Bulili ku kabamba ka Banzelo

Yehowa ekutunda tumenye kikanga kyage kya mwigulu. Kikanga kyongo kisa munda banzelo, bekumanwa “bana ba Kalaga.” (Yobu 38:7, NWT.) Biblia byatenda kikizi ku kabamba ka banzelo? Bekukitilaga banakantu kikizi? Nu ndi banzelo bansania beli mu kikanga kya Kalaga?

1. Banzelo u banazi?

Yehowa abumbile banzelo lwabusio lwa kubumba kisi. Anga gwe, banzelo bekulamaga mwigulu nu tabekumonekaga. (Baebrania 1:14) Kuli ma milioni ma banzelo, nu n’umozi kubo eli na nkumu zatingana n’ungo. (Kulolesibwa 5:11) “Bekukita makakizio . . . , nu bekwanza iyuki ly’idagi” lya Yehowa (Nimbo 103:20) Wakalazi, mu nkungu imozi Yehowa asingaga banzelo kusambala musagu wage, kukasya nu konia bantu bage. Ono lelo, banzelo bekusondelezya Bakristo kwa kumona bantu bekutunda kwijigisya ku kabamba ka Kalaga.

2. Satana nu basumbu: u banazi?

Banzelo bamozi tabasigende bakatizia ku Yehowa. Mwanzelo mutangi kuguna, u wozo ‘ukumanwa buno Diabolo nu Satana, wozo ukwengelela kisi kinsania.’ (Kulolesibwa 12:9) Satana atundaga kwangata bango, ukinsa engelide bantu batangi kubumbwa ga kisi nu kusila engelide bango banzelo kuguna Yehowa. Babo banzelo baguni bekumanwa basumbu. Yehowa abatikizye mwigulu nu kubeisa ga kisi, nu bekulindila kuzikibwa.​—Soma Kulolesibwa 12:9, 12.

3. Satana nu basumbu bekwengelela banakantu mu nzila nkizi?

Satana nu basumbu bekwengelaga bantu beingi mu nzila za kwezezya na basumbu kitondo kiteli kisoga. Anga, bantu bamozi bekulondaga musagu kutuka ku bantu bekwisulaga bya galwabusio kutingila nkeninkeni, tuti nu makwa aba ku bagila nu balaguzi aba baganga. Nu bango bekulonda busaki bwisa munda bintu bya basumbu. Bango bekwengelelwa lingo kwa kusolelwa buno benezezya na bakuzi. Tondo Yehowa atuzugila kukita bubo, atenda bunee: “Tamwende ku mugila; tamubalonde [aba tamulonde babo bekwezezya na basumbu, NWT].” (Balawi 19:31) Atuzugila kukita bubo kwa kutulanga na Satana nu basumbu, beli basombi ba Kalaga nu bekutunda kutukitila bubi.

TUMENYININE

4. Banzelo bekukasya bantu kwijigisya kumenya Yehowa

Banzelo ba Kalaga tabekusambalaga mu nzila zikumoneka na bantu. Tondo, benasondelezya bakambi ba Kalaga ku bantu bekutunda kwijigisya kumumenya. Soma Kulolesibwa 14:6, 7, nu kusila ibuzye zeno mbuzya:

• Kabamba kakizi twijanizya lukasyo lwa banzelo mu busambazi?

• Ndi walindibwa mutima kumenya buno banzelo benakusondelezya ku bantu bekutunda kungwa ku musagu wa Biblia? Kabamba kakizi?

5. Ibembukye na basumbu

Satana nu basumbu beli basombi ba Yehowa. Beli tondi basombi beitu. Soma Luka 9:38-42, nu kusila ibuzye luno lubuzya:

• Basumbu bekukitilaga banakantu kikizi?

Tatwimanile basumbu mu binsania bitukukita mu kalamo keitu. Soma Kukokomezia Mulembe 18:10-12, nu kusila ibuzye zeno mbuzya:

• Basumbu bekutundaga kutwengelela nu kwezezya na beiswe mu nzila nkizi? Misako mikizi zatendelwa mu lino isanzo zikukitwa na bantu gago gaukulama?

• Ukukengela buno Yehowa eli na kabamba kasoga ka kutuzugila kukita binsania bili na mungwano na basumbu? Kabamba kakizi?

Lola VIDEO, nu kusila ibuzye zeno mbuzya zalemba.

VIDEO: “Kinza Diabolo” (5:02)

• Ukukengela buno mulika wakandilwe mwana wa Palesa wamukitilaga bubi? Ku kabamba kakizi?

• Palesa atungananine kukita kikizi kwa kwilanga na basumbu?

Bindi binsania Bakristo ba bulili bekukinzaga basumbu. Soma Misako 19:19 nu 1 Bakorinto 10:21, nu kusila ibuzye luno lubuzya:

• Kabamba kakizi buli busoga kugisya binsania biuli nabyo bili na m’ungwano na basumbu?

6. Bukindi ku bita bitukulwana na Satana nu basumbu

Satana u mukota wa basumbu. Tondo banzelo bakatizia bekusondelezibwa na Mikaeli, Mukota wa banzelo, ingo izina lya Yesu. Mikaeli eli na magala megezye gani? Soma Kulolesibwa 12:7-9, nu kusila ibuzye zeno mbuzya:

• Banazi u beli na magala kutinga bango gesamba Mikaeli na banzelo bage nu Satana na basumbu bage?

• Ku makengelo mobe, ndi beigisibwa ba Yesu batunganana kukua boba Satana nu basumbu?

Unakinda bita biukulwana na Satana nu basumbu bage. Soma Yakobo 4:7, nu kusila ibuzye luno lubuzya:

• Buni b’unilanga na Satana nu basumbu?

MAKENGELO MANENE

Banzelo bakatizia bekutukasyaga. Satana nu basumbu beli basombi ba Yehowa. Nu bekwengelelaga bantu kutingila nzila za kwezezya na basumbu.

Mbuzya za kwikengelesya

• Banzelo ba Yehowa bekukitaga kikizi kwa kukasya bantu bijigisye ku kabamba kage?

• Satana nu basumbu u banazi?

• Kabamba kakizi ntwatunganana kuba na kintu kili na m’ungwano na basumbu?

LONDA LINGO

Lola butitikizio bwalosya buno Yesu u mwanzelo munene ukumanwa Mikaeli.

“Mikaeli Mwanzelo Munene U Nazi?” (Musagu wa ku Enternete)

Lola butitikizio bwalosya buno Diabolo nteli makengelo mabi meli munda mwa muntu, tondo eli lebelebe kibumbwa kya muuza kikulamaga.

“Ndi Lebelebe Diabolo Ekubezagako?” (Musagu wa ku Enternete)

Lola buni bwikandulide mukikulu umozi ku magala ma basumbu.

“Amonile Kalamo Keli N’inilo” (Munara wa Mulinzi, 1 Mwezi wa 6, 1993)

Menya buni bukukitaga Satana kwa kwengelela bantu.

“Bulili ku Bulaguzi nu Buganga” (Barabara Yenye Inaongoza Kwenye Uzima wa Milele, sehemu ya 5)