Mikanda mu bungu dia Mukanda wa lukutakanu lwa Luzingu na tisalu

3-9 JANVIER

BIMVWAMA BIA ZU DIA NZAMBI | MFUNDISI 15-16

“Teka muntu​—Musamu wa mbi!”

w12-F 15/4 8 par. 4

Teka muntu​—Tidimbu timosi tia ntangu ya mansukina!

⁴ Ntete, tazonzeleno Dalila, mukento wumosi weri zoloko Samsone. Kampe bu bayizi zaba ti mukento wo ka weri’â tomo mu zoloko ko, mfunu tanu za Bafiliste zamuhana mbongo ngatu kabatêla mu bungu dia nti Samsone kabêla na ngolo za nzitukulu. Kani diawu ni mu fukisa mfundisi yo yeri nwanaka mu kengerela kanda dia Nzambi. Dalila watambula. Mbala zitatu wayêla mu lomba kwe Samsone kamutêla nsweki’andi, kâ walembana. Kâ mukento wo “wamukwamisa ntangu zazansoni mu nzonzolo mpe wamusa tiya.” Ha manima, Samsone “wafwatika mpe ka lenda ko mu vutu kanga mutima.” Buna wamutêla ti nsuki zandi ka batoko’â za zenga ko, mpe bu baketi za mu zenga, mbo kaketi hombesa ngolo zandi. Ha manima, Dalila wamusekesa ha malu mandi, wamuzenga nsuki, mpe wamuhana ha moko ma mbeni zandi, yandi ka belokele lwaka misamu miaketi tûrila Samsone. (Mfu. 16:4, 5, 15-21) Ngano musamu wu kayirika, ka wena wa nkatika wa mbi ko? Suka diandi dia mbongo diamutuma mu têka muntu weri tomo mu zoloko.

w05-F 15/1 27 par. 5

Misamu mia nguri mia mukanda wa Mfundisi

14:16, 17; 16:16. Sa tiya kwe muntu mu bidilu na mu nkwamusu kulendi bebesa tindiku tieto na Yandi.​—Bingana 19:13; 21:19.

w12-F 15/4 11-12 par. 15-16

Teka muntu​—Tidimbu timosi tia ntangu ya mansukina!

¹⁵ Bwe tulendi bêla ba kwikama kwe muntu wu takwela? Zu dia Nzambi ditêle: “Yangalala na mukento [peleko bakala] wa buntwenia bwaku,” “Mona luzingu na mukento [peleko bakala] wu zololo.” (Bin. 5:18; Ekl. 9:9) Bu bakwe kuri, mukento na bakala bafweti sa “miamiansoni mifwanane” mu kengerela longo lwawu. Bawu bafweti bâ ha timosi, mpe bafweti bâ na mabanza mamosi. Wuzololo tâ ti, bawu bafweti kipasanaka, bafweti yôkesaka ntangu, mpe bafweti bâ ndiku za mutima. Wufwanane bakengerela longo lwawu, mpe balunda tindiku tiawu na Yehova. Buna bawu bafweti longokaka Bibila ha timosi, bafweti vulu samunaka ha timosi, mpe bafweti sambilaka Yehova ha timosi mu baka lusakumunu.

TATAMALNA MU BÂ WA KWIKAMA KWE YEHOVA

¹⁶ Bantu bakaka mu timvuka masumu ma manene bayirikaka, mpe “nsembolo ya ngolo babahanaka ngatu babâ ngolo mu timinu.” (Tite 1:13) Bantu bakaka, bafweti ba katula mu timvuka. Mu bungu dia bantu nsembolo “ba yikubikaka,” mu timpeve balendaka mu wasa. (Ebr. 12:11) Ngano muntu we naku wu bakaturi mu timvuka? Buna kwikama kweto kulendi kota mu ntontolo. Ngano ba kwikama kwe nani? Ka kwe muntu’â ko wu bakaturi mu timvuka, kâ kwe Nzambi. Yehova beto katalaka mu mona tala ti mbo tuzitisa ntumunu’andi ya lembo saka tintwari na muntu ni muntu wu bakaturi mu timvuka.​—Tanga 1 Bisi-Korente 5:11-13.

Bimvwama bia timpeve

w05-F 15/3 27 par. 6

Samsone nungini mu ngolo za Yehova!

Samsone mabanza mamosi ma bâ nandi mu mutu: tatamana mu kani diandi dia nwana na Bafiliste. Tala ti wayôkesa mwa ntangu kwe tiyala timosi ku Gaza, ni mu nwanisa mbeni za Nzambi. Mbuka ya bwila tolo ya bâ nandi nsatu ku hata dia bambeni, mpe kwe tiyala tio kabakila yo. Samsone ka bâ na mabanza ma bunsuza ko. Ha kati-kati dia mpimpa, Samsone waduka mu nzo ya mukento wo, wakatula mielo mia hata na makundi ma mole, mpe wanata bio ha zulu mongo, penepene na Hebrone, ha titini tia kilometre 60. Samsone wayirika misamu mio miamiansoni mu ngolo na mu bweso bwa Nzambi.​—Mfundisi 16:1-3.

10-16 JANVIER

BIMVWAMA BIA ZU DIA NZAMBI | MFUNDISI 17-19

“Kolamana Musiku wa Nzambi mpasi kunataka”

it-2-F 278 par. 5

Mika

1. Muntu wa kanda dia Efrayime. Mika wabonga mipata 1 100 mia arza mia nguri’andi; bu kavweza ntumunu ya nana ya Ntumunu Kumi. (Nd 20:15) Bu kafungula musamu’andi wa mbi mpe bu kakârisa mbongo kwe nguri’andi, nguri’andi yatâ: “Mfweti santukisa mbongo zi kwe Yehova mu koko kwani mu bungu dia mwana’ani, ngatu nayirika tifwiti na titeki tia tisengo; mpe buna mbo nikukârisila zo.” Buna wanata mipata 200 mia arza kwe muntu wusalaka bifwiti, ni kayirika “tifwiti na titeki tia tisengo” bi batûla mu nzo ya Mika. Mika, “nzo ya banzambi” ya bâ nandi; mpe wayirika efode na terafime, mpe wahana nswa kwe mwana’andi wumosi ngatu kabâ nganga-nzambi mu bungu dia yandi. Ni bu sa ti misamu mio bakubika mio mu kembela Yehova, mia mbi mieri, mu bungu ti ntumunu ya lembo sambilaka biteki mieri vwezaka (Nd 20:4-6) mpe tabernakle ya Yehova na tisalu tia nganga-nzambi mieri kabakasaka. (Mf 17:1-6; Lb 12:1-14) Ha manima, Mika wabonga Yonatane ku nzo’andi, mwana wumosi wa kanda dia Gersome, weri mwana wa Mose, ngatu Levite yo ya ntwenia yabâ nganga-nzambi’andi. (Mf 18:4, 30) Na nsayi yayansoni Mika watâ: “Diangana bwawu bu, Yehova mbo katomo yirika mbote kwe meno.” (Mf 17:7-13) Kâ, mu bungu ti Yonatane keri’â mwana wa kanda dia Arone ko, ka bâ na nswa ko wa bâ nganga-nzambi; musamu wo wavutu yika masumu mandi dema.​—Lu 3:10.

it-2-F 278-279 par. 7

Mika

Ntangu fioti ha manima, Mika na mukangu wumosi wa babakala balanda Badanite mpe bababakila. Bawu bu bamuyula tala ti musamu kwa, Mika wavutula ti: “Lusi bonga nzambi zani zi nayirikiri, na nganga-nzambi, mpe lwele kweno; mbo nti bisiri nani?” Kâ, bala ba kanda dia Dane bamukebesa mpe bamutêla ti tala ti tatamane mu ba landa na mu ba kwamisa, mbo baketi mu bwila. Bu kamona ti Badanite bayôka mukangu’andi mu ngolo, Mika wakâla ku nzo’andi. (Mf 18:22-26) Ha manima, Badanite banwanisa Layise, bayôka dio, mpe batunga mumvuka wa Dane. Yonatane na bala bandi bayizi bâ nganga-nzambi za Badanite, mpe Badanite “bakuna tifwiti tia yirika Mika, mpe babika tio hô ntangu yayansoni ya bâ nzo ya Nzambi ya matieleka [tabernake] ku Silo.”​—Mf 18:27-31.

Bimvwama bia timpeve

w15-F 15/12 10 par. 6

Mbangululu ya moyo ya Zu dia Nzambi

⁶ Bidimbu bisongelaka ti tufweti lunda nkumbu ya Nzambi mu Bibila ni yikama kwa bisimbiri. Mu Traduction du monde nouveau ya 2013, nkumbu ya Nzambi mbala 7 216 yena, mbala yôka sambanu na mbangululu ya 1984. Mbala tanu badzukulaka yo mu 1 Samwele 2:25; 6:3; 10:26; 23:14, 16. Nsobolo zo bayizi za sa mu bungu ti mu Rulo za la mer Morte, zi bamweni ka ntama ko, nkumbu ya Nzambi ye mô. Nkumbu yo mpe bayizi ya tûla mu Mfundisi 19:18, ha manima ma ndongokolo ya maniskri za ntama.

17-23 JANVIER

BIMVWAMA BIA ZU DIA NZAMBI | MFUNDISI 20-21

“Tatamaneno mu dinga Yehova”

w11-F 15/9 32 par. 2

Ngano lendi bâ ntiana Finease bu bwabanaka na nkwamusu?

Bu bamana vukasa nitu mu ngolo mpe bu bahonda makangu ma Levite yimosi kwe Bisi-Gibea, beri mu kanda dia Benyamine, bantu ba makanda makaka ma ku Israele badinga mu nwanisa kanda dia Benyamine. (Mfu. 20:1-11) Ntete benda ku muzingu basambila Yehova ngatu kababakisa, kâ batomo ba nunga mbala zole. (Mfu. 20:14-25) Ngano bayizi banza ti Nzambi kawâ tusambulu twawu ko? Ngano Yehova watambula ti basemba bankwa-mbi?

w05-F 15/1 27 par. 9

Misamu mia nguri mia mukanda wa Mfundisi

20:17-48​—Tala ti wadelakana ti babasemba, mu bungu dia nti Yehova kabikila kanda dia Benyamine dianunga makanda makaka mbala zole? Yehova wabika banunga makanda mo ma kwikama, mu tala tala ti makanda mango mbo maketi tatamana mu nzengolo’awu ya katula mbi ku Israele.

w11-F 15/9 32 par. 4

Ngano lendi bâ ntiana Finease bu bwabanaka na nkwamusu?

Ngano ntia malongi tulendi baka mu tinsamu tio? Mu timvuka, misamu miakaka mizingilaka ntono ngolo zisarilaka bakuluntu na tusambulu twawu. Buna, bawu bafweti bambukaka misamu mia tâ Yezu: “Tatamaneno mu lomba [peleko sambila], mpe mbo baluhana; tatamaneno mu dinga, mpe mbo ludzukula; tatamaneno mu konkota, mpe mbo baluziburila.” (Like 11:9) Ni bu sa ti mvutu ya lusambulu ntiana ya yita landila, bakuluntu balendi bâ na lukwikulu ti mbo yikwiza mu ntangu ya kubika Yehova.

Bimvwama bia timpeve

w14-F 1/5 11 par. 4-6

Ngano wa wazaba?

Bwe beri sarilaka bitêlo mu mizingu mia ntama?

Davide titêlo kasarila mu honda Goliate. Kampe Davide walongoka mu sarila tinwanunu tio mu bumwana bwandi, bu keri kêlaka twila diandi.​—1 Samwele 17:40-50.

Titêlo tia bamonaka mu bisalulu bia Bisi-Ezipte na bia Bisi-Asiri bia mu ntangu ya ntama. Tinwanunu tiango poche yeri yi beri sarilaka mu mukanda wa tibulu peleko mu titenda, mpe yi beri kangaka misinga mu ndeko. Tari beri tûlaka mu poche yo, dieri na 5 peleko 7,5 centimètres de diamètre, mpe dieri na dema dia 250 grammes. Mu zulu beri zungasaka titêlo tio, mpe musinga wumosi beri yambulaka. Buna tari mu ngolo dieri kendaka.

Ba-archéologues bayizi baka matari mamingi ma basarila mu mizingu mia ntama ku Proche-Orient. Tinwani tia mbote lenda dia bâ nandi dia losa tari mu ntinu za 140 peleko 240 kilomètres par heure. Bantu ba mayela babanzaka ti titêlo ntinu zimosi tiabâ na dionga, bakaka ka batambulaka wo ko. Ntono musamu wo, titêlo honda tieri hondaka.​—Mfundisi 20:16.

24-30 JANVIER

BIMVWAMA BIA ZU DIA NZAMBI | RITE 1-2

“Dinga luzolo lwa kwikama”

w16.02-F 14 par. 5

Landa tifwani tia ndiku za mutima za Yehova

⁵ Rite mbo kaketi tâ ti kanda dieri nandi ku Moabe—nguri’andi na bantu ba kanda diandi balendi mu bwana mpe balendi mu kipa. Moabe ni hata diandi dia mbutukulu. Bima biabiansoni bia kûna bia kazaba: tikulu, zu, na bantu. Naomi kaketi’â mu hana bima bia mpila yo ko ku Beteleyeme. Dieka bo, yandi wamulomba mu kâla ku Moabe. Naomi wazaba ti kabâ na bakala ko, ka bâ mpe na nzo ko yi kaketi hana kwe bako bandi. Ngano Rite nti kaketi sa? Tala luswaswanu na Orpa, “wakâla kwe kanda diandi na kwe nzambi zandi.” (Rite 1:9-15) Ngano Rite wadinga mu kâla kwe nzambi za bungungu za kanda diandi? Kani kabwe.

w16.02-F 14 par. 6

Landa tifwani tia ndiku za mutima za Yehova

⁶ Kampe Rite walongoka mu zaba Yehova kwe bakala diandi peleko kwe Naomi. Yandi wazaba ti Yehova kena ntiana nzambi za Moabe ko; bafweti mu zolo, mpe bafweti mu kunda. Kâ luzabu ka lufweni’â ko; Rite nzengolo ye nandi yi kafweti bonga. Ngano mbo kaketi sarila Yehova? Nsololo ya ndwenga kasa. Yandi watâ kwe Noami ti: “Kanda diaku mbo dibâ kanda diani, mpe Nzambi’aku mbo yibâ Nzambi’ani.” (Rite 1:16) Luzolo lwa Rite mu bungu dia Naomi lwa nzitukulu lwabâ, kâ luzolo lwandi mu Yehova lwatomo yôka. Boaze, mfumu-mutoto yimosi, wamusîka ha manima, bu kadinga mu swamina mu mahayi ma Yehova. (Tanga Rite 2:12.) Tulendi banza mwana wa nuni wuta swamina mu mahayi ma bibuti biandi. (Mik. 36:7; 91:1-4) Mpila mosi mpe, Yehova wazabakana ntiana nkatika tata dia Rite. Yandi wamusenda mu bungu dia timinu tiandi, mpe Rite kanionga ko mu bungu dia nzengolo’andi.

Bimvwama bia timpeve

w05-F 1/3 27 par. 1

Misamu mia nguri mia mukanda wa Rite

1:13, 21​—Ngano Yehova wasa ti luzingu lwa Naomi lwabâ lwa mpasi mpe ni Yandi watulumuna matimuna mandi? Kâni. Naomi ka tâ ko ti Nzambi misamu mia mbi kayirika. Kâ bu katala misamu miamutûrila, wabanza ti Yehova weri mu telamanaka. Yandi watomo nionga mpe wafwema. Tufweti bambukaka ti mu ntangu ya ntama, bantu beri banzaka ti mbutu ya moyo lusakumunu lweri lwa Nzambi, mpe busita ndoko yeri. Naomi ka bâ na batekolo ko, mpe bala bandi ba bole bafwa. Buna, yandi wabanza ti ni Yehova wamufwisa nsoni.

31 JANVIER–6 FÉVRIER

BIMVWAMA BIA ZU DIA NZAMBI | RITE 3-4

“Bâ na nkumbu ya mbote mpe lunda yo”

w12-F 1/10 22 par. 5

“Mukento wa nkatika wa mbote”

Zu dia mbote na dia lembama dia nzonzolo ya Boaze diatindisa Rite. Yandi watâ: “Bâ wa sakumunu kwe Yehova mwana’ani. Nge wasongele mbote ya mutima mbala ya nzole, yôka mbala ya ntete, bu walembolo dioka ha manima ma bantwenia, ni zibâ mputu peleko mvwama.” (Rite 3:10) Rite wasongela luzolo lwa kwikama “mbala ya ntete” bu katûrisa Naomi ku Israele, mpe bu kamukipa. “Mbala ya nzole” ni yawu yi. Boaze wazaba ti mwana mukento ntiana Rite mbo waketi dinga babakala ba ntwenia, ni zaketi bâ mputu peleko mvwama. Kani wabêla buna, Rite wadinga mu yirika mbote kwe Naomi na kwe bakala diandi diafwa, mu kengerela nkumbu ya bakala diandi diafwa. Tubakuri mu bungu dia nti Boaze kasusumuka mu tifu tia tihana tia mwana mukento wo.

w12-F 1/10 23 par. 1

“Mukento wa nkatika wa mbote”

Ntia mpila nsayi kwe Rite mu wâ mu munwa wa Boaze ti yandi wa zabakana weri kwe bantu ntiana “mukento wa nkatika wa mbote”! Ntembe kani, luhemo lwandi lwa zaba Yehova na lwa mu sarila lwasa ti kazabakana mu mpila yo. Rite wasongela mpe mbote yayingi na tiari tia mutima kwe Naomi na kwe kanda diandi bu kayizi yukunu mu mbêlo na mu bikulu bieri bia nzenza kwe yandi. Mu landa tifwani tia timinu tia Rite, tufweti dinga mu songela buzitu bwabwingi kwe bampwana’eto ntono mbêlo’awu na bikulu biawu; mbo wusa ti tabâ na nkumbu ya nkatika ya mbote.

w12-F 1/10 24 par. 3

“Mukento wa nkatika wa mbote”

Boaze wakwela Rite. Ha manima tutengi: “Yehova wamuhana bweso bwabaka zimi mpe wabuta mwana wa bakala.” Bakento ba ku Beteleyeme basakumuna Naomi mpe bakembela Rite, yandi wayôka bala nsambwari mu bungu dia Naomi. Ha manima, tulongokele ti mwana wa Rite wayizi bâ nkaka ya mutinu Davide. (Rite 4:11-22) Mboko Davide, wayizi bâ nkaka ya Yezu Kristo.​—Matie 1:1.

Bimvwama bia timpeve

w05-F 1/3 29 par. 3

Misamu mia nguri mia mukanda wa Rite

4:6​—Ngano bwe tikûri tiaketi bebesela fwa diandi mu ntangu yi keri kûlaka tima? Ntete, tala ti muntu wayizi bâ mputu wateka lupangu lwandi, tikûri mbongo ze kô kaketi hana mu kûla lupangu lo, mpe ntalu ya lupangu mbo beri ya zabaka tintwari na lutangu lwa mvula zasala ntete Yubile yatûla. (Levitike 25:25-27) Bu kaketi sila bo, ntalu ya fwa diandi mbo yaketi koka. Wa nzole, tala ti Rite wabuta mwana wa bakala, mwana wo ni yandi waketi biarila fwa dia tikûri, ka muntu ni muntu’â ko wa kanda dia tikûri.

7-13 FÉVRIER

BIMVWAMA BIA ZU DIA NZAMBI | 1 SAMWELE 1-2

“Zibula mutima’aku kwe Yehova mu lusambulu”

ia-F 55 par. 12

Yandi wazibula mutima’andi kwe Nzambi mu lusambulu

¹² Ana tifwani tiena mu musamu wutariri lusambulu. Tufweti zaba ti mu mbote’andi, Yehova bisari biandi biabiansoni kalombaka mu mu zonzela mu mutima wawansoni, mu yekola maniongo mawu kwe yandi ntiana mwana wutûlaka lukwikulu mu tata’andi. (Tanga Mikunga 62:8; 1 Bisi-Tesalonike 5:17.) Mu nzila ya mpeve santu, ntumwa Piere watsoneka misamu mita landa: “Mu haneno maniongo meno mamansoni, mu bungu ti beno kafwilaka tiari.”​—1 Pi. 5:7.

w07-F 15/3 16 par. 4

Bwe Ana kabakila tidzunu

Ngano ntia malongi tuta baka? Bu tusambilaka Yehova mu bungu dia maniongo meto, tulendi mu têla misamu mi tumonaka ku mutima mpe tumusiri ndombolo za delakana. Tala ti tuyirikiri miamiansoni mi tulenda mu yirika musamu, buna, tufweti wa bika ha moko ma Yehova. Wo ni musamu wuyôkele bubote wu tufweti yirika.​—Bingana 3:5, 6.

Bimvwama bia timpeve

w05-F 15/3 21 par. 5

Misamu mia nguri mia mukanda wa 1 Samwele

2:10​—Mu bungu dia nti Ana kasambila ti Yehova “kahana ngolo kwe mutinu’andi” bu kwalembo bâ mutinu ku Israele? Musiku wa Mose watâ ti muntu waketi kwizi bâ mutinu wa bala ba Israele. (Lubambu 17:14-18) Mu mbikululu yi katâ ntete kafwa, Yakobe watâ: “Muhangu [tidimbu tia timfumu] ka wukatuka ko kwe Yuda.” (Mbatukulu 49:10) Mboko mu bungu dia Sara​—nkaka ya ba Israelite—​Yehova watâ: “Mitinu mia bantu midûka mu yandi.” (Mbatukulu 17:16) Diangana, Ana mu bungu dia mutinu waketi kwiza keri sambilaka.

14-20 FÉVRIER

BIMVWAMA BIA ZU DIA NZAMBI | 1 SAMWELE 3-5

“Yehova bantu kakipaka”

w18.09-F 24 par. 3

Nkwa-Ngolo-Zazansoni kena, kâ bantu kakipaka

³ Samwele wabatika mu sarila ku tabernakle tûka bu keri ntwenia. (1 Sam. 3:1) Mpimpa mosi, bu kabâ ku tolo, tima tia nzitukulu tiamuturila. (Tanga 1 Samwele 3:2-10.) Yandi wawâ zu dieri mu tâka mbila. Bu keri banzaka ti Mfumu-Nganga-Nzambi Eli weri mu tâka mbila, Samwele wadioka kwe yandi mpe watâ: “Mbila kuntêle, ewu ni meno.” Kâ Eli wamuvuturila ti ka mu tâ mbila ko. Tima tio tiavutu yilama mbala zole. Buna, Eli wabakula ti Nzambi weri tâka Samwele mbila. Buna watâ kwe Samwele nti kaketi sa tala ti tima tio tivutulu yilama, mpe Samwele watumama. Mu bungu dia nti Yehova ka lembo tâ ti ni Yandi weri zonzaka kwe Samwele? Bibila ka dihanaka mvutu ko, kâ misamu mialanda wa misongelaka. Kampe ni mu bungu dia buzitu bwandi mu bungu dia Samwele. Kâ ngano bwe?

w18.09-F 24 par. 4

Nkwa-Ngolo-Zazansoni kena, kâ bantu kakipaka

⁴ Tanga 1 Samwele 3:11-18. Musiku wa Yehova mbo weri lombaka mu zitisa bantu ba nuna, nsungula bamfumu. (Ndu. 22:28; Lev. 19:32) Ngano lendi banza Samwele, mwana fioti, kenda kamonekena Eli mu pari mpe katomo mu têla nsangu za mfundusu za Yehova? Kâni! Bibila ditêle ti “bunkuta bwabâ nandi mu tâ timona-meso kwe Eli.” Kâ Yehova watâ kwe Eli ti ni Yandi weri zonzaka kwe Samwele. Buna, Eli watitekerela mu lomba kwe mwana, kwe Samwele nsangu zango ni ze. Eli “wamulomba [mu lembo] mu swekela na kani musamu wumosi,” mu mio mia mu têla Yehova. Samwele watumama mpe “wamutêla miamiansoni.”

Bimvwama bia timpeve

w05-F 15/3 21 par. 6

Misamu mia nguri mia mukanda wa 1 Samwele

3:3​—Ngano Samwele mu Mbuka yiyôkele ya Santu keri sekelaka? Kâni. Samwele ka bâ nganga-nzambi ko. (1 Ntangu 6:33-38) Buna, ka bâ na nswa ko “wakota mûna, na mu mona bima bia santu.” (Lutangu 4:17-20) Mbuka ya tabernakle yeri kotaka Samwele, ni lupangu lwa tabernakle. Ni kûna kafweti sekela. Dieka bo, Eli mpe mu lupangu lwa tabernakle keri sekelaka. Nzonzolo ya “hâna ha bâ nkela ya Nzambi (arche de Dieu)” yizololo tâ tabernakle yayansoni.

21-27 FÉVRIER

BIMVWAMA BIA ZU DIA NZAMBI | 1 SAMWELE 6-8

“Mutinu’aku ni nani?”

it-2-F 827 par. 1

Timfumu tia Nzambi

Kanda dilombele mutinu. Mvula 400 ha manima ma ndukulu ya ku Ezipte mpe mvula 800 ha manima ma luwawanu lwa Nzambi na Abrahame, bala ba Israele balomba mutinu waketi ba twarisa ntiana makanda makaka. Mu ndombolo’awu bayizi kala lutumu lwabâ na Yehova mu bawu. (1Sa 8:4-8) Diangana, bala ba Israele nswa wabâ nawu mu kekolo ti Nzambi kazakasa timfumu tintwari na kani di kasa kwe Abrahame na Yakobe, kani di batokolo zonzelaka. Bala ba Israele mu mbikululu ya Yakobe, yi katâ mu bungu dia Yuda ntete kafwa, beri sikamanaka (Mb 49:8-10), mu misamu mia tâ Yehova ku Israele ha manima ma ndukulu ya ku Ezipte (Nd 19:3-6), mu luwawanu lwa Musiku (Lb 17:14, 15), mpe na mu nsangu za hana Nzambi kwe mbikuri Balame. (Lu 24:2-7, 17) Ana, nguri ya Samwele, mukento wo wa kwikama, wasongela tivuvu tio mu lusambulu. (1Sa 2:7-10) Kâ, Yehova ka tomo’â zabikisa “nsweki’andi ya santu” ko yitariri timfumu mpe ka zabikisa ntangu ko yi kakubika mu zakasa tio. Ka tâ ko mpe bwe timfumu tiaketi bâ, banani baketi tia yâla—​tala ti ku zulu tiaketi bâ peleko ha mutoto. Buna lulendo lweri tumaka bala ba Israele mu lomba mutinu.

w11-F 1/1 27 par. 1

Yandi wakorela ntono maniongo

Taleno mvutu ya hana Yehova kwe Samwele bu kamuzonzela musamu wo mu lusambulu: “Wirikila misamu miamiansoni mi ta tâ bantu bô; mu bungu ti ka nge’â ko bakariri, kâ ni meno bakariri ngatu nalembo vutu bâ mutinu’awu.” Ntia mpila lutindusu mu bungu dia Samwele, kâ ntia mpila mitsotso ha meso ma Nzambi! Yehova walomba kwe mbikuri’andi mu tâ kwe bala ba Israele nti biaketi ba tûrila bu baketi bâ na mutinu. Samwele watumama, kâ bawu batâ ti: “Kâni, kâ mutinu wutuyâla.” Mu bungu ti ntangu zazansoni Samwele Nzambi keri tumamanaka, waye tumba mutinu wa sola Yehova.​—1 Samwele 8:7-19.

w10-F 15/1 30 par. 9

Luyalu lwa Yehova lunungini!

⁹ Misamu miayôka mu ntama misongele mbote ya ndwengosolo yo. Lutumu lwa bantu misamu lweri vulu nataka kwe bala ba Israele, nsungula mitinu mialembo bâ mia kwikama. Bu bazonzelaka Israele ka wena wa nzitukulu ko ti tûka ntama, guvernema za bantu balembolo zaba Yehova, ka zayizi’â bâ na lenda ko dia nata mbote za mankululu. Diangana, mfumu zakaka za politike zilombaka kwe Nzambi mu sakumuna ngolo zi basarilaka mu nata tidzunu; kâ bwe Nzambi kalendi sakumunina bantu balembo tumamanaka lutumu lwandi?​—Mik. 2:10-12.

Bimvwama bia timpeve

w02-F 1/4 12 par. 13

Mu bungu dia nti fweti batusu?

¹³ Tufweti nata nsobolo ntete tabâ Mbangi ya Yehova mpe tabatusu. Nsobolo nsalulu yena yi lungisaka muntu yandi beni, wusolele mu mutima wawansoni, mu landa Yezu Kristo. Ndiatulu’andi ya ntama kabikaka mpe nzengolo kabongaka ya yirika misamu mia sungama ha meso ma Nzambi. Mu Matsonoko, ntêlo ya Hebre na ya Greke yi babangulaka mu nsobolo, yizololo tâ vutuka. Mu sa nsobolo tufweti bika nzila zeto za mbi mpe tufweti vutuka kwe Nzambi. (1 Mitinu 8:33, 34) Nsobolo “nsalulu zidelakane na nsobolo ya mabanza yilombaka.” (Bisalu 26:20) Nsobolo mbo yidingaka mpe mu bika nsambululu ya bungungu, mu landa ntumunu za Nzambi na mu tihana kwa kwe Yehova. (Lubambu 30:2, 8-10; 1 Samwele 7:3) Nsobolo, mpila yi tumwinaka misamu yisobesaka, makani meto na mabanza meto ma ku mutima. (Ezekiele 18:31) “Nsobolo tusaka” bu tuyingasaka nsalulu zi lembolo zolo Nzambi mu timuntu tia môna.​—Bisalu 3:19; Bisi-Efeze 4:20-24; Bisi-Kolose 3:5-14.

28 FÉVRIER–6 MARS

BIMVWAMA BIA ZU DIA NZAMBI | 1 SAMWELE 9-11

“Bu kabatika Sawule wa kuluka weri mpe wazaba ndilu zandi”

w20.08 10 par. 11

Bâ wa kuluka mpe zabaka ndilu zaku

¹¹ Banza’eti misamu miaturila mutinu Sawule. Bu kabâ ntwenia, Sawule wazaba ndilu zandi, mpe bunkuta bweri nandi bwa tambula madema. (1 Sam. 9:21; 10:20-22) Kâ, ha manima Sawule wayizi bâ na lulendo mpe wayizi yirika misamu mi kalembo bêla na mio nswa mu yirika. Sawule wayizi batika mu diatila bo, ha manima ma ntangu yi kayizi bâ mutinu. Tilumbu timosi, Sawule wayizi lembana mu sarila luvivululu bu keri kêlaka mbikuri Samwele. Kani kakwikila mu Yehova mu sala mu bungu dia kanda dia Israele, Sawule wayizi hana mukayulu ni bu sa ti ka bâ na nswa ko wa hana mukayulu. Ha manima, Yehova wamulosa mpe Sawule wahombesa bweso bwa tatamana mu bâ mutinu. (1 Sam. 13:8-14) Mbo tusongelaka ti ndwenga ze neto tala ti tusariri malongi ma tifwani ti mu lembo yirikaka misamu mi tu lembolo na mio nswa.

w14-F 15/3 9 par. 8

Bwe tulundila tifu tia tihana

⁸ Tinsamu tia Sawule, mutinu wa ku Israele ndwengosolo tita tu hana. Tinsamu tiango titusongele bwe bwimi bulendi bebesela tifu tia tihana. Ku mbatukulu ya luyalu lwandi Sawule mabanza ma kuluka ma bâ nandi mpe ndilu zandi keri zabaka. (1 Sam. 9:21) Ni bu sa ti nswa wabâ nandi mu nwanina lutumu lwa mu hana Yehova, Sawule wakala mu semba bala ba Israele batelamana timfumu tiandi. (1 Sam. 10:27) Bu katambula lutwalusu lwa mu hana Nzambi, Sawule watwarisa Israele ku muzingu na Ba-Amonite mpe wabanunga. Ha manima, na kuluka kwakwansoni, wahana mukembo wawansoni kwe Yehova.​—1 Sam. 11:6, 11-13.

w95-F 15/12 10 par. 1

Ba-Amonite​—Kanda dieri kârisaka mbote mu miangu

Ba-Amonite bavutu karisa miangu mu mbote yeri ba yirikaka Yehova. Yehova ka yôkesa musamu wo ko wa diki. “Mpeve ya Nzambi yabatika mu sala kwe Sawule bu kawâ nzonzolo [ya Nahase], mpe nkesi zayizi tomo mu baka.” Mu lutwalusu lwa mpeve ya Nzambi, Sawule wahana binwanunu kwe binwani 330 000 banunga Ba-Amonite, mpe “ka ha vutu’â sala bantu bole ko ha mbuka mosi.”​—1 Samwele 11:6, 11.

Bimvwama bia timpeve

w05-F 15/3 22 par. 8

Misamu mia nguri mia mukanda wa 1 Samwele

9:9​—Mu bungu dia nti we mfunu mu bakula ti “mbikuri ya lumbu ti, mu ntama timoni beri mu tâka”? Kampe ntêlo yo yizololo tâ ti, mu bungu ti bambikuri misamu miamingi mia nguri bayizi yirika mu ntangu ya Samwele na mu ntangu ya mitinu mia Israele, ntêlo ya “mbikuri” yayizi yingasa ntêlo yo ya “timoni.” Samwele ntiana mbikuri ya ntete bamubongelaka mu bambikuri.​—Bisalu 3:24.