe diati mu tisalu tia samuna, ntangu zakaka mu baka kwa muntu wumosi peleko bole bazonzaka Quechua. Bwawu bu mu teritware ze na bantu babingi bazonzaka Quechua tukwendaka. Buna, tayizi sa bimoko bibingi, vizite na ndongokolo za Bibila, mpe bantu babingi beri kwizaka ku tukutakanu tweto.” Bu tudiatilaka mu timinu, Yehova senda kwa katusendaka.

17. Nti tulongokele mu timoko ti?

¹⁷ Misamu mitatu mia mfunu tutaluzuri mi tusongele bwe tutatamana mu diatila mu timinu. Kâ tufweti tatamana mu diatila mu timinu mu misamu miamiansoni mia luzingu lweto, mu tifwani bu tusolaka nsaka, bu tubongaka nzengolo zitariri lukolo peleko lukolo lwa bala beto. Nzengolo ni nzengolo yi tufweti bonga yifweti sikamana mu mio mi tulendi mona kâ mpe mu tindiku tieto na Yehova, mu malongi mandi na mu kani diandi dia tu kipa. Tamana sila bo, mbo tubâ na lenda dia ‘diatila mu nkumbu ya Yehova Nzambi’eto mankululu nsuka pele.’—Mi. 4:5.