Yohani

4 Bboke rangʉe ri utso d’i, Bbafarisayo rr ri ndi una ndrŭ si bí ndirigoti ndi batiso bbʉ Yohani djolu ná saa na— 2 føro mai, batiso ngʉ bbʉ nari nga ngʉe Yesu nganga ri, ro ke unakpa— 3 ke tungʉeni Yudea nǎ ro ndirigoti ke ki rangʉe Galilea na. 4 Ro, ringangʉeni ke dá Samaria lu. 5 Føri dho ke singʉe Sikari le nzǐ ná ddikpa vile na, ná fønga kuso ngʉe Yakobo bbʉngʉe ndidhi dduna Yosefu dho ná nza. 6 Føga i ngʉe Yakobo bbɨngʉe ná dda maddi. Ro, Yesu njengʉeni nje ndi bbi ná bbi dho nari dho, ke dingʉe fø dda* tso ro; føri ngʉe chøchø dyina saa sita na.

7 Føro Samaria nǎ ddikpa le singʉe dda d’yʉdha dho, ro Yesu pongʉeri le dho: “Abbʉ dda ma jø.” 8 (Fø saa na Yesu unakpa rangʉe vile nǎ nyodha dhi ritsi dzi.) 9 Samaria nǎ fø le dhungʉeri ke tso: “Ni kʉ Muyaudi ró, ni ká dda kó ma tso ngbǎ idhé, dhonalo ma kʉ Samaria nǎ le?” (Dhonalo kʉ Wayaudi ma nzɨ adi rrni ndima kana Samaria nǎ ndrŭ na ri.) 10 Yesu ngʉngʉe logoti le dho: “Njati rie b’lo ni rr rie lo ro pá Mungu bbʉ ná bbʉdha djo ndirigori ni chúe ‘Abbʉ dda ma jø’ ripo ni dho ná ke nyi chu ri ró, ni i ka ni koe dda ke tso ndirigoti ke ka ndi bbʉe shinga dhi dda ni jø.” 11 Le pongʉeri ke dho: “Bboke, nidhó kʉ dda le d’yʉ na ná no ro ma nga ndirigoti i bbù nanga kʉ da, ró shinga dhi fø dda ká ni ba ngbaga ro? 12 Ni ká dada kodhi bbuna Yakobo djolu i dda ndi bbʉngʉe ko dho ro; ke ma, ndi ddui ma, ndidhó zǎ ma na krʉ ndima ngʉ adi ri jø ro?” 13 Yesu ngʉngʉe logoti le dho: “I dda jø ná ndrŭ krʉ ki dda d’yu si hwi vi. 14 Ro, ma bbʉ ná dda jø ná ke ki ro nzɨ dda d’yu si kʉ hwi ri ndirigoti ma bbʉ ná dda jø ná ke na fø dda si ngʉ dda tø ná nga, bʉ ndi bʉ cho ró nŭnŭ di ná shinga ndi bbʉ ro.” 15 Fø isɨle ngʉngʉe logoti: “Bboke, abbʉ fø dda ma jø ndiro nzɨ dda d’yu hwi ma ki ndirigoti nzɨ ma ki di si i ngana dda d’yʉdha dho ró.”

16 Føro Yesu pongʉeri le dho: “Ara nibbá ke nzi ndirigoti ni si iga.” 17 Fø isɨle ngʉngʉe logoti: “Mabbá nga kʉ ke ro ri.” Yesu pongʉeri: “Ni pori, ‘Mabbá nga kʉ ke ro ri’ ná føri na ni po bbʉbbʉlo. 18 Dhonalo ni køni mbʉ kʉ ná kpetsi kpa dho b’lo, ndirigoti kpadjo na ni di nari ma nga ddi kʉ nibbá ke ri. Fø lo na ni po bbʉbbʉlo.” 19 Le ngʉngʉe logoti: “Bboke, ma njari nari kʉ ni kʉ nabi. 20 Ko bbui ngʉ adi ra madha bbʉ i ngøtsɨ djo, ro ni adi ripo madha ringani le rá bbʉ ná nga kʉ Yerusalemu nǎ.” 21 Yesu pongʉeri le dho: “I isɨle au ma, ddikpa ddo si nì, ná ddo na nzɨ ni si ra Baba ro ma i ngøtsɨ djo maddi ri, Yerusalemu na ma nzɨ ddi. 22 Ni má nari kʉ nzá ni chu ná ke, ro ko má nari kʉ chu ko chu ná ke dhonalo gødha tso ngani Wayaudi bbá ro. 23 Ro, saa si nì ndirigoti ri si b’lo; ná fø saa na bbʉbbʉ madha bbʉ ná ndrŭ si Baba ma roho na ndirigoti bbʉbbʉlo na. Baba nganga maddi fø di ná ndrŭ ne ndi madha dho. 24 Mungu kʉ roho ndirigoti ke má ná ndrŭ maddi ringani má ke roho na ndirigoti bbʉbbʉlo na.” 25 Fø isɨle pongʉeri: Ma churi ngbà Masiya si nì, Kristo le ndi nzǐ ro. Føri goti ke si ró, ke si kʉ fø lo krʉ d’ra ko dho pʉlʉpʉlʉ.” 26 Yesu pongʉeri le dho: “Ni na ma loti ro, ma i kʉ ke.”

27 Fø saa na thei ke unakpa singʉe, ro kpa nanga kengʉeni ke, ke loti isɨle na nari dho. Føro mai kpa kana ddikpa ke ma nzá di dhungʉeri ro ɨ ri: “Ni ká addu ne? Ni ká loti fø isɨle na addudho?” 28 Føri dho le bbangʉe dda ndi rangʉe d’yʉ na ná no føga ro, le rangʉe vile na ndirigoti le d’rangʉeri ɨ ndrŭ dho: 29 “Anisi ni nja ma njirie ná lo krʉ d’ra ma dho ná ke d’e. Fø ke ká ka ndi rá bani Kristo nzá?” 30 Ndrŭ tungʉeni vile nǎ ro ndirigoti ndrŭ ngangʉe ke dhi ngana ndima si nari tso.

31 Fø saa na ke unakpa ngʉ kǎ ke ro ɨ ndima ripo ro: “Rabi, anyonga.” 32 Ro, ke pongʉeri kpa ni: “Ma nyo nari kʉ nzá ni chu ná nyo.” 33 Føro ke unakpa ngangʉe ri tidha tso ɨ ndima kana: “Nde, i ke nyó nzá ddikpa le ma si nyo ro na ddi ri.” 34 Yesu pongʉeri kpa dho: “Madzá nyo kʉ, ma njí ma chongʉe ná ke ji ná lo ndirigoti ma d’yá kedzá njí tso. 35 Ni ripo bi gʉ ma tho go nyo tso njudha dho, ri ká nga fø ri? Ro, ma ripo ni dho: Aningbe ni nyǒ ndirigoti aninjari nza gʉ nga kʉ sawø nyo tso njudha dho. Kpadjo, 36 nyo tso njú ná ke ndi kobe ba ndirigoti ke nyo tso njú cho ró nŭnŭ di ná shinga dho, ndiro nyo zʉ ná ke ma, nyo tso njú ná ke ma na njí hwè ddinga d’e. 37 Dhonalo føri chulu, i lo dzá bbʉbbʉnga dhoni: Ddikpa ri kʉ nyo zʉ ná ke ndirigoti ddi ri kʉ nyo tso njú ná ke. 38 Ma cho ni ni rá nzá djotsina ni nzani ná nyo tso nju d’e. Ri djotsina d’i ndrŭ nzani, ro ni i faida ba fø ndrŭ nji ná njí nǎ ro.”

39 Fø vile nǎ Samaria dhi ngø nǎ bí kʉ ná ndrŭ ungʉe ke u, fø isɨle d’ra ke djo ná i lo djotsina: “Ke d’ra ma njirie ná lo krʉ ma dho.” 40 Føri dho, Samaria nǎ ndrŭ singʉe ke dhi ngana ro, kpa nzingʉeri ke tso, ke má ndima bba; føro ke ma dingʉe kpa ma na aro cha. 41 Føri dzá lo dho, ke pongʉe ná lo djotsina bí kʉ ná ndrŭ dhongʉe udha. 42 Føri goti ndrŭ pongʉeri fø le dho: “Ko nzá uri ni po ná lo kpali dho dhé ri, dhonalo ko rr ri ko nganga bɨ na ndirigoti ko churi chu nari kʉ, i ke kʉ bbʉbbʉ dhé dz’ djó ndrŭ gødha dho si ná ke.”

43 Aro cha ndi di fø bba gʉ nari goti ke rangʉe Galilea na. 44 Ro, Yesu nganga i pongʉeri nari kʉ, nabi dho nzɨ ndrŭ adi heshima ro bbʉ ndima bbá ngø nganga nǎ ri. 45 Føri dho, Galilea na ke si ro, Galilea nǎ ndrŭ kongʉe ke ko, dhonalo kʉ kpa njangʉe Yerusalemu nǎ ngʉe ná fete dhi ngana ke njingʉe ná lo nja; dhonalo kpa nganga ma ngʉe ddi fø fete dhi ngana.

46 Føri goti ke ki singʉe Galilea nǎ Kana na, føri kʉ dda thika ke lengʉe wa ná nga. Ro, ddikpa pi bbá ngʉ adi njínji ná ddikpa bbonga dhi dduna ngʉe dhe na Kapernaumu nǎ. 47 Ke rrngʉe Yesu si Yudea nǎ ro Galilea na nari ro, ke rangʉe Yesu dhi ngana ndirigoti ke nzingʉeri Yesu thʉ ndiro ke gø ndidhi dduna d’e, dhonalo ke ngʉe chøchø ndi dhedhe. 48 Ro, Yesu pongʉeri ke ni: “Njati ni nja ddù ma, ké dho le nanga keni ná lo ma na nzá ró, nzɨ ni ri ro uri.” 49 Ro, pi bbá njí dhi ke pongʉeri Yesu dho: “Bboke, athʉ ma bba nzá madzá rengba d’e dhe nari njí.” 50 Yesu ngʉngʉe logoti ke dho: “Angʉ ni bba dhonalo nidzá ngba kʉ shi ró.” Ke ungʉe Yesu po ndi dho ná fø lo u ndirigoti ke ngʉngʉe ndi bba. 51 Go ke ngʉ ra ndi bba ro, ke singʉe nju ndidhó njí dhi kpa na, ná kpa pongʉeri ke dho, kedzá kpetsi ngba gø b’lo. 52 Føro ke dhungʉe ngba ká mbue ndi bblo ngbá saa na nari kpa tso. Ro, kpa pongʉeri: “Ngba ró fievre sieni nzingá chøchø saa saba* si ro.” 53 Føro ngba dzá baba chungʉeri thei nari kʉ, fø lo njieni Yesu poeri: “Nidzá ngba kʉ shi” ná saa nganga na thei. Føri dho ke ma, ndibbá dza nǎ ndrŭ krʉ ma na ungʉeri u. 54 Føri ngʉe ya pili Yesu njingʉe ddù, Yudea nǎ ro ndi si Galilea na ro ri.