“Nsaka za mpaka ndieri tomo zoloko”

MU NTAMA

Mputa ya mpwana’ani yi tweri nwanaka ku entraînement ya ntatika ya yinene yeri na mbuna bu ndieri wa banzakilaka. Matambi namukamuna mu mbombo, kâ ka nawaya wo ko. Mabanza mani semba meri kunsembaka mpe ni natiyula tala ti mfweti tatamana mu sa nsaka za mpaka. Mu bungu dia nti kumba di nasa dia kuntuma natiyula tala ti mfweti tatamana mu sa nsaka za mpaka, zi nazolo mpe zi nabatika mu sa tûka ntama? Ntete, bikeneno na toko lu bangurila bwe nabatikila mu sa nsaka za mpaka.

Ku Buffalo nakurila, ku hata dia New York, ku États-Unis, mu kanda dia dzuna mpe ndieri Catholique. Ku lukolo lwa ba-Catholique na kotela mpe enfant de chœur nabâ. Bibuti biani biazolo ti meno na yaya’ani wa wukento tabâ na luzingu lwa mbote. Ntiangu, bakumbika na saka sport ha manima ma lukolo peleko na salaka ntangu fioti, mpasi na bakaka kwa note za mbote ku lukolo. Misamu mio miasa ti nabâ muntu wa nsungu tûka buleke.

Bu nayizi bâ na mvula 17, nabatika mu sa nsaka za mpaka. Tûka mvula zazingi, 3 heures ya entraînement ndieri saka, bilumbu 6 mu lumingu. Tumingu twatwansoni, ntangu yayingi mpe ndieri yôkesaka mu longoka na mu karilaka teknike na muvema za swaswana, video mpe ndieri talaka ngatu na vutu tomesa mpila’ani ya sila. Mbo ndieri zoloko mpe mu sa entraînement na meso ma kangama, ni bu sa ti binwanunu ndieri sarilaka. Lenda dieri nani dia bula mabaya na bibriki mu moko mani mu mbala mosi. Sport’ani ya nayizi tomo zaba mpe meno kwa ndieri bakaka. Nsaka za mpaka zayizi bâ tima tiyôkele mfunu mu luzingu lwani.

Mbo ndieri ti banzaka nalenda luzingu lwani. Diplome’ani ya université ya nabaka na mukembo wawansoni. Mu compagnie mosi ndieri salaka ntiana ingénieur mu informatique. Ndandu zeri kunganaka compagnie za ndieri zoloko, nzo yeri nani, na makangu mpe meri nani. Bantu bakaka mbo beri monaka ti nkati nsayi yeri nani, kâ ka ndieri’â na nsayi ko mu bungu ti biyuvu bia mfunu beri nani bi ndieri lembo bakaka mvutu.

BWE BIBILA DIASOBESELA LUZINGU LWANI

Mu baka mvutu za biyuvu biani, ni nabatika mu kwendaka ku leglize mbala zole mu lumingu mpe Nzambi ndieri sambilaka ngatu kakumbakisa. Lumbu timosi, timoko ti nasa na ndiku’ani tiasobesa luzingu lwani. Tiyuvu eti namuyula: “Ngano weka tiyula mu bungu dia nti twe ha mutoto?” Ni navutu muyula: “Mpasi zazingi ze ha mpe kondo kwa buderede bwabwingi bwe ha!” Wakuntêla ti yandi mpe biyuvu bio bia katiyula mpe wabaka mvutu za mbote mu Bibila. Wakungana buku ndieri na mutu-diambu:Vous pouvez vivre éternellement sur une terre qui deviendra un paradis.a Wakuntêla ti Bibila keri longokaka na Mbangi za Yehova. Nayizi toko kekama, mu bungu ti mbo ndieri banzaka ti ka mfweti’â tanga mikanda mia dimbundu diakaka ko. Kâ, nsatu ya baka mvutu za biyuvu biani ya kuntuma mu za tala ti misamu mieri longesaka Mbangi za Yehova mia matieleka mieri.

Nayizi tomo yituku mu zaba misamu mi longesaka Bibila mu matieleka. Nayizi longoka ti, ku mbatukulu kani Nzambi ndieri ti bantu babâ mankululu ha mutoto ku paradi mpe kani dio ka diasobele’â ko. (Mbatukulu 1:28) Natomono yituku mu mona nkumbu ya Nzambi, Yehova, mu Bibila dia me beni mbangululu ya roi Jacques, na mu bakula ti nkumbu ni yo na sambirila bu ndieri tâka lusambulu lwa “Tata’eto”. (Mikunga 83:18; Matie 6:9) Musamu wakaka, nayizi bakula mu bungu dia nti Nzambi kata bikila bantu bamona mpasi ntangu fioti. Misamu miamiansoni mi ndieri longokaka mia matieleka mieri! Nsayi yatomo kumbaka.

Kani kabwe ka nizimbakana mpila yi natimwina bu na yenda ku lukutakanu lwa Mbangi za Yehova mbala ya ntete. Bantu babanosni nsayi yeri nawu mpe bazolo mu zaba nkumbu’ani. Ku lukutakanu lwani lwa ntete, tinzonzi tia nzitukulu tieri zonzelaka tusambulu tu wâka Nzambi tieri yôkaka. Mu bungu ti Nzambi ndieri sambilaka ngatu kakumbakisa, mutu-diambu wo wana zolo. Ku Mbambukulu moyo ya lufwa lwa Yezu nayenda mpe. Ku tukutakanu twatwansoni, yituku ndieri yitukuku mu mona ti bala fioti mpe ntangulu za verse beri landaka mu Bibila diawu. Ku mbatukulu, ka nazaba ko mu dinga verse, kâ Mbangi za Yehova zakumbakisa mpe bakunsongela bwe ndendi sarila Bibila.

Bu ndieri kwe yende ku tukutakanu, ni nayizi tomo zolo ndongosolo ya toma yeri hanaka Mbangi za Yehova. Misamu miamiangi ndieri longoka ku lukutakanu, mpe nkatika tindisa mieri kutindisaka. Ha manima, bakundomba balongoka Bibila na meno.

Misamu mi ndieri mona kwe Mbangi za Yehova mia nkatika mia swaswana mieri na mio mi ndieri monaka ku legize’ani. Nayizi mona ti Mbangi za Yehova bumosi bwe nawu mpe bantu bêna bê na bunsungu, ngolo basarilaka mu yangirika Nzambi. Luzolo lu basongasanaka lwayizi tomo kungana lukwikulu ti, tindimbu ti monekesaka Bakristo ba matieleka ni bawu basongelaka tio.​—Za 13:35.

Bu ndieri kwe tatamane mu longoka Bibila, nsobolo ndieri saka mu diatila mu mitieno mia Nzambi. Kâ, nayizi banza ti ka mfweti nabika nsaka za mpaka ko. Entraînement za ndieri zoloko, na nwana na bantu bakaka mpe kwa ndieri zoloko. Bu natêla misamu mio kwe Mbangi ya Yehova yeri longokaka Bibila na meno, na nsayi yayansoni wakuntêla ti: “Toko tatamana mu longoka, nzebi ti mbo bonga nzengolo ya mbote.” Musamu ni wo weri nani nsatu mu wâ. Bu ndieri kwe tatamane longoka, nsatu yayingi yeri nani mu yangirika Nzambi, Yehova.

Kâ tilumbu ti na lwarisa mpwana’ani yi tweri saka entraînement (ntiana bu nilutêlele wo ku mbatukulu), kani kabwe ka zimbakanaka wo ko. Ha manima ma musamu wo, nayizi tiyula na bunsungu bwabwansoni, tala ti ndendi bâ Mukristo wusingasaka tidzunu namana tatamana mu sa nsaka za mpaka. Mu Izaya 2:3, 4 nayizi dimbitila, yitâka ti bô balandaka mitieno mia Yehova “ka bavutu’â longoka muzingu ko.” Musamu, Yezu walongesa kwe milongoki miandi ti ka babâ’andi bantu ba miangu, ni bu sa ti na kondo kwa buderede bata babongela. (Matie 26:52) Ntiangu, nayizi bika sport yo yi ndieri tomo zoloko.

Ha manima, ni nalanda malongi Bibila “sarila ngolo mu bâ na ndiatulu ya kangama kwe Nzambi.” (1 Timote 4:7, NWT) Ntangu yayansoni na ngolo zi nderi hanaka mu sa nsaka za mpaka, bwawu bu mu tindiku tiani na Yehova nita tia yôkesa na mu mu sarila. Makangu mani keri’â zoloko misamu mi ndieri longokaka mu Bibila, ntiangu tayizi hambana. Mu tilumbu tia 24 janvier 1987 nayizi batusu mpe nayizi bâ Mbangi ya Yehova. Ntangu fioti ha manima, nayizi batika tisalu tia samuna tia ntangu zazansoni mu longesa Bibila kwe bantu bakaka. Tûka buna, ni natatamana mu tisalu tiani tia ntangu zazansoni, mpe ntangu fioti nasala ku siège mondial ya Mbangi za Yehova ku hata dia New York, ku États-Unis.

NTIA NDANDU NABAKA

Bwawu bu matieleka matariri Nzambi ma nzebi, tio tieri kumankaka mu luzingu tie nani. Ka nita vutu mona ko ti tima tita kumanka. Diangana, luzingu lwe na nsasa lwe nani, tivuvu tia ngolo tie nani mpe nkatika nsayi ye nani. Sport ya kwa natiri sa ntangu zazansoni, kâ ka yasala tima tiyôkele mfunu kwe meno ko. Musamu wuyôkele mfunu ni mu sarila Yehova.

Bu ndieri saka nsaka za mpaka, ntangu zazansoni keba kwa ndieri saka mu bantu beri kunzungirilaka, mpe wakubama kwa ndieri bâka mu nwana tala ti muntu wizi kunwanisa. Lumbu ti, keba kwa natiri sa mu bantu bata kunzungirila, kâ mu bungu dia musamu wakaka—ngatu nababakisa. Bibila diakumbakisa mu bâ muntu wukabaka mpe mu bâ bakala dia mbote kwe Brenda, mukento’ani wa toma.

Nsaka za mpaka za natomo zolo. Kâ, nayizi za yingasa mu tima tiyôkele bubote. Ntiana bu tâka Bibila: “Ngalasise salu yena mu misamu mia fioti, kâ kangama kwe Nzambi salu kwena mu bima biabiansnoni, mu bungu ti kani die nandi dia luzingu bwawu bu na luzingu luta kwiza.”​—1 Timote 4:8, NWT.