Bikeno “musiku wa mbote ya mutima” wa lutuma

LISA watâ ti: “Tima tia tomo kunsimba mutima ni mbote ya mutima ya kunsongela mpangi za Bakristo.”a Mbo keri zonzelaka musamu wa ntete wamubenda mu matieleka. Musamu ni wo mpe wabenda Anne, watâ ti: “Ku mbatukulu, ka ndongosolo’awu â ko ya kumbenda mu matieleka, kâ mbote ya mutima yeri songelaka Mbangi za Yehova.” Mpangi zo za zole za zikento zayika zoloko mu tanga na mu dimbitila Bibila, kâ mbote ya mutima yatomo basimba mutima.

Ngano bwe tulendi songela mbote ya mutima yisimbaka mitima mia bantu batuzungirilaka? Tazonzeleno mpila zole: mu nzonzolo’eto na mu nsalulu zeto. Ha manima mbo tumona ka nani tufweti ya songela.

“MUSIKU WA MBOTE YA MUTIMA” HA LUDIMI LWAKU

Mukento wa ntalu wu bazonzelaka mu Bingana 31 “musiku wa mbote ya mutima” we nandi ha ludimi lwandi. (Bin. 31:26) Mbo kabikaka ti “musiku” wo wa tuma misamu mi katâ na mpila yi katêla mio. Batata mpe bafweti bâ na “musiku” wo ha ludimi lwawu. Bibuti biabingi bi zebi ti nzonzolo ya ngolo yilendi sa bubi kwe mwana, mpe mwana wulendi kala mu wâ misamu mitâ bibuti. Bibuti bu bisarilaka mbote ya mutima mu mpila’awu ya zonzela, ka wubâ musamu wa mpasi ko kwe bala mu wâ na mu tumama.

Ni bu bâ tibuti peleko kâni, bwe lendi sarila mbote ya mutima mu nzonzolo’aku? Mbo tubakaka mvutu mu Bingana 31:26: ‘Ziburi munwa na [ndwenga].’ (NWT) Wuzololo tâ, solaka misamu mi tâ na bunsungu mpe zonzaka mu mpila ya delakana. Buna, mbo wubâ mfunu mu tiyula: ‘Ngano musamu wu nidukisa mbo wutâ nkesi peleko mbo wunata tidzunu?’ (Bin. 15:1) Wa matieleka, mbo tusongela ndwenga tamana banza ntete tazonza.

Musamu wakaka we mu Bingana wutâka ti: “Misamu mi balembo banzaka miena ntiana bu bawindaka mbele.” (Bin. 12:18, NWT) Bu tubanza mu mpila bantu bakaka yi balendi mwina misamu mi tutâ na mpila yi tutêla mio, mbo wututuma mu tomo sola misamu mi tutâ. Wa matieleka, sarila “musiku wa mbote ya mutima” mbo kutu bakisa mu lembo sarila nzonzolo ya miangu peleko ya ngolo. (Efz. 4:31, 32) Mbo tukwizi yingasa mabanza na nzonzolo ya mbi mu nzonzolo ya mbote mpe ya nsayi. Yehova wahana tifwani mu musamu wo bu katindisa tisari tiandi Eliya weri na bunkuta. Mbazi yeri monekesaka Yehova yamuzonzela mu mpila ya dzuna na mu zu dia lembama. (1 Mit. 19:12) Kâ, sarila mbote ya mutima ka wusukisinaka kwa mu nzonzolo ko. Tufweti bâka mpe na nsalulu za fuluka mu mbote ya mutima. Mu bwe?

NSALULU ZA FULUKA MU MBOTE YA MUTIMA BANTU BAKAKA ZITINDISAKA

Mbo tulandaka tifwani tia Yehova, bu tusarilaka mbote ya mutima mu nzonzolo na mu nsalulu. (Efz. 4:32; 5:1, 2) Lisa, wu tutokolo zonzelaka wazonzela mbote ya mutima yamusongela Mbangi za Yehova. Têle ti: “Bu badukisa kanda diani mu ntinu ntinu mu nzo yi tweri futilaka, mpangi zole za bakala za timvuka na bakento bawu zabonga congé ku tisalu tiawu ngatu ba tubakisa mu kutika bima bieto. Mu ntangu yîna, ka ndieri’â longokaka Bibila ko!” Nsalulu za fuluka mu mbote ya mutima zatuma Lisa mu tomo taluzula matieleka.

Anne, wu tuzonzele ku mbatukulu wazolo mpe mbote ya mutima yamusongela Mbangi za Yehova. Watâ ti: “Mu bungu dia mpila ye bantu mu nza, nayizi bâ na mabanza ma mbi. Wayizi bâ musamu wa mpasi kwe meno mu kwikila bantu.” Wavutu tâ ti: “Bu nayizi bwabana na Mbangi za Yehova, ka ndieri’â bakwikilaka ko. Nayizi tiyula: ‘Mu bungu dia nti bata kunsongela nsayi?’ Kâ mbote ya mutima ya matieleka yeri kunsongelaka muntu weri kundongesaka Bibila yakuntuma mu mu kwikila.” Ngano ntia ndandu za mbote zamoneka? Vutulu tâ ti: “Ha manima, nayizi batika mu tûla mutima’ani mu mio mi ndieri longokaka.”

Wa matieleka, nsalulu za luzolo za fuluka mu mbote ya mutima za songela mpangi za timvuka zatomo simba mitima mia Lisa na Anne, mpe zabatuma mu longoka misamu mitariri matieleka. Nsayi ya basongela timvuka yababakisa mu zibula mitima miawu.

LANDA TIFWANI TIA NZAMBI MPE SONGELA MBOTE YA MUTIMA KWE BANTU BAKAKA

Kwe bantu bakaka ka wena musamu wa mpasi ko mu sarila mbote ya mutima mu nzonzolo na mu songela nsayi mu bungu ti ni bo babakurisila peleko kuma ku batûka ni bo basarilaka. Musamu wa mbote wena mu mona bantu basongelaka buzitu mu bungu dia ntukulu zawu peleko timuntu tiawu. Kâ tulendi lembo bâ na mbote ya mutima ya Nzambi tala ti ntukulu peleko timuntu tieto kwa ti tutumaka mu songela mbote.​—Fwanakasa na Bisalu 28:2.

Mbote ya mutima ya matieleka mu mbutu ya mpeve ya Nzambi yena. (Nga. 5:22, 23) Wuzololo tâ ti, mu bâ na mbote ya mutima tufweti bika mpeve santu yatuma mabanza meto na nsalulu zeto. Bu tusila bo, mbo tulanda tifwani tia Yehova na Yezu. Mpe bu twena Bakristo, mbo tuzoloko mu kipa bampwana’eto. Buna, luzolo mu Yehova na mu bampwana’eto mbo lututumaka. Mbote yi tusongelaka mbo yikwizi bâka tifu tia ngolo titukaka ku mutima mpe titambulaka Nzambi.

KWE NANI TUFWETI SONGELA MBOTE YA MUTIMA?

Wulendi bâ musamu wa fioti mu songela mbote ya mutima kwe bô batusongelaka yo peleko kwe bantu ba tuzebi. (2 Sam. 2:6) Mpila mosi yi tulendi wa sila ni mu batondaka. (Kol. 3:15) Kâ nti biyôka tala ti tubenzi ti muntu we kô tufweti lembo songela mbote ya mutima?

Taluzula musamu ewu: Yehova mbo kasongelaka tifwani tiyôkele mu musamu wutariri mbote peleko bweso bwalembo tudelakana, mpe Zu diandi mbo ditulongesaka malongi ma mfunu mu musamu wutariri songela tifu tio. Ntelo ya “bweso bwalembo tudelakana” mbo basarilaka yo mbala zazingi mu matsonoko ma greke mu Bibila. Ngano Nzambi bwe katusongelaka mbote ya mutima?

Banza’eti mbote ya mutima Yehova yi kasongela kwe milio za bantu zikahana bima biabiansoni bie nawu nsatu mu tatamana mu bâ ba moyo. (Mat. 5:45) Bu tutomo tala, Yehova wasongela mbote ya mutima kwe bantu ntete bamuzaba. (Efz. 2:4, 5, 8) Mu tifwani, wahana muntu weri nguria mfunu kwe yandi, Mwana’andi wa wumosi, mu bungu dia nza ya mukaka. Ntumwa Paulo watâ ti Yehova wahana nkûlulu ‘tintwari na timvwama tia bweso bwandi bwa bunene.’ (Efz. 1:7) Mpe, ni bu sa ti mbo tusumukaka mpe mbo tumuniongesaka, Yehova mbo katatamanaka mu tutwarisa na mu tulongesa. Ntumunu zandi na misamu mi katutêlaka biena ntiana mvula ya dzuna. (Lub. 32:2) Ka tulendi’â tafuta Yehova ko mu bungu dia mbote ya mutima yayansoni yi katusongelaka. Mpe musamu wa matieleka ni wena’eti, tala ti Yehova ka tusongela mbote ya mutima ko, ka taketi’â bâ na vuvu ko mu bungu dia bilumbu bia ku matu.​—Fwanakasa 1 Piere 1:13.

Ntembe kâni, mbote ya mutima ya Yehova mbo yitutindisaka mpe mbo yitutumaka mu bâ bakangama kwe yandi. Buna, kani tasolaka bidiri bu tusongelaka mbote ya mutima, tufweti sarila ngolo mu landa tifwani tia Yehova bu tukwe songele nsayi kwe bakaka bilumbu biabiansoni. (1 Tes. 5:15) Bu tusongelaka mbote ya mutima ntangu zazansoni, mbo tubâka ntiana tiya tulemaka mu tilumbu tia tiozi. Mbo tutindisa bantu ba kanda dieto, mpangi zeto za timvuka, bantu ba tusalaka na bo peleko batukotaka na bo ku lukolo na bantu batuzungirilaka.

Banzeno bantu ba kanda dieno peleko ba timvuka tieno babaka ndandu mu bungu dia nzonzolo’eno na nsalulu zeno za fuluka mu mbote ya mutima. Kulendi bâ muntu mu timvuka tieno we na nsatu lubakusu, mu kipa nzo na jardin, peleko mu vulu mu sila bima biakaka ntiana mu kwe mu sumbila bima. Musamu wakaka, bu lubwabana na muntu we na nsatu lubakusu mu tisalu tia samuna, ngano lulendi mu bakisa mu mpila ni mpila ya mbote?

Mu tifwani tia Nzambi, bika “musiku wa mbote ya mutima” watuma nzonzolo’eto na nsalulu zeto ntangu zazansoni.