Misionere “mu mbuka ze nkatika mala za mutoto”

Yezu watâ kwe milongoki miandi: “Mbo lubâ mbangi zani [. . .] mu mbuka ze nkatika mala za mutoto.” (Bisalu 1:8) Lumbu ti, Mbangi za Yehova tisalu tio zilungisaka na luhemo. Kâ, mbuka ze kô mu nza, za zinene mpe zi bâka bantu babingi, zi beka lembo tomo samunina. Mu nsi zakaka mpe, Mbangi za Yehova ka zena zazingi ko. (Matie 9:37, 38) Ngano nti tuta sa mu samunina bantu babîngi?

Mu zitisa ntumunu ya Yezu, komite ya tisalu ya Timvuka titwarisaka tia Mbangi za Yehova, bamisionere yisolaka mu sarila mu mbuka za nza ze na nsatu lubakusu mu tisalu tia samuna. Bwawu bu, misionere 3 090 ze mu nza ya mukaka.a Babîngi ndongosolo babakaka ku Lukolo lwa Bisamuni bia Timfumu. Misionere za kubama zibâka mu bika nzo zawu na mu kwenda mu nsi ya nzenza. Mu bungu ti ba yela bêna, mpe ndongosolo ya mbote babaka na misamu miakaka mi bazebi, misionere zo za kwikama ngolo zisalaka mu yalanga nsangu za mbote mpe tifwani tia mbote bahana mu bungu dia milongoki mia môna.

Lubakusu kwe bamisionere mu bakisa bantu bakaka

Mu filiale zazansoni, biro ya bisari bi batambika mu teritware ya Depatema ya tisalu na komite ya tisalu yisalaka mu kipa nsatu za bamisionere, ntiana nzo, tikolela na mwa mbongo zibabakisaka mu sumbaka bima bi bâka nawu nsatu bilumbu biabiansoni. Mu muvu wa tisalu wa 2020, Mbangi za Yehova zasariri 27 millions de dollars américain (kampe 15 756 970 000 FCFA) mu kipa bamisionere. Mu bungu dia misamu mio, bamisionere balendi tûla mutima na ngolo zawu mu tisalu tiawu na mu lubakusu lu bahana mu bimvuka biawu.

Bwe misionere zinatinaka nsobolo mu tisalu tia samuna? Frank Madsen, we mu komite ya filiale ya Malawi, têle: “Mu bungu dia luzabu lwawu na butindi bawu, bamisonere bimvuka babakisaka mu sala teritware ze mpasi, ntiana tumpangu twe na bikaku peleko teritware zi bazonzaka zu dia nzenga. Ngolo zi basarilaka mpe mu longoka zu na tikulu tia hata, tifwani tia mbote zihanaka kwe bantu bakaka, mpe nsobolo za mbote batumaka kwe bantwenia mu mpila yi babongelaka tisalu tia ntangu zazansoni. Yehova tutomo tondaka mu bungu dia bamisionere.”

Mpangi ya komite ya filiale ya nsi yakaka yitêle: “Misionere mu timona meso zimwinaka ti kanda dia Yehova mu bumosi diena mu nza yayansoni. Bantu balembolo Mbangi za Yehova mpe, ba batomo monaka ti bikulu ka bituhambasaka ko, kâ ndongosolo za Bibila zatubakisa mu bâ timvuka tia mpangi ze mu bumosi.”

Bwe misionere zibakisilaka bisamuni? Paulo, bâka ku Timor oriental, nsayi ye nandi ya bâ na bamisionere mu timvuka tiandi. Yandi têle: “Kwawu ku yaninga dia nkatika diadingi die kû. Kâ, ni bu sa ti nsi za tûka bamisionere tiozi zena, ka babikaka ko ti yaninga dia bakabakasa mu samuna. Ka bamangisaka tukutakanu twa tisalu tia samuna ko mu pari. Me beni bawu nivulu monaka basaka vizite za môna mu mwini, bu kubâka yaninga diadingi, na mu nkokela mpe. Bantu ba nkatika babingi babakisa mu zaba matieleka, na meno. Luzingu lwawu basarilaka na luhemo, na tiya mu bungu dia Yehova, mpe timvuka tiatiansoni bahanaka nsatu yatomo sarila Yehova.”

Ketti, mupasuri-nzila wa ku Malawi, têle bwe misionere za kwelana zabakisila kanda diandi: “Bu batambika misionere za kwelana mu timvuka tieto, me kaka kwa nabâ Mbangi ya Yehova mu kanda diani. Kâ misionere zo zatomo kumbakisa, mpe bayizi bâ nkatika ndiku za kanda dieto. Tifwani tiawu tia mbote tiabakisa bala bani mu mona bwe tisalu tia Yehova tinatinaka nsayi na luzingu luyôkele bubote. Mu bungu dia tifwani tiawu tia mbote bala bani ba batatu mipasuri-nzila mia ntangu zazansoni bena, mpe bakala diani diabatikiri mu kwizaka ku tukutakanu.”

Kwe mbongo zi bakipilaka bamsionere zitûkaka? Mu makabu ma tisalu tia mu nza, makabu ma lusilaka mu mpila zazingi mu donate.jw.org. Lukabu lo nkatika nsayi lutâka.