Marko

15 Bbʉtso kukú bbakuhani djó bbobbonga ma, ngó kpa ma, nga ndi ná kpa ma na njungʉe ndima tso, ná føri ngʉe Sanhendrini nǎ kpa krʉ. Føro kpa chɨ Yesu nari goti, kpa mbangʉe ke Pilato bba. 2 Føro, Pilato dhungʉeri ke tso: “Ni i ká kʉ Wayaudi bbá pi?” Yesu ngʉngʉe logoti: “Ni nganga i ripo fø.” 3 Ro, bbakuhani djó bbobbonga ngʉ ke bbø bí kʉ ná lo kpari na. 4 Føro Pilato ngangʉe ngadhudha tso ki ke tso: “Ni ká fø logoti ro ngʉ nzɨ?” Anja ni kpa bbø na ná lo kpari. 5 Ro, Yesu nzá ngʉngʉe logoti ro ddikpa maddi ri, ná føri kengʉe Pilato nanga bbo.

6 Fete dyina ke ngʉ adi prizo nǎ le sʉe ná ndrŭ kana ro ddikpa ke kló, ri ngʉe birobiro kʉ ná ndrŭ vʉ ná ke. 7 Fø saa na Baraba ró dho kʉ ná ddikpa ke ngʉe prizo nǎ, ddironga tsa tsangʉe ná nja kpa ma na. Kpa le sʉngʉe ndima hwi ndrŭ nari djó. 8 Føro birobiro kʉ ná ndrŭ singʉe Pilato dhi ngana ndirigoti ndrŭ ngangʉe nì ke ngʉ adi nji ndima dho ná lo nzidha tso ke tsó. 9 Ke ngʉngʉe logoti kpa dho: “Ni ká jiri ma kló Wayaudi bbá Pi ni dho?” 10 Dhonalo Pilato chungʉeri chu bbakuhani djó bbobbonga bbø Yesu dda dzá lo dho. 11 Ro, bbakuhani djó bbobbonga lingʉeri ndrŭ pori le kló Baraba, Yesu rɨngana. 12 Pilato dhungʉeri ki: “Nde, Wayaudi bbá Pi ni nzǐ ná i ke dhó lo ká ma nji ngbǎ?” 13 Ndrŭ ngʉngʉe logoti ki bbobbo ndima chu na: “Le tɨ ke tsú badjo!”* 14 Ro, Pilato dhungʉeri ki: “Addudho? Ke ká nji ngbá kosa?” Ro, ndrŭ krʉ ki høngʉe ndima chu bbobbo ri na: “Le tɨ ke tsú badjo!”* 15 Pilato jingʉeri ndi bbʉ hwè birobiro kʉ ná ndrŭ dho nari dho, ke klongʉe Baraba kpa dho ndirigoti b’lo ke liri kpa dhɨ Yesu fimbo na nari goti, ke bbʉngʉe Yesu le tɨ tsú badjo.

16 Bbasødda mbangʉe ke bbaidjo ná føri ngʉe guverner bbá bbaidjó nga, ná fø ngana bbasødda krʉ gbangʉe ndima tso. 17 Kpa thongʉe pli dzá kakanga kʉ ná rù ke ro. Føri goti kpa d’yangʉe kpelé dhi klo* ndirigoti kpa thongʉe ri ke djǒ ro; 18 kpa ngangʉe ke ronga zʉdha tso ɨ ndima ripo ro: “Yambø, Wayaudi bbá Pi!” 19 Godhé, kpa ngʉ ke djǒ nanga dhɨ wɨ na sadda ndima hwi ke djo ro ndirigoti kpa ngʉ koni ke nji ndima d’eti djo. 20 Mwisho, b’lo ndima gbo ke nari goti, kpa klongʉe fø rù ke ró ro ndirigoti kpa ngʉngʉe ke ró rù nganga ke ro. Føri goti kpa rangʉe ke na bbaidjo ndiro ndima rá ke tɨ tsú badjo d’e. 21 Kpa singʉe nju chu lu ngʉ da ná ddikpa ke na, ná føri ngʉe Kirene nǎ Simoni, nza gʉ ro ndi ngʉ ro. Føri ngʉe Aleksanda ma, Rufo ma na dhi baba, kpa løngʉe ke ndiro ke d’u Yesu dhó nzadha dhi tsú* d’e.

22 Føro kpa mbangʉe ke Golgota le nzǐ ná ngana, føri na mana kʉ, “Le djǒ nǎ kpà dhi nga.” 23 Føga kpa mbungʉeri ndima bbʉ divai ma tso le gba dyadya o ná ritsi na nari ke jø, ro ke nyingʉe ri nyi. 24 Føri goti kpa tɨngʉe ke tsú badjo ndirigoti kpa kangʉe ke ró arugu rù nanga dyá djó, nja ndima nja ie dho ma ri che nari d’e. 25 Ke kpa tɨngʉe tsú badjo bbʉtso saa tatu na. 26 Føri kina, kpa ndingʉe ke le bbø na ná i lo ke djǒ tso ro: “I ri kʉ Wayaudi bbá Pi.” 27 Føri goti aro kʉ ná gbʉ dhi kpa le tɨngʉe tsú badjó ke kuso lu, ddi ke thá djó ro ndirigoti ddi ke gru djó ro. 28* —— 29 Føro chu lu da ná ndrŭ ngʉ che kʉ ná loti ke dhi ngana ndima djǒ nanga ndima ja ro, ndrŭ ngʉ ripo: “He! Ni ngʉ ji ni glʉ hekalu ndirigoti ni chi ri ddo gbo kana, 30 ró ave ni gø ni niro, athʉni nzadha dhi tsú* badjó ro.” 31 Bbakuhani djó bbobbonga ma, nga ndi ná kpa ma na maddi ngʉ ke gbo ɨ ndima ripo ro: “Nja ndrŭ i ke gø ngbà, ro ndi nganga ndi gø nari i gʉ ke tsori gʉ. 32 Anibbari Kristo, Israeli bbá Pi thʉni nzadha dhi fø tsú* badjó ro. Njati ko nja føri ró, ko ke uu.” Ke kuso ro ngʉe tsú badjó ná kpa maddi ngʉ chelo ti ke djo.

33 Saa aza* singʉe ro, nga tɨngʉe mbi kpø saa tisa djo, fø ngø lu gble. 34 Saa tisa na, Yesu høngʉe bbò ndi chu na ɨ: “Eli, Eli, lama sabaktani?” føri na mana kʉ: “Madzá Mungu, madzá Mungu ni ká bba ma addudho?” 35 Fø lo ndima rr ro, føga ngʉ tøni ná kpa kana nja kpa ngangʉe ɨ ndima ripo nari tso: “Anja! Ke Eliya nzǐ.” 36 Føro, ddikpa ke d’angʉe ndirigoti ke tɨngʉe eponje ngóngó o ná divai na, ná ri ke chingʉe wɨ djǒ ro, føri goti ke bbʉngʉe ri Yesu ndø ɨ ndi ripo ro: “Anibba ke! Anibba ko nja Eliya ká si ke thʉ nì ma tsú badjó ro nari.” 37 Føro Yesu høngʉe bbobbo ndi chu na, nari goti ke dhengʉe dhe.* 38 Føri goti takatifu kʉ ná nga nǎ rido nanga thangʉeni aro, arø ro agʉ. 39 Yesu njí ro ngʉ tøni ná sødda djó bbonga njangʉe ke dhe ná saa na njini ná fø lo ro, ke pongʉeri: “Bbʉbbʉ dhé, i ri e Mungu Ddù.”

40 Føga ngʉe isɨ ndrŭ maddi, danga nǎ ro ndima ngʉ nganja ro; fø ndrŭ kana ngʉe Maria Magdalene ma, Re Yakobo ndirigoti Yose ma na dhi mama Maria ma, Salome ma na. 41 Fø ndrŭ ngʉ adi ke goti mba ndirigoti ke tsotso kó Galilea nǎ ke ngʉe ná saa na. Føga ngʉe bí kʉ ná nja isɨ ndrŭ maddi, ná føri ngʉe Yerusalemu na ke ma djingʉe na ná ndrŭ.

42 Ddiddi ri ngʉe Matayarisho dhi ddo, føri kʉ Sabato dhi ddo njí ndirigoti ri ngʉe ngasdjó nari bbai, 43 Arimatea nǎ Yosefu ró dho kʉ ná ke singʉe, fø ke ngʉe lo ngʉ adi d’ɨ ná kpa kana heshima ndrŭ ngʉ adi bbʉ dho ná ke; ke maddi ngʉ adi Mungu dhó Pidhinga b’o. Ke tungʉe ndi ró do ndirigoti ke rangʉe Yesu dzá bʉ ko Pilato tso. 44 Ro, Pilato ngʉ ji ndi chu Yesu ká dhe b’lo bbʉbbʉ nari. Føri dho ke nzingʉe sødda djó bbonga ndirigoti ke dhungʉe Yesu ká dhe b’lo nari ke tso. 45 Yesu dhe b’lo nari sødda djó bbonga d’ra ke dho nari goti, ke ungʉe ritso u Yosefu rá Yesu dzá bʉ na. 46 B’lo Yosefu dzi bbo dhó valer kʉ ná rù* nari goti, ke thʉngʉe kedzá bʉ røna ro ndirigoti ke ndɨngʉe ri ronga tso fø rù na. Føri goti ke rangʉe ri li dju nǎ ndi bbɨngʉe ná kabuli na. Føri goti ke dzengʉe dju kabuli* tsoro. 47 Ro, Maria Magdalene ma, Maria, Yose dzá mama ma na ngʉ nganja Yesu dzá bʉ le lingʉe ná ngana dhé.