Filipi

4 Ji ma ji ná le-djoi ndirigoti bbo d’yu ma hwi ná ndrŭ, ni kʉ madzá hwè ndirigoti kpakpanga na ma nji ná njí kobe bbai. Ma rija ni tøni chi Bboke dho, madzá bbo ma ji ná ndrŭ.

2 Ma rija Eudia dho ndirigoti ma rija Sentike dho kpa si ndima kana kʉ ná lo* Bboke dyø ná ndrŭ bbai. 3 Føri kina, ma rinzi ma lai chi tøni ná njí dhi ke ni tso, ako fø isɨ ndrŭ tsotso. Bbʉbbʉ dhé, fø isɨ ndrŭ ma, Klema ma, ma lai njí dhi nja ndrŭ ma na ko njie njí ddinga* ndiro hwè lo-i rá anzi d’e. Fø ndrŭ krʉ ró dho ndini shinga dhi buku nǎ.

4 Krʉ ddo ró aninji hwè Bboke nǎ, ma ri ki po godhé aninji hwè. 5 Anibbari krʉ kʉ ná ndrŭ churi nari kʉ, ni nzɨ adi tøni ni ji ná lo djo dhé ri. Bboke si ná ddo kʉ chøchø. 6 Nzɨ ni bbari ddikpa lo ma d’o ni nanga ro ddi. Føri rɨngana, krʉ ddo ró anidi nganzi Mungu tso, anidi ddo nǎ le ddoni ná sala nji ndiro ke ddá chutso ni dho krʉ kʉ ná lo kana d’e, ndirigoti anidi mbai po ke dho. 7 Njati ni njiri fø ró, Mungu dhó dada ngbà le ka le famu ná nga djolu da ná ngoi si ni thí ma, nidhó ngaddidha ma na ronga b’o, Kristo Yesu ni dyø nari kana.

8 Lo tso dyadha dho, le-djoi anili nidhó ngaddidha* bbʉbbʉ kʉ ná lo ma, d’ad’ani ná lo ma, chø kʉ ná lo ma, tsetse ná lo ma, thothonga ná lo ma, bblolo le ka le ti djo ná lo ma, bblo nyi dhi ri kʉ ná lo ma, ma le ka le má ná lo ma na djo. 9 Li ni li ni d’yu ro, anidyø ma ddie ni dho ná lo ma, madhó ro ni ue ná lo ma, ni rr e ná lo ma, ni njae ná lo ma na ndirigoti ngoi dhi Mungu sie ni na.

10 Ma kʉ hwè na bbo ndirigoti ma adi mbai po Bboke dho, ni nga ma djo ni ngaddi nari dhodha tso ki vi nari dho. Nì mai ni e ngaddi ma djo ro, ri ni dho ná chu i nga e ri. 11 Ma nzɨ føri po ma rɨ ritsi ró nari dho ri, dhonalo krʉ kʉ ná lo kana ma nanga adi jini madhó bani ná ritsi dho. 12 Ma chuni sese ritsi kʉ le dhó nari ma, bí ritsi kʉ le dhó nari ma na na chu. Ma chu ngbaribbai ma ma ka ma vú ma krʉ kʉ ná hali na nari chu, ma o lɨlɨ ma inga ma é ù na ma, madhó ritsi é bí ma, inga ma rɨrɨ ma ró. 13 Krʉ kʉ ná lo kana ma adi kpakpanga ba klø adi bbʉ ma dho ná ke dhó ro.

14 Ro, madzá nzadha kana ni ko ma tsotso ná føri na ni njiri bblo. 15 Bbʉbbʉ dhé Filipi nǎ ndrŭ, ni churi chu Makedonia nǎ ro ma rangʉe hwè lo-i ni rrngʉe ya kwanza ná saa na ro, ni dhé ngʉe ma tsotso kongʉe ná kutaniko. 16 Tesalonike nǎ ma ngʉe ná saa na, ni chongʉe ma dhó lo u ná ritsi ma dho, nga ddikpa ina dhé ri, ro aro ina. 17 Ma nzɨ rine ni bbʉ ritsi ma dho ri, ro ma riji ni ba ritsi le bbʉ nari nǎ ro adi si ná lekobe. 18 Madhó kʉ madhó lo u ná ritsi nì, ri kʉ madhó lo u ná nga djolu ma krʉ ddi. Epafrodito djó ni choe ná ritsi ma ba nari goti madhó lo krʉ tso gbani gba. Fø bbʉdha kʉ ddiddi djuu ngø ná ritsi bbai, u ndi tso uni Mungu na ro. 19 Ndi lai djó ro, ndidhó kadha dhi mali chulu, madzá Mungu si nidhó lo u ná ritsi bbʉ ni dho krʉ Kristo Yesu chulu. 20 Kodhi Mungu ndirigoti kodhi Baba mani* cho ró nŭnŭnga dho. Amina.

21 Anizʉ Mungu dzá watakatifu krʉ ronga, Kristo Yesu na ndima gba ndima tso ro. Ko kʉ na iga ná le-djoi ma cho ndima dhó zʉdha ddi ni dho. 22 Iga kʉ ná watakatifu krʉ, ro bbo pli Kaisari bbá dza nǎ ndrŭ cho ndima dhó zʉdha ni dho.

23 Bboke Yesu Kristo dzá nzá tso ka ndi koe le djo ná zølo é ni na, bblo kʉ ná fø lethí ni dhǒ nari kana.