ISOMO 49
Buni Bunaba Kikanga Kyobe na Mbogimbogi?—Kibe 1
Babo basongana bekulegela buno mbogimbogi zibekubezaga nazo ku busi bwa ndoba u zibekaba nazo bindi binsania. Bubo bunakulungana. Bakristo basonganine wakalazi nu bidindikile kukambya nsungu za Biblia, bizi buno bubo bwakulungana.
1. Biblia byakasa iba nsungu nkizi?
Yehowa abikile wamulume kuba itoe lya kikanga. (Soma Baefeso 5:23) Yehowa ekutunda iba akate bulamuzi bwalisizye kikanga mutali. Biblia byasungula beiba bunee: “Tundazi bakikulu beinyu.” (Baefeso 5:25) Bubo buli na bwisulilwa bukizi? Wamulume uli na lutundo ekukitila busoga mukikulu wage gabeli ku numba aba gabeli gamozi na bango bantu. Ekulanga mukikulu wage ku bubi bunsania nu ekwidindika kukukya meijanizyo mage ma mubili nu bubo bwekwijungwa. (1 Timoteo 5:8) Kya mutali nunse ekukukya meijanizyo mage ma mutima. (Matayo 4:4) Anga, enasega nu kusoma Biblia gamozi na mukikulu wage. Ndi wamulume ekukunga mukikulu wage kwa lutundo, nti agugumania bwida bwage gamozi na Yehowa.—Soma 1 Petro 3:7.
2. Biblia byakasa mukikulu nsungu nkizi?
Kitondo kya Kalaga kyasungula mukikulu buno “mukikulu nteide kwanza iba wage.” (Baefeso 5:33) Buni bwenakita bubo? Mukikulu enakengela nkumu nsoga z’iba wage nu bubo bwekwidindika kumukunga nu kukunga bana. Enalosya lingo lwanzo kwa kukasya ku bulamuzi bw’iba wage nu kumulosya lwanzo gekwezezya nage aba gekwezezya na bango ku kabamba kage inube buno iba wage ntekukumbamina Yehowa.
3. Wamulume nu mukikulu benakita kikizi kwa kugugumania isonga lyabo?
Biblia byatenda buno ku kabamba ka ba mukazi n’iba: “Bobabili babe mubili umozi.” (Matayo 19:5) Bubo bwisulwa buno batunganana kulwania lukita lwa nagwe kwikitila byage winyene. Bekukita bubo kwa kutingya nkungu gamozi mambizi meingi nu kulosyana bwasi-bwasi makengelo mabo nu bubo bubekwijungwa mu nzila za lutundo. Yehowa u bekumonaga tugu kuba wa mutali nunse kutinga munyage na ndoba—tondo tabekusiga kintu aba ungo muntu—kuba wa mutali mu ndoba zabo. Beli meiso nunse kwa kutaba na mungwano nunse n’ungo muntu uteli munyage na ndoba.
TUMENYININE
Lola kanuni nkizi za Biblia zinagugumania isonga lyeinyu.
4. Wamulume—tunda mukikulu wobe nu umukunge busoga
Biblia byatenda buno “bamulume batunganana kutunda bakikulu babo anga mibili zabo bobenyene.” (Baefeso 5:28, 29) Bubo buli na bwisulilwa bukizi? Lola VIDEO, nu kusila ibuzye luno lubuzya lwalemba.
Mu nzila nkizi wamulume enalosya buno atunda mukikulu wage nu kumukunga?
Soma Bakolosayi 3:12, nu kusila ibuzye luno lubuzya:
Wamulume enakita kikizi kwa kulosya zeno nkumu mu ndoba zage?
5. Mukikulu—tunda iba wobe nu umulosye lwanzo
Biblia byakakizia mukikulu kwanza iba wage ibe buno ekukambila Yehowa aba kilo. Soma 1 Petro 3:1, 2, nu kusila ibuzye zeno mbuzya:
Ndi uli n’iba utekukumbamina Yehowa, lebelebe unatunda amukumbamine. Ku makengelo mobe, kikizi kili kya mutali nunse gesamba—kumusambalila nkungu insania nu kumulosya misako misoga anga mponga nu lwanzo? Kabamba kakizi watenda bubo?
Wamulume nu mukikulu benakala lwango lusoga gamozi. Tondo, mu nkungu imozi mukikulu nten’itabizya makengelo m’iba wage. Mu lukita lulo, mukikulu enalosya makengelo mage kwa bubobelelo kutingila bitondo byabota nu lwanzo, tondo atunganana kumenya buno Yehowa akasile iba wage bwangato bwa kukata bulamuzi bukulisizya kikanga mutali. Atunganana kwidindika kukasya ku bulamuzi bw’iba wage. Ndi akita bubo, nti akasye ku bubobelelo bwa kikanga. Soma 1 Petro 3:3-5, nu kusila ibuzye luno lubuzya:
Yehowa ekwijungwa buni ndi mukikulu alosya lwanzo ku iba wage?
6. Munasila milondo mu isonga lyeinyu
Takuli isonga lyasililila. Kasi, wamulume nu mukikulu batunganana k’ungwana nu kukamba gamozi kwa kusila milondo zabo. Lola VIDEO, nu kusila ibuzye zeno mbuzya zalemba.
Mu zeno video, kikizi kyalosya buno ba mukazi n’iba tababezaga na mungwano gabesamba?
Bakitile kikizi kwa kugugumania isonga lyabo?
Soma 1 Bakorinto 10:24 nu Bakolosayi 3:13. Kusila kusoma isanzo imozi lwabusio lwa kutinga ku ingo, ibuzye luno lubuzya:
Kulemba zeno nsungu kunagugumania isonga mu nzila nkizi?
Biblia byatenda buno twatunganana kulosyana lwanzo. Kulosya muntu lwanzo kwisulwa buno kumukitila busoga nu kumukutya. Soma Baroma 12:10, nu kusila ibuzye zeno mbuzya:
Ndi wamulume aba mukikulu atunganana kulindila buno munyage abe mutangi kumulosya lwanzo? Kabamba kakizi watenda bubo?
NDI MUNTU AKUSOLELA BUNEE: “Tatukungwana lingo na munane anga butwabezaga wakalazi.”
Buni b’unamulosya buno Biblia binabakasya?
MAKENGELO MANENE
Ba mukazi n’iba benaba na mbogimbogi ndi batundana, bekulosyana lwanzo nu kukambya kanuni za Biblia.
Mbuzya za kwikengelesya
Wamulume enakita kikizi kwa kukasya isonga libe na mbogimbogi?
Mukikulu enakita kikizi kwa kukasya isonga libe na mbogimbogi?
Ndi use wasongana, kanuni nkizi za Biblia zinakukasya kugugumania isonga lyobe?
LONDA LINGO
Lola nsungu zinakasya ba mukazi n’iba kwa kuba na mbogimbogi mu kikanga.
Lola lwimbo lwa video lukulosya mponga zikumonaga babo bekukambya nsungu za Kalaga mu isonga lyabo.
Lola bwisulilwa bwa kwisigulizya ku bwangato bw’iba.
Lola mu nzila nkizi nsungu za Biblia zinakasya ba mukazi n’iba mu isonga lyabo.