Bakisa mulongoki’aku wa Bibila mu bonga nzengolo ya sarila Yehova

1-2. a) Mu bungu dia nti milongoki miakaka mia Bibila mikekamaka mu bonga nzengolo ya sarila Yehova? b) Nti tutaluzula mu timoko ti?

NGANO wayizi kekama mu bonga nzengolo ya bâ mbangi ya Yehova? Kampe bunkuta bweri naku ti ndiku zaku peleko kanda diaku dia ku telamana. Peleko wayizi mona ti ka waketi’â lenda ko mu diatila mu mitieno mia Nzambi. Tala ti ni bo wena, mbo bakula mu bungu dia nti milongoki mia Bibila miakaka mikekamaka mu bonga nzengolo ya sarila Yehova.

² Yezu wazaba ti bunkuta bwa mpila yo bulendi kabakasa muntu mu kula mu timpeve. (Mat. 13:​20-22) Kâ ka yambirika bô beri kekamaka mu mu landa ko. Buna, wayizi songela kwe milongoki miandi, bwe baketi ba bakisila 1) mu zaba misamu mieri ba kabakasaka mu kula mu timpeve, 2) mu kurisa luzolo lwawu mu Yehova, 3) mu zaba misamu miyôkele mfunu, mpe 4) mu telamana nkwamusu zawu. Bwe tulendi landila malongi ma hana Yezu kwe milongoki miandi mu ntangu yi tusarila buku dia Bâ mu nsayi ntangu zazansoni! mu bakisa milongoki mia Bibila mu bonga nzengolo ya sarila Yehova?

BAKISA MULONGOKI’AKU MU ZABA MISAMU MITA MU KABAKASA MU KULA MU TIMPEVE

3. Ngano nti bieri kabakasaka Nikodeme mu bâ mulongoki wa Yezu?

³ Nikodeme, mfumu yimosi yeri ya Bayuda, kâ musamu wumosi weri mu kabakasaka mu bonga nzengolo ya landa Yezu. Mu ntangu Yezu yi kabatika tisalu tiandi tia samuna, ngonda 6 kwa za yôka Nikodeme watambula ti Yezu weri Masiya. (Za 3:​1, 2) Kâ, Nikodeme wasola mu monekena Yezu mu mansweki mu bungu dia ‘bunkuta bwa Bayuda.’ (Za 7:13; 12:42) Kampe wayizi banza ti bima biabingi kaketi hombesa bu kaketi bâ mulongoki wa Yezu.a

4. Bwe Yezu kabakisila Nikodeme mu bakula mio mieri kêlaka Nzambi mu yandi?

⁴ Nikodeme musiku wa kazaba, kâ nsatu lubakusu lweri nandi mu bakula nti Yehova keri kêlaka mu yandi. Bwe Yezu kamubakisila? Yezu wayôkesa ntangu na Nikodeme, ni bu sa ti mpimpa yeri. Mpe Yezu watomo mu têla misamu mi kafweti sa mu bâ mulongoki’andi: kasoba mabanza, kabatusu, mpe kakurisa timinu tiandi mu Mwana wa Nzambi.—Za 3:​5, 14-21.

5. Bwe tulendi bakisila mulongoki wa Bibila mu zaba misamu mita mu kabakasa mu kula mu timpeve?

⁵ Ni bu sa ti mulongoki wa Bibila Matsonoko ma kazebi, nsatu lubakusu ye nandi mu bakula misamu mita mu kabakasa mu kula mu timpeve. Tisalu peleko nkwamusu za kanda zilendi sa ti kalembo lungisa makani mandi ma timpeve. Buna ntiana Yezu, bonga ntangu ya bakisa mulongoki’aku. Tulendi mu tikisa mu dia tima, peleko mu sa nzietolo. Buna tulendi sarila ntangu yo, mu mu bakisa mu zonzela nkwamusu zandi. Tindisa mulongoki’aku mu sa nsobolo zo zifwanane, kâ mu ku yangirika ko, ka mu songela luzolo lwandi mu bungu dia Yehova.

6. Bwe lendi bakisila mulongoki mu bâ na butindi bwa bonga nzengolo ya sarila Yehova? (1 Bisi-Korente 16:13)

⁶ Mulongoki wa Bibila bu wubâ na lukwikulu ti Yehova mbo kamubakisa mu landa mitieno mia Bibila, mbo kabâ na butindi bwa sarila misamu mi kalongokele. (Tanga 1 Bisi-Korente 16:13.) Tisalu tiaku tilendi moneka ntiana tisalu tia profesere. Banza’eti ntangu yi weri ku lukolo; ntia profesere weri tomo zoloko? Kampe ni profesere yo yeri ku bakisaka na luvivululu mu bâ na lukwikulu mu lenda diaku. Mpila mosi mpe, mulongi wa mbote wa Bibila ka wulongesaka kwa misamu Nzambi mi kazololo tayirika ko, kâ mulongoki’andi katindisaka mu bâ na lukwikulu ti na lubakusu lwa Yehova, lendi sa nsobolo zifwanane mu luzingu lwandi. Bwe tulendi bwa sila?

BAKISA MULONGOKI’AKU MU KURISA LUZOLO LWANDI MU YEHOVA

7. Bwe Yezu kabakisila bantu beri mu wirikilaka mu kurisa luzolo lwawu mu Yehova?

⁷ Yezu wazaba ti luzolo mu bungu dia Nzambi ni lo lwaketi bakisa milongoki miandi mu sarila misamu mi beri longokaka. Mbo keri vulu zonzelaka misamu miaketi bakisa milongoki miandi mu kurisa luzolo lwawu mu bungu dia Tata’awu die ku mazulu. Mu tifwani, wafwanakasa Yehova na bakala dihanaka bima bia mbote kwe bala bandi. (Mat. 7:​9-11) Bantu bakaka beri wirikilaka Yezu, ka babaka luzolo lu hanaka tata ko. Banza’eti bwe bantu beri wirikilaka Yezu bayizi mona ku mutima, mu ntangu Yezu yi kabonga tifwani tia tata dimosi dieri na tiari tia mutima, dita bwana mwana’andi wayizi humuka. Lenda dieri nawu dia mona tiari tia mutima tia Yehova mu bungu dia bala bandi bê ha mutoto.—Like 15:​20-24.

8. Bwe lendi bakisila mulongoki wa Bibila mu kurisa luzolo lwandi mu Yehova?

⁸ Nge mpe lendi bakisa mulongoki wa Bibila mu kurisa luzolo lwandi mu bungu dia Yehova, mu ntangu yi zonzela bifu bia Nzambi mu ndongokolo’eno ya Bibila. Mu muna ndongokolo’eno ya Bibila, mu bakisa mu sa tintwari ha kati dia misamu mi kata longoka na luzolo lwa Yehova. Bu luzonzela nkûlulu, mu bakisa mu bakula kabwe nkûlulu yita mu tarila. (Rom. 5:8; 1 Za 4:10) Mulongoki bu kamona ti luzolo lwa Yehova yandi luta tomo tarila kampe mbo katomo zolo Yehova.—Nga. 2:20.

9. Nti biayizi bakisa bakala dimosi di batâka nkumbu Michael mu sa nsobolo mu luzingu lwandi?

⁹ Tabongeno tifwani tia Michael, bâka ku Indonesie. Mu kanda dia Mbangi za Yehova kakurila, kâ ka batusu’â ko. Bu kabâ na mvula 18, wayenda ku nsi ya nzenza mu kwe sala ntiana chauffeur. Ha manima wayizi kwela mpe wavutu bîka kanda diandi mu kwe sala ku nsi ya bunzenza. Mu ntangu yo, mukento’andi na mwana’andi wa mukento babatika mu longoka Bibila mpe mu kula mu timpeve. Ha manima ma lufwa lwa nguri’andi, Michael wakâla ku nzo mu kipa tata’andi mpe watambula ndongokolo ya Bibila. Timoko tia 27 tia buku dia Bâ mu nsayi ntangu zazansoni! tiayizi tomo simba mutima wa Michael bu bataluzula lweka lwa “Yika ndilu” lwa timoko tio. Bu kayizi dimbitila mu mpila Yehova yi kamwina mpasi mu ntangu yi kahana mwana’andi, Michael wayizi dila. Wayizi tomo tonda mu bungu dia nkûlulu mpe wayizi sa nsobolo mu luzingu lwandi, ha manima wayizi batusu.

BAKISA MULONGOKI’AKU MU ZABA MISAMU MIYÔKELE MFUNU

10. Bwe Yezu kabakisila milongoki miandi mu zaba misamu miyôkele mfunu? (Like 5:​5-11) (Tala mpe tifwani.)

¹⁰ Milongoki mia ntete miazaba ti Yezu weri Masiya, kâ nsatu lubakusu lweri nawu mu tûla tisalu tia samuna ha tibuka tia ntete. Yezu bu kabatikisa mu mu landa mu tisalu tia ntangu zazansoni, Piere na Andre batibêla milongoki tûka mwa ntangu. (Mat. 4:​18, 19) Kampe, tintwari beri salaka na Zaki na Za mu tisalu tia loba mbizi tieri tomo butaka mbutu. (Mak. 1:​16-20) Piere na Andre bu ‘babika tisalu tiawu tia loba mbizi’ mu landa Yezu, ntembe kani bayizi kubika misamu miamiansoni mu kipa nsatu za makanda mawu. Nti biababakisa mu tûla tisalu tia samuna ha tibuka tia ntete kani badinga mbongo? Tinsamu tia Like beto titêlaka ti Yezu wasa timangu tiayizi kurisa lukwikulu lwawu mu lenda dia Yehova dia kipa nsatu zawu.—Tanga Like 5:​5-11.

11. Bwe tulendi sarila bifwani bieto mu kurisa timinu tia mulongoki’eto?

¹¹ Ka tulendi’â tasa bimangu ntiana Yezu ko, kâ tulendi zonzela mpila Yehova yi kabakisilaka bô bamutûlaka ha tibuka tia ntete mu luzingu lwawu. Mu tifwani, ngano nge ta bambuka mpila Yehova yi kakubakisila bu wabatika mu kwiza ku tukutakanu? Kampe wayizi monekena mfumu’aku ya tisalu mu mu têla ti kuvutu’â sala heure zazingi ko yôka zo zi lwawisana tala ti wukabakase ntangu yi fweti kwenda ku tukutakanu. Bu kwe zonzele binsamu bio kwe mulongoki’aku, mu songela kabwe timinu tiaku tiayizi kurila bu wamona mpila Yehova yi kakubakisila mu tûla nsambululu’andi ha tibuka tia ntete mu luzingu lwaku.

12. a) Mu bungu dia nti tufweti nataka bisamuni bia swaswana bu tukwe saka ndongokolo ya Bibila? b) Bwe tulendi sarila video mu tomo longesa mulongoki’eto? Hana tifwani.

¹² Mulongoki’aku ndandu yayingi mpe kabaka bu kawirikila bwe Bakristo bakaka bayizi sa nsobolo mu zaba misamu miyôkele mfunu mu luzingu lwawu. Buna nataka mpangi za swaswana mu ndongokolo’eno ya Bibila. Ba lomba mu zonzela kabwe bazabila matieleka mpe bwe bayizi tûla tisalu tia Yehova ha tibuka tia ntete mu luzingu lwawu. Kâ mpe, bonga ntangu ya tala video za buku dia Bâ mu nsayi ntangu zazansoni! mu lweka lwa “Yika ndilu” peleko “Zaba biakaka” na mulongoki’aku. Mu tifwani, bu lulongoka timoko 37, lendi zonzela mitieno mie mu video Yehova mbo kakipa nsatu zeto.

BAKISA MULONGOKI’AKU MU TELAMANA NKWAMUSU

13. Bwe Yezu kakubikila milongoki miandi mu nkwamusu zaketi ba tûrila?

¹³ Yezu wabangula mbala zazingi kwe milongoki miandi, ti bantu mbo baketi bakwamisa, kâ mpe na makanda mawu. (Mat. 5:11; 10:​22, 36) Ntangu fioti ntete lufwa lwandi, Yezu watâ kwe milongoki miandi ti balendi ba honda mu bungu ti Yehova beri sarilaka. (Mat. 24:9; Za 15:20; 16:2) Wabalwengesa mu sa keba mu tisalu tiawu tia samuna. Mu tifwani, wabatêla mu lembo zonza na muntu ni muntu wuta telamana nkwikulu zawu mpe mu sa keba mu mio mi beri tâka na mi beri yirikaka ngatu batatamana mu samuna.

14. Bwe tulendi kubikila mulongoki’eto mu nkwamusu zilendi mu tûrila? (2 Timote 3:12)

¹⁴ Tulendi bakisa mulongoki wa Bibila, mu kubama mu bungu dia nkwamusu, bu tumuzonzela misamu mi kalendi wâ kwe ndiku zandi na kwe kanda diandi. (Tanga 2 Timote 3:12.) Ndiku zakaka za ku tisalu zilendi mu sehesela mu bungu ti ngolo kata sarila mu bêla ntiana buta watêla Bibila. Mpe, bantu bakaka ba mu kanda balendi tsâla nkwikulu zandi zisikamane mu Bibila. Tamana tikubikila milongoki mieto mu bungu dia nkwamusu, mbo bazaba za telamana bu zitûla.

15. Nti bilendi bakisa mulongoki wa Bibila mu telamana nkwamusu za kanda?

¹⁵ Tala ti mulongoki’aku nkwamusu kata bwabana na zo mu kanda, mu bakisa mu dimbitila mu bungu dia nti kanda diandi die mu nkesi bu kata longoka Bibila na Mbangi za Yehova. Balendi banza ti wubakasa bamuwubakase, peleko kampe mbanzulu za mbi ze nawu mu bungu dia Mbangi za Yehova. Kanda dia Yezu mpe ka dieri’â yangalalaka ko mi misamu mi keri yirikaka. (Mak. 3:21; Za 7:5) Longesa mulongoki’aku mu zonza mu mpila ya mbote na mu bâ na luvivululu kwe bantu bakaka.

16. Bwe tulendi bakisila mulongoki wa Bibila mu zonzela nkwikulu zandi mu mpila ya mbote?

¹⁶ Ni bu sa ti muntu wa kanda zololo kazaba matieleka, mulongoki mbo kasongela ndwenga bu kalembo mu têla misamu miamiansoni mi kazebi. Tala ti kâni, bantu bô ka babakula misamu miamiansoni ko, mpe ka badinga ko mu ba na timoko tiakaka. Buna tindisa mulongoki’aku mu zonzela nkwikulu zandi mu mpila yi mu bakisa mu ba na timoko tiakaka na muntu wo. (Kol. 4:6) Mu tifwani lendi lomba kwa kwe muntu wa kanda diandi mu kota mu site ya jw.org. Mbo wu babakisa mu longoka misamu mitariri Mbangi za Yehova mu mpila ya bawu beni.

17. Bwe lendi kubikila mulongoki wa Bibila mu telamana mabanza ma bungungu malendi bâ na bantu bakaka mu bungu dia Mbangi za Yehova? (Tala mpe tifwani.)

¹⁷ Lendi sarila lweka lwa “Biyuvu bi vulu yulaka bantu” mu jw.org, mu bakisa mulongoki’aku mu kubika mvutu zilembolo mpasi mu biyuvu bia bantu ba kanda diandi peleko bia ndiku zandi za tisalu. (2 Tim. 2:​24, 25) Ku nsuka ya muna timoko tia buku dia Bâ mu nsayi ntangu zazansoni! taluzuleno lweka lwa “Tala ti bakutêlele.” Tindisa mulongoki’aku mu kârilaka mvutu mu ntêlo za yandi beni. Kukekamandi mu mu songela mpila zakaka zi kalendi hanina mvutu. Mpila yo ya sila mbo yi mu bakisa mu tomo zonzela timinu tiandi na lukwikulu lwalwansoni.

18. Bwe lendi tindisila mulongoki’aku mu zonzela timinu tiandi mu tisalu tia samuna? (Matie 10:27)

¹⁸ Yezu watâ kwe milongoki miandi mu samuna nsangu za mbote kwe bantu babansoni. (Tanga Matie 10:27.) Mulongoki kamana kulu batika mu samuna, mbo kalongoka mu sikirila Yehova. Bwe lendi bakisila mulongoki’aku mu bâ na kani dio? Bu batâka mu timvuka ti tisalu tia nzitukulu tie kô, tindisa mulongoki’aku mu dimbitila nti kalendi sa mu bâ tisamuni. Mu songela mu bungu dia nti wayizi bâ musamu wa fioti kwe bantu bakaka mu batika mu samuna mu ntangu yo. Lendi baka ndongosolo yibakisaka mu zonza ha matu ma bantu babingi yi bahanaka ku lukutakanu lwa ha kati-kati dia lumingu. Bu ka kwe lungisi kani dio, lenda di bâ nandi dia zonzela nkwikulu zandi na butindi bwabwansoni.

BÂ NA LUKWIKULU MU MULONGOKI’AKU

19. Bwe Yezu kasongela ti lukwikulu lweri nandi mu milongoki miandi, mpe bwe tulendi landila tifwani tiandi?

¹⁹ Ntete kenda ku zulu, Yezu watâ kwe milongoki miandi ti mbo bavutu bâ tintwari nandi. Ka beri’â bakulaka ko ti Yezu ni mwendo’awu wa ku mazulu keri zonzelaka. Ni bu sa ti milongoki miandi ka mieri’â bakulaka misamu miamiansoni ko, Yezu lukwikulu lweri nandi ti mbo batatamana mu sarila Yehova. (Za 14:​1-5, 8) Wazaba ti ntangu yeri nawu nsatu mu bakula misamu miakaka ntiana, tivuvu tiawu tia ku mazulu. (Za 16:12) Beto mpe tulendi bâ na lukwikulu mu nsatu ye na milongoki mieto ya sarila Yehova.

20. Bwe mpangi yimosi ya yikento ya ku Malawi yayizi songela lukwikulu mu mulongoki’andi wa Bibila?

²⁰ Lukwikulu lwe neto ti mulongoki’eto zololo mu yirika misamu mia mbote. Tabongeno tifwani tia mpangi yimosi ya yikento yibâka ku Malawi yi batâka nkumbu Chifundo. Yandi wabatika ndongokolo ya Bibila mu buku dia Bâ mu nsayi ntangu zazansoni! na ntwenia ya yikento ya Catholique yi beri tâka nkumbu Alinafe. Ku nsuka ya timoko 14, Chifundo wayula kwe mulongoki’andi bwe keri bongelaka nsambululu ya biteki. Alinafe wabaka nkesi mpe wavutula: “Meno kwa wuta tala!” Chifundo wabanza ti ndongokolo ya Bibila ni hana yaketi manisina. Kâ watatamana mu longoka na yandi na tivuvu ti mbo kabakula musamu wo ntangu bu yi kwe yôke. Ha manima ma mwa ngonda, Chifundo wamuyula tiyuvu tie mu timoko 34 titâka: “Ndongokolo’aku ya Bibila na ya Yehova Nzambi ya matieleka, ntia ndandu yakunatinini?” Chifundo watâ ti “Alinafe wazonzela misamu miamingi mia mbote, mu kati, ti Mbangi za Yehova ka zitambulaka mu sarila nsalulu zi yiminaka Bibila ko.” Ntangu fioti ha manima, Alinafe wabika mu sarila biteki mpe wabaka bateme.

21. Bwe tulendi bakisila mulongoki wa Bibila mu bonga nzengolo ya sarila Yehova?

²¹ Ni bu sa ti ni Yehova kurisaka, beto mpe tulendi bakisa mulongoki wa Bibila mu kula mu timpeve. (1 Kor. 3:7) Ka tusukinaka ko kwa mu mu longesa mio mita dinga Nzambi kayirika. Yandi tubakisaka mu kurisa luzolo lwa ngolo mu Yehova. Yandi tutindisaka mpe mu songela luzolo lo bu katûla Yehova ha tibuka tia ntete. Yandi mpe tulongesaka mu sikirila Yehova bu kabwabana na nkwamusu. Bu tusongela kwe mu mulongoki’eto ti lukwikulu lwe neto mu yandi, mu luzolo lwandi lwa sarila Yehova, lubakusu tumuhanaka lwa bâ na ngolo, na nsatu mpe na butindi bwa sola mu sarila Yehova.