ISOMO 60
Endelela Kugugumania Bwida Bwobe Gamozi na Yehowa
Kutingila lino igisyo lya Biblia, wijigisya byeingi ku kabamba ka Yehowa. Meigisya mawijigisya makukasya kumutunda nunse nu buligo buno lutundo lwobe lwakusingile kwikasana kweli nu kututikwa. Ndi ntututikwa, mango ukukengela buni buwakite bubo mu nkungu zikuvwa. Kusila kututikwa, ntusige kugugumania bwida bwobe gamozi na Yehowa. Unendelela kukunda Yehowa milyalya. Buni b’unakita bubo?
1. Kabamba kakizi watunganana kwendelela kugugumania bwida bwobe gamozi na Yehowa?
Twatunganana kwidindika kugugumania bwida bweitu gamozi na Yehowa bindi binsania. Kabamba kakizi? Kubuno “tunavwa kutingwa” nu kwibilila Yehowa. (Baebrania 2:1) Kikizi kinatukasya kwendelela kuba bakatizia kwa kukambela Yehowa? Kuba na byeingi bya kukita mu mulimo wa busambazi nu kulonda ingo nzila zitunakambela nunse kuzo Kalaga. (Soma Bafilipi 3:16.) Kukambela Yehowa u kalamo kasoga katunalama!—Nimbo 84:10.
2. Watunganana kwendelela lingo kukita kikizi?
Aba buno lino igisyo lya Biblia lyasila, tondo kalamo kobe ka Kikristo takasila. Biblia byatenda bunee: “Muvwale muntu muto.” (Baefeso 4:23, 24) B’ukwendelela kwijigisya Kitondo kya Kalaga nu kukundamana ku mikundamano za Kikristo, u buwajigisye bitondo byeingi bito ku kabamba ka Yehowa nu nkumu zage. Lola mu nzila nkizi unajanga nunse Yehowa nu kulosya nkumu zage mu kalamo kobe. Endelela kukita migaluko ziwijanizya kwa kubogyabogya Yehowa.
3. Mu nzila nkizi Yehowa akukasye kwendelela kumukunda?
Biblia byatenda bunee: “Kalaga . . . we wenyene amusililizie, amukase magala, amugugumanie.” (1 Petro 5:10) Beiswe bansania tukukulumanaga na malindiko, tondo Yehowa ekutukasa magala matwijanizya kwa kukinda malindiko mongo. (Nimbo 139:23, 24) Alaga kukukasa nkasa nu magala ma kusigala mukatizia kwa kumukambela.—Soma Bafilipi 2:13.
TUMENYININE
Lola buni b’unendelela kugugumania bwida bwobe gamozi na Yehowa nu mponga zakukase.
4. Endelela kwezezya na Mwida wobe musoga
Kusega Yehowa nu kwijigisya Biblia kwakukasizye kuba mwida wage. Kukita bubo kwakukasye lingo kumukunda nunse mu nzila nkizi?
Soma Nimbo 62:8, nu kusila ibuzye luno lubuzya:
Buni b’unakita masego mobe mabe masoga, kwa kugugumania bwida bwobe gamozi na Yehowa?
Soma Nimbo 1:2, nu kusila ibuzye luno lubuzya:
Buni b’unakita busomi bwobe bwa Biblia bukulisizye mutali nunse, kwa kugugumania bwida bwobe gamozi na Yehowa?
Buni b’unakita igisyo lyobe lya muntu winyene likulisizye mutali nunse? Kwa kumona makengelo mamozi, lola VIDEO, nu kusila ibuzye mbuzya zalemba.
Wakambye makengelo makizi ku makengelo mawamona mu video?
Unatunda kwijigisya misagu mikizi?
5. Ibikile bilumbilo bya kukambela nunse Yehowa
Kwibikila bilumbilo bya kukambela Yehowa kwakukasye kugugumania bwida bwobe gamozi nage. Lola VIDEO, nu kusila ibuzye lubuzya lwalemba.
Mu zeno video, Cameron amonile mponga nkizi kwa kwibikila bilumbilo bya mutima?
Ta bantu bansania u benakumukila mu ingo nsi kwa kwenda nasambala. Tondo, beiswe bansania tuneibikila bilumbilo bitunakosya kuzindilizya. Soma Misumo 21:5, nu kusila lola bilumbilo biuneibikila . . .
mu ikundamano.
mu busambazi.
Buni bunakukasya kako kanuni keli mu isanzo kwa kuzindilizya bilumbilo byobe?
Bilumbilo biuneibikila
Kukita masego mobe kuba masoga.
Kusoma Biblia binsania.
Kumenya bantu bansania mu ikundamano lyeinyu.
Kulonda nu kulingya kusondelezya igisyo lya Biblia.
Kuba painia mukasya aba painia wa nkungu insania.
Ndi uli mubuto, kukya bibyo byasegwa na masanzo kwa kuba mukambi wa mulimo.
6. Bogelabogela kalamo milyalya!
Soma Nimbo 22:26, nu kusila ibuzye luno lubuzya:
Unakita kikizi kwa kubogelabogela kalamo ono lelo nu milyalya?
MAKENGELO MANENE
Endelela kugugumania bwida bwobe gamozi na Yehowa nu kwibikila bilumbilo bya mutima. Kwa kukita bubo, unabogelabogela kalamo ono lelo nu milyalya!
Mbuzya za kwikengelesya
Kabamba kakizi unalemanina buno Yehowa akukasye kusigala mukatizia kwa kumukambela?
Buni b’unagugumania bwida bwobe gamozi na Yehowa?
Mu nzila nkizi kwibikila bilumbilo kwakukasye kugugumania bwida bwobe gamozi na Yehowa?
LONDA LINGO
Yehowa ekutananizibwa nunse na kikizi gesamba kwikasana mu limbizi limozi aba kusigala bakatizia kwa kumukambela kalamo keitu kansania?
Aba mukambi wa Yehowa uli na bukatizio bwalinda, enazimizya mbogimbogi zage. Lola buni bwenamona lingo mbogimbogi zongo.
Umone Lingo Mbogimbogi Kutingila Kwijigisya nu Kwesela (5:25)
Buni b’uneibikila bilumbilo bya mutima nu kubizindilizya?
“Ibikile Bilumbilo bya Mutima kwa Kuganuna Mubumbi wobe” (Munara wa Mulinzi, 15 Mwezi wa 7, 2004)
Kabamba kakizi buli busoga kuba Mukristo wakula mu mutima, nu buni b’unakita bubo?
“Idindike Kukula mu Mutima—‘Busi bwa Yehowa Buse Bwigi’” (Munara wa Mulinzi, 15 Mwezi wa 5, 2009)