Roma
9 Ma kʉ Kristo unake nari dho, ma bbʉbbʉlo po, ma nzɨ kali ro sha ri. Roho takatifu chutso ddá ndi dho ro, madhó zamiri fø lo dzá bbʉbbʉnga d’ra i ri bbai: 2 Ma kʉ njedha na bbo ndirigoti ma thí kʉ vodha na krʉ saa ró. 3 Rie nì ri e ka ri ró ma ka ma tue ma d’i Kristo ró ro wa wani ná ke bbai, ma djoi, kobbá ngø nǎ ndrŭ djotsina. 4 Føri kʉ Bbaisraeli ndirigoti kpa Mungu vʉngʉe kpa é ndidzá nzø d’e. Ke dhongʉe ndidzá kadha kpa dho, ke njingʉe koddo kpa na, ke bbʉngʉe Yadha kpa dho, ke njingʉe tsodha kpa dho, ndirigoti ke bbʉngʉe kpa dho ná bblonga kʉ, kpa njinjí ndi dho. 5 Kpa kʉ ko bbui nǎ gø ndirigoti Kristo maddi singʉe fø gø nǎ ro ndrŭ ndí na ndi ngʉe ro. Krʉ ritsi djo kʉ ná Mungu ba madha cho ró nŭnŭnga dho. Amina.
6 Føro mai, Mungu dhó tsodha ro nzá mangʉe pá ri. Dhonalo ri nga kʉ Israeli nǎ gø krʉ i kʉ “Israeli” nganga ri. 7 Ri nga kʉ kpa krʉ i kʉ bbʉbbʉ nzø, ndima kʉ Abrahamu nǎ gø nari dho dhé ri. Dhonalo Mungu pongʉeri Abrahamu dho: “Ni nǎ gø le si nzi nari kʉ Isaka nǎ ro si ná gø.” 8 Fø lo ridho nari kʉ, ri nga kʉ Abrahamu gø ná nzø krʉ i kʉ Mungu dzá nzø nganga ri. Føri rɨngana bbʉbbʉ gø le zø nari kʉ, Mungu dhó tsodha djotsina gøni ná nzø. 9 Dhonalo Mungu pongʉeri: “Ma si si bbʉ cho nǎ i saa na, ndirigoti Sara dhó sie kpetsi ngba.” 10 Rebeka bangʉe zʉ nzø dhi lɨnga kodhi bbuna Isaka na ná saa na maddi ringʉe fø. 11 Kpa gøni nari njí ndirigoti che inga bblo kʉ ná ddikpa lo ro ma kpa nji nari njí, Mungu dhongʉeri nari kʉ ndi kpe ná lo nzá d’yʉ ndi njí ró ri, ro ndi nzi ndrŭ ndirigoti ndi vʉ ndrŭ nari ró. 12 Føri dho i ke pongʉeri le dho: “Ya kwanza gøni ná ke sie ya pili gøni ná ke dhó nokpa.” 13 Ddiddi ndi ndini ná lo pori nari bbai: “Yakobo i ma jiji, ro Esau ma ndrondro.”
14 Ko ká ji ko pori nari kʉ Mungu nga kʉ chølo dhi ke ri? Ri nga kʉ fø ri. 15 Dhonalo ke pongʉeri ɨ Musa dho: “Ma si zølo dho ma thí ji ná le dho, ndirigoti ma si zø be ma thí ji ná le djo.” 16 Fø lo nzá d’yʉ ndi ddikpa ke ji ná lo ró inga ke nji ná kpakpanga ró ri, ro Mungu dhó zølo ró. 17 Dhonalo ndi ndini ná lo pori ɨ Farao djo: “Ma bbari ni di shi dho ná lo kʉ: ndiro ma dhǒ madzá kpakpanga ni chulu ndirigoti ma ró dho d’rani dz’ djolu gble d’e.” 18 Føri dho, Mungu adi zø be ndi thí ji ná le djo, ro krʉ jiri ndima é kpakpa ndima djǒ d’yu ro ná ndrŭ ke adi bbabba.
19 Njaro nja ndrŭ ka ndima dhuri: “Ke ká adi kosa ne ko nǎ ro addudho? Ke ji ná lo tso ró ká ie ka ndi ve tøni? 20 Nde ndrŭ, ni ká kʉ ie, ni ti chelo Mungu djo d’e? Rø le rø ná ritsi ká ka ndi pori ro ndi rø ná ke ni ɨ maddi: “Ni ká rø ma fø addudho?” 21 Nde, cha rø ná ke ká kʉ bbonga na nga nzz djo, ndiro ndi thɨ fø nzz nganga ro na dhé bbo dhó valer kʉ ná no inga nga dhó valer kʉ ná no d’e? 22 Mungu nganga maddi adi rinji fø. Ngbà mai Mungu ka ndi dhoe ndidhó bbò kʉ ná thø ma, ndidhó kpakpanga ma na ro i, ke vengʉe bbò kʉ ná fø thø bbʉngʉe ndi dho ná ndrŭ tso bbò kʉ ná dà le thí na, ná fø ndrŭ i ngʉe ddiddi d’rɨ nanga le ka le d’rɨe ná no bbai. 23 Ke njingʉe fø lo ndiro ndi dhǒ ndidzá bbò kʉ ná kadha ndidzá zølo ka ndima sie ba ná ndrŭ dho d’e. Fø ndrŭ ke tayarishangʉe anziro dhé ndima ba fø kadha d’e. 24 Ko i kʉ fø ndrŭ kana nja ndrŭ ro, ndirigoti ko nzá le nzi Wayaudi kana ro dhé ri, ro nja ndrŭ tsɨ kana ro maddi. 25 Ri njini Osea chulu ke pongʉe ná i ri bbai: “Nga kʉ madzá ndrŭ ná ndrŭ ma si nzi ‘madzá ndrŭ’ ndirigoti nzá dzá lo ndrŭ ji ná le ma si nzi ‘bbo ma ji ná le.’ 26 Ndrŭ pongʉeri kpa ni, ‘Ni nga kʉ madzá ndrŭ tsɨ ri,’ ná fønga nganga nǎ i ma si kpa nzi ‘shi di ná Mungu ddui.’”
27 Isaya ndi nanga jø Israeli dhi lo dho ɨ: “Nì mai Israeli nǎ ndrŭ kʉ bí bbo dda tso ró søkpa bbai ro, gø si gø ná ndrŭ kʉ sese dhé. 28 Dhonalo Yova* si lod’i dz’ djo; ke si ri njidha tso d’ya lele.” 29 Ddiddi Isaya pongʉeri nari bbai: “Søddá kpari dhi Yova* bbáe gø ro ko dho nzá ró, ko ka ko ngʉe Sodomu bbai ndirigoti ko ka ko die ddiddi Gomora na.”
30 Nde, føro ká ko ka ko po ngbá lo? D’i ngø nǎ ndrŭ dho udha nari dho le zø kpa chølo dhi ndrŭ, nzɨ mai kpa ngʉ chølo nji ro, 31 ro, nì mai Israeli ngʉ chølo dhi yadha dyø ro, kpa dho nzá fø yadha ró njí ndima nji nari ro kangʉeri. 32 Ri ká kangʉe kpa dho nzá addudho? Dhonalo kpa ngʉ rine ndima njí fø lo njí chulu, ro nga udha ndima dhǒ nari chulu ri. Føri dho, kpa b’ɨngʉe ndima “b’ɨ le kó b’ɨ ná dju ró.” 33 Ri kʉ ddiddi ndi ndini ná lo pori ná i ri bbai: “Anja! Ma b’ɨ ndrŭ kó b’ɨ ná dju li Sioni na ndirigoti njedha si bbʉ kpa dho ná dju, ro, ddikpa ke li ndi thí fø dju djo ró, fø ke thí ro nzɨ si bʉni ri.”