Yohani

2 Gbo na ri si ná ddo dyina, ddikpa ndoa dhi fete ngʉe Galilea nǎ Kana nǎ ndirigoti Yesu dzá mama ngʉe føga. 2 Yesu ma, ndi unakpa ma na maddi le nzingʉe ndoa dhi fø fete dho.

3 Divai ngʉe chøchø ndi sini si, ro Yesu dzá mama singʉe ke dhi ngana, ro le pongʉeri: “Kpadhó divai sini si.” 4 Ro, Yesu pongʉeri le dho: “Isɨle, føri ká nja ko ni ma na adduna?* Madhó saa ro nzá d’e si ri.” 5 Kedzá mama pongʉeri njí ngʉ nji ná ndrŭ dho: “Aninji b’lo ke si po ni dho ná lo thei.” 6 Nja le tsetse d’e Wayaudi ngʉ adi dyø ná yadha nǎ ringʉe nari bbai, føga ngʉe dju na le thɨ ná chǎ aza, fø chǎ ddi ddiro nǎ nga ngʉe aro inga gbo ina le ddi dda ná ngatsi.* 7 Yesu pongʉeri kpa dho: “Aniddo dda pɨpɨ chǎ lu.” Føro kpa ddongʉe dda pɨpɨ ri lu. 8 Føro ke pongʉeri kpa dho: “Kpadjo anid’e fø dda ro sese nari ni mbá fete djó bbonga dhona.” Føro kpa njingʉeri fø. 9 Fete djó bbonga mbungʉe divai ngʉ ná fø dda dzi ro, ke nzingʉe ndoa ba, dhonalo ke nzá chungʉe fø divai ká si ngbaga ro ma nari ri, (ro njí dhi ndrŭ i chungʉe ri si ná nga ngbà,) 10 ndirigoti ke pongʉeri: “Ndrŭ krʉ adi bblo kʉ ná divai i bbʉ nji ndirigoti b’lo ndrŭ rɨ wa ró i le adi nga kʉ bblo ná ri bbʉ, ro ni ru bblo divai kpø kpadjonga djo.” 11 Yesu njingʉe fø lo Galilea nǎ Kana nǎ ná føri ngʉe kedhó ya kwanza ddù, ná føri chulu ke ka ndidhó kadha dho ndirigoti ke unakpa ka ndima dhó udha li ke djo.

12 Føri goti ke ma, kedzá mama ma, ke djoi ma, ke unakpa ma na thʉngʉe Kapernaumu na, ro fø bba gʉ nzá kpa dingʉe bicha ri.

13 Ro, Wayaudi dhó Pasaka ngʉe chøchø ndirigoti Yesu djingʉe Yerusalemu na. 14 Hekalu nǎ ke singʉe tsí ma, chembø ma, bbǎna ma na nanga dzi ná kpa ro ndirigoti mbø nanga ngʉ wø ná kpa ngʉ di ndima tsena kiti djolu. 15 B’lo ndi thɨ mbi na le d’ya ná fimbo ro, ke dingʉe hekalu nǎ ngʉ chembø ma, tsí ma na nanga dzi ná kpa arugu ndirigoti ke plingʉe mbø nanga ngʉ wø ná kpa dhó mbø nanga ndirigoti ke lengʉe kpadhó mesa thika glʉ. 16 Føri goti ke pongʉeri bbǎna nanga ngʉ dzi ná kpa ni: “Anitu i ritsi iga ro! Anibba madzá Baba dzá dza ni ngʉ turusa dhi nga* nari tso!” 17 Ke unakpa nongʉe nga nari kʉ, ri ndingʉeni: “Nidzá dza dho ma kʉ na ná bbò jidha* si rørø ma nǎ.”

18 Føro Wayaudi dhungʉeri ke tso: “Ni ká ka ni njí ngbá ddù ko dho ndiri na ni dhǒ ni kʉ bbonga na nì fø ritsi njidha dho nari d’e?” 19 Yesu ngʉngʉe logoti kpa dho: “Aniglʉ i hekalu, ndirigoti ma ri chichi ddo gbo kana.” 20 Føro Wayaudi dhungʉeri ke tso: “I hekalu le chingʉe cho 46 kana nari i ni ka ni chi ddo gbo kana?” 21 Ro, lo ke ngʉ ti djo ná fø hekalu ngʉe ke ndí. 22 Ke gangʉe ná saa na, ke unakpa nongʉe ke ngʉ adi fø lo po nari nga nó, ndirigoti kpa ungʉe ndi ndini ná lo ma, Yesu pongʉe ná lo ma na u.

23 Ro, Yerusalemu nǎ ke ngʉe Pasaka dhi fete dhi ngana ná saa na, bí kʉ ná ndrŭ lingʉe ndima dhó udha ke ró dho na, ke ngʉ nji ná ddù ndima njangʉe ná saa na. 24 Ro, Yesu nzá lingʉe ndi thí ro fø ndrŭ djo ri dhonalo ke chungʉe fø ndrŭ krʉ chu, 25 ndirigoti kedhó lo nzá ungʉeri le tu lo nanga ro ndrŭ djo ndi dho ri dhonalo ke chungʉe ndrŭ thí nǎ kʉ ná lo chu.