Yohani

9 Da ndi ngʉ da ro, Yesu njangʉe gø gøni nzɨ ndi nyǒ nganja ro ná ddikpa ke. 2 Føro ke unakpa dhungʉeri ke tso: “Rabi, i ke gøni nzɨ ndi nyǒ nganja ro dho nari ká kʉ ke nji chenga nari inga kedhó gø dhi ndrŭ? 3 Yesu ngʉngʉe logoti: “Ri nga kʉ ke inga kedhó gø dhi ndrŭ nji chenga nari dho ri, ro ri kʉ ndiro Mungu dzá njí dhoni ke chulu d’e. 4 Ringani ko njí cho chongʉe ma ná ke dzá njí go nga kʉ dyina ro; dhonalo kunanga sisi, ná fø saa na nzá ddikpa le ma ka ndi njinjí ro ddi ri. 5 Go ma kʉ dz’ djó ná saa na, ma kʉ dz’ djó kadha.” 6 Fø lo ndi po nari goti ke hwingʉe sadda dz’ djo, ke njingʉe d’o fø sadda na ndirigoti ke d’ringʉe ri fø ke nyǒ djo. 7 Føri goti Yesu pongʉeri ke dho: “Ara dda ʉ cho tso le cho ná Siloamu (fø lo na mana kʉ “cho le cho ná ri) dhi dda na.” Føro ke ra ro, ke ʉngʉe dda ndirigoti ke ngʉngʉe fø lu ro b’lo ndi nyǒ tso weni ro.

8 Ke ma kuso lu bbá nga ngʉe ná ndrŭ ma, anziro ngʉ adi ke nja nga ke kó ro ná ndrŭ ma na ngʉ ridhu: “I ri ká nga, nga adi kó ndrŭ tso gʉna ndi di ro ná chá ke ri?” 9 Nja ndrŭ ngʉ ripo: “I ri kʉ fø ke.” Nja ndrŭ ngʉ ripo: Nga, i ke didi i fø ke bbai.” Ro, ke nganga ngʉ ripo: “Føri kʉ ma.” 10 Føro kpa dhungʉeri ke tso: “Nde, ni nyǒ tso ká weni ngbaribbai?” 11 Ke ngʉngʉe logoti: “Yesu le nzǐ ná ddikpa ke njie sese kʉ ná ddikpa d’o ndirigoti ke d’ri ri ma nyǒ djo. Føri goti ke pori ma ni, ‘Ara dda ʉ Siloamu na.’ Føro ma ra ro, ma ʉ dda nari goti ma nyǒ tso weni thei.” 12 Kpa dhungʉeri ke tso: “Fø ke ká kʉ ngbaga?” Ke pongʉeri: “Ma nzá churi ri.”

13 Kpa mbangʉe nzɨ nyǒ ngʉ adi nganja anziro ná fø ke Bbafarisayo dhi ngana. 14 Ro, Yesu njingʉe d’o ndirigoti ke gøngʉe ke nyǒ nari ngʉe Sabato ddo dyina. 15 Fø saa na Bbafarisayo maddi ngangʉe ngbaribbai ma ke nyǒ tso wengʉeni nari dhudha tso ke tso. Føro ke ngʉngʉe logoti kpa dho: “Ke d’rie ddikpa d’o ma nyǒ djo, ndirigoti ma ra dda ʉ nari goti ma njanga thei.” 16 Bbafarisayo kana nja kpa ngangʉe ri podha tso: “Føri nga kʉ Mungu dhi ngana ro si ná ke ri, dhonalo fø ke nzɨ Sabato dyø ri.” Ro, nja kpa ngʉ ripo: “Chenga dhi ke ká ka ndi njí fø di ná ddù ngbaribbai?” Føri dho, kpa nanga ndongʉeni ndo. 17 Føri goti kpa dhungʉeri ki nzɨ nyǒ ngʉ adi nganja ná fø ke tso: “Ni ká po ngbá lo fø ke djo dhonalo ri kʉ ni nyǒ tso i ke we ri ró?” Ke ngʉngʉe logoti: “Fø ke kʉ nabi.”

18 Ro, Wayaudi nzá ungʉe fø ke nyǒ e nganja anziro nzɨ, ro kpadjo i ke nganja nì nari ro ri; føri dho kpa nzingʉe kedhó gø dhi ndrŭ. 19 Føri goti kpa dhungʉeri kedhó gø dhi ndrŭ tso: “I ri i ká kʉ nidhó nzɨ ndi nyǒ nganja ro ni po gøngʉeni ná ngba? Nde, kpadjo ká ke nyǒ nganja ngbaribbai?” 20 Kedhó gø dhi ndrŭ ngʉngʉe logoti: “Ngbà ko chu nari kʉ, i ri kʉ nì kodhi dduna ri ndirigoti ke gøngʉeni nzɨ ndi nyǒ nganja ro. 21 Ro, kpadjo ká ke nyǒ tso weni ngbaribbai ma nari ro nzá ko churi, inga ke nyǒ tso ká ie we nari ma nzá ddi ko churi. Anidhuri ke tso dhonalo kedhó cho kʉ ngbà ka ndi ti ndi djó lo ndi ndiro ná ngatsi ró.” 22 Kedhó gø dhi ndrŭ pongʉe fø lo dho nari kʉ, ndrŭ ngʉ Wayaudi do nji; dhonalo Wayaudi rrngʉeni b’lo nari kʉ, njati ddikpa ke pori Yesu kʉ Kristo ró, fø ke ringani le didi Sinagogi nǎ ro. 23 Ri kʉ føri dzá lo dho i kedhó gø dhi ndrŭ pongʉeri ɨ ri: “Kedhó cho kʉ ngbà ka ndi ti ndi djó lo ndi ndiro ná ngatsi ró, anidhuri ke tso.”

24 Føro kpa nzingʉe nzɨ nyǒ ngʉ adi nganja ná fø ke ki ndirigoti kpa pongʉeri ke ni: “Abbʉ madha Mungu dho, dhonalo ko churi chu fø ke kʉ chenga dhi ke ró.” 25 Ke ngʉngʉe logoti: “Fø ke ká e chenga dhi ke ma ná føri gʉ i nzá ma churi, ro ngbà ma chu nari kʉ ma nyǒ nzɨ ngʉ nganja ri, ro kpadjo ri nganja nja.” 26 Føro kpa dhungʉeri ke tso: “Ke ká njie addu ni dho? Ni nyǒ tso ká ke wee ngbǎ?” 27 Ke ngʉngʉe logoti kpa dho: “Føri ma d’rae ni dho b’lo, ro ni nzá rr e ri ro ri. Føro kpadjo ká ni riji ni rr ri ki addudho? Ni ma ká jiri ni ngʉ ke unakpa ddi?” 28 Ro, kpa pongʉeri ɨ ke ni pá ndima ke be ro: “Ni i kʉ fø ke unake, ro ko kʉ Musa unakpa. 29 Ko chu Mungu tingʉelo Musa dho nari chu, ro fø ke ká si ngbaga ro ma nari nzá ko churi.” 30 Ke ngʉngʉe logoti kpa dho: “Ma nyǒ tso maddi we ná fø ke si ná nga ni chu nzá ná føri kʉ bbʉbbʉ dhé ké ka ndi ke le nanga ná lo. 31 Mungu nzɨ adi chenga dhi ndrŭ ro rr ri, ná føri ko chuchu, ro ddikpa ke di Mungu do nji ndirigoti ke di ke ji ná lo nji ró, fø ke ke adi rrrr. 32 Drrdrrnga djó ro nzá ko d’erie gø gøni nzɨ ndi nyǒ nganja ro, ná ke nyǒ tso ddikpa ke we nari ro rr ri. 33 I ke é nzá ndi sie Mungu dhi ngana ro ro ró, ke nzá ka ndi njie ddikpa lo ro maddi ri.” 34 Kpa ngʉngʉe logoti ke dho: “Ni gøni gø lu chenga na, ro i ni longaddi ko dho?” Føro kpa bungʉe ke bbaidjo!

35 Yesu rrngʉe ke kpa bungʉe bbaidjo nari rr; føro luti kpa ki nju ke na ro, ke dhungʉeri ke tso: “Ni ká u ndrŭ Ddù ngbà?” 36 Fø ke dhungʉeri: “Bboke, ke ká kʉ ie ndiro ma u ke d’e?” 37 Yesu ngʉngʉe logoti ke dho: “Ke ni nja b’lo, bbʉbbʉ dhé ri kʉ ni loti na ná ke.” 38 Ke pongʉeri: “Bboke, ma u ke ngbà.” Føri goti ke kongʉeni ndi d’eti djo ke nji. 39 Føro Yesu pongʉeri: “Ma si dz’ djo dho ná lod’idha kʉ: Ndiro nzɨ nyǒ nganja ná ndrŭ nyǒ njanga ndirigoti nì nyǒ nganja ná ndrŭ ngʉ nzɨ nyǒ nganja ná ndrŭ d’e.” 40 Fø lo ndima rr ro, ke kuso lu ngʉe ná Bbafarisayo dhungʉeri ke tso: “Ni ká riddi ko ma kʉ nga nyǒ kʉ ná ndrŭ ddi?” 41 Yesu ngʉngʉe logoti: “Njati rie nzɨ ni nyǒ e nganja ri ró, føro nga chenga eé ni djó ri, ro ni ripo, ‘Ko nyǒ nganja nì’ ná føri dho nidhó chenga mama ni djó.”