ISOMO 19
Ndi Balongeki ba Yehowa Beli Bakristo ba Bulili?
Beiswe Balongeki ba Yehowa twakatizia buno tuli Bakristo ba bulili. Ku kabamba kakizi? Menyinina bukatizio bweitu bwalemanina kikizi, buni bwatwengukanizya izina lyeitu na bango nu lutundo lutuli nalo gatusamba.
1. Bukatizio bwa Balongeki ba Yehowa bwalemanina kikizi?
Yesu atendile bunee: “Idagi [lya Kalaga] lili bulili.” (Yoana 17:17) Anga Yesu, bukatizio bwa Balongeki ba Yehowa bukulemaninaga Kitondo kya Kalaga. Kengela historia za Balongeki ba Yehowa. Mu miaka za 1870 kibombo kya beigisibwa ba Biblia balingile kwijigisya Biblia kwa kulonda meigisya ma bulili ma Biblia. Bukatizio bwabo bwalemaninaga bibyo bigisyaga Biblia aba buno mamo meigisya mabezaga meingukana na bumba bwa madini. Kusila, balingile kusambalila bango bulili bwongo bwa Biblia.a
2. Kabamba kakizi tukumanwa Balongeki ba Yehowa?
Yehowa ekumanaga bakumbamizi bage buno beli Balongeki bage kubuno bekusambalaga bulili ku kabamba kage. (Baebrania 11:4–12:1) Anga, wakalazi Kalaga amanile bantu bage bunee: “Muli balongeki bane.” (Soma Isaya 43:10.) Yesu ekumanwa “mulongeki wisanana.” (Kulolesibwa 1:5) Ukinsa ku mwaka wa 1931 twasombwede izina lya Balongeki ba Yehowa. Tukubogaboga kumanwa mu izina lyongo.
3. Balongeki ba Yehowa bekujangaga lutundo lwa Yesu mu nzila nkizi?
Yesu atundaga nunse beigisibwa bage ukinsa abamonaga anga kikanga kyage. (Soma Marko 3:35.) Ku bubo Balongeki ba Yehowa nubo ba kisi kinsania, bakita kikanga kimozi. Ukinsa n’umozi kutuli ekumanaga munyage mubuto aba mubitu. (Filemona 1, 2) Tukwanza tondi ikakizio lyatenda bunee: “Tundazi mibuto zeinyu.” (1 Petro 2:17) Balongeki ba Yehowa bekulosya lulo lutundo mu nzila neingi, anga kukasya Bakristo banyabo beli mu kisi kinsania mu nkungu za meijanizyo.
TUMENYININE
Ijigisye byeingi ku historia za Balongeki ba Yehowa, nu lola butitikizio bwalosya buno beli Bakristo ba bulili.
Bukatizio bwa Bakristo ba bulili bukulemanina Biblia, nu bekusambalila bango bulili bwa Biblia
4. Bukatizio bweitu bwalemanina Biblia
Yehowa atendile wakalazi buno bulili bwa Biblia bunamenyininwe. Soma Danieli 12:4, nu kusila ibuzye luno lubuzya:
Kubuno bantu ba Kalaga bekwendelela kwijigisya Biblia, balagilwe “kutalikilwa kikizi?”
Lola mu nzila nkizi beigisibwa ba Biblia, gamozi na Charles Russell, bijigisyaga Kitondo kya Kalaga. Lola VIDEO, nu kusila ibuzye luno lubuzya lwalemba.
Mu zeno video, Russell nu banyage bakitaga kikizi kwa kwijigisya Biblia?
Ndi wamenyile?
Mambizi kishembe tukwisananizya (kurekebisha) meigisya kishembe malemanina bukatizio bweitu. Ku kabamba kakizi? Anga bukuvwa bwasana kyeingi kya musi bukebuke nu kubasila kulosya bintu busoga, unu bukutukasya Kalaga kumenyinina Kitondo kyage bukebuke. (Soma Misumo 4:18.) Aba buno Biblia tabyagaluka, tondo butukubasila kumenyinina Biblia busoga unu butukwisananizya meigisya meitu.
5. Tukulama bulingilingi n’izina lyeitu
Kabamba kakizi twasombwede izina lya Balongeki ba Yehowa? Lola VIDEO, nu kusila ibuzye luno lubuzya lwalemba.
Kabamba kakizi bwatunganana buno tumanwe ku izina lya Balongeki ba Yehowa?
Kabamba kakizi Yehowa asombwede bantu babe Balongeki bage? Kubuno balosye bango buno eli Kalaga wa bulili ku buza bweingi buekwekelwaga. Lola buza bubili ku buza bwongo.
Madini kishembe mekwigisya bakatizia babo buno Kalaga ekwitabizya kukambya nkisi nu bikeko kwa kumukumbamina. Tondo, soma Balawi 26:1, nu kusila ibuzye zeno mbuzya:
Ndi bubo buli bulili? Buni buli makengelo ma Yehowa ku kabamba ka kukumbamina nkisi nu bikeko?
Bakulu ba madini kishembe bekwigisya buno Yesu u Kalaga. Tondo, soma Yoana 20:17, nu kusila ibuzye zeno mbuzya:
Ndi bubo buli bulili? Ndi Kalaga nu Yesu beli muntu umozi?
Kumenya buno Yehowa asingile Balongeki bage kusambala bulili ku kabamba kage nu ku kabamba ka Mwana wage kwakukita ujungwe buni?
6. Tuli na lutundo gatusamba
Biblia byalengemania Bakristo na biganza bya mubili. Soma 1 Bakorinto 12:25, 26, nu kusila ibuzye zeno mbuzya:
Buni bwatunganana kukita Bakristo ba bulili ndi banyabo bekubabalwa?
Anga b’ukwimonela, buni bukukitaga Balongeki ba Yehowa kwa kulosyana lutundo gabesamba?
Balongeki ba Yehowa ba kisi kinsania, bekusasyaga kukita kikizi ndi banyabo bekubabalwa mu biziki kishembe bya kisi? Kwa kumona bubekukitaga, lola VIDEO. Kusila ibuzye luno lubuzya lwalemba.
Mu nzila nkizi mulimo wa kulisya nkasyo wa Balongeki ba Yehowa walosya buno batundana?
Bakristo ba bulili bekulosya lutundo ku babo beli mu meijanizyo
NDI MUNTU AKUSOLELA BUNEE: “Idini lya Balongeki ba Yehowa lyalinga tugu bwigi gano.”
Kutukila nkungu nkizi Yehowa ekumana bakumbamizi bage buno beli Balongeki bage?
MAKENGELO MANENE
Balongeki ba Yehowa beli Bakristo ba bulili. Tuli mu kikanga kya kisi kinsania kya bakumbazi beli na bukatizio bwalemanina Biblia, nu tukusambalila bango bulili ku kabamba ka Yehowa.
Mbuzya za kwikengelesya
Kabamba kakizi twasombwede izina lya Balongeki ba Yehowa?
Buni butukukitilana gatusamba?
Ukukengela buno Balongeki ba Yehowa beli Bakristo ba bulili?
LONDA LINGO
Ijigisye byeingi ku historia zeitu.
Balongeki ba Yehowa—Bukatizio Bukumoneka ku Misako, Kibe 1: Kutuka mu Kapilo (1:01:27)
Lola buni bwakitile Balongeki ba Yehowa kwa kulosya bwasi-bwasi meigisya ma buza.
Mona makulo ku mbuzya z’unibuzya ku kabamba ka Balongeki ba Yehowa.
“Mbuzya Zikubuzibwaga Nunse ku Kabamba ka Balongeki ba Yehowa” (Lusamba lwa ku Enternete)
Stephen asombaga nunse bantu ba ingo idangi lya kikoba ukinsa abakitilaga bubi. Lola kikizi ky’amonile gesamba Balongeki ba Yehowa kyamukasizye kugalukya kalamo kage.
“Kalamo Kane K’itide ku Bubi Nunse” (Munara wa Mulinzi, 1 Mwezi wa 7, 2015)
a Gazeti zeitu, Katangela ka Mulangi, kekusambalaga bulili bwa Biblia kutukila mwaka wa 1879.