Mu bungu dia nti tufweti kwendaka ku tukutakanu ku Nzo ya Nsambululu?

Mbala zole mu lumingu, Mbangi za Yehova tukutakanu tu bâka nawu peleko nsambululu, mu mbuka zawu za nsambululu zi batâka Nzo za Nsambululu. Ngano nti biyôkaka kûna, mpe bwe tulendi kwa bakila ndandu?

• Nti biyôkaka ku Nzo ya Nsambululu?

• Mu bungu dia nti fweti kwa kwendaka?

• Misamu mi tâka bampwana’aku

Nti biyôkaka ku Nzo ya Nsambululu?

Nzo ya Nsambululu mbuka yena yi balongokelaka mu sarila ndongosolo za Bibila. Tukutakanu tuyôkaka kûna tulendi ku bakisa mu:

• longoka matieleka mu Nzambi.

• bakula nsasa ya misamu mia bwawu bu.

• bâ muntu wa mbote.

• dzukula ndiku ziyôkele.

Ngano wa zebi? Mbuka ya lukutakanu ya Mbangi za Yehova, Nzo ya Timfumu batâka yo mpe, mu bungu ti Timfumu tia Nzambi bavulu zonzelaka kûna.​—Matie 6:9, 10; 24:14; Like 4:43.

Mu bungu dia nti fweti kwa kwendaka?

Ndongosolo mbo yikubakisa. Mitieno mia Bibila mi bazonzelaka kûna mbo mikubakisa mu “baka ndwenga.” (Bingana 4:5) Diangana, Bibila dilendi tomo ku bakisa mu bonga nzengolo za mbote. Bibila dilendi ku bakisa mpe mu baka mvutu za biyuvu bia nguri bia luzingu, ntiana:

• Ngano nsasa ya luzingu ni ye?

• Ngano Nzambi tulumunaka mpasi zeto?

• Bwe tubwanaka bu tufwaka?

Tala mitu-diambu miakaka mia binzonzi bia lukutakanu bia nsuka ya lumingu:

• Mu bungu dia nti Bibila difweti tu twarisa?

• Kwe tulendi bakila lubakusu mu ntangu ya mpasi?

• Misamu mi yirikaka Timfumu tia Nzambi mu bungu dia beto bwawu bu.

“Ndiku’ani yimosi ya ku lukolo yayiza ku tukutakanu. Penepene na meno kazakala, na kanda diani, mpe walanda lukutakanu mu mikanda mieto. Yandi wakuntêla ti watomo susumuka mu mvutu zeri hanaka bantu ku lukutakanu. Yandi wavutu tâ ti mu dibundu diandi, bantu ka bena na mikanda mia ndongokolo ya Bibila ko ntiana beto.”​—Brenda.

Ngano wa webi? Nkotolo mu Nzo ya Nsambululu ofele yena, mpe ka kubâka nsinsani ko.

Bantu bakaka mbo bakutindisa. Bibila musamu wakaka ditâka, wusaka ti takutakana ni mu “titindisaka beto na beto.” (Bahebre 10:24, 25) Bindiku bia mbote na bantu batûlaka Yehova na bampwana’wu ha tibuka tia ntete, nkatika lutindusu lwena.

“Ku nsuka ya tilumbu, wa fwatika nivulu bâka mpe mu tiari nibâka, kâ bu nibâka na bantu ku Nzo ya Nsambululu, bubote nimonaka. Bu nikotaka ku Nzo, nsayi yi bâka nani mpe wa kubama nibâka mu bungu dia tilumbu tilanda.”​—Elisa.

Ngano wa zebi? Mu nza yayansoni, bimvuka yôka 120 000 bie kô bia Mbangi za Yehova; mboko mbuka za nsambululu yôka 60 000 ze mô. Mivu miamiansoni, kampe Nzo za Nsambululu 1 500 batungaka mu bungu ti lutangu lwa bantu bakwizaka ku tukutakanu kula kwa luta kwe kuri.a