Yohani

7 Føri goti Yesu ngʉ bbi Galilea lu dhonalo ke nzá jingʉeri ndi bbi Yudea lu ri, Wayaudi ngʉ rine ndima hwi ke hwi nari dho. 2 Ro, Wayaudi dhó Tabernakulo* dhi fete ngʉe chøchø. 3 Føro, ke djoi pongʉeri ke ni: “Ara iga ro Yudea na ndiro ni unakpa ma nja ni nji ná lo ro ddi d’e. 4 Dhonalo njati ddikpa ke jiri krʉ ndrŭ chu ndi chu ró, ke nzɨ adi lo ro nji ru runi ná ngana ri. Njati rie fø lo ni nji ri ró, ara ni dho ndrŭ dho.” 5 Bbʉbbʉ dhé, ke djoi ma nzá ddi ungʉe ke ro ri. 6 Yesu ngʉngʉe logoti kpa dho: “Ma dhó saa ro nzá d’e si ri, ro nidhó saa si b’lo. 7 Ni dz’ ndro dho ná lo ro nga kʉ ri, ro ri ndro ma i ngbà dhonalo ma rid’ra pʉlʉpʉlʉ nari kʉ, ri dzá njí kʉ che. 8 Anidji dji dhé fete dhi ngana, ro ma nzɨ dji thei ri dhonalo madhó saa tso nzá d’e ka krʉ ri.” 9 Fø lo ke po kpa dho nari goti ke mangʉe Galilea na.

10 Ro, b’lo ke djoi dji fete dhi ngana ro, ke maddi djingʉe dji; ro ke nzá djingʉe pʉlʉpʉlʉ ri, ro nzá nga nja ndrŭ chu ro. 11 Føro Wayaudi ngangʉe ke nedha tso fete dhi ngana ɨ ndima ridhu ro: “Chá ke ká kʉ ngbaga?” 12 Ndrŭ ngʉ loti ke djo bbo birobiro kʉ ná ndrŭ kalu. Nja ndrŭ ngʉ ripo: “Føri kʉ bblo kʉ ná ke.” Ro, nja ndrŭ ngʉ ripo: “Ri nga kʉ føri; fø ke ndrŭ vivi.” 13 Bbʉbbʉ dhé, ddikpa le ma nzɨ ddi ngʉ lo ro ti ke djo pʉlʉpʉlʉ ri dhonalo ndrŭ ngʉ Wayaudi do nji.

14 B’lo fete si katikati nǎ ro, Yesu djingʉe hekalu na ndirigoti ke ngangʉe longaddidha tso. 15 Wayaudi nanga kengʉeni ke ndirigoti kpa ngʉ ripo ɨ: “I ke ká chu ndi ndini ná lo fø ngatsi ngbaribbai dhonalo ke nzá nji darasa* ro maddi ri ró?” 16 Yesu ngʉngʉe logoti: “Ma ddi nari nga kʉ madhó lo ri, ro ri si cho chongʉe ma ná ke dhó ro. 17 Njati ddikpa ke jiri ndi njí ke ji ná lo ró, ke si ma ddi ná lo ká si Mungu dhó ro inga ma nganga dhó ro nari chuchu. 18 Njati ddikpa ke di ndi nganga dhó ro si ná lo ti ró, fø ke madha ne ndi nganga dho, ro njati ddikpa ke di cho chongʉe ndi ná ke dhó madha ne ró, føri kʉ bbʉbbʉlo dhi ke ndirigoti nga kʉ chø ná lo ro nga kʉ ke nǎ ddikpa maddi ri. 19 Musa bbʉngʉe Yadha ni dho, ri ká nga føri? Ro, ddikpa le ma nzɨ ddi nga ro rr fø Yadha dho ri. Ni ká rine ni hwi ma addudho?” 20 Føro birobiro kʉ ná ndrŭ ngʉngʉe logoti: “Ni nǎ kʉ gó, ró ni ká ie ne ndi hwi?” 21 Yesu ngʉngʉe logoti: “Ma nji ritsi ddikpa dhé, ro ni krʉ nanga keni ke. 22 Ri kʉ føri dho i Musa bbʉngʉe yadha krr le le krr nari djo ni dho ri. Ro, fø yadha nzá singʉe Musa dhó ro ri, ro ni bbui dhó ro, ro ni ndrŭ krr sabato dyina. 23 Nde, njati rie ddi ni ddikpa ke krr sabato ddo dyina ma, ndiro ni njí Musa bbʉngʉe ná Yadha pongʉe ná lo d’e ri ró, føro ká ni nanga kani bbo addu dzá lo dho ma gø ddikpa ke sabato ddo dyina nari dho? 24 Anibba ndrŭ djo ni lod’i ndrŭ nyǒ djó nga ni nja nari ró ro nari tso, ro anid’ilo chølo na.”

25 Føro Yerusalemu nǎ nja ndrŭ ngangʉe ɨ ndima ridhu nari tso: “I ri ká nga hwi ndrŭ e ne ndima hwi ná ke ri? 26 Ro i aninjari! ke loti ndrŭ krʉ njí, ro kpa nzɨ ddikpa lo ro ma po ke ni ddi ri. Mwisho ká bbobbokpa si i ke kʉ Kristo nari u nzɨ bbʉbbʉ? 27 Føri dzá njonjonga, i ke ká si ngbaga ro ma nari ko chuchu, ro Kristo si si ná saa na, ddikpa le ma nzɨ ddi si ke ká si ngbaga ro nari ro chu ri. 28 Føro hekalu nǎ ke ngʉ longaddi ro, ke pongʉeri bbobbo ndi chu na ɨ: “Ni chu ma chu ndirigoti ni chu ma ká si ngbaga ro nari maddi. Ma nzá si ma nganga chu na ri, ma cho nari kʉ nì kʉ ná Ke, ndirigoti fø ke nzá ni chu ri. 29 Ma chu ke chu dhonalo ma i si ke rɨngana ndirigoti ke i cho ma.” 30 Kpa ngʉ rine ndima lø ke lø, ro ke djo li ndi thó ná le ro i nga ngʉe ri, dhonalo kedhó saa nzá d’engʉe si go ri. 31 Ro, birobiro kʉ ná ndrŭ kana bí kʉ ná ndrŭ ungʉe ke u ndirigoti ndrŭ ngʉ ripo ɨ: “Kristo si si ró, ke nzɨ si ddù ro nji i ke nji ná nga djolu ri, ri ká nga fø ri?”

32 Birobiro kʉ ná ndrŭ fø lo ti Yesu djo ndima chu nini ri na nari Bbafarisayo rr ro, kpa ma, bbakuhani djó bbobbonga ma na chongʉe nga ngʉ adi b’o ná kpa ndima rá ke lø d’e. 33 Føro Yesu pongʉeri: “Ni ma na ko ro kʉ sese saa kana dhé, ro føri goti ma si ra cho chongʉe ma ná Ke dhi ngana. 34 Ni si ma ne ro, ni nzɨ si ma ro ba ri, ndirigoti ma kʉ ná ngana nzá ni ro ka ni si si ri.” 35 Føri dho, Wayaudi ngʉ riti ɨ ndima kana: “I ke ká ji ndi rá ngbaga ndiro nzɨ ko ndi ba ró? Ke ká ji ndi rá Bbagiriki kalu nanga plini ná Wayaudi dhi ngana ndiro ndi ddi longa Bbagiriki dho d’e? 36 I ke po ná i lo na mana ká kʉ d’ʉ addu, ‘Ni si ma ne ro, ni nzɨ si ma ro ba ri, ndirigoti ma kʉ ná ngana nzá ni ro ka ni si si ri’?”

37 Ya mwisho ddo dyina, føri ngʉe fete ddo kana bbo kʉ ná ddo dyina, Yesu dani ro, ke pongʉeri bbobbo ndi chu na ɨ: “Ddikpa ke é dda d’yu ndi hwi ro ró, ke si ma dhi ngana nja ndi jø dda d’e. 38 Ddikpa ke é udha na ma nǎ ró, ‘fø ke nǎ atsi ro, shinga bbʉ ná dda si kʉ bʉbʉ’ ddiddi ndi ndini ná lo ripo nari bbai.” 39 Ro, fø lo ke pongʉe nì kʉ udha na ndi nǎ ná ndrŭ ka ndima sie ba ná roho djo; fø saa na nga roho ro ngʉe ri dhonalo Yesu nzá d’engʉe kadha ba go ri. 40 Birobiro kʉ ná ndrŭ kana ro, fø lo rrngʉe ná nja ndrŭ ngangʉe ri podha tso ɨ: “Bbʉbbʉ dhé i ri kʉ Nabi.” 41 Nja ndrŭ ngʉ ripo: “I ri kʉ Kristo.” Ro, nja ndrŭ ngʉ ripo: “Kristo ro nzá ka ndi sie Galilea nǎ ro ri, ri ká nga fø ri? 42 Ndi ndini ná lo ká pori nzá nari kʉ, Kristo ka ndi sie Daudi nǎ gø nǎ ro, ndirigoti Daudi ma bbá vilaje Betelehemu nǎ ro ri?” 43 Føri dho, birobiro kʉ ná ndrŭ nanga ndongʉeni ndó kedhó lo djotsina. 44 Nja kpa ngʉ rine ndima lø ke lø, ro ddikpa le ma nzá ddi lingʉe ndi thó ro ke djo ri.

45 Føri goti nga ngʉ adi b’o ná kpa ngʉngʉe ngʉ bbakuhani djó bbobbonga ma, Bbafarisayo ma na dhi ngana, ro kpa dhungʉeri nga ngʉ adi b’o ná kpa tso: “Ni ká si ke na nzá addudho?” 46 Kpa ngʉngʉe logoti: “Fø ke bbai tilo ná ndrŭ ro nzá ko d’erie nja ri.” 47 Føro Bbafarisayo dhungʉeri kpa tso: “Ni ká bbari fø ke shá ni nzá bbʉbbʉ? 48 Chutso ddá ná kpa ma, Bbafarisayo ma na kana nga kʉ fø ke u ná ke ro ddikpa maddi ri, ri ká nga fø ri? 49 Ro, nzá chu Yadha ná birobiro kʉ ná i ndrŭ kʉ wa wani ná ndrŭ.” 50 Anziro singʉe Yesu dhi ngana ná ke Nikodemu, Bbafarisayo kana ddi ke ndi ngʉe ro, pongʉeri ɨ kpa ni: 51 “Kodhó Yadha nzɨ adi lo ro d’i ddikpa le djo nzá ndi d’e le po ná lo rr ndirigoti nzá ndi d’e le nji ná lo chu ró ri, ri ká nga fø ri? 52 Kpa ngʉngʉe logoti ke dho: “Ni ma ká kʉ nga Galilea nǎ ke i ri? Ane lonanga ndirigoti ni si rinja nari kʉ, Galilea nǎ ro nzá nabi ro ka ndi si ri.*