Lendi duka mu mitambu mia Satana!

1. Mu bungu dia nti tulendi fwanakasa Satana na muntu wusaka mbingu?

MUNTU wusaka mbingu, kani diandi ni mu bwila tibulu peleko mu honda tio. Lendi sarila mitambu mia swaswana, ntiana bwa têla wo ndiku mosi ya Yobe yamubomba mu mpila ya mbi. (Yobe 18:8-10) Ngano muntu wusaka mbingu bwe wulendi sa ngatu tibulu tiabwa mu mutambu? Mbo kadingaka mu zaba bifu bia tibulu. Mbo katiyulaka: Kwe tita kwenda? Nti tizololo? Ntia mutambu wuyôkele bubote mu baka tio? Satana wena ntiana muntu wo wusaka mbingu. Mbo kadingaka mu zaba bifu bieto. Mbo katalaka kuma ku tukwendaka na bima bi tuzololo. Ha manima mbo katûlaka mutambu wu kamonaka ti wufwanakane mu tu bwila mu ntangu yi tulembo sa keba. Kâ, Bibila mbo ditutêlaka ti tala ti tubawukiri tulendi hatumuka peleko tulendi duka mu mutambu wo. Mbo ditulongesaka mpe ka bwe tulendi sa mu lembo bwa mu mutambu’andi.

2. Ngano ntia mitambu miole Satana kavulu sarilaka?

² Mitambu miole mivulu sarilaka satana ni lulendo na bundiafu.b Tûka mivu miamingi, Satana watomo lenda mu sarila bifu bio bia mbi. Wena ntiana muntu wubwilaka nuni mpe wusaka miamiansoni ngatu nuni yabwa mu mutambu. (Mik. 91:3) Kâ, ka batêle’â ko ti tufweti bwa mu mitambu mia Satana. Mu bungu dia nti? Mu bungu ti Yehova watuzabikisa mitambu mi kasarilaka.​—2 Kor. 2:11.

3. Mu bungu dia nti Yehova katsonekesa binsamu biakaka mu Bibila?

³ Mu nzila ya misamu miaturila bisari biandi biakaka, Yehova mbo katulongesaka ti lulendo na bundiafu bifu bia mbi biena, ngatu talembo tâ makuba ma batâ. Mu bifwani bi tutaluzula mbo tumona ti Satana wabâ na lenda dia tambakasa bisari bia Yehova, na bia yela mpe. Ngano mbo wuta zolo tâ ti ka tulenda ko mu sa keba mu bâ na lulendo mpe na bundiafu? Kâni. Yehova watsonekesa binsamu mu Bibila mu tu lwengesa. (1 Kor. 10:11) Yehova zebi ti tulendi baka ndongosolo mu binsamu bilwengesaka ngatu tasa keba peleko talembo bwa mu mitambu mia Diabulu.

LULENDO MUTAMBU WENA

4. Ngano lulendo kwe lunataka?

⁴ Satana zololo ti takurisa mbanzulu za lulendo. Zebi ti tamana bika lulendo lwatutuma, mbo tukwizi bâ ntiana yandi, mpe mbo tuhombesa luzingu lwa mankululu. (Bin. 16:18) Ntumwa Paulo watulwengesa ti muntu wulendi ‘fuluka mu lulendo, [mpe mbo] kayola masembo, ntiana bwa yola mo Diabulu.’ (1 Tim. 3:6, 7) Musamu wo wulendi turila muntu ni muntu mu beto, ni bu sa ti tûka ntama twe mu matieleka peleko kâni.

5. Ntiana bu bazonzele wo mu Ekleziaste 7:16, 20, ngano muntu bwe wulendi songela ti lulendo lwe nandi?

⁵ Bantu bê na lulendo bwimi bwe nawu. Satana mbo kayêlaka mu tu nata mu bâ na bwimi, bu tutoko tibanzilaka beto beni kani tatoko banzila Yehova, nsungula bu tubwabanaka na misamu mia mpasi. Mu tifwani, Ngano nge beka kwikisila musamu? Peleko nge beka bongela na kondo kwa buderede? Satana mbo kazolo kakumona wabakila Yehova nkesi peleko mpangi zaku. Mpe Diabulu zololo wabanza ti, bubote bu yirikiri misamu mu mpila ya nge beni kani walanda malongi ma ku hanaka Yehova mu Zu diandi.​—Tanga Ekleziaste 7:16, 20.

6. Ngano nti lendi longoka mu tifwani tia mpangi ya yikento ya ku Pays-Bas?

⁶ Tataluzuleno tifwani tia mpangi mosi yibâka ku Pays-Bas wabaka nkesi mu makuba ma bantu bakaka. Wabonga nzengolo ya lembo vutu yôkesaka ntangu na mpangi zo. Têle ti: “Mbo ndieri timonaka me kaka mpe ka ndieri’â lendaka ko mu soba mabanza. Natâ kwe bakala diani ti wafwanakana tasoba timvuka.” Ha manima watala programe ya JW Télédiffusion^® ya mars 2016. Programe yo yazonzela mpila zakaka zi tulendi bongelaka makuba ma mpangi zeto. Mpangi yo vutulu tâ ti: “Nayizi bakula ti nafweti tala makuba ma me beni na bunsungu mpe na kuluka kwakwansoni kani nayêla mu sobesa mpangi za timvuka. Programe yo yakumbakisa mu tûla mabanza mani mu Yehova na mu luyalu lwandi lwatomo zangama.” Ngano ntia malongi lendi baka? Bu bwabanaka na musamu wa mpasi, tûlaka mabanza maku mu Yehova. Mu lomba kakubakisa mu mwina mpangi zaku buna bu kabamwinaka. Tata’aku dia ku mazulu makuba mawu ma kamonaka, kâ, mbo kabalemvokelaka. Zololo ti nge mpe wasila bo.​—1 Za 4:20.

7. Ngano nti biaturila mutinu Uziya?

⁷ Lulendo lwatuma mutinu Uziya wa ku Yuda kakala malongi na mu sa tima ti kalembo bêla na nswa. Uziya wayirika misamu miamingi mia mbote. Wabaka mizingu miamingi, watunga hata na nzo za zangama, mpe twila diadingi dieri nandi. “Nzambi ya matieleka yasa ti misamu miandi miatoma.” (2 Nta. 26:3-7, 10) Bibila mbo ditâka ti: “Kâ, bu kayizi bâ na ngolo, mutima’andi wayizi bâ na lulendo mpe musamu ni wo wamubwisa.” Yehova watâ ti, Nganga za Nzambi kwa zabâ na nswa wa yoka encens ku Tempelo. Kâ mutinu Uziya wayirika musamu wu kalembo bêla na nswa mu yirika bu kakota mu Tempelo mu yoka encens. Yehova nsayi ka yamubaka ko mpe wamutâ bwazi. Uziya wafwa na bwazi bwandi.​—2 Nta. 26:16-21.

8. Mu nzonzolo ya 1 Bisi-Korente 4:6, 7, bwe tulendi sila keba mu lembo bâ na lulendo?

⁸ Ngano tulendi kwizi bâ na lulendo mpe tulendi sumuka ntiana Uziya? Tabongeno tifwani tia José. Mvwama yeri mpe mukuluntu weri wu beri zitisaka mu timvuka. Mbo keri hanaka binzonzi mu timvuka na ku tukutakanu twa tunene, mpe minkengi mia bizunga mbo mieri kwizi mu monekenaka mu baka malongi. José têle ti: “Kâ, nayizi bâ na lukwikulu mu lenda dia me beni na mu misamu mi nazaba. Ka ndieri’â sikirilaka Yehova ko. Nayizi banza ti ngolo ndieri, buna ka ndieri’â vutu landaka ndwengosolo na malongi ma Yehova ko.” José wayizi sa disumu dia dinene, mpe bayizi mu katula mu timvuka. Ha manima ma mvula zazingi, bamukarisa mu timvuka. Bwawu bu, têle ti: “Yehova wakundongesa ti tima tiyôkele mfunu ka nkumbu’â ko ya yinene kâ ni mu sarila mio mi katulombaka.” Tabambukaka ti bima bi twe na bio lenda mu sa na madema meto mu timvuka kwe Yehova bitûkaka. (Tanga 1 Bisi-Korente 4:6, 7.) Tala ti lulendo lwe neto, Yehova ka tusarila ko.

BUNDIAFU MUTAMBU WENA

9. Ngano bundiafu nti bwatuma Satana na Eva mu sa?

⁹ Bu tuzonzelaka bundiafu, mbo tubambukilaka Satana Diabulu. Kampe Satana madema ma mbote mamingi meri nandi, mu bungu ti mbazi ya Yehova yeri. Kâ, tima tiakaka tiyôkele keri dingaka. Wazolo ti bamuhana nsambululu yi bafweti hana kwa kwe Yehova. Satana zololo ti tabâ ntiana yandi, ntiangu katunataka mu lembo yangalala mu bio bie neto. Mbala ya ntete yi kayêla mu sila bo ni mu ntangu yi kazonza kwe Eva. Yehova, mu luzolo lwandi, wahana kwe Eva na kwe bakala diandi bima biabingi bia dia bia mbote bia miti miamiansoni. Kâ wabayimina mu dia mbutu za muti wumosi. (Mba. 2:16) Kâ Satana wahuna Eva bu kamunata kabanza ti wafweti dia mbutu za muti wu babayimina. Eva ka yangalala ko mu bima bieri nandi; mbo keri dingaka tima tiakaka. Mpe musamu watula wa tuzebi. Eva wasumuka, mpe ha manima wayizi fwa.​—Mba. 3:6, 19.

10. Ngano bundiafu bwe bwayizi bêla mutambu mu bungu dia mutinu Davide?

¹⁰ Bundiafu bwatuma mutinu Davide kazimbakana bima bia mu hana Yehova, ntiana bimvwama, timfumu na lenda dia nunga mbeni zandi. Davide watonda bu katâ ti makabu ma Nzambi mingi mena mu zonzela mo! (Mik. 40:5) Kâ, Davide wayizi bâ na bundiafu mpe wadinga mu baka bima biakaka yôka bio bia mu hana Yehova. Ni bu sa ti bakento babingi beri nandi, Davide wabatika mu zolo mukento wa muntu wakaka, kâ musamu wo Yehova wa kayimina. Mukento wango nkumbu’andi yeri Bateseba, mpe bakala diandi dieri na nkumbu Uriya, Muhitite weri. Na mabanza ma bwimi, Davide wavukasa nitu na Bateseba mpe ha manima Bateseba wabaka zimi. Musamu wa yirika Davide wa mbi weri, kâ wavutu yirika musamu wakaka wa nguria wa mbi; Davide wasa miamiansoni mu hondesa Uriya! (2 Sam. 11:2-15) Ngano Davide bwe keri banzaka? Ngano wabanza ti Yehova ka keti’â mu mona ko? Tisari tio tia kwikama tia Yehova tiabwa mu mutambu wa bundiafu mpe musamu wo wamunatina mpasi zazingi. Ha manima, Davide wafungula masumu mandi mpe wasoba mabanza. Wayizi vutu tonda Yehova mu bungu ti wamulemvokela.​—2 Sam. 12:7-13.

11. Tintwari na Bisi-Efeze 5:3, 4, nti bilendi tu bakisa mu telamana bundiafu?

¹¹ Ngano nti tuta longoka mu tifwani tia Davide? Mbo tuta longoka ti tulendi telamana bundiafu tala ti Yehova tutondaka mu bio bi katuhanaka. (Tanga Bisi-Efeze 5:3, 4.) Tufweti yangalalaka mu bio bie neto. Mbo batindisaka milongoki mia Bibila mia môna mu banza mu lusakumunu lumosi lu babakiri na mu tonda Yehova mu bungu dia lusakumunu lo. Tala ti muntu wusariri bo bilumbu biabiansoni mu lumingu lwa mukaka, wuzololo tâ ti misamu 7 kasambiriri mia swaswana. (1 Tes. 5:18) Ngano ni bo sarilaka? Wamana dimbitilaka mu mio Yehova mi kayirikaka mu nge, mbo wukubakisa mu mu tondaka. Mpe bu vulu vutulaka matondo, mbo yangalala mu bima bie naku. Bu yangalala mu bima bie naku, kubâ na bundiafu ko.

12. Ngano bundiafu nti bwatuma Yuda Iskariote mu sa?

¹² Mu bungu ti wayizi bâ na bundiafu, Yuda Iskariote wayizi sa tima tia nguria tia mbi mpe wayizi teka Yezu. Ku mbatukulu Yuda keri’â muntu wa mbi ko. (Like 6:13, 16) Yezu wamusola mu bâ ntumwa. Yezu yandi keri sikirilaka mu bungu ti ni yandi bahana dema dia lunda kese ya mbongo. Yezu na bantumwa basarila mbongo zo mu lungisa nsatu zawu mu tisalu tia samuna. Mbongo zo tulendi za fwanakasa na makabu ma bahanaka lumbu ti mu bungu dia tisalu tisalamaka mu nza ya mukaka. Kâ ha manima ma mwa ntangu, Yuda wabatika mu laba ni bu sa ti mbo keri vulu wâka ndongosolo za Yezu zeri lwengesaka mu musamu wutariri bundiafu. (Mak. 7:22, 23; Like 11:39; 12:15) Yuda ka landa ndwengosolo zo ko.

13. Mu ntia ntangu Yuda kayizi bâ na bundiafu?

¹³ Bundiafu bwa Yuda bwayizi tomo vutu moneka mu musamu wumosi wayôka ntete Yezu kafwa. Yezu, milongoki miandi, Mariya na Marte, babatikisa kwe Simo munga bwazi. Mu ntangu yi beri diaka, Mariya watelama mpe watsamuna mafuta mafwa ntalu yayingi mpe meri na nsunga ya mbote ha mutu wa Yezu. Yuda na milongoki miakaka batomo fwema. Kampe milongoki miakaka miamona ti mbongo zo mbo baketi za sarila mu tisalu tia Nzambi. Kâ Yuda, mabanza makaka meri nandi. Mwivi weri mpe weri nandi kalaba mbongo za mu kese. Ha manima, bundiafu bwatuma Yuda mu teka Yezu mu ntalu yi basumbilaka ngamba.​—Za 12:2-6; Mat. 26:6-16; Like 22:3-6.

14. Bwe bantu bole ba kwelana basarila malongi me mu Like 16:13?

¹⁴ Yezu wabambula matieleka ema ma nguri kwe milongoki miandi: ‘Ka lulendi’â lwasarila Nzambi na Mbongo ko.’ (Tanga Like 16:13.) Musamu wo wa matieleka kwa watiri lumbu ti. Tataleno ka bwe mpangi zole za kwelana zibâka ku Roumanie zasarila musamu watâ Yezu. Ba bakila tisalu ku nsi yakaka ye na bimvwama biabingi. Batêle ti: “Mfuka yayingi yeri neto ku banque, yi tafweti futa; buna tayizi mona ti tisalu tio lusakumunu lweri lwa Yehova.” Kâ, musamu weri swamanaka. Bu baketi tambula tisalu tio, ka baketi’â bâ na ntangu yayingi ko mu sarila Yehova. Bu bamana tanga timoko tia Nzo ya Zangama ya Munkengi ya 15 août 2008 tieri na mutu-diambu “Demeurons fidèles, le cœur unifié,” bayizi bonga nzengolo. Bavutulu tâ ti: “Tala ti kani dieto kwa dia baka mbongo zazingi diaketi tu tuma mu kwe sala ku nsi yakaka, mbo taketi songela ti ka tutûlaka tindiku tieto na Yehova ha tibuka tia ntete ko. Tayizi bâ na lukwikulu ti timpeve tieto mbo tiaketi beba.” Buna bakala tisalu tio. Nti biatula? Bakala diabaka tisalu tiakaka ku nsi’awu, tieri lungisaka nsatu zawu. Mukento wutêle ti: “Kani kabwe, koko kwa Yehova ka kwena kwa kukufi ko.” Bantu bo ba kwelana nsayi ye nawu bu basola Yehova kabâ Mfumu’awu kani basola mbongo.

SA KEBA MU MITAMBU MIA SATANA

15. Mu bungu dia nti tulendi bêla na lukwikulu ti tulendi dioka mitambu mia Satana?

¹⁵ Bwe tulendi sa tala ti tubwiri mu mutambu wa lulendo peleko wa bundiafu? Tulendi duka! Paulo watâ ti bô ‘ba basimba ba moyo’ kwe Diabulu balendi duka mu mitambu miandi. (2 Tim. 2:26) Musamu ni wo waturila Davide. Wawâ malongi ma ngolo ma mu hana Natane, wanionga mpe wasoba mabanza mandi ma bundiafu mpe wavutu kwizi bâ na tindiku tia mbote na Yehova. Kani kabwe ka tuzimbakanakandi ti, Yehova yôkele Satana mu ngolo. Buna, tamana tambula lubakusu lwa Yehova, tulendi dioka mitambu miamiansoni mi tûlaka Diabulu.

16. Nti bitubakisa mu dioka mitambu mia Satana?

¹⁶ Musamu wa matieleka ni wena’eti, bubote bwingi tala ti ka tubwiri’â mu mutambu wa lulendo na wa bundiafu ko. Na lubakusu lwa Yehova kwa tulendi lendela. Kâ ka tufweti’â tabanzaka ko ti ngolo twena mpe kani kabwe, ka tulendi’â tabwa mu mutambu wa lulendo na wa bundiafu ko! Bantu mpe basarilaka Yehova tûka ntama, bayizi bwa mu mutambu wa lulendo peleko wa bundiafu. Buna, lombaka kwe Yehova bilumbu biabiansoni, kakubakisa mu zaba tala ti bifu bio biabatikiri mu sobesa mbanzulu zaku na nsalulu zaku. (Mik. 139:23, 24) Sarila ngolo mu lembo bâ na lulendo mpe na bundiafu!

17. Ngano ntamana nti biturila mbeni’eto Diabulu?

¹⁷ Tûka mvula zazingi, Satana mbingu kasaka. Kâ ntamana mbo bamukanga mpe ha manima mbo bamufukisa. (Nza. 20:1-3, 10) Tilumbu tiango nkatika kêla tukêlaka tio. Buna, taseno keba mu mitambu mia Satana. Taseno ngolo mu lembo bika ti lulendo na bundiafu bwatutuma. Tabongeno nzengolo ya ‘telamana Diabulu mpe mbo kadioka mala’ na beto.​—Zaki 4:7.