TIMOKO 13

Bwe mabundu ma bungungu mahunisinaka Nzambi misamu

Mukanda wa papier

Tala ti Nzambi nkwa luzolo, mu bungu dia nti mabundu matâka ti Nzambi masarilaka, mayirikilaka misamu mia mbi? Mu bukufi, mabundu mango ma bungungu mena; Nzambi mahunisinaka misamu. Bwe mabundu mango mahunisinaka Nzambi misamu? Bwe Nzambi kabongelaka mo? Mpe, nti kasa mu bungu dia mabundu mango?

**1. Bwe mabundu ma bungungu mahunisinaka Nzambi misamu mu ndongosolo zawu?**

Mabundu ma bungungu mayizi “sobesa matieleka ma Nzambi mu bungungu.” (Bisi-Rome 1:25, NWT) Mu tifwani, mabundu mamingi malembo longesaka nkumbu ya Nzambi. Kâ, Bibila ditêle ti nkumbu ya Nzambi bafweti ya sarila. (Bisi-Rome 10:13, 14) Mfumu za mabundu zakaka, zitâka ti mbi bu yitûlaka, luzolo lwa Nzambi lubâka. Kâ, bungungu bwena. Nzambi ka tulumunaka mbi ko. (Tanga Zaki 1:13.) Musamu wa tiari ni wena’eti, bungungu bwa mabundu bwatuma bantu mu lembo zolo Nzambi.

**2. Bwe mabundu ma bungungu mahunisinaka Nzambi misamu mu nsalulu zawu?**

Mabundu ma bungungu ka makipaka bantu ntiana Yehova ko. Bibila ditêle ti: ‘masumu ma mawu madzulamane na tii ku zulu.’ (Nzabukusu 18:5) Tûka ntama, mabundu makota mu politike, masingasa mizingu, mpe matulumuna peleko matambula lufwa lwa pôka dia bantu. Mfumu zakaka za mabundu luzingu lwa nienze lwe nawu, mpe mbongo zilombaka kwe milongoki miawu mu futa lo. Nsalulu zawu zisongele ti ka bazebi’â Nzambi ko, mpe ka bêna na nswa ko wabâ bimonikisi biandi.—Tanga 1 Za 4:8.

3. Bwe Nzambi kabongelaka mabundu ma bungungu?

Tala ti misamu mi yirikaka mabundu ma bungungu nkesi mikutâka, bwe Yehova kamonaka ku mutima? Yehova zololo bantu, kâ, ka yangalalaka mu mfumu za mabundu ko zimuhunisinaka misamu, mpe ziniekonaka milongoki miawu. Yandi kanisini ti mabundu ma bungungu mbo bafukisa mo mpe ‘kani kabwe ka bavutu’â ma mona ko.’ (Nzabukusu 18:21) Ntamana, Nzambi mbo katula nsuka mu mabundu mamansoni ma bungungu.—Nzabukusu 18:8.

YIKA NDILU

Tomo taluzula bwe Nzambi kabongeleka mabundu ma bungungu. Tomo longoka misamu mia yirika mabundu ma bungungu, kâ longoka mpe mu bungu dia nti misamu mio mifweti lembo ku kabakasa mu zaba Yehova.

4. Nzambi ka tambulaka mabundu mamansoni ko

Bantu babingi bakwikilaka ti mabundu mamansoni nzila zena za swaswana zinataka kwe Nzambi. Kâ, ngano wa matieleka we? Tangeno Matie 7:13, 14, mpe zonzeleno tiyuvu eti:

Ngano bwe Bibila dizonzelaka nzila yinataka ku luzingu?

Taleno VIDEO, mpe zonzeleno tiyuvu tita landa.

VIDEO: Ngano mabundu mamansoni Nzambi ma katambulaka?—Lweka (3:22)

Ngano Bibila mbo ditâka ti Nzambi mabundu mamingi katambulaka?

5. Mabundu ma bungungu ka masongeleka luzolo lwa Nzambi ko

Mabundu mabutisa mabanza ma mbi mu Nzambi mu mpila zazingi. Mpila yimosi ya mbi ni nkotolo’awu mu mizingu. Mu zaba tifwani timosi, taleno VIDEO. Ha manima, zonzeleno biyuvu bita landa.

VIDEO: Dema dia mabundu mu muzingu wa nzole wa nza (2:22)

Ngano mabundu mamîngi nti masa mu ntangu ya muzingu wa nzole wa nza?
Ngano bwe ta banza mu misamu mi bayirika?

Tangeno Za 13:34, 35 na 17:16. Ha manima zonzeleno biyuvu ebi:

Bwe Yehova kamonaka ku mutima mu ntangu mabundu makotaka mu muzingu?
Mabundu ma bungungu misamu mia mbi miamingi mayirikaka. Mu nge, bwe mabundu ma bungungu malembana mu landa luzolo lwa Nzambi?

Tifwani: Katedrale na tempolo ya ku Asie yibazungiriri mu binsinsa bita songela mpila mabundu ma bungungu yi masingasaka mizungi tûka mvula zazingi. 1. Mizingu mi tulumunaka mabundu. 2. Muzingu wa ntete wa nza. 3. Mupelo wa dibundu dia Ortodoxe wuta sakumuna binwani. 4. Pasteur ya ku Afrique yita tuma bantu mu nwana muzingu wa makanda. 5. Binwani bita sambila Empereur ya ku Japon. — Mabundu ma bungungu ka masongelaka luzolo lwa Nzambi ko

6. Nzambi zololo kabakisa bantu mu duka mu mabundu ma bungungu

Tangeno Nzabukusu 18:4,a mpe zonzeleno tiyuvu eti:

Ngano nti wukusaka ku mutima mu zaba ti Nzambi zololo mu bakisa bantu ba bayizi huna mu mabundu ma bungungu?

7. Tatamana mu longoka mu zaba Nzambi ya matieleka

Ngano mabundu ma bungungu mafweti sobesa mpila yi bongelaka Nzambi? Banza’eti mwana wuta kala lutwalusu lwa mbote lu mu heni tata’andi. Mwana wango wudukiri ku nzo mpe wizi bâ na ndiatulu ya mbi. Tata ka dita tambula nsalulu za mwana’andi ko. Mu bungu dia nti wulembo bâ wa delakana mu semba tata mu bungu dia bukolo bwa mwana’andi?

Ngano mbo wubâ wa delakana mu semba Yehova na mu bika mu mu zaba mu bungu dia nsalulu za mabundu ma bungungu?

TALA TI BAKUTÊLELE: “Nzambi ka nimukipaka ko mu bungu ti mabundu misamu miamingi matulumunaka.”

Ngano mabanza ni mo me naku?
Mu bungu dia nti nsalulu za mabundu ma bungungu zifweti lembo sobesela mpila yi tubongelaka Yehova?

MU BUKUFI

Mabundu ma bungungu mahunisina Nzambi misamu mu ndongosolo zawu na mu nsalulu zawu za mbi. Nzambi mbo kafukisa mabundu ma bungungu.

Biyuvu bia mbambukulu

Ngano bwe bongelaka ndongosolo na nsalulu za mabundu ma bungungu?
Ngango Yehova bwe kabongelaka mabundu ma bungungu?
Ngano Nzambi nti kasa mu bungu dia mabundu ma bungungu?

Timoko tiwiri mu tilumbu tia:

Kani

Ku lukutakanu lwa timvuka luta landa, yula muntu wumosi: “Mu bungu dia nti wayizi bâ Mbangi ya Yehova?”

Kani diakaka:

Your other goal

ZABA BIAKAKA

Dzukula mpila zole, mabundu mamingi zi malembo têleka Nzambi nsayi.

“Ngano mabundu mamansoni mpila mosi mena? Ngano mamansoni kwe Nzambi manataka?” (Mutu-diambu wa mu Internet)

Mu bungu dia nti Yehova kazololo ti tamukundaka na bantu bakaka?

“Ngano musamu wa mfunu wena mu bâ mu dibundu?” (Mutu-diambu wa mu Internet)

Mupelo wafwema mu bungu dia dibundu diandi. Kâ, ka wamukabakasa ko mu longoka matieleka mu Nzambi.

“Mu bungu dia nti mupelo wumosi wakatukila mu dibundu diandi” (Réveillez-vous!, février 2015)

Tûka mbandu zazingi, mabundu mayizi tâ bungungu mu Nzambi mpe manata bantu bakwikila ti Nzambi ka ba kipaka ko mpe mutima wa ngolo we nandi. Longoka matieleka matariri bungungu butatu.

“Bungungu bukabakasaka mu zolo Nzambi” (Nzo ya Zangama ya Munkengi, 1^er novembre 2013)

a Mu zaba mu bungu dia nti mukanda wa Nzabukusu wuzonzelaka mabundu ma bungungu ntiana mukento wu batâka Babilone ya yinene, tala note 1.