ISOMO 13
Madini ma Buza Tamekukutyaga Kalaga mu Nzila Nkizi?
Kubuno Kalaga eli lutundo kabamba kakizi madini mekutenda buno mekukambela Kalaga mekukita misako neingi mbi? Bubo bwalosya buno mamo madini meli ma buza; tamekukutyaga Kalaga. Tamekukutyaga Kalaga mu nzila nkizi? Kalaga ekwijungwaga buni ku kabamba ka bubo? Nu ekakita kikizi ku kabamba ka bubo?
1. Mu nzila nkizi madini ma buza tamekukutyaga Kalaga kutingila meigisya mazo?
Beija madini ma buza “bagalukizye bulili bwa Kalaga ku buza.” (Baroma 1:25) Anga, madini meingi tamekwigisyaga izina lya Kalaga ku bakumbamizi bazo. Tondo Biblia byatenda buno izina lya Kalaga lyatunganana kukambibwa. (Yoeli 2:32) Mu nkungu za tubebe bakulu beingi ba madini bekutendaga bunee: “U bwatundile Kalaga.” Tondo bubo buli buza. Kalaga ntekulisyaga bubi. (Soma Yakobo 1:13.) Kitondo kyakwinia mutima kili buno buza bwa madini bwabika bantu bulazi na Kalaga.
2. Mu nzila nkizi madini ma buza tamekukutyaga Kalaga kutingila misako zazo?
Madini ma buza tamekukitila bantu kwa lutundo anga bukukitaga Yehowa. Biblia byatenda buno ku kabamba ka madini ma buza “bwagi bwage bwingi bwakundamenne nu kubasa mwigulu.” (Kulolesibwa 18:5) Kutukila wakalazi madini ma buza mekwisambikya mu politike, mekukasya ku bita nu mekulisizya bantu beingi lukuo. Bakulu beingi ba madini bekutundaga kulama kalamo kasoga, ukinsa bekusegaga musanga ku bakatizia babo. Misako zezo zalosya buno tabizi Kalaga, lebelebe tabatananina kumukambela.—Soma 1 Yoana 4:8.
3. Kalaga ekwijungwaga buni ku kabamba ka madini ma buza?
Ndi misako zikukitwaga na madini ma buza zikukwinia mutima, embe leno Yehowa, ukukengela ekwijungwaga buni? Ekutundaga bantu, tondo bubo butekumukutyaga bakulu ba madini nu bubekwengelela bakatizia babo bukumwinia mutima. Kalaga alaga buno madini ma buza mekazikibwa nu ‘tamekamonekako lingo.’ (Kulolesibwa 18:21) Bwigi gano, Kalaga azikye madini mansania ma buza.—Kulolesibwa 18:8.
TUMENYININE
Lola buni bukwijungwaga Kalaga ku kabamba ka madini ma buza. Menya byeingi ku bibyo byakitile madini ma buza, tondo ijigisye kabamba kakizi bubo tabunakukita usige kwijigisya kumenya Yehowa.
4. Kalaga ntekwitabizyaga madini mansania
Bantu beingi bekukatiziaga buno madini meli anga nzila zatingana-tingana nu zinsania zika ku Kalaga. Tondo ndi bubo buli bulili? Soma Matayo 7:13, 14, nu kusila ibuzye luno lubuzya:
Biblia byatenda kikizi ku kabamba ka nzila zika ku kalamo?
Lola VIDEO, nu kusila ibuzye luno lubuzya lwalemba.
Ndi Biblia byatenda buno madini meingi mitabizibwa na Kalaga?
5. Madini ma buza tamekulosyaga lutundo lwa Kalaga
Madini tamekukutyaga Kalaga mu nzila neingi. Nu bubi bunene buli buno madini mekwisambikya mu bita. Kwa kumona musumo umozi, lola VIDEO. Nu kusila ibuzye zeno mbuzya zalemba.
Madini meingi makitaga kikizi mu bita bya mabili bya kisi kinsania?
Buni bukwijungwa ku kabamba ka bubo?
Soma Yoana 13:34, 35 nu 17:16. Kusila ibuzye zeno mbuzya:
Ku makengelo mobe, buni bukwijungwaga Yehowa g’ekumonaga madini meisambikya mu bita?
Madini ma buza u mekukitaga bitondo byeingi bibi. Mu nzila nkizi ukwimonela buno madini tamekulosya lutundo lwa Kalaga?
Madini ma buza tamekulosyaga lutundo lwa Kalaga
6. Kalaga ekutunda kutikya bantu mu madini ma buza
Soma Kulolesibwa 18:4,a nu kusila ibuzye luno lubuzya:
Kumenya buno Kalaga ekutunda kukasya bantu babezaga bese bengelelwa na madini ma buza kwakukita ujungwe buni?
7. Endelela kwijigisya byeingi ku kabamba ka Kalaga wa bulili
Ndi misako mbi zikukitwaga na madini ma buza zinagalukya makengelo maukubezaga namo ku Kalaga? Kengela ku musikila utekutunda kulemba nzila nsoga zamulosizye isé. Atuka ku numba z’isé nu enda kulama kalamo kabibu. Isé ntatananizibwa na misako zikukita mwana wage. Kabamba kakizi tabuli busoga kutenda buno isé u watundile mwana wage alame bubo?
Ndi misako zikukitwa na madini ma buza zinakukita umone Yehowa buno eli mubi nu kusiga kwijigisya kumumenya?
NDI MUNTU AKUSOLELA BUNEE: “Nsikutundaga lingo k’ungwa ku musagu wa Kalaga kubuno madini u mekukitaga bubi bunsania.”
Ndi bubo u buli makengelo mobe?
Kabamba kakizi misako za madini ma buza tamenagalukya makengelo mobe maukubezaga namo ku Yehowa?
MAKENGELO MANENE
Madini ma buza tamekukutyaga Kalaga kutingila meigisya mazo nu misako mbi. Kalaga ekazikya madini ma buza.
Mbuzya za kwikengelesya
Ukwijungwa buni ku kabamba ka meigisya nu misako za madini ma buza?
Yehowa ekwijungwaga buni ku kabamba ka madini ma buza?
Kalaga ekakita buni madini ma buza?
LONDA LINGO
Soma buno umenye mu nzila nkizi ibili nene madini tamekutananizyaga Kalaga.
Kabamba kakizi Yehowa ekutunda tumukumbamine gamozi na bango?
“Ndi Kuba mu Idini Lyalongekwa Busoga Kuli kwa Mutali?” (Musagu wa ku Enternete)
Patele umozi inile mutima n’idini lyage. Tondo bubo tabwamukitile asige kwijigisya bulili ku kabamba ka Kalaga.
“Kabamba Kakizi Patele Umozi Atukile mu Idini Lyage?” (Amuka! Na 2 2015)
Kutukila wakalazi madini mekutendaga buza bukukitaga bantu bakatizie buno Kalaga eli mwiti nu ntekutwangaga. Ijigisye bulili ku kabamba ka buza bwongo busatu.
“Buza Bukukitaga Bantu Tabatunde Kalaga” (Munara wa Mulinzi, 1 Mwezi wa 11, 2013)