Marko
11 Chøchø kpa ngʉ si Yerusalemu na ndirigoti b’lo kpa singʉe Mizeituni dhi Ngøtsɨ djó Betefage ma, Betania ma na nǎ ro, Yesu chongʉe ndi unakpa kana ro aro kʉ ná kpa, 2 ndirigoti ke pongʉeri kpa dho: “Anira ni njí ni nja ná bba gʉ ndirigoti fø bba gʉ ni si ró thei, ni si nzá djo ndrŭ ro d’erie dji ná ddikpa kana dzá ngba ro. Aniklo ri ndirigoti anisi ri na iga. 3 Njati ddikpa ke pori, ‘Ni ká rinji fø addudho?’ ró, anipori, ‘Bboke dhó lo u ri ndirigoti ke ri ngʉ kpadjo.’” 4 Føro kpa rangʉe ro, kpa singʉe kana kalʉ ro arugu, chu tso ró kʉ ná ddikpa dzaitso ró le sʉ ndi ro ndirigoti kpa klongʉe ri klo. 5 Føga ngʉ tøni ná ndrŭ kana nja ndrŭ dhungʉeri kpa tso: “Ni ká addu nji? Ni ká fø kana kalʉ kló addudho?” 6 Kpa ngʉngʉe logoti Yesu poeri ndima dho nari bbai, føro ndrŭ bbangʉeri kpa rárá ri na.
7 Kpa singʉe kana kalʉ na Yesu dhi ngana ro, kpa hungʉe ndima ró arugu rù ri djo ndirigoti ke dingʉe ri djo. 8 Bí kʉ ná ndrŭ ngʉ ndima ró arugu rù hú chu lu ndirigoti nja ndrŭ ngʉ tsú bɨ d’rɨ nza gʉ ro. 9 Ke njí ngʉ ra ná ndrŭ ma, ke goti ngʉ ra ná ndrŭ ma na ngʉ ndima nanga jø ɨ: “Ko rinzi, agø ke! Yova* ró dho na si nari kʉ le ronga leni ná ke! 10 Le ronga leni nari kʉ kodhi baba Daudi dhó gosi ná Pidhinga! Ko rinzi, agø ke, arø bbo ngbeni ná nga nǎ ro!” 11 Ke tsungʉe Yerusalemu na ndirigoti ke rangʉe hekalu na ro, ke njangʉe ndi kuso lu kʉ ná ritsi krʉ, ro nga ngʉ tɨtɨ nari dho ke ma rangʉe Betania na ndi una 12 kʉ ná kpa ma na.
12 Bbʉdyi, Betania nǎ ro kpa ngʉ tuni ro ù løngʉe ke. 13 Danga nǎ ro ke njangʉe ndi bɨ na kʉ ná figi dhi ddikpa tsú ndirigoti ke ndringʉeni ri kuso ndiro ndi nja ri djó ká kʉ ritsi ro ddi nari d’e. Ro ri kotɨ ke si ro, fø tsú djó nga ngʉe ddikpa ritsi ro maddi ri, ri djó ngʉe ri bɨ dhé, dhonalo ri nga ngʉe figi adi o ná saa ri. 14 Føro ke pongʉeri fø tsú ni: “Nzɨ ddikpa le ma d’a ni djó tsu-kpa ki ro ddi.” Ndirigoti ke unakpa ngʉ fø lo rrrr.
15 Yerusalemu na kpa si nari goti, ke tsungʉe hekalu na ro, ke ngangʉe ritsi nanga ngʉ dzi ná kpa ma, ritsi ngʉ dzi ná kpa ma na didha tso hekalu nǎ ro. Mbø nanga ngʉ wø ná kpa dhó meza ma, bbǎna nanga ngʉ dzi ná kpa ngʉ di djó ná ba ma na thí ke lengʉe glʉ. 16 Ke nzɨ ngʉ ri ro bba ddikpa le ma dá ndi djó no ro na hekalu nǎ lu ddi ri. 17 Føri goti ke ngʉ riddi ɨ kpa dho: “Ri ká ndini ɨ nzá: ‘Madzá dza le si nzi sala dhi dza krʉ kʉ ná ndrŭ tsɨ dho?’ Ro, ni liri fø dza ngʉ gbʉ dhi kpa ra runi ná nga.” 18 Bbakuhani djó bbobbonga ma, nga ndi ná kpa ma na rrngʉe fø lo ro, kpa ngangʉe ke ndima hwi ná chu nedha tso, ro kpa ke do ngʉ njinji dhonalo birobiro kʉ ná ndrŭ krʉ nanga ngʉ keni ke kedhó longaddidha dho.
19 Ngasdjó nga si ro, kpa rangʉe ra fø vile nǎ ro. 20 Ro, bbʉtso kpa ngʉ da figi dhi fø tsú kuso lu ro, kpa njangʉe ri b’lo ndi dyu ndi tɨtɨ djo i kpø ro. 21 Petro nongʉe fø lo nga ro, ke pongʉeri Yesu dho: “Rabi, anja di, ni wae ná chá tsú dyudyu!” 22 Føro Yesu ngʉngʉe logoti kpa dho: “Anidi udha na Mungu nǎ. 23 Bbʉbbʉ dhé ma ripo ni dho, njati ddikpa ke pori i ngø ni, ‘Angbeni iga ro ndirigoti ni rá ni bu jʉdda na,’ ro rie nzɨ ke nanga ro rɨni rɨ ndi thí nǎ ndirigoti rie nì ke kʉ udha na ndi po ná fø lo si njini nji nari djo ró, ri si njini nji. 24 Ri kʉ føri dzá lo dho i ma ripo ni dho, sala nǎ ni nganzi djo ná ritsi krʉ djo, anidi udha na nari kʉ ni ba ri b’lo, føro ni si ri baba. 25 Sala njidha dho ni dani ná saa na, anisa ni ró ni lai ndrŭ nji ná chelo sa ndrŭ dho ndiro nidhi ra nǎ Baba ma sa nidhi chelo ddi d’e.” 26* ——
27 Kpa ki ngʉngʉe Yerusalemu na. Føro hekalu lu ke ngʉ bbí ro, bbakuhani djó bbobbonga ma, nga ndi ná kpa ma, ngó kpa ma na singʉe 28 ndirigoti kpa dhungʉeri ke tso: “Ni nji ná fø ritsi ká ni nji ie chu na? Ndirigoti ni dho ká ie bbʉ fø bbonga fø lo njidha dho?” 29 Yesu ngʉngʉe logoti kpa dho: “Ma maddi ngʉ ddikpa lo ro i dhu ni tso; ná fø lo goti ni ngʉ ma dho nari goti ma d’ra ma ká fø lo nji ie chu na nari thei ni dho. 30 Yohani ngʉ bbʉ ná batiso ká singʉe ra nǎ ro inga ndrŭ dhó ro? Aningʉ madhó logoti.” 31 Føro kpa ngangʉe longanedha tso ndima kana ɨ ndima ripo ro: “Njati ko pori, ‘Ri si ra nǎ ro’ ró, ke si ridhu ko tso, ‘Nde, føro ká ni ungʉe ke nzá addudho?’ 32 Ro, njati ko mburi ko pori ‘Ndrŭ dhó ro’ ró?” Kpa ngʉ birobiro kʉ ná ndrŭ do nji dhonalo kʉ, ndrŭ chungʉeri chu Yohani ngʉe nabi. 33 Føri dho, kpa ngʉngʉe logoti Yesu dho, “Ko nzá churi ri.” Ro, Yesu maddi pongʉeri kpa ni: “Ma ma nzɨ ddi d’ra ma ká fø lo nji ie chu na nari ni dho ri.”