Marko

7 Føro Bbafarisayo ma, Yerusalemu nǎ ro singʉe ná nga ndi ná nja kpa ma na njungʉe ndima tso Yesu kuso. 2 Føro kpa njangʉe ke una nja kpa ngʉ nganyo nzá ndima thó tsetse ro nari, føri kʉ nzá ndima ʉ ndima thó ro.* 3 (Dhonalo Bbafarisayo ma, Bbayahudi krʉ ma na nzɨ ngʉ adi nganyo nzá ndima ʉ ndima thó kpø ndima kù d’eti djo ró ri, føri na kpa ngʉ adi ndima bbui dhó desturi dyø. 4 Føri kina, soko nǎ ro kpa ngʉ ró, kpa nzɨ ngʉ adi nga ro nyo nzá ndima gbo dda ró ri. Ndirigoti kpa bangʉe nja desturi maddi ndima bbui dhó ro, ná ri kpa ngʉ adi dyø bbo, føri i kʉ, kopo ma, krish ma, kuivre dhi sani ma na dho le batiso bbʉ nari ro mai.) 5 Føro Bbafarisayo ma, nga ndi ná kpa ma na dhungʉeri ke tso: “Ni unakpa ká ko bbui bbangʉe ko dho ná yadha dyø nzɨ addudho? Kpa ká nganyo nzá ndima thó tsetse ro addudho?” 6 Ke ngʉngʉe logoti kpa dho: “Aro kudjo dyʉ* kʉ ná kpa, Isaya pongʉe bbʉbbʉlo ni djo ɨ ndi pongʉeri unabi nǎ ná saa na: “I ndrŭ ma má ndima tsodjo ró kpali, ro kpa thí i kʉ da ma ró ro.” 7 Kpa bbʉ ná madha kʉ pá dhonalo Mungu dhó yadha rɨngana kpa ndrŭ dhó yadha ngaddi.’ 8 Ni bba Mungu dhó yadha bba ndirigoti ni ndrŭ dhó desturi dyø.”

9 Ke ndringʉe ri ki ɨ: “Ni Mungu dhó yadha bé pá ndana nja ni dyø nidhó desturi d’e. 10 Loroji na, Musa pongʉeri, ‘Abbʉ heshima nidzá baba ma dho, nidzá mama na,’ ndirigoti, ‘Ddikpa ke po che kʉ ná lo* ndidzá baba inga ndidzá mama ni ró, ringani le hwi fø ke hwi.’ 11 Ro, ni ripo: ‘Ddikpa ke ka ndi pori po ndidzá baba inga ndidzá mama ni: “Ni tsotso ma kóe na ná ritsi kʉ korbani (føri kʉ Mungu dho le tsoni djo ná bbʉdha),”’ 12 føri na ni rili nzɨ ke nji ddikpa lo ro ma ndidzá baba inga ndidzá mama dho. 13 Fø chu nǎ, ni liri Mungu dzá lo é nga na mana kʉ ri nidhó yadha djotsina, ná føri i ni ddi nja ndrŭ dho. Ndirigoti ni fø di ná bí kʉ ná nja lo nji.” 14 Føri goti ke nzingʉe birobiro kʉ ná ndrŭ ki ndi dhi ngana ndirigoti ke pongʉeri: “Ni krʉ, anirr ma ndirigoti anifamu ma po ná lo bblo. 15 Ri nga kʉ ndrŭ nǎ tsu ná ritsi i adi ndrŭ sa ri, ro ri kʉ ndrŭ nǎ ro si ná ritsi i adi ndrŭ sa ri.” 16* ——

17 Birobiro kʉ ná ndrŭ kana ro ndima tuni nari goti ke tsungʉe ddikpa dza na, føro ke unakpa ngangʉe ngadhudha tso ke tsó fø loroji djo. 18 Ro, ke ngʉngʉe logoti: “Ni ma ká lo famu nzɨ ddi kpa bbai? Ndrŭ nǎ tsu ná ritsi kana nga kʉ sa adi ndrŭ sa ná ri ro ri nari ká ni chu nzá? 19 dhonalo ri nzɨ adi tsu ndrŭ thí na ri, ro ri adi tsu estoma* na, ná nga nǎ ro ri adi da bbù* na.” Føri na ke ngʉ ji ndi pori nari kʉ, krʉ kʉ ná nyo tsetse. 20 Ke ndringʉeri ki: “Ri kʉ ndrŭ nǎ ro si ná ritsi i adi ndrŭ sa ri. 21 Dhonalo ri kʉ ndrŭ nǎ ro, ndrŭ thí nǎ ro i che kʉ ná ngaddidha adi si ri: føri i kʉ uasherati* ma, gbʉ ma, ndrŭ le hwi nari ma, 22 uzinifu ma, nja ndrŭ dhi ritsi le ji nari ma, che lethí kʉ ro le nji ná lo ma, kali ma, do ka ndi pá le djo ná lo le nji ndá nari* ma, tamaa ma, dhú ma, nodha ma, nga nyǒ djó longa ro le ritsi nji nari ma na. 23 Che kʉ ná fø ritsi krʉ adi si ndrŭ nǎ ro ndirigoti ri adi ndrŭ sasa.”

24 Føga ro Yesu tuni ro ke rangʉe Tiro ma, Sidoni ma na nǎ eneo na. Ke singʉe tsu ddikpa dza na ndirigoti ke nzá jingʉe ddikpa le ma chu ndi kʉ fø dzá nari ro ddi ri, føro mai, ndrŭ chungʉe ke kʉ fø dzá nari ngodhé. 25 Føro thei, Yesu djó lo ndi rr ro, ddikpa isɨle singʉe ke dhi ngana, fø le dzá singba ngba nǎ ngʉe gó ndirigoti le singʉe koni ke nji. 26 Fø isɨle ngʉe Mugiriki, ro le gøngʉeni Siria nǎ Foenike na. Ndirigoti le nzingʉeri bí ina ke pʉ gó ndidzá singba ngba nǎ ro. 27 Ro, ke pongʉeri le dho: “Abba nzø o li vi, dhonalo ri nga kʉ bblo le dzi nzø dhó mukati nari le bu tsɨ kalʉ dho ri.” 28 Le ngʉngʉe logoti: “Bbʉbbʉ dhé, ri kʉ fø bboke, ro tsɨ kalʉ ma adi nzø dhó ro d’røni mesa tsena ná nyo tso kukú nyo ddi.” 29 Føro ke pongʉeri le dho: “Ni po ná fø lo djotsina angʉngʉ ni bba; dhonalo nidzá singba ngba nǎ ro gó vʉ b’lo ró.” 30 Føro le ngʉ ndi bba ro, le singʉe ndidzá ngba ro ra djó ndi yi ro. Ndirigoti gó ngʉe b’lo ndi vʉ ngba nǎ ro ro.

31 Føri goti Yesu tungʉeni Tiro nǎ eneo nǎ ro, ro ke dangʉe Sidoni lu ndirigoti ke ngʉngʉe Galilea nǎ jʉdda ladjo lu Dekapoli* lu ndi da ro. 32 Føga ndrŭ mbangʉe nzɨ dho lo ngʉ tini bblo ná nga bɨ kʉ ná ke Yesu dhi ngana. Ndirigoti ndrŭ ngʉ ddoni Yesu ró ke li ndi thó ke djo. 33 Føro Yesu rangʉe fø ke na da ronga birobiro kʉ ná ndrŭ kpari kuso ro. Ndirigoti Yesu lingʉe ndi thó ke bɨ na ndirigoti b’lo ndi hwi sadda nari goti Yesu løngʉe ke dà ronga. 34 Føri goti ke ngbengʉe ndi nyǒ røna, ro b’lo ke dda ndi he bbo nari goti ke pongʉeri: “Efata,” føri na mana kʉ, “Awe ni tso.” 35 Føro thei ke bɨ rrngʉe nga, ke da maddi klongʉeni klo ndirigoti ke ngangʉe lo tidha tso bblo. 36 Føro ke jangʉeri kpa dho nzɨ kpa d’a fø lo ronga ro ddikpa le dho maddi, ro ri ke ngʉ gʉ nari bbai i ndrŭ ngʉ ri nanga ma pli. 37 Bbʉbbʉ dhé, ndrŭ nanga kengʉeni bbo nari dho ndrŭ ngʉ ripo: “Ke nji ná lo krʉ kʉ bblo. Ke rili nzɨ bɨ ngarr ná ndrŭ rrnga ndirigoti nzɨ tso loti ná ndrŭ tilo.”