Mvutu yalembama kwe mipelo mieri mu nkesi

Artur, we munkengi wa tizunga ku Armenie, waye tala timvuka timosi tia Mbangi za Yehova. Wayizi bakula ti timvuka tiango ka tieri’â samuninaka mu prezantware ko. Mu tindisa bampangi mu sarila mpila yo ya samunina, Artur na mukento’andi Anna, na mpangi yakaka ye na nkumbu Jirayr, bayizi tûla prezantware ku hata dîna. Bayizi sola mbuka yeri yôkelaka bantu babingi mu malu.

Bantu beri yôkaka mu nzila yo bayizi zolo mikanda mieri mu prezantware ni beri mia bongaka. Kâ, bantu bakaka ka bazolo’â mpila yo ya samunina ya môna ko ya Mbangi za Yehova. Mipelo miole miapusana hâna, mpe wumosi mu bawu watâ matambi mu prezantware, mpe ni yabwa. Ha manima, wakamuna Artur mbata, mpe lunette zandi za bwa. Artur na Anna, na Jirayr bayêla mu dzunisa mupelo wango, kâ balembana. Mipelo miadiata prezantware na nkesi zazansoni, mpe miamwangasa mikanda. Bu bamana ba finga mpe babakebesa, mipelo miango miayenda.

Artur na Anna, na Jirayr bayenda ku bapolisie mu kwe funda. Wabangula bwe misamu miayôkela mpe wazonzela fioti Bibila kwe bapolisie na kwe bantu bakaka babâ hâna . Ha manima, babanata mu biro ya komisere. Ntete, komisere wadinga mu zaba bwe musamu wayôkela. Kâ, bu kabakula ti Artur ka karisa mbata yîna ko, yandi weri bakala dia zangama mpe na ngolo, wabika mu yula biyuvu mu musamu wayôka, mpe wabatika mu yula biyuvu mu nkwikulu za Mbangi za Yehova. Timoko tiawu tiasa 4 heures! Polisie wayizi yituku mu misamu mi kawâ, mpe wayizi tâ ti: “Ntia dibundu dia toma! Nzololo meno mpe nabâ mu dibundu dio!”

Mu ntangu Artur kakarila mu sa prezantware, bakala dimosi dia kula wamona misamu miayôka, wapusana ha prezantware. Bakala dîna wasîka Artur mu mpila yi kasongela bulembami bwandi na yi kalembo karisila mbata yîna. Wavutu yika ti misamu mi kamona miasa ti kalembo vutu zitisaka mipelo.

Mu nkokela, komisere watêla kwe Artur ti kakâla. Kâ, kani kazonzela musamu wo, wavutu mu yula biyuvu bitariri Bibila. Polisie zole zayi yikama ha timoko tiango.

Tilumbu tialanda, Artur waye vutu tala komisere, mu mu songela video zitariri Bibila. Komisere watâ mbila polisie zakaka mu kwizi tala video.

Ha manima ma ndiatulu ya mbi ya songela mipelo, polisie zazingi mu mbala ya ntete zayi wâ nsangu za mbote. Musamu wo wayizi sa ti bamwina Mbangi za Yehova mu mpila ya mbote.