Yohani

19 Føro Pilato dzingʉe Yesu ndirigoti ke dhɨngʉe ke dhɨ. 2 Kpa d’yangʉe kpelé dhi klo* nari goti kpa thongʉe ri ke djǒ ro. Føri goti kpa thongʉe viole kʉ ná rangi dhi robe ke ro. 3 Føri kina, kpa ngʉ si ke dhi ngana ndirigoti kpa ngʉ ripo: “Yambø Wayaudi bbá Pi!” Godhé kpa ngʉ ke bɨtɨ nanga b’ɨ. 4 Pilato ki vʉngʉe arugu ndirigoti ke pongʉeri kpa dho: “Anirr di! Ma ke pʉ ni dhona arugu ndiro ni churi chu nari kʉ ma nzá ba ke djo le lod’i dho ná lo ro ddikpa maddi ke nǎ ri nari d’e.” 5 Føri dho Yesu vʉngʉe arugu, ke djǒ ró ngʉe kpelé dhi klo,* ke ró ngʉe viole kʉ ná rangi dhi robe. Føro Pilato pongʉeri: “Aninja! Ke ena!” 6 Ro, bbakuhani djó bbobbonga ma, bbobbokpa ma na njangʉe ke ro, kpa pongʉeri bbobbo ndima chu na: “Le tɨ ke tsú badjo! Le tɨ ke tsú badjo!” Pilato pongʉeri kpa ni: “Anidzi ke ni niro ndirigoti anihwi ke, dhonalo ma nzá nja kosa ro fø ke nǎ ddikpa maddi ri.” 7 Wayaudi ngʉngʉe logoti: “Kobbá kʉ ddikpa yadha ro thé, ná fø yadha ró ro ringani ke dhedhe. Dhonalo ke ndi nji Mungu dhi dduna.”

8 Kpa po ná fø lo Pilato rrngʉe ná saa na, ke na do gʉ tangʉe bbo. 9 Føri dho, ke ki ngʉngʉe vi guverner dzá njí ndi ngʉ adi nji nǎ ná dza na, ndirigoti ke dhungʉeri Yesu tso: “Nibbá bba gʉ nga ká kʉ ngbaga?” Ro, Yesu nzá ngʉngʉe logoti ro ke dho ri. 10 Føri dho, Pilato dhungʉeri ke tso: “Ni ká go ddi ma ro? Ma kʉ bbonga na ma kló ni klo ndirigoti ma kʉ bbonga na ma hwi ni hwi maddi nari ká ni chu ngbà?” 11 Yesu ngʉngʉe logoti: “Ni ro nga ka ni ée bbonga na ma djo karrnø maddi ri, rie nzá ri bbʉeni ni dhona arø ro ri ró. Ri kʉ føri dho i ni thó thina bbʉ ma ná ke dhó chenga gʉ kʉ bbo pli ri.”

12 Føri dzá lo dho Pilato ngʉ ke ndi ka ndi kló ná chu ne, ro Wayaudi ngʉ ndima nanga jø ɨ: “Njati ni kló fø ke klo ró, ni nga kʉ Kaisari dzá kau ri. Dhonalo ddikpa ke di ndi nji pi ró, fø ke tøni* Kaisari tso ró.” 13 Fø lo ndi rr ro, Pilato pʉngʉe Yesu bbaidjo ndirigoti ke dingʉe lod’idha dhi ngana, ná fø nga le ngʉ adi nzǐ Dju le kpe ná nga, ro Kiebrania nǎ le ngʉ adi ri nzǐ Gabata. 14 Ri ngʉe Pasaka le tayarisha ná ddo ndirigoti ri ngʉe chøchø saa sita si ro, føro ke pongʉeri Wayaudi dho: “Aninja! Nidhó pi!” 15 Ro, kpa jøngʉeri: “Ahwi ke hwi! Ahwi ke hwi! Le tɨ ke tsú badjo!” Ro, Pilato dhungʉeri: “Ká ma hwi nidhó pi hwi?” Føro bbakuhani djó bbobbonga ngʉngʉe logoti: “Kodhó nga d’i pi ro ri, rie nga Kaisari dhé ri ró.” 16 Føri dho ke bbʉngʉe ke kpa tɨ tsú badjo d’e.

Føro, kpa rangʉe ra ke na. 17 Ke d’ungʉe ndidhó nzadha dhi tsú* ndi ndiro ndirigoti ke rangʉe ri na Le djǒ nǎ kpà le nzǐ ná ngana, fønga le nzǐ Kiebrania nǎ Golgota. 18 Føga i kpa tɨngʉe ke tsú badjo ndi kuso aro kʉ ná kpa na, ddi ke injaro, ddi ke chanjaro ndirigoti Yesu i ngʉe kpa kana kati nǎ. 19 Føri goti Pilato ndingʉe ddikpa lo maddi ná ri kpa lingʉe kedhó nzadha dhi tsú* djo. Ri djó ri ndingʉeni: “Yesu Nazareti nǎ ke, Wayaudi bbá Pi.” 20 Bí kʉ ná Wayaudi zøngʉe ri djó le ndingʉe ná lo zø dhonalo Yesu kpa tɨngʉe ná nga ngʉe chøchø vile nǎ ro. Ndirigoti ri le ndingʉe Kiebrania ma, Kilatini ma, Kigiriki ma na nǎ. 21 Ro, Wayaudi dhó bbakuhani djó bbobbonga pongʉeri Pilato dho: “Nzɨ ndiri ‘Wayaudi bbá Pi,’ ró andiri ke pori: ‘Ma kʉ Wayaudi bbá Pi.’” 22 Pilato ngʉngʉe logoti: “B’lo ma ndi nari ma ndi b’lo.”

23 Føro b’lo bbasøddá tɨ Yesu tsú badjo nari goti kpa dzingʉe ke ró arugu rù ná ri nanga kpa ndongʉe tho, kpa krʉ bangʉe ri ddi ddi. Føri goti kpa dzingʉe ke ró atsi rù, ro fø rù nanga le ro ná nga ro nga ngʉeri dhonalo rù le d’yangʉe ndi djotso ró ro kpø ndi kotso ro. 24 Føro kpa ngʉ riti ndima kana: “Nzɨ ko tha ri nanga, ro ako ka ri nanga dyá djó ndiro ko nja ie dho ma ri che nari d’e.” Føri ngʉe ndiro ndi ndingʉeni ná i lo njini d’e: “Kpa ndongʉe ma ró rù nanga ndima kalu ndirigoti kpa kangʉe ri nanga dyá djó.” Føri i kʉ bbasøddá njingʉe ná lo nganga.

25 Nzadha dhi tsú* badjó Yesu ngʉe ro, kedzá mama ma, kedzá mama dhi vena ma, Kleopas bbá le Maria ma, Maria Magdalene ma na ngʉ tøni føga. 26 Føro Yesu njangʉe ndidzá mama ma, ndi una bbo ndi jingʉe ná ke ma na føga ndima tøni ro, ndirigoti ke pongʉeri ndidzá mama dho: “Isɨle, anja nidhi dduna aføna!” 27 Føri goti ke pongʉeri ndi una fø ke dho: “Anja nidzá mama aføna!” Fønga djó ro, ke unake dzingʉe le ndi bba.

28 Føro Yesu njangʉe krʉ kʉ ná lo njini b’lo nari ro, ndiro ndi ndingʉeni ná i lo njini d’e ke pongʉeri: “Ma dda d’yu hwi.” 29 Føga ngʉe ná cha nǎ ngʉe ngóngó o ná divai pɨ. Føro kpa tɨngʉe eponje ngóngó o ná fø divai na, nari kpa chingʉe hisopo dhi tsú* djǒ ro ndirigoti kpa lingʉeri Yesu tso ro. 30 Ngóngó o ná fø divai dzi ndi mbu nari goti, Yesu pongʉeri: “Ri njini nji!” føri goti ke d’ingʉe ndi djǒ ndirigoti ke thí d’engʉe* thei.

31 Ri ngʉe Sabato le ngʉ tayarisha ná ddo nari dho, Wayaudi rangʉe rinzi Pilato tsó le d’rɨ kpa løkpa nanga d’rɨ ndirigoti le tu kpadhó bʉ tu, ndiro nzɨ Sabato si ri ro tsú badjó ró, (dhonalo føri ngʉe bbò Sabato). 32 Føro bbasøddá singʉe ro kpa d’rɨngʉe ya kwanza ngʉe ná ke løkpa nanga føri goti kpa d’rɨngʉe ddinga laidjó ngʉe ná ke løkpa nanga. 33 Ro, Yesu dhi ngana kpa si ro, kpa singʉe ke ro b’lo ke dhe ro, ná føri dho kpa nzá d’rɨngʉe ke løkpa nanga ro ri. 34 Føro ddikpa sødda tøngʉe ke ikpa nanga lǐ na, ná nga nǎ ro ju ma singʉe dda na thei. 35 Nja njangʉe fø lo ná ke i fø lo dzá bbʉbbʉnga d’ra, ndirigoti ke d’ra nari kʉ bbʉbbʉ kʉ ná lo, føri kina ke chu ndi d’ra ná lo kʉ bbʉbbʉ nari chu ndiro ni maddi uri u d’e. 36 Bbʉbbʉ dhé, fø lo njingʉeni ndiro ndi ndini ná i lo njini d’e: “Ke ró ddikpa kpà ro ma nzɨ ddi si koni* ri.” 37 Føri kina ndi ndini ná nja lo pori ɨ: “Kpa si nganja tø nanga ndima tøngʉe ná ke laidjo.”

38 Yesu unake ngʉe nzá nga nja ndrŭ chu ro, Wayaudi do ndi nji nari djotsina ná ke Arimatea nǎ Yosefu singʉe Yesu dzá bʉ ko Pilato tsó, ro Pilato ungʉe ri tso u. Føri goti ke singʉe ro, ke tungʉe kedzá bʉ tu. 39 Yesu dhi ngana singʉe kuna ná ke Nikodemu maddi singʉe si, ná fø ke singʉe manemane ma le te aloe ma na nari na, ná føri ngʉe chøchø kilo 33. 40 Føro kpa dzingʉe Yesu dzá bʉ ndirigoti kpa ndɨngʉe ri ronga tso bbo d’ani ná rù na, ndidhi djuu ngø ná ddikpa tsó na, føri ngʉe Wayaudi bbà le ngʉ adi bʉ d’ø ná chu. 41 Yesu le hwingʉe* ná nga kuso ngʉe ddikpa í, ná fø í nǎ ngʉe ddikpa wø kabuli* nzá le d’engʉe ndrŭ ro d’ø ndi na ro. 42 Ri ngʉe Wayaudi dhó matayarisho dhi ddo ndirigoti fø kabuli i ngʉe chøchø føga ro nari dho, kpa lingʉe Yesu thei ri na.