Nti fweti sa mu baka luzingu lwa mankululu?
Mvutu ya Bibila
Bibila dikanisini: “Wô yidika mio mi zoloko Nzambi, mbo kabaka [luzingu lwa mankululu].” (1 Za 2:17, Holy Bible—Easy-to-Read Version) Ngano Nzambi nti kazololo wasa?
Longoka mu zaba Nzambi na mwana’andi Yezu. Mu lusambulu kwe Nzambi, Yezu watâ: ‘Luzingu lwa mankululu luzololo tâ: balongoka mu ku zaba nge, Nzambi ya yimosi ya matieleka, na Yezu Kristo wu watambika.’ (Za 17:3) Ngano bwe lendi ‘longokela mu zaba’ Nzambi na Yezu? Lendi longoka mu ba zaba bu longoka Bibila na bu sarila malongi mo mu luzingu lwaku.a Bibila mbo dizonzelaka mabanza ma mvangi’eto, Yehova Nzambi, Yandi hanaka luzingu. (Bisalu 17:24, 25) Bibila mbo dituzonzelaka mpe mwana’andi Yezu weri longesaka misamu mia luzingu lwa mankululu.—Za 6:67-69.
Sarila timinu mu nkûlulu ya Yezu Kristo. Yezu wayiza ha mutoto mu samuna na mu hana luzingu lwandi mu kûla bantu. (Matie 20:28) Mukayulu wa nkûlulu ya Yezu wahana bantu bweso bwa bâ na luzingu lwa mankululu ku Paradi ha mutoto.b (Mikunga 37:29) Yezu watâ: “Nzambi watomo zolo nza ntiangu kahana Mwana’andi wa wumosi, ngatu bô babansoni basarilaka timinu mu yandi ka bafukandi, kâ babaka luzingu lwa mankululu.” (Za 3:16, NWT) Verse yitêle ti kufweti’â kwa wakwikila mu Yezu ko. Fweti ‘sarila timinu mu yandi’, bu sola mbêlo yidelakanaka na ndongosolo zandi mpe na luzolo lwa Tata’andi.—Matie 7:21; Zaki 2:17.
Tunga tindiku tia ngolo na Nzambi. Nzambi zololo ti tapusana kwe Yandi mpe ta bâ ndiku’andi. (Zaki 2:23; 4:8) Nzambi mankululu kazingaka. Kani kabwe ka lendi’â kafwa ko, mpe zololo ti ndiku zandi zabâ na luzingu lwa mankululu. Mu Zu diandi, Nzambi mbo katâka misamu, mi kazolo mu bungu dia bantu babansoni bamudingaka: “Bika lwabâ mu nsayi ntangu zazansoni.”—Mikunga 22:26.
Misamu milembolo mia delakana mu bungu dia luzingu lwa mankululu
Musamu wulembolo wa delakana: Ngolo za bantu peleko sianse mbo yisa ti bantu babaka luzingu lwa mankululu.
Musamu wa matieleka: Ni bu sa ti mayela ma Badoktere mbo mahanaka tivuvu tia bâ na luzingu lwa mwa lwa lula, ka basa ko ti bantu babâ na luzingu lwa mankululu. Nzambi kwa lendi hana luzingu lwa mankululu mu bungu ti Yandi kwa we “titeko tia luzingu.” (Mikunga 36:9) Yandi tu kanisini ti mbo kakatula lufwa mpe mbo kahana luzingu lwa mankululu kwe bantu ba kwikama.—Izaya 25:8; 1 Za 2:25.
Musamu wulembolo wa delakana: Bantu kwa ba mukanda nitu mosi babaka luzingu lwa mankululu.
Musamu wa matieleka: Nzambi kasolaka bidiri ko. Kâ, mbo katambulaka bantu ba makanda mamansoni bamutinaka mpe basarilaka buderede. (Bisalu 10:34, 35) Bantu ba mahata mamansoni mpe ba bikulu biabiansoni batumamanaka Nzambi balendi baka luzingu lwa mankululu.
Musamu wulembolo wa delakana: Luzingu lwa mankululu ka lubâ lwa nsayi ko.
Musamu wa matieleka: Kabu dia luzingu lwa mankululu kwe Nzambi diatûka, Yandi tuzololo mpe zololo ti tabâ mu nsayi. (Zaki 1:17; 1 Za 4:8) Zebi ti ngatu tabâ mu nsayi tufweti bâ na tisalu tia mbote. (Ekleziaste 3:12) Ntiangu kakanisini ti bantu babaka luzingu lwa mankululu ha mutoto mbo babâ na tisalu tia mbote tibatâ nsayi mpe tinata ndandu za mbote kwe bawu na kwe kanda diawu.—Izaya 65:22, 23.
Bô babâka luzingu lwa mankululu mbo batatamana mu longoka misamu mia môna mitariri Mvangi’eto mpe mitariri bima bi kasala. Nzambi wasala bantu na nsatu ya luzingu lwa mankululu na ya longoka misamu mi mu tariri, ni bu sa ti “ka basa zaba bisalu bia sala Nzambi ya matieleka ko ku mbatukulu tii ku mansuka.” (Ekleziaste 3:10, 11) Buna, bô babaka luzingu lwa mankululu mbo batatamana mu longoka bima bia mbote na mu yirika misamu mia mbote.
a Mbangi za Yehova mbo zihanaka ndongokolo ya Bibila ya mpamba kwe bantu. Mu baka nsangu zakaka, tala video Bwe ndongokololo ya Bibila yisalamanaka?
b Tala timoko tie na mutu-diambu “Bwe Yezu katuvukisila?”