Buni Bukukambyaga Balongeki ba Yehowa Nkaso Zibekumonaga?
Tukukambyaga nkaso zitukumonaga kwakukasya bantu nu milimo zikukitwaga n’iketelo lyeitu. Milimo zongi zikukasyaga kwakubasila inilo nene litukubezaga nalyo, lyakukasya bantu kubasila kuba b’igisibwa ba Yesu Kristo.—Matayo 28:19, 20.
Tatukukambyaga nkaso zeitu kwakugumia muntu kishembe. Bakungu nu bango bakambi tabekulegwaga, lingo Balongeki ba Yehowa tabekulegwaga kwakusambala numba kwa numba. Babo bekukamba ku biro za filiale nu babo bekukambaga ku Lûsu Lukusondelezya, banse beli mu mulindi wa bantu bekukambelaga iketelo lya Kalaga nu tabekulegwaga.
Imozi gesamba milimo zeitu
Busanzi: Naa mwaka, tuku galukya, ku sanzya, ku senga, nu kukasana kwa bulya ma milioni ma Biblia nu bingo bitabu bya kikristo. Unu bubo tondi na site zeitu za jw.org nu aplikasio za JW Library zikukasya bantu kumona bitabu byeitu bya kielectronike kwa bulya nu kuteli kuzikitila piblisité.
K’obaka nu kukunga: Tuk’obaka nu kukunga biziki byeitu bya kukumbamina kunsania mu kesé, kwakukasya mibuto balandania ba makundamano matingana-tingana kukundamana ku biziki byatunganana kukumbamina ko Kalaga. Unu butukukitaga tondi ku biro za filiale nu za bugaluki bwa mitendezi. Neingi za milimo zongo zikukitwa na bantu bakwitundila, nu bubo bukukasya kwa kuta zimizya mosanga mwingi.
Bwemanizi: Milimo zeitu zikukitwa ku Lûsu Lunene Lukusondelezya, biro za filiale, nu za bugaluki bwa mitendezi, nu za batimbi ba metanda, zikukasibwa na nkaso zikulisizibwaga kwakukasya milimo zeitu mu kesé kinsania..
Busambazi: Balongeki ba Yehowa tabekulegwaga kwakusambala musagu musoga aba kwa kwigisya bango ‘Kitondo kya Kalaga.’ (2 Bakorinto 2:17) Tondo, anga bwabezaga mu nkungu za basengwa, babo bekusombolwaga nu kugomibwa buno batingye nkungu neingi mu busambazi bekukaswaga buziki bwa kwikalela nu kulisibwa.—Bafilipi 4:16, 17; 1 Timoteo 5:17, 18.
Meigisya: Musanga ukukambibwaga kwakukasya musanganano wa kolokolo nu wa muzung’uko ukutukilaga ku nkaso. Tukubezaga nu na programu za odio nu video zalemanina Biblia. Tukubezaga nu nama formasio mekukasyaga bakungu nu babo bekukambaga nkungu insania kukita busoga milimo zabo.
Nkaso mu nkungu za menya: Tukukasanaga idia, maze, nu biziki kubabo bakulumende na menya aba kubabazibwa. Wono mulimo wakukasya bantu ukulisizya mutali “mibuto zeitu za mu bukatizio” nu kubabo beteli Balongeki.—Bagalatia 6:10.