Bantu bengi tabekwenda lingo ku mikundamano z’idini kubuno takuli busondolezya bwa mutima ali kukaswa magala. Kabamba kabuni twatunganana kuenda ku mikundamano za Balongeki ba Yehowa? Kikizi kiukumonaga?

Mbogimbogi za kuba gamozi. Baklisto batangi babezaga beidonga mu tunisa. Bakitaga mikundamano bu bekumbamina Kalaga, kwijigisya masanzo nu kulindikana. (Baebrania 10:24, 25) Mukilungi kili na lutundo nu kukwilana kyombo, babezaga bekukundamana na bilemba bya lebelebe nu mibuto za bamulume nu bamukazi ba mutima. (2 Batesalonika 1:3; 3 Yoana 14) Tukujanga bubakitile nu kukita bubo kwatukasa mbogimbogi anga zabo.

Migisya makutukasia kukita milembe za Bibilia. Anga mu nkungu za kulinga balume, bakikulu nu bana bakundamanaga gamozi. Beigisya beizi mulimo bekutukasya kutingila Bibilia buni butuneema kukita milembe mu bindi byitu binsania. (Kukokomezia Mulembe 31:12; Nehemia 8:8) Nagwe na unalosia bukatizya bwage nu kilemanizyo kyage ndi atenda mu mukundamano nu kwimba nimbo.​—Baebrania 10:23.

Mbogimbogi za kuba na bukatizya buna magala. Musingwa Paulo abwinde ku beija kanisa kamozi mu nkungu zage: “Nkutunda nunse kumumonako, . . . Tulindianazi gamozi bweitubweitu na bukatizio bumozi bweinyu nu bwane.” (Baroma 1:11, 12) Kukundamana gamozi na bango Balongeki ba Yehova busi na busi kukulindika bukatizyo bweitu nu lukakasia lwitu lwa kuba Baklisto.

Ndi bino byatendwa gano binakusinga wende kumukundamano wavwe wa kanisa kito buumona nugwe bibyo? Bakusekele busoga. Mikundamano zeitu ta zakuliga​—takuli kusega bikulo.

• Nazi u utukulemba gatukukita mikundamano zeitu?

• Kitukumonaga mu mikundamano zeitu?

Kilo tunakita lugendo lwa idungu-lulazi buni, lwa igulu mbe, tabikutuzibizya kubasa ku mikundamano. Tubebe twa kalamo aba mutambo wa mulimo tabikutuzibizia tukundamame na balongeki banitu ba Yehowa. Mano magala mekubalisizya mbogimbogi nkizi?

Menge matunganana. Musingwa Paulo asegile balongeki benyage ‘balindiane bamozi ku bango’ kutenda bunoe; bemenyane. (Baebrania 10:24) Uno mutendezi, watusega tube na lwanzo lusoga ku bango. Kumenya kweitu banitu mu kanisa, kwatukasia kumenya buni bubakindile tubebe twabo twasusania na twitu. Baneema kutukasia tukinde tubebe twitu.

Bwida bwalama. Mu nkungu za mikundamano zeitu, tatukuzindila tugu kukumenyana, tondo twikile bilemba. Muzingo mpilili, tukutingiaga gamozi nkungu mu kyelele kyatunganana. Kugomania kwitu kwatukase mutali muki? Twijigisya bukuti bwa bamozi ku bango, ikyo kitondo kyakokomezya lutundo lwitu. Nu, ndi umozi kutuli amona mulondo, twatunganana kumukasia, kubuno twalimbwa na lutundo lumozi. (Misumo 17:17) Kwa kugomania na banse mu kanisa, twalosya buno tuli na “lwanzo lumozi kubeswe.”​—1 Bakorinto 12:25, 26.

Twakusega usombole bilemba kubabo bekukita bwatunda Kalaga. Wasange bilemba bibyo gesamba balongeki ba Yehowa. Ntube na ntubia za kutusanga!

• Tuna bukasya buki ndi twenda ku mikundamano zeitu?

• Nkungu nkizi ziunatundile kumenya kanisa keitu?

Mikundamano za Bakristo batangi tazabezaga bumba. Kwabezega: nimbo, masego, kusanzula nu kugelenzula masanzo. (1 Bakorinto 14:26) Tondo, ubukukitwa mikundamano zeitu.

Meigisya ma bulele matukila mu Bibilia. Mu busi bwa mposo ali bw’izinga, kibombo kya balongeki kikukundamanaga kungwilila Lusumbi lwa Bibilia mu kyende kya nkungu kwa kulosya busoga bwa masanzo mu kalamo keitu nu mu bino bindi byeitu. Banse basegwa kusanzula masanzo malosibwa. Kusila kwa obo, kibombo kinsania kyamanwa kusambila makengelo mu “Munara wa Mulinzi” (Kyindo kya Mulangi) ali zezo miango zakitwa mu nkungu emozi zikutuka mu lusamba lwa kyindo kya mulangi Munara wa Mulinzi (Kyindo kya Mulangi) kikutukasia kukita bitondo bili mu Bibilia ku kalamo keitu. Tondo lulo lusamba lukusanzulwa mu mikundamano kutinga 110 000 mu kisi kinsania.

Mikundamano zeitu zikutukasyaga kuba na meenge makwigisya busoga nuunse. Mumpisi n’izinga, tukwijigisyaga tondo mukundamano wa Utumishi na Maisha ya Mukristo (Mukambo nu Kalamu ka Mukristu) mu lulenge luli na bitiko bisatu. Meigisya ma luno lulenge meikile mu nsamba za mukambo nu kalamu ka mukristu zitukukaswaga mu mwezi. Kitiko kitangi kikumanwa Utumishi na Maisha (Bugumi bw’idagi lya Kalaga); kikutukasya kumenya busoga masanzo ma Bibilia zakasilwe mu lwabusyo mu kibombo. Kitiko kya mabele, kya manwa Twikokomezye busoga ku mulimo wa busambazi; kitiko kino kili na maketelo meingi mekutukasya kutenda busoga na bantu misago zikile mu Bibilia. Kuli musunguzi ekulemba busoga buni bwenatusungula tube na meenge ma kusanzula nu kwigisya busoga. (1 Timoteo 4:13) Kitiko kizinda kyamanwa Kalamu ka Mukristu; kekutukasya tumenye buni butunakita misako zeitu za kila buusi zilongamane na bwatenda Bibilia. Zasambikya tondo mbuzia nu maakulo mekutukasya tumenye busoga nuunsenia Bibilia.

Busoga bwa migisya ma Bibilia matukukaswa mu mikundamano zeitu tamenida kukwangamia.​—Isaya 54:13.

• Buni bukutingaga mikundamano zeitu?

• Mu mukundamano muki uunasombola kuvwa mugo limbizi litangi?

Wamonile bilimelime bili mu zeno broshua byakulosia buni bukwijambalaga Balongeki ba Yehowa ndi besenda ku mikundamano zabo? Kabamba ka buni tukwijambalaga busoga?

Kwa kukotya Kalaga. Lebelebe Kalaga ntazindila kumona bikumonekaga na meiso. (1 Samweli 16:7) Tondo, gatukukulumanaga tukumbamile Kalaga, tukutunda lebelebe kumwanza, nu kwanza tondo babo batukukundamanaga nabo. Ndi twatabangila mukota, twasegwa kuengelesia muijambalo witu watunganana kumulosia lwanzo lwitu. Bubo tondi, mu nkungu za mikundamano zeitu kwijambala kwitu kwalosia bunoe twanza “mukota wa kisi kinsania,” Kalaga Yehowa nu twanza gago gatukumukumbamilaga.​—Kulinga 18:25.

Kwalosia lwanzo ku buzitu bwitu. Bibilia byalindia babo “bekwibula buno bekwanza Kalaga” kuidebya na nsulu “zabatananina nu misako misoga.” (1 Timoteo 2:9, 10) Kwijambala “bwatunganana” ukubula buno twidange na nsulu zitatunganana, zikulosya kindi kya mubili ali zikusinga bantu bekulole bubi. “Kuba na misako misoga” kwatukasya kusombola nsulu nsoga zasambasamba nu zitasununana. Mamano mano matusigila mwingilo wa kusombola nsulu zatunganana. Aba tatwatenda, tuneema “kulebya meigisia ma monia weitu” nu “kuganuna Kalaga” ku kuijambala kwitu kusoga. (Tito 2:10; 1 Petro 2:12) Mu kuijambala kwitu busoga ndi tusetwenda ku mikundamano zeitu, twalosia kinsusania kisoga kwa kukumbamila Yehowa.

Nsulu zobe tazikuzibizye kuenda ku mikundamano zeitu. Busoga bwa nsulu tabukutukila ku bukunza bukali bwazo buno zimoneke nsoga, twasegwa tugu kuba na nsulu zatunganana, nsoga nu zi unabasa nazo geli bantu.

• Kabamba ka buni muijambalo weitu watunganana kuba musoga mu nkungu za kukumbamila Kalaga?

• Mano makizi masoga matukasie tube na busombozi busoga bwa nsulu?

Ndi ukwijigisyaga Bibilia na umozi wa Balongeki ba Yehowa, lebelebe ukwidindikaga lwabusyo kusanzula bi mwatende. Tondo buli busoga kwikungeka lwabusyo lwa kwenda ku mikundamano. Ubo bwasega kuba na bulongeki busoga.

Sombola nkungu nsoga nu kiziki kisoga. Mu nkungu nki muukubezaga na makengelo misanana? Mu mukelo lwabusio lwa kulinga mulimo, mango mukindi ndi baana bijombeka? Aba ntunaba na nkungu ndazi za kuijigisia, nti wikalila nkungu ziwakite mu kuijigisia kobe, nu ndi wa bugomia, ntusige kingo kibulunganie bulongeki bwobe. Londa kiziki kyolelela nu kusiga kulutwa na mango makengelo anga radio, televizio nu kangwenene (telefone). Kukita masego lwabusyo lwa kuijigisya, kuneema kukukasia kutina makengelo mabi ma kisi nu kwidindika ku mulembe wa Kalaga.​—Bafilipi 4:6, 7.

Beka tukengelesyo ku bitondo bizito nu widange kulosya bukatizio bwobe ku biwatende mu mikundamano. Menya lwabusio makengelo manene ma musago. Engelesya itwe linene lya musago uli ku lusamba, londa kumeya buni bwakulumana matwe makeke na itwe linene lya musago. Engelesia bilimelime. Sanzula mbuzia zakulumania makengelo manene ma musago. Kumbusa, sanzula kibombo unu sosole mbuzia. Limbola Bibilia unusanzule masanzo malosibwa nu gelenzula ndi bubuno bwasusania n’itwe lya musago. (Misako 17:11) Ndi wasila kusanzula mbuzia beka kakengelesyo aba utile katilatila kunsi kwa bitondo bikeke gago lino ntwibilile lingo. Mu mikundamano, ndi watunda, unaema kulosya munwe kwa kusosola mbuzia mu mutendezi wobe.

Ndi wasongolola busoga matwe ma misago zise z’igisibwa kila izinga mu mikundamano, watalikile ku busanga bwobe bwa bukunzi bubibu ku isuku lyobe lya bumenyinino bw’Bibilia.​—Matayo 13:51, 52.

• Bulongeki bukizi buunakita kwa kwidanga kwenda ku mikundamano?

• Buni bun’idanga kusosola mbuzya ku mukundamano?

Kutukila tununu twa miaka, Yehowa ekutunda bantu bansania ba mu kikanga betingye nkungu gamozi kwa kukokomezia mugomyo wabo bubeli nu gamozi na Yehowa. (Kukokomezia Mulembe 6:6, 7) Ukiansa Balongeki ba Yehowa bekwibikila nkungu mw’ijinga kumukumbamila Yehowa mu kikanga​—bekubuzaniaga ku bitondo bya Kalaga bya tunganana na kikanga kyabo. Tondo unaba ugw’inene, uneema kwibikila nkungu za kuba gamozi na Kalaga kwa kusombola kuijigisya mulembe umozi wa Bibilia.

Zili nkungu za kukunda Yehowa. “Kundazi Kalaga, nu we amukunde.” (Yakobo 4:8) Tuneema kumenya Yehowa busoga nu kutinga ndi twijigisia buzito bwage nu misako zage zeli mu Bibilia. Nzila nsoga za kumukumbamila Yehowa mu kikanga zili kusom’Bibilia na ijuki linene, mango kwa kulemba programe za likolo lya mulimo wa kiteokrasi kil’ijinga. Kila umozi mu kikanga anaema kusoma kyage kyindi. Kuzinda, banse ben’ema kutenda bibunguile.

Nkungu nsoga za kukundamana mu kikanga. Balume nu bakikulo, tondo babuti nu bana ndi bijigisia Bibilia gamozi beneema kukokomezia bwida mu kikanga kyabo. Zili nkungu za mbogimbogi nu bubobelo, zikulindilwa na bansania mu kikanga na kalemanizio. Babuti benasombola misumo za mbuzia nsoga zatunganana na lugi lwa bana babo, nu mbabazio zibekukulumanaga nazo ku likolo nu kuzinda kubalosia buni bubenazikinda. Banaema tondo kulola mu lusamba lwa Munara wa Mulinzi (Kyindo kya Mulangi) aba lusamba lukumanwa Amuka! (Jukazi), tondo lingo mu site web jw.org kwa kubakasia. Tondo kikanga kino kineema kulola Bilimelime bya JW Télédiffusion (tv.jw.org) nu kwezezela byo gamozi. Bingo bikanga bikutundaga kujigisya nimbo zimbwe mu mikundamano. Kulia nu kunwa gamozi na bana babo kuzinda mukundamano wa kikanga kwa balisizia mbogimbogi.

Nkungu zeno zimwatingye mu kil’izinga gamozi mukukumbamila Yehowa zakasye kikanga kinsania nkasa za kuijigisia musago wa Kalaga. Nugwe abakasie mponga ku numba zinyu.—Nimbo 1:1-3.

• Buni buneema kukita babuti nkungu zeno zibe za mbogimbogi ku kikanga kinsania?

• Buni bunaema kukita babuti nkungu zeno zibe za mbogi-mbogi ku kikanga kinsania?

Kabamba ka buni bano bantu bena mbogimbogi nnene? Kubuno beli kwimozi za misanganano zeitu. Anga babo bakitilaga Kalaga wa kalazi, basegilwe buno bekundamane mambizi masatu mu mwaka, tukulindila na mpusia ningi misanganano zeitu minene. (Kukokomezia Mulembe 16:16) Tuli na misanganano isatu na mwaka na mwaka: misanganano 2 za circonscription za kindi 1 nu misanganano wa bindi 3 (Assemblée Régionale). Kikutukasa zezo misanganano?

Zikutukasya tube na lutundo lwa mubuto. Anga bwabezaga ba Israele na mbogimbogi za ku ganula Yehowa “munkatini mwa musanganano”, tukuganula na mbogimbogi mu misanganano zeitu. (Nimbo 26:12; 111:1) Misanganano zikusinga tukulumane ali kumonana na Balongeki ba mango makumbamino, nu aba ba zingo nse. Tukuikala gamozi mu kyumulo kya mu musi, kukukasya kubakamya nse za mubuto. (Misako 2:42) Mwezezo nkungu zili za mutima, tukwimonela iswe binene lutundo lukutubika gamozi “mibuto zeitu bakatizya” ba mu kisi kinsania.​—1 Petro 2:17.

Zikutusindika mu mutima. Baisraeli babogile bogile “kubano basongolede moki” ma Masanzo ma basambalidwe. (Nehemia 8:8, 12) Anga bo, twatunda meigisya ma Bibilia matukukaswa mu misanganano zeitu. Na musanganano na wili na itwe lya meigisya likutuka mu Bibilia. Kutingila lusumbi nu tulolesyo, tukumenya buni butunakita bukutunda Kalaga mu kalamo keitu. Tondo, bukwenda babo beli na misako misoga za Kikristo mu bino bindi bibibu bukutindika. Mu misanganano za bindi bisatu (Assemblée Régionale), makitilo mekutulosya masanzo ma bibilia nu lusungu lusoga. Lututiko lukukitwa kubabo bakutunda kilosya gesamba bantu buno bakasa Kalaga kalamo kabo, mu kila musanganano.

• Kabamba ka buni tuli na mbogimbogi za kubasa ku misanganano zeitu?

• Kikizi kiunamona ndi wenda ku musanganano?

Bindi bikeke lwabusyo lwa lukwo lwage, Yesu atendile buno: “Nu musagu musoga wa bukota ukasambalwa ku bansania ba kisi kinsania, kube bulongeki bwa bilongo binsania, nu kuzinda nti kwabasa.” (Matayo 24:14) Tondo buni ubukakitwa kuko kwigisya bango bantu mu kisi kinsania? Kwa kujanga bwakitile Yesu.​—Luka 8:1.

Kuigisya bantu kutuka mu luno lwibi nu kutingila mu lungo lwibi. Yesu alosizye beigisibwa bage musagu musoga kutuka mu numba zeino nu kutingila mu numba zeizo. (Matayo 10:11-13; Misako 5:42; 20:20) Bakristo batangi babezaga na mwaga uizibwe na bena tunganana kuigisya. (Matayo 10:5, 6; 2 Bakorinto 10:13) Anga ono lelo, kwigisya kwitu bango bantu kwakulumina: n’ikundamino na lili na muaga wage. Tun’ema kukita mulimo watukasile Yesu: “kuigisya bango bantu nu kulongeka kwa sililila.”​—Misako 10:42.

Engo nzila za kuigisya bantu. Yesu igisyaga kunsania kwasangaga bantu, kube ku kisege ali ku kanua balomgo (kisima). (Marko 4:1; Yoana 4:5-15) Kutulemba bwakitaga ndi tusetwatenda kutingila bibilia kunsania kutun’ema​—mu nzila, ku kwendaga bantu ku mulimo, ga bisengezyo, Tuli tondo na kangwenene (telefone). Nu ndi bwatunganana, tukuigisya batwombola nabo gamozi, banitu na mulimo, bilemba byitu nu banitu na kikanga. Mamo magala mansania masinga tununu twa bantu mu kisi kinsania bungwilile “musagu musoga wa lonio.”​—Nimbo 96:2.

Nazi uunatunda kusambalila musagu musoga wa Bukota bwa Kalaga nu bwisulilwa bwabo mu bindi bikuvwa? Ntuibikile uno musago wa kilemanizyo, sambalila bango ndi una nkungu!

• Musagu musoga wa buni unaema kusolwa?

• Buni bwakitaga Yesu butukulemba niswe?

Itenda “painia” lyalosya mambizi mengi muntu ukuunza kilenge kitizibilwe na bantu nu walosya nzila ku bango. Tunatenda buno Yesu abezaga painia, kabamba ka buno asingilwe ga kisi kuigisya bango bantu musago wa kalamo nu kulosya bantu bubeneima kulama. (Matayo 20:28) Mu bino bindi byitu, beigisibwa bage bekujanga bwakitaga ndi bese batingya nkungu ningi bekulonda bango beigisibwa. (Matayo 28:19, 20) Bamozi kubo bekukita mulimo utwamana wa painia.

Muntu ukuigisya bango bantu nkungu zinsania. Balongeki ba Yehowa bansania bekusambala musago musoga. Bamozi kubo beilongeka kuba painia wa kuizizya ukutenda buno bekutingya nkungu 70 mu mwezi. Bube kukya bekulonda tugu mulimo za kyindi kya busi. Bango bekusingwa anga painia wa bwelebwele mu bilenge bite na beigisya bengi; bekutingya nkungu 130. Bapainia tabekulonda babe na bintu byingi, babika kilemanizyo kyabo kwa Yehowa buno abakase bibeli nabyo mpusia. (Matayo 6:31-33; 1 Timoteo 6:6-8) Betenema kwigisya bango bantu nkungu zinsania benaba ba painia bakasya, bekutingya nkungu 30 ali 50 mu mwezi.

Muntu ukusingwa na mutima wa lutundo kwa Kalaga nu ku bantu. Anga Yesu, twamona buno bantu beingi beli na mpusia za kumenya Kalaga. (Marko 6:34) Bitusetwamenya binabakasia aba ono lelo nu kubagelezya kilemanizyo kisoga. Kabamba ka Lutundo lwage kubango bantu, painia ekukasa nkungu zage, magala mage, bwena basambalila musago musoga. (Matayo 22:39; 1 Batesalonika 2:8) Ndi akita bubo bukatizyo bwage nti bwagugumala, nti asigelela Kalaga nu nti aba na mbogimbogi ningi.​—Misako 20:35.

• Buni buinulwa bwa painia?

• Kikusingaga ba painia bakite mulimo wabo?

Likolo lya Kiteokrasia kutukila wa kalazi lili kamenyekelo ka Balongeki Ba Yehowa. Likolo liabo liabo liabikwa ku babo bekukita mulimo wa nkungu insanya, ku kusambalila bantu musago wa bukota, kububo ben’ema kusililizia mulimo wabo unsania.​—2 Timoteo 4:5.

Mulimo wa Likolo lya Mapainia. Kusila kwa mwaka mutangi wa mulimo wa bindi binsania bya bupainia, painia wa mulume ali wamukikulu, nta sanzwa mu likolo lya bindi 6, liabe mu numba za Bukota zikile muntungo nage. Kikulembwa mu likolo lilio, ukukasia mapainia beli bwigi na Yehowa bebe na menge mingi mu mulimo unsania; nu kujangana na bukatizya bwa mulimo.

Likolo Lya Basambazi ba musagu musoga wa Bukota. Lino likolo lya miezi ibili likukitwa kabamba ka mapainia beli na kumenya kwingi, beli na mpusia za kusiga numba zabo nu kwenda kukamba kuko kwatunganana. Bekwitabizia buno, ‘Niligano, Nsinge,’ balemba musambazi munene wabende ga kisi, Yesu Kristo. (Isaya 6:8; Yoana 7:29) Ku buno batuka bulazi na numba zaabo, kwabakita babe na kalamo kabibu. Mizinga, kilimo, nu mulilizi wengukana na biwakitaga nu biwaliaga. Tondo, bunaba busoga kuijigisia ungo mutendezi. Lino likolo likukasia mibuto basimba balume nu bakikulu nu basongana beteli na baana, beli na miaka gesamba 23 nu 65, buno babe na misako za mutima, zikabakasia ku mulimo wabo kuko ku bekenda nu bwangato bwa kubakasia bekite busoga mulimo wa Yehowa nu bulongeki bwage.

Likolo lya Gileadi lya Bibilia. Mu Kiebrania Gileadi ukutenda bunoe Balongeki bengi. Kutukila mwaka wa 1943, nkungu za lingile Gileadi, basililizi ba likolo lya Gileadi kutinga 8 000, bese basingwa mu zingo nsi, anga ba misionere bakasane musago wa Kalaga busoga, tondo nu kuzinda kwa kisi kinsania. (Misako 13:47) Gamonekile basililizi batangi, bamozi kubo babasile ku Pérou, takwabezaga mikundamino ma balongeki, ono lelo kuseli mikundamino kutinga 1 000. Mu Japon, mu nkungu zezo zalinganga ba misionere beitu kukita mulimo mu kisi kinsanya, mwabezaga Balongeki betakuka ikumi. Lelo kuse balongeki kutinga 200 000. Mu miezi etano za miigisia ku Gileadi, zasega kulondalonda miigisia meingi mu masanzo ma Kalaga. Babo bekukamba mulimo anga mapaina ba bwelebwele aba bamisionere ba muisoa, beli mubwangato bwa biro, aba beli mu ngendo za mulimo, basegwa kwenda ku lilio likolo, buno bakaswe miigisia mazito ma lugendo lumozi makubakasa menge, nu makuidindika mu mulimo wabo.

• Mutale muki unamoneka mu likolo lya mulimo wa mapainia?

• Banazi ubasombolwa ku likolo lya Basambazi ba musagu musoga wa Bukota?