Bwe Yehova katubakisilaka mu vivirila

1. Mu bungu dia nti twe na nsatu luvivululu, mpe nani lendi tu bakisa? (1 Piere 5:10)

MU NTANGU zi za mansukina, kanda dia Yehova luvivululu lwe nandi nsatu. Bakaka mpasi bata mona mu bungu dia timbevo tilembo waka. Bakaka mpasi bata mona mu bungu ti muntu bafwila. Bakaka mpe nkwamusu bata bwabana na zo zitûkaka kwe kanda diawu peleko ku guvernema. (Mat. 10:​18, 36, 37) Bâ na lukwikulu ti ntono mpasi zita bwabana na zo, Yehova lendi ku bakisa mu vivirila.—Tanga 1 Piere 5:10.

2. Luvivululu lwa Bakristo kwe lutûkaka?

² Luvivululu ni tifu tia korela na tia lunda tivuvu tieto ntono mpasi na nkwamusu. Lenda dia vivirila dia Bakristo ka ditûkaka mu ngolo za bawu beni ko; kâ kwe Yehova zitûkaka, Yandi tu hanaka ‘ngolo zo ziyôkele.’ (2 Kor. 4:7) Mu timoko ti, mbo tuzonzela misamu miyà mia kubika Yehova mu tu bakisa mu vivirila. Mpe bwe tulendi bakila ndandu mu muna misamu mio.

LUSAMBULU

3. Mu bungu dia nti tulendi tâ ti lusambulu timangu tiena?

³ Yehova wakubika musamu wa nzitukulu mu tu bakisa mu vivirila. Watuhana lenda dia zonza nandi ni bu sa ti bantu ba masumu twena. (Ebr. 4:16) Banza’eti: tulendi sambila Yehova ntangu zazansoni mpe mu bungu dia misamu miamiansoni. Lendi tu wirikila ntono zu di tuta sarila, mbuka yi twena, ni bu sa ti ha beto kaka twena peleko ku boloko. (Yon. 2:​1, 2; Bis. 16:​25, 26) Ni bu sa ti lwaka lwe neto mpe ka tuta lenda ko mu dukisa mabanza meto, Yehova lenda die nandi dia bakula misamu mi tuta zolo tâ. (Rom. 8:​26, 27) Wa matieleka lusambulu nkatika timangu tiena!

4. Bwe tuzabiri ti bu tusambilaka Yehova mu tu bakisa mu vivirila, mbo katubakisa?

⁴ Mu Zu diandi Yehova tu heni lukwikulu ti ‘tala ti tumulombele tima mu luzolo lwandi, beto kawâka.’ (1 Za 5:14) Ngano tulendi lomba kwe Yehova katubakisa mu vivirila? Ye! Mu bungu ti Yandi zololo tatatamana mu vivirila. Bwe tuzabiri wo? Bu tukorelaka nkwamusu, Yehova tuhanaka lenda dia hana mvutu kwe Satana, mbeni’andi. (Bin. 27:11) Ku lweka lwakaka Bibila mbo ditâka ti Yehova timina die nandi dia “songela ngolo zandi mu bungu dia bô bê na mitima mia lunga mu bungu dia Yandi.” (2 Nta. 16:​9, NWT) Tulendi bâ na lukwikulu ti Yehova ngolo ze nandi na nsatu mu tu bakisa mu vivirila.—Iza. 30:18; 41:10; Like 11:13.

5. Bwe lusambulu lulendi tu hanina tidzunu tia mutima? (Izaya 26:3)

⁵ Bibila ditêle ti bu tusambilaka na fuki mu bungu dia bima bitukwamisaka, ‘tidzunu tia Nzambi, tiyôkele mabanza mamansoni, mbo tikeba mitima [mieto] na mbanzulu [zeto].’ (Flp. 4:7) Tataleno bwe wuta zolo tâ. Bantu balembo sarilaka Yehova mpe babwabanaka na mpasi, misamu miamingi bayêlaka ngatu babâ na tidzunu. Bakaka mbo bayêlaka mu dukisa mabanza mamansoni mu mutu’awu ngatu babâ na tidzunu. Musamu wo wa nkatika wa mbi wena, mu bungu ti wulendi sa ti tabâ tintwari na ba Demo. (Fwanakasa na Matie 12:​43-45.) Kâ tidzunu ti tu hanaka Yehova bu tumusambilaka tiyôkele tidzunu ti tulendi baka mu mpila zakaka. Bu tusambilaka Yehova, songela tusongelaka ti lukwikulu lwe neto mu Yandi mpe lendi tu hana ‘tidzunu tia sikama.’ (Tanga Izaya 26:​3, NWT.) Mu sila bo, Yehova mbo katubakisaka mu bambukila matieleka ma talongoka mu Bibila. Matieleka mo mbo matubambulaka mu ntia mpila Yehova katuzololo, kâ mpe zololo ti katubakisa, ntiangu tubâka ba dzuna.—Mik. 62:​1, 2.

6. Nti lendi tâ mu lusambulu lwaku? (Tala mpe tifwani.)

⁶ Misamu milendi yirika. Timinu tiaku bu tikotaka mu ntontolo, ‘losa dema diaku kwe Yehova’ mpe sambila mu bâka tidzunu. (Mik. 55:22) Sambila mpe mu baka ndwenga zikubakisa mu telamana musamu’aku. (Bin. 2:​10, 11) Bu sambilaka Yehova mu bâka ngolo za korela, kuzimbakanakandi mu mu sila lusambulu lwa matondo. (Flp. 4:6) Dinga bidimbu bita songela ti, Yehova ni ke naku mu nkwamusu zaku, mpe mu vuturila matondo mu lubakusu lwandi. Kubikandi nkwamusu zaku zakukabakasa mu mona tusakumunu tu watoko baka.—Mik. 16:​5, 6.

ZU DIA NZAMBI

7. Bwe ndongokolo ya Bibila yilendi tu bakisa mu vivirila?

⁷ Yehova watuhana Zu diandi mu tu bakisa mu vivirila. Verse zazingi ze mu Bibila zitulongesaka ti Yehova mbo katubakisa. Tataleno tifwani timosi. Matie 6:8 (NWT) yitêle: “Tata’eno zebi bio bie neno nsatu ntete lwamulomba bio.” Yezu watâ misamu mio, tomono zaba Yehova yôka bantu babansoni. Tulendi bâ na lukwikulu ti, bu tubâka mu mpasi Yehova zebi nti bie neto nsatu mpe mbo katubakisa. Mabanza mamingi ma mpila yo me mu Bibila, malendi tu hana ngolo mu tatamana mu vivirila.—Mik. 94:19.

8. a) Hana tifwani tia mutieno wumosi wa Bibila wulendi tu bakisa mu vivirila. b) Nti bilendi tu bakisa mu bambukila mitieno mia Bibila bu tu bâka na mio nsatu?

⁸ Mitieno mia Bibila milendi tu bakisa mu vivirila. Mpe mitieno mio, milendi tu hana ndwenga zitubakisa mu bonga nzengolo za mbote. (Bin. 2:​6, 7) Mu tifwani: Bibila mbo ditulongesaka mu lembo bâ na lwaka mu bungu dia bilumbu bita kwiza, kâ mu sikirila Yehova bilumbu biabiansoni. (Mat. 6:34) Tamana bâ na tifu tia tangaka Bibila na tia dimbitilaka bilumbu biabiansoni, ka wubâ musamu wa mpasi ko kwe beto mu bambukila mitieno mie neto nsatu mu ntangu yi twe na mio nsatu.

9. Bwe binsamu bia mu Bibila biyikilaka lukwikulu lweto ngolo mu lubakusu lwa Yehova?

⁹ Bibila mbo dizonzelaka mpe binsamu bia bantu batûla lukwikulu lwawu mu Yehova mpe babaka lubakusu lwandi. (Ebr. 11:​32-34; Zaki 5:17) Bu tudimbitilaka mu binsamu bio, mbo tubâka na lukwikulu ti, Yehova ni “tiswamunu tieto mpe ngolo zeto, lubakusu lulembolo mpasi mu baka mu ntangu ya mpasi.” (Mik. 46:​1, NWT) Bu tudimbitila mu bifwani bia mbote bia bisari bia kwikama bia Yehova bia mu ntama, mbo tubâ na nsatu ya landa timinu tiawu na luvivululu lwawu.—Zaki 5:​10, 11.

10. Bwe tulendi sarila Bibila mu mpila ya nguria ya mbote?

¹⁰ Misamu milendi yirika. Tanga Bibila bilumbu biabiansoni, mpe sa lutangu lwa verse zita mona ti zilendi ku bakisa. Bantu babîngi verse ya tilumbu bataluzulaka mpe mbo yi babakisaka mu batika tilumbu na mabanza ma tindisaka. Mpangi yimosi ye na nkumbu Marie,a wasingasa musamu wo bu babaka bibuti biandi na cancer. Nti biamubakisa mu vivirila mu ntangu yi keri kipaka bibuti biandi mu bilumbu biawu bia mansukina? Yandi têle: “Bilumbu biabiansoni mu pari, verse yimosi ndieri tangaka mpe ndieri dimbitilaka mu mukanda wa Tataluzulaka Matsonoko bilumbu biabiansoni. Tifu tio tiakumbakisa mu tûla mabanza mani mu Yehova na mu misamu mia mbote mi nilongokaka mu Bibila, kani natûla mabanza mani mu misamu mia mpasi mi ndieri bwabanaka na mio.”—Mik. 61:2.

BAMPANGI MU TIMVUKA

11. Mu bungu dia nti we musamu wa mbote mu zaba ti ka twena beto kaka ko tuta bwabana na mpasi?

¹¹ Yehova tu heni bampangi mu timvuka batubakisaka mu vivirila. Bu tuzebi ti “timvuka tiatiansoni tia bampangi mu nza, mpasi ni zo mpe bata bwabana na zo,” musamu wo mbo wutubambulaka ti ka twena beto kaka ko. (1 Pi. 5:​9, NWT) Buna, tufweti bâ na lukwikulu ti musamu ni musamu wu tubwabana na wo, wa weka tûrila mpangi zakaka mpe wa bavivirila. Musamu wo wusongele ti beto mpe tulendi vivirila!—Bis. 14:22.

12. Bwe mpangi zeto zilendi tu bakisila mpe nti tulendi sa mu bungu dia bawu? (2 Bisi-Korente 1:​3, 4)

¹² Mpangi zeto zilendi tu bakisa mu vivirila mu nzila ya misamu mi batâka na mi basaka mu tu tindisa. Ntumwa Paulo wasingasa musamu wo. Matondo keri vulu vutulaka bu keri tangumunaka nkumbu za bantu bamubakisa bu keri ku boloko. Batindisa Paulo mpe bamuhana lubakusu lweri nandi nsatu. (Flp. 2:​25, 29, 30; Kol. 4:​10, 11) Lumbu ti, tulendi baka mpe lutindusu lwa bampwana’eto. Bu tubâka na nsatu lubakusu mu vivirila, tulendi sikirila mpangi zeto mpe bawu balendi tu sikirila mpe.—Tanga 2 Bisi-Korente 1:​3, 4.

13. Ngano nti biabakisa Maya mu vivirila?

¹³ Luzolo lu songelaka mpangi mu timvuka, lwayizi tomo tindisa mpangi Maya bâka ku Russie. Bayizi tsala nzo’andi kwe ba polisie mu 2020 mpe bayizi mu fundisa mu bungu dia timinu tiandi. Maya têle: “Bu nalembo vutu bâ na ngolo, bampangi bakuntâ mbila mpe bakuntsonekena mu zaba bwe ndieri haninaka. Wa nazaba ti mu kanda dia luzolo ndieri, kâ mu 2020 nayizi tomo wa bakula.”

14. Nti tulendi sa mu baka lubakusu lwa mpangi zeto? (Tala mpe tifwani.)

¹⁴ Misamu milendi yirika. Mu ntangu yita vivirila, kubândi mala na mpangi zaku za timvuka. Kukekamandi mu lomba lubakusu kwe bakuluntu. Bakuluntu balendi bâ ‘tiswamunu mu titembo, tiswamunu mu mvula ya ngolo.’ (Iza. 32:​2, na note) Bambuka ti mpangi zaku, nkwamusu mpe bata vivirila. Tamana sa mbote kwe muntu we na nsatu lubakusu, mbo tubâ na mabanza ma mbote bu tuta vivirila mpasi za beto beni.—Bis. 20:35.

TIVUVU TIETO

15. Bwe tivuvu tiabakisila bantu ba kwikama, mu kati na Yezu? (Bahebre 12:2)

¹⁵ Yehova watuhana tivuvu tia ngolo titubakisaka mu vivirila. (Rom. 15:13) Bambuka bwe tivuvu tiabakisila Yezu mu vivirila tilumbu tiayôka mpasi mu luzingu lwandi ha mutoto. (Tanga Bahebre 12:2.) Yezu wazaba ti kwikama kwandi, nkumbu ya Yehova kwaketi santukisa. Yezu na timina diadiansoni keri kêlaka mu kâla ku zulu mpe ha manima mu yâla tintwari na mpangi zandi mu Timfumu tia ku mazulu. Mpila mosi mpe, tivuvu tieto tia mu nza ya môna bakisa titubakisaka mu vivirila mpasi zi tubwabanaka na zo mu nza ya Satana.

16. Bwe tivuvu tia bakisila mpangi yimosi mu vivirila, mpe nti talongoka mu misamu mi katêle?

¹⁶ Tataleno bwe tivuvu tiabakisila mpangi ya yikento ye na nkumbu Alla yibâka ku Russie mpe ye na bakala di batûla ku boloko. Mu ntangu musamu wo watûla, Alla têle: “Tifu tia sambila na tia dimbitila mu bungu dia tivuvu tieto mbo tikumbakisaka mu lembo tomo bâ wa nôka. Nzebi ti ha manima ma mpasi zi, misamu mia mbote mbo mitûla. Yehova mbo kanunga mpe beto mpe mbo tununga.”

17. Bwe tulendi songela ti matondo tuvutulaka kwe Yehova mu tivuvu ti katuhana? (Tala mpe tifwani.)

¹⁷ Misamu milendi yirika. Bonga ntangu ya dimbitila mu bilumbu bia toma bi kukanisini Yehova. Timona mu nza ya môna mpe banza mu tusakumunu tu baka. Nkwamusu ni nkwamusu zi tubwabana na zo lumbu ti, za “ntangu fioti kwa zena mpe ka zena dema ko.” (2 Kor. 4:​17, NWT) Sa miamiansoni mi lenda mu samunina bantu bakaka. Banza’eti luzingu lwa mpasi luta bwabana na bantu balembo sarilaka Yehova, misamu mia mpasi bata bwabana na mio kâ ka bazebi’â ko nti Yehova kakanisini mu bungu dia bantu. Tulendi ba tindisa mu zaba misamu miamingi mitariri Timfumu tia Nzambi na makani mandi ni bu sa ti bimoko bia nkufi kwa bie neto na bawu.

18. Mu bungu dia nti tulendi tûla lukwikulu lweto mu makani ma Yehova?

¹⁸ Bu kamana vivirila mpasi zazansoni, Yobe watâ kwe Yehova: “Bwawu bu nzebi ti nge lenda die naku mu misamu miamiansoni mpe ka kwena tima ti waya ko ti lembana mu yirika.” (Yobe 42:​2, NWT) Yobe wayizi longoka ti, ka kwena tima ko tilendi kabakasa Yehova mu lungisa makani mandi. Musamu wo wulendi tuhana ngolo za vivirila. Mu tifwani, banza’eti mukento wumosi we na timbevo mpe we mu bunôkena mu bungu ti ba doktere babingi balembane mu mu buka. Kâ doktere dimosi die na luzabu lwalwingi, didzukuri nti bita tulumuna timbevo tiandi mpe dimutêlele ti balendi mu buka; ni bu sa ti ntangu yayingi yifwanana mu wasa, mbo kabâ na butindi. Bwawu bu, lendi vivirila na tivuvu ti mbo kawasa. Mpila mosi mpe, lukwikulu lweto na tivuvu tieto mu nza ya môna mbo bitubakisaka mu vivirila.

19. Nti bie neto nsatu mu vivirila?

¹⁹ Ntiana bu tumweni wo, Yehova beto kabakisaka mu vivirila mu nzila ya lusambulu, ya Zu diandi, ya bampangi, na mu nzila ya tivuvu tieto. Tamana tomo sarila bima bio, Yehova mbo katubakisa mu telamana nkwamusu zazansoni tii bu tûla tilumbu ti kakatula mpasi zazansoni mu nza ya Satana.—Flp. 4:13.