Marko

4 Føri goti ke ngangʉe jʉdda tso ró ndi longaddi nari tso ki dhé ndirigoti birobiro kʉ ná ndrŭ kpari gbangʉe ndima tso ke kuso. Føri dho, ke djingʉe bbú na ndirigoti ke dingʉe ri na. Ke ngʉe dda tso ró ro da ronga, ro birobiro kʉ ná ndrŭ i ngʉe dda tso ró. 2 Ndirigoti ke ngangʉe bí kʉ ná lo ddidha tso kpa dho loroji chulu. Føro longa ke ngʉ ddi ro, ke pongʉeri kpa dho: 3 “Anirr di. Ngazʉ ná ke rangʉe ngazʉ. 4 Nyo ke ngʉ zʉ ro, nja nyo-kpa d’røngʉeni chu tso ro lu ndirigoti rè singʉe ro, rè chongʉe fø ri chó. 5 Nja ri d’røngʉeni dju djo, nga dz’ ndí-tso kʉ bbo ná ngana. Ndirigoti ri ngangʉe tse dhonalo føga nga dz’ ndí-tso ngʉe bbo ri. 6 Ro, dyi kangʉe ná saa na, dyi bɨngʉe ri bɨ ndirigoti ri dyungʉe dyu dhonalo ri tɨtɨ ro nga ngʉe ri. 7 Føri goti nja nyo-kpa d’røngʉeni kpelé kana, føro kpelé dhi ná saa na, ri chingʉe ri chi, ndirigoti ri nzá ongʉe ndi kpa ro ri. 8 Ro, nja nyo-kpa d’røngʉeni bblo kʉ ná dz’ djo, ri nga ro, ri dhingʉe ndirigoti ri ngangʉe ndi kpa odha tso, nja ri ongʉe ndi kpa 30 ina, ddi ri 60 ina ndirigoti ddi ri 100 ina.” 9 Føri goti ke pongʉeri ki: “Nì bɨ kʉ ngarrdha dho ná le rr fø lo rr.”

10 Føro ddiro ke ngʉe ná saa na, ke kuso ngʉe ná nja ndrŭ ma, ke una 12 kʉ ná kpa ma na ngangʉe ngadhudha tso ke tso fø loroji djo. 11 Ke ngʉngʉe logoti kpa dho: “Ni dho ritso uni u ni chu Mungu dhó Pidhinga dzá takatifu siri, ro bbaidjó kʉ ná fø ndrŭ dho krʉ kʉ ná ritsi kʉ loroji chulu. 12 Ndiro kpa nja ri nja ma ró, kpa ka ndima nja ri, ro nzɨ ndima famu ri na mana, ndirigoti kpa rr ri rr ma ró, kpa ka ndima rr ri, ro nzɨ ndima rr ri nanga; ri kʉ føri dho i kpa ro nzɨ ngʉ Mungu dhi ngana ngbá dyi maddi ndiro ndima zø njini d’e ri.” 13 Føri kina, Yesu dhungʉeri kpa tso: “Fø loroji ká ni djǒ lø nzɨ? Nde, føro nja kʉ ná loroji krʉ ká ka ndi lø ni djǒ ngbaribbai?

14 “Ngazʉ ná ke zʉ nari kʉ lo. 15 I ri kʉ lo le zʉe ná ngana kʉ chu tso ro lu ná ndrŭ: lo ndrŭ rr nari goti tse, Shetani si ndirigoti ke tu ndrŭ thí nǎ le zʉ ná fø lo tu. 16 Føri kina, dju djó le zʉ ná nyo-kpa kʉ ɨ di ná ndrŭ: lo kpa rr nari goti thei kpa u lo hwè na. 17 Ro, kpa tɨtɨ e kpa nǎ nga nari dho, kpa ro tøni sese saa kana thé, ro mbudha ma, ndrŭ le nzá lo djotsina nari ma na banga ná saa na, kpa thí bʉni bʉ. 18 Njari kʉ kpelé kana le zʉ nari. Føri kʉ lo rr ná ndrŭ, 19 ro, i dz’* djó d’od’o ma, mali le sha na ná kpakpanga ma, njonjo kʉ ná tamaa ma na ra sisi ke rr e ná fø lo djolu ndirigoti ri sani sa, ná føri dho ri nzá o ndi kpa ro ri. 20 Ya mwisho, bblo kʉ ná dz’ djo d’e ná nyo-kpa kʉ, lo ndima rr nari goti u lo hwè na ná ndrŭ ndirigoti ndrŭ o ndima kpa—30 ina, 60 ina ndirigoti 100 ina.”

21 Godhé, ke pongʉeri ki kpa dho: “Tala nzɨ le adi tø le li ndi d’yó* tsena inga ra tsena d’e ri, ri ká nga fø ri? Ri ká le adi tø le li ndi ri dho le thɨ ná ngana nzɨ? 22 Ru runi ná lo kana nga kʉ nzɨ djó nga si nyani ná lo ro ri. Bbo pli le ru ná lo kana nga kʉ nzɨ ro si si lalanga na ná lo ro ri. 23 Nì bɨ kʉ ngarrdha dho ná le rr fø lo rr.”

24 Føri goti ke pongʉeri ki kpa dho: “Anidi krr rr ni rr ná lo kana. Ni ritsi ddi ndrŭ dho nǎ ná no nǎ i le si ritsi ddi ni dho, bbʉbbʉ dhé, ni dho le si ri ndri fø nga djolu. 25 Dhonalo nì dhó ritsi kʉ ná ke dho le si ritsi ki ndrindri, ro nga dhó ritsi kʉ ná ke dhó ro le si nì kʉ kedhó nari ma dzidzi ddi.”

26 Ke pongʉeri ki: “Mungu dhó Pidhinga kʉ ddiddi nza gʉ ddikpa ke nyo-kpa yi nari bbai. 27 Kuna ke ddoddo ndirigoti bbʉtso ke dani da, ro nyo-kpa ngǎ ndirigoti ri dhi nzá ke chu ngbaribbai ma føri njini nari ro. 28 Dz’ adi ndi kpa o ndi ndiro dzodzo dhé. Ya kwanza ri tsu adi si, føri goti ri kpa adi tata, ndirigoti nyo-kpa adi ndi pʉ krʉ ri djo. 29 B’lo nyo-kpa í ró, ke adi ra nyo tso nju, nyo tso njudha dhi ritsi na, nyo tso njudha dhi saa ka b’lo nari dho.”

30 Føri goti ke pongʉeri ki: “Mungu dhó Pidhinga ká le ka le ddi addu na, inga le ká ka le bbʉ ngbá loroji ri nanga tudha dho? 31 Ri kʉ ddiddi haradali dhi tsu-kpa bbai. Zʉ le ri zʉ ná saa na, ri e i dz’ djó tsu-kpa kana sese pli kʉ ná ri. 32 Ro, b’lo le zʉ ri ró, ri adi dhi ndirigoti ri adi dada nja tsó krʉ djolu ndirigoti ri ró lerr adi dhi dadá nari dho, rakpa ró rè adi didha dhi nga ba ri ró sʉsʉ tsena.”

33 Yesu ngʉ adi njínji fø di ná loroji na bí ina ndiri na ndi d’ra Mungu dzá lo kpa dho d’e ndirigoti ke ngʉ adi ngaddi ngbà kpa ka ndima famu ná lo djo. 34 Bbʉbbʉ dhé, ke nzɨ ngʉ lo ro ti ndrŭ dho ngadhi loroji ro ri, ro nga nja ndrŭ kʉ ná ngana i ke ngʉ adi ri nanga tu krʉ ndi unakpa dho.

35 Fø dyi ngasdjó nga si ro, ke pongʉeri kpa dho: “Akoda jʉdda djolu adzɨ.” 36 B’lo ndi pori birobiro kʉ ná ndrŭ rá nari goti, kpa rangʉe thei ke ma na nì nǎ ke ngʉe ná bbú nǎ, ndirigoti fø bbú kuso ngʉe nja bbú maddi. 37 Føro bbò kʉ ná vʉvʉ ngangʉe vʉdha tso ndirigoti dda-gru ngʉ ndi bú bbú na nari dho, bbú ngʉe chøchø ndi koko dda na. 38 Ro, Yesu ngʉe aluti ro ndirigoti ke ngʉ ddo kuse djó. Føro kpa dangʉe ke ro, kpa pongʉeri ke ni: “Mwalimu, ni ká ko kʉ chøchø ko cheni che nari nja nzɨ?” 39 Ke dani ro, ke tangʉe vʉvʉ djó ndirigoti ke pongʉeri dda ni: “Ago ddi, ako ni jotso!” Føro vʉvʉ kongʉe ndi jotso ndirigoti nga gongʉe kɨlɨ. 40 Føri goti ke pongʉeri kpa ni: “Ni ká do nji bbo addudho? Ni ki ká kʉ udha na nga dhé?” 41 Ro, kpa do løngʉe bbo nari dho, kpa ngʉ riti ɨ ndima kana: “D’ʉ ká i ke kʉ ie? Ke dho vʉvʉ ma, dda ma na krʉ ngarr rr.”