ISOMO 41
Biblia Byatenda Kikizi ku Kabamba ka Kujama Gamozi?
Bantu beingi bekukua nsoni kwezezya ku kabamba ka kujama gamozi. Tondo Biblia byatendela bwasi-bwasi musagu wongo mu nzila za lwanzo. Bibyo byatenda Biblia bikutulisizya mutali. Nu byatukasya kuba na kalamo kasoga, kubuno Biblia byatukile kwa Yehowa Mubumbi weitu. Kubuno izi bibyo bili bisoga ku beiswe, atulosya bibyo bitwatunganana kukita kwa kumutananizya nu bibyo byatukasye kubogelabogela kalamo milyalya.
1. Buni buli makengelo ma Yehowa ku kabamba ka kujama gamozi?
Kujama gamozi kuli lukaso kutuka ku Yehowa. Ekutunda ba mukazi n’iba basongana babogelebogele lukaso lwongo. Lulo lukaso lwakasya ba mukazi n’iba kubuta bana, nu lingo kulosyana lutundo nu mbogimbogi gabesamba. Ukinsa Biblia, Kitondo kya Kalaga kyatenda bunee: “Bogaboga na mukikulu wa busikila bwobe.” (Misumo 5:18, 19) Yehowa ekutunda wamulume abe mukatizia ku mukikulu wage nu mukikulu abe mukatizia ku iba wage, nu azugila kwita meiga.—Soma Baebrania 13:4.
2. Butazi buli na bwisulilwa bukizi?
Biblia byalosya buno “bitazi, . . . tabekapiena bukota bwa Kalaga.” (1 Bakorinto 6:9, 10) Basanzi ba Biblia bakambizizye kitondo kya Kigiriki por·neiʹa kwa kutendela butazi. Kitondo kyongo kisa munda 1) kujama gamozia gesamba bantu babili betasongana, 2) kujama gamozi wamulume ku wamulume nu mukikulu ku mukikulu, nu 3) kujama gamozi na nyama. Tukubogyabogya Yehowa nu tukwidisizya mutali beiswe binyene ga ‘twibembukya na butazi.’—1 Batesalonika 4:3.
TUMENYININE
Lola buni b’uneibembukya na butazi nu mutali u unamona kwa kukita bubo.
3. Tina butazi
Yosefu wamulume mukatizia ku Kalaga atinile kukita butazi gasegilwe kujama gamozi na mukikulu wa ungo muntu. Soma Kulinga 39:1-12, nu kusila ibuzye zeno mbuzya:
Yosefu atinile ku kabamba kakizi?—Lola mulindi 9.
Ukukengela buno Yosefu akitile busoga? Kabamba kakizi watenda bubo?
Basikila nu bakinga benakita kikizi ono lelo kwa kujanga musumo wa Yosefu nu kutina butazi? Lola VIDEO.
Yehowa atusega beiswe bansania tutine butazi. Soma 1 Bakorinto 6:18, nu kusila ibuzye zeno mbuzya:
Bikizi binabasizya muntu kukita butazi?
Buni b’unatina butazi?
4. Unakinda mugeleko wa kukita butazi
Kikizi kinakita bube bubibu kukinda mugeleko wa kukita butazi? Lola VIDEO, nu kusila ibuzye luno lubuzya lwalemba.
Mu zeno video, mubuto akitile kikizi gamenyile buno makengelo mage nu misako zage zinamukita ntasigale mulandania ku mukikulu wage?
Aba Bakristo bakatizia ku Kalaga batunganana kwidindika kuba na makengelo masoga bindi binsania. Unakita kikizi kwa kusiga kukengela bitondo bya nsese? Soma Bafilipi 4:8, nu kusila ibuzye zeno mbuzya:
Bitondo bikizi bitwatunganana kukengela kubyo?
Mu nzila nkizi kusoma Biblia nu kuba na byeingi bya kukita mu mulimo wa Yehowa kunatukasya kukinda mugeleko wa kukita bwagi?
5. Kanuni za Yehowa zikutulisizya mutali
Yehowa izi bibyo bili bisoga ku beiswe. Atulosya buni butunendelela kuba na makengelo masoga nu mponga zitunamona kwa kukita bubo. Soma Misumo 7:7-27 aba lola VIDEO, nu kusila ibuzye zeno mbuzya zalemba.
Buni bwingide gono musikila mu malindiko?—Lola Misumo 7:8, 9.
Bulingilingi na Misumo 7:23, 26, butazi bunaba na mbaselo mbi nunse. Tunabembuka tunkunku tukizi kwa kwendelela kuba na makengelo masoga?
Mu nzila nkizi makengelo masoga menatukasya kubogelabogela kalamo milyalya?
Bantu bamozi bekukengelaga buno, bibyo byatenda Biblia ku kabamba ka kujama gamozi wamulume ku wamulume nu mukikulu ku mukikulu meli makengelo ma kutaba na lutundo. Tondo Yehowa, Kalaga mwija lutundo ekutunda bantu bansania babogelebogele kalamo milyalya. Buno tubogelebogele kalamo milyalya, twatunganana kulama bulingilingi na kanuni zage. Soma 1 Bakorinto 6:9-11, nu kusila ibuzye luno lubuzya:
Ndi kujama gamozi wamulume ku wamulume nu mukikulu ku mukikulu u kunakita tugu muntu kuba uteisanana?
Buno tutananizye Kalaga, beiswe bansania twatunganana kukita migaluko. Ndi kuli mutali kukita bubo? Soma Nimbo 19:8, 11, nu kusila ibuzye zeno mbuzya:
Ku makengelo mobe, ndi kanuni za Yehowa zalengelela? Kabamba kakizi watenda bubo?
Yehowa es’akasya bantu beingi kulama bulingilingi na kanuni zage. Enakukasya nugwe tondi
NDI MUNTU AKUSOLELA BUNEE: “Takuli bubi ndi bantu babili b’ungwana bajama gamozi, kubuno batundana.”
Unatenda buni?
MAKENGELO MANENE
Kujama gamozi kuli lukaso kutuka ku Yehowa ku ba mukazi n’iba buno babogelebogele lukaso lwongo.
Mbuzya za kwikengelesya
Butazi bwisa munda kikizi?
Kikizi kyatukasye kubembuka butazi?
Twamone mutali mukizi kwa kulemba kanuni za Yehowa?
LONDA LINGO
Lola kabamba kakizi Yehowa ntekutunda wamulume nu mukikulu bajame gamozi lwabusio lwa kusongana.
Lola kabamba kakizi Biblia bigisya buno kujama gamozi wamulume ku wamulume nu mukikulu ku mukikulu zili misako mibi. Tondo bubo tabwisulwa buno twatunganana kusomba babo bekukita bubo.
“Ndi Buli Bubi Kujama Gamozi Wamulume ku Wamulume nu Mukikulu ku Mukikulu?” (Musagu wa ku Enternete)
Lola buni bukutulanga milembe za Kalaga ku kabamba ka kujama gamozi.
“Ndi Kujama Gamozi Kutingila Kanua Kuli Kujama Gamozi Lebelebe?” (Musagu wa ku Enternete)
Mu musagu “Bandosyaga Lwanzo,” lola kikizi kyakasizye wamulume umozi wajamaga gamozi na bamulume banyage kugalukya lukita lwa kalamo kage kwa kutananizya Kalaga.
“Biblia Bikugalukyaga Kalamo ka Bantu” (Munara wa Mulinzi, 1 Mwezi wa 4, 2011)
a Kujama gamozi mu nzila ziteli za bumba kwisa munda kujama gamozi kutingila kanua, ntungi, nu kujana na kyamunsulu kya ungo kwa kumulutila bumania.