ISOMO 59
Unasigala Mukatizia mu Nkungu Ziukusungibwa
Mukristo unsania, ekakulumana na buguni aba kusungibwa busi bumozi, ndi bubo bwatunganana kutwitya boba?
1. Kabamba kakizi tunalegela kusungibwa?
Biblia byatenda bwasi-bwasi bunee: “Bansania bakutunda kulama kalamo ka kutananizia Kalaga mu Yesu Kristo, basungibwe.” (2 Timoteo 3:12) Yesu asungizibwe kubuno ntabezaga wa kino kisi kya Satana. Kubuno nu beiswe tondi tatuli ba kisi, ukinsa tatunangama kumona bukutusungya guvernema za banakantu nu madini ma buza.—Yoana 15:18, 19.
2. Buni butuneikungika ku kabamba ka nsungyo?
Twatunganana kugugumania bukatizio bweitu ku Yehowa kutukila ono lelo. Ibikile nkungu za kumusega nu kusoma Kitondo kyage busi na busi. Kundamana ku mikundamano za Kikristo bindi binsania. Kukita bubo kwatukase magala matukwijanizya kwa kusigala bakatizia gatukusungibwa inube bantu ba kikanga kyeitu u bekutusungya. Musingwa Paulo wasungibwaga mambizi meingi, asanzile bunee: “Mukota [Yehowa] eli mukasia wane, nsinakua kampa boba.”—Baebrania 13:6.
Tunagugumania lingo bupuka bweitu kwa kusambala bindi binsania. Kusambala kukutukasya kulemanina Yehowa nu kutakua munakantu boba. (Misumo 29:25) Ndi twakuzya kulosya bupuka kwa kusambala ono lelo, kwatukasye kwendelela kusambala aba mu nkungu zazugilwe mulimo weitu na mbulamatali.—1 Batesalonika 2:2.
3. Tunamona mutali mukizi ndi twasigala bakatizia mu nkungu za kusungibwa?
Lebelebe, tatukutundaga kusungibwa, tondo ndi twalosya nkiki gatukusungibwa, bukatizio bweitu nti bwalinda. Tukukunda Yehowa kubuno tukumona lukasyo lwage ndi tatuli lingo na magala. (Soma Yakobo 1:2-4.) Kumona butukusungibwa, kukwinia nunse Yehowa mutima, tondo ekubogelabogela nkiki zitukulosyaga. Biblia byatenda bunee: “Ndi mwakita busoga nu mwikalila lusungio, bubo buli busoga nunse ku Kalaga.” (1 Petro 2:20) Ndi twendelela kuba bakatizia nu kulosya nkiki, Yehowa ekatukasa kalamo ka milyalya mu kisi kito mukaba bantu bansania bekakumbamina Yehowa kuteli buguni.—Matayo 24:13.
TUMENYININE
Lola kabamba kakizi bwakulungana kusigala bakatizia ku Yehowa mu nkungu zitukusungibwa nu mponga zatukase.
4. Uneikalila buguni bwa bantu ba kikanga kyobe
Yesu amenyile busoga buno bantu bamozi ba kikanga kyeitu tabenatunda tukumbamine Yehowa. Soma Matayo 10:34-36, nu kusila ibuzye luno lubuzya:
Buni bunakita bantu ba kikanga kyeitu ndi twasombola kukambela Yehowa?
Kwa kumona musumo umozi, lola VIDEO, nu kusila ibuzye lubuzya lwalemba.
Unakita kikizi ndi muntu wa kikanga aba mwida wobe ntekutunda ukambele Yehowa?
Soma Nimbo 27:10 nu Marko 10:29, 30. Kusila kusoma isanzo imozi lwabusio lwa kutinga ku ingo, ibuzye luno lubuzya:
Buni bunakukasya idagano lili mu lino isanzo ndi ukuzugilwa na bantu ba kikanga kyobe aba bilemba byobe buno ntukambele Yehowa?
5. Endelela kukumbamina Yehowa aba mu nkungu ziukuzugilwa
Bukusega bupuka kukambela Yehowa ndi bango bekutunda kutuzugila kukita bubo. Lola VIDEO, nu kusila ibuzye lubuzya lwalemba.
Mu nzila nkizi zeno misumo zatendelwa mu video zakukasa magala?
Soma Misako 5:27-29 nu Baebrania 10:24, 25. Kusila kusoma isanzo imozi lwabusio lwa kutinga ku ingo, ibuzye luno lubuzya:
Kabamba kakizi buli busoga kwendelela kukumbamina Yehowa aba mu nkungu zazugilwa mulimo weitu wa kusambala nu mikundamano zeitu na mbulamatali?
6. Yehowa akukasye kulosya nkiki
Balongeki bansania ba Yehowa, ibe bana aba bakungu mu kisi kinsania, bendelela kumukambela nu kusigala bakatizia kweli aba mu nkungu zibekusungibwa. Kwa kumona kikizi kikubakasyaga, lola VIDEO. Kusila ibuzye lubuzya lwalemba.
Mu zeno video, kikizi kyakasizye babo Balongeki kulosya nkiki?
Soma Baroma 8:35, 37-39 nu Bafilipi 4:13. Kusila kusoma isanzo imozi lwabusio lwa kutinga ku ingo, ibuzye luno lubuzya:
Buni bwakutitikizya isanzo buno unalosya nkiki ku nsungyo za nkita insania?
Soma Matayo 5:10-12, nu kusila ibuzye luno lubuzya:
Kabamba kakizi unaba na mbogimbogi aba g’ukusungibwa?
Ma milioni ma bakambi ba Yehowa bese balosya nkiki ku buguni. Nugwe unabukosya!
NDI MUNTU AKUSOLELA BUNEE: “Nne nsinakosya kwikalila nsungyo.”
Masanzo makizi menakasya wozo muntu?
MAKENGELO MANENE
Yehowa ekubogelabogela kutumona twendelela kumukambela aba mu nkungu zitukusungibwa. Tuneikalila nsungyo kutingila lukasyo lwage!
Mbuzya za kwikengelesya
Kabamba kakizi Bakristo batunganana kulegela kusungibwa mu nkungu zikuvwa?
Kikizi kiunakita ono lelo kyakukasye kwikalila nsungyo mu nkungu zikuvwa?
Kikizi kinakukasya kulemanina buno unakambela Yehowa aba mu nsungyo za nkita insania?
LONDA LINGO
Mu zeno video, mubuto uli musikila ekulosya buni bwamukasizye Yehowa gakandilwe ku kabamba ka kutaba ku lulenge kishembe.
Lola kikizi kyakasizye ba mukazi n’iba, kusigala bakatizia kwa kukambela Yehowa mu miaka neingi kinga buguni bubakulumende nabwo.
Lola buni b’unalosya bupuka mu nkungu ziukusungibwa.
“Ikungike ku Kabamba ka Nsungyo Kutukila Ono Lelo” (Munara wa Mulinzi, Mwezi wa 7, 2019)
Buni butwatunganana kumona buguni bwa bantu ba kikanga kyeitu, nu buni butunakita kwa kulonda bubobelelo nabo nu kusigala bakatizia ku Yehowa?
“Bulili tabukulisya ‘Bubobelelo, Tondo Mwene wa Nganda’” (Munara wa Mulinzi, Mwezi wa 10, 2017)